Nganga'a dhu dhèu pake ropa sogo-tagu nidhu
(Lole Hari J'ara-j'ara Mamuri 4:35,39; 6:4)
8
Ja'a neo lole lula-nèti sisi dhu dhèu pake sogo-tagu nidhu. Èdhi aa'i-aa'i ti dhu te'a ae le j'ara se'e. Dhu j'aj'i mi lii langu, ka ladhe dhèu ne'a ae, na, nèngu bisa nged'e, te na pangee, na, nèngu d'èlu-mèu risi nèti dhèu leo sèra. De be'a risi, èdhi mamuri dènge pasue di. Te j'ara pasue ne'e ka tao dhèu aa'i-aa'i asa tabha èra ètu d'ara parcaya ra.2 Ladhe abhu dhèu dhu pangee, na, ne'a mèu, èèna peka na, mamèu nèngu dhae d'ai mèka. 3 Te ngaa ladhe abhu dhèu dhu sue Ama Lamatua, tatu Lamatua tadhe ne. Ne'e ka dhu lèke mola-mola.
4 De ladhe dhèu na'a sisi dhu sogo-tagu le mi nidhu, èdhi aa'i-aa'i te'a, na, nèngu dhoka pahaha iisi mi mèdha sogo-tagu ètu rai-haha di, te ngaa pahaha boe iisi mi Lamatua dhu lèke. Te èdhi te'a, na, “Abhu dhoka Ama Lamatua èci di dhu lèke.” aa, “mèdha sogo-tagu aa'i-aa'i dhu dhèu sogo-tagu, dènge boe kab'ua.” 5 Abhu mèdha ae-ae ètu dedha-liru dènge rai-haha ne, dhu dhèu peka, na, ‘lamatua rèngu’ do aad'o na, ‘kètu rèngu’.
6 Te ngaa bagi èdhi, Ama Lamatua dhoka èci di.
Nèngu èèna, Ama èdhi.
Aa'i-aa'i ra j'aj'i nèti Nèngu.
Aa'i-aa'i dhu èdhi tao hia mi Nèngu.
Aa Kètu èdhi dhoka èci di,
nuka Yesus Kristus.
Ama Lamatua pake Yesus,
lod'o Na paj'aj'i aa'i-aa'i.
Aa èdhi mamuri,
lula Yesus ka dhu hia èdhi.
7 Te ngaa abhu dhèu dhu re'a boe j'ara se'e. Rèngu loe boe pangee mèdha sogo-tagu sèra, hèia ngangee rèngu èci èèna ka dènge ngangee rèngu uru sèra. Nèti èèna ka, ropa ra'a sisi dhu sogo-tagu nidhu, rèngu pangee, na, “Nganga'a ne j'aj'i le korban ho pake sogo-tagu nidhu! Ladhe ja'a ku'a mèdha ne'e, na, ja'a pa'èki era dènge j'ara-j'ara dhu bhelu!” De ne'e ne ka dhu pa'ele iie ngangee rèngu, toke rèngu bisa heka unu ngangee madhera, lula d'ara rèngu èra boe. 8 Nga tao ka sèmi èèna? Nganga'a bisa boe nèti èdhi asa madha Ama Lamatua, si? Ladhe ta'a boe, èdhi asa boe bhelu, sina ma? Aa ladhe ta'a, tao boe èdhi j'aj'i dhèu be'a, si?
9 Te ngaa mage-mage! Masi ka èu dènge hak sèna ka ad'u-ue madha j'ara èci, tatu boe j'ara ne nèti babe'a hia èu. Ladhe sèmi abhu a'ari ca dhèu dhu parcaya èra boe, ladhe nèdhi èu tao j'ara èèna, hèia na manahu, na, èèna be'a boe! 10 Èu dhu me'a le, j'ara ne j'aj'i boe mi ngaa èci sa. Te ngaa ladhe a'ari dhèu parcaya dhu d'ara na èra boe, ladhe nèdhi èu mu'a ètu d'ara èmu sogo-tagu, na pangee sèmi ngaa? Tatu na pangee, na, “Ladhe ja'a ku'a nganga'a sogo-tagu èèna, ngaa-ngaa tao boe, masi ka nganga'a èèna ra pae'a le nidhu.” 11 Èu me'a le j'ara ae-ae. Te ngaa ladhe èu tao sèmi èèna, èu asa paroe d'ara dhèu dhu èra mèka. Aa te ngaa dhèu èèna, a'ari èu dhèu parcaya. Kristus madhe hia nèngu kahèi! 12 Hua iia pangee sèmi ne'e: ladhe a'ari èu dhu d'ara èra mèka ad'u-ue j'ara èci dhu madhutu ngangee rèngu sala lula tatao èu, na, èu tao le sasala hia rèngu. Aa èu tao sasala mi Kristus kahèi. 13 De ladhe ja'a ku'a nganga'a dhu tao a'ari ja'a dhèu parcaya manahu asa d'ara sasala, be'a risi ja'a baku ku'a sisi sèmi sèra, toke d'ai ja'a madhe. Te ja'a ko'o boe rèngu manahu asa d'ara sasala.