2 Sèmi ne'e: lula abhu lod'o taleo ae, dhu dhèu bisa manahu asa d'ara tatao dhu sala ètu d'ara pa'èci mone dènge bhèni, nèti èèna ka be'a risi dhèu mone èci hud'i dènge ku dhèu èmu nèngu mesa na. Sèmi èèna kahèi, dhèu bhèni hud'i pa'èci ku dènge dhèu èmu nèngu mesa na.

3 Mone dhu dènge le dhèu èmu! Mage mo'o boe j'unu pa'èci dènge dhèu èmu èu. Aa dhèu bhèni dhu dènge le dhèu èmu! Mage mo'o boe j'unu pa'èci dènge dhèu èmu èu. 4 Te bhèni dhu leo le èmu, hia le ngi'u na sèna ka j'aj'i unu dhèu èmu na. Aa mone dhu leo le èmu, hia le ngi'u na ho j'aj'i unu dhèu èmu na. 5 De miu baku patula-pajuku, lula dua-dua mi dhu dènge hak hua! Te ngaa ladhe miu neo sabaj'a di, ho mo'o boe ngee j'ara dhu leo-leo, na, j'unu pa'èci boe d'ara ciki oo'e èèna ka, ngaa-ngaa tao boe. Sad'i dua mi mere lii èci ku. Aa ladhe sabaj'a mere, na, be'a risi pakaboko hari dènge ka. Te ladhe aad'o, na, bisa j'aj'i be'a boe! Te dhèu aae nidhu bisa dadugu-rariu dhèu dhu taha rare boe d'ara. 6 J'ara ne mai nèti a'abhu ja'a di, nèti boe atora Lamatua. 7 Madhutu ngangee ja'a, be'a risi dhèu baku leo-èmu, nuka sèmi ja'a dhu dènge boe dhèu èmu. Te ngaa Ama Lamatua hia dhèu karunya pamèci dènge nèngu. Nèti èèna ka, abhu dhèu dhu Ama Lamatua hia si leo-èmu, aa abhu cahag'e dhu Na hia si leo boe èmu.

8 Ja'a neo peka dènge dhèu mone do dhèu bhèni dhu leo mèka èmu, aa dènge bhèni balu, na, be'a risi miu baku leo-èmu, nuka sèmi ja'a ne. 9 Te ngaa ladhe taha mere boe, hua iia leo èmu ka. Dhu hua iia risi ladhe dhèu leo-èmu, te aad'o na, dad'èi d'ara na pa'ele iie ngi'u nèngu unu na.

10 Ne'e ne mai boe nèti ngangee ja'a mesa ku. Te ja'a neo peka ngaa dhu Lamatua èdhi paredha le mi dhèu dhu leo le èmu, na, bhèni bisa boe pa'ia-pa'ela dènge dhèu èmu-kamali na. 11 Te ngaa ladhe nèngu tèke eele dhèu èmu na, be'a risi leo ia ka èmu. Hua iia nèngu la'e padame dènge mone dhu j'aj'i dhèu èmu na. Sèmi èèna kahèi mone, bisa boe pa'ia-pa'ela dènge dhèu èmu-kamali na.^a

12 Ne'e ne madhutu ngangee ja'a, mai boe nèti Lamatua èdhi. Aa mi dhèu leo, ja'a neo padhai lii sèmi ne'e: ladhe abhu mone dhèu sarani dhu dhèu èmu na parcaya boe Kristus, na, baku ia eele ne, ladhe dhèu èmu na neo mamuri taruu dènge nèngu. 13 Sèmi èèna kahèi, dènge bhèni dhu dhèu èmu na parcaya boe Kristus, na, baku ia eele ne, ladhe mone ne d'èi era sèna ka dua ra mamuri pa'èci taruu. 14 Te mone dhu parcaya boe Kristus, bisa mola-mèci, lula nèngu dhu pa'èki le dènge bhèni dhu j'aj'i dhèu èmu na. Aa bhèni dhu parcaya boe Kristus, bisa j'aj'i mola-mèci kahèi, lula nèngu dhu pa'èki dènge mone dhu j'aj'i dhèu èmu na. Te ladhe aad'o, na, ana-ana rèngu bisa boe mola-mèci. Te ngaa dènge j'ara ne, rèngu bisa mola-mèci ètu madha Ama Lamatua. 15 Te ngaa ladhe dhèu bhèni do dhèu mone dhu parcaya boe Kristus, dhu la'e tèke eele dhèu èmu-kamali na dhu parcaya, na hud'i nèngu sène. Ka dhèu èmu dhu parcaya, pa'èki heka dènge ne. Te Ama Lamatua paroa miu sèna ka j'aj'i dhèu unu Na, ho miu mamuri padame èci dènge èci. 16 Dhèu bhèni dhu parcaya, dhu leo le èmu aa'i-aa'i! Ele boe miu bisa hia mamuri mi dhèu èmu miu. Aa bisa aad'o kahèi. Sèmi èèna kahèi dhèu mone dhu parcaya dhu leo le èmu sèra! Ele boe miu bisa hia mamuri mi dhèu èmu miu. Aa bisa aad'o kahèi. Miu me'a iia mèka.

17 Masi ka sèmi èèna, te ngaa mamuri dhèu èci-èci tasa mera mia lod'o Ama Lamatua paroa nare miu j'aj'i dhèu unu Na, mamuri taruu sèmi èèna. Baku ub'a hari, te Ama Lamatua dhu ator nare le sèmi èèna. Ja'a aj'a-nori atora ne ètu juma'at aa'i-aa'i ra.

18 Conto, ladhe miu suna le sèna ka pad'elo, na, miu dhèu Yahudi, hèia lod'o limuri miu tadèngi Ama Lamatua paroa nare miu, na, baku pasili, peka na, miu suna le. Aa dhèu dhu dhae suna mèka ropa tadèngi Ama Lamatua paroa si, sèna ka j'aj'i dhèu unu Na, na, suna ia ka. Lula rèngu dhu j'aj'i le dhèu unu Lamatua. 19 Ladhe dhu suna le, èèna j'aj'i boe mi ngaa èci sa. Aa suna mèka èèna ka, ngaa-ngaa tao boe. Dhu dènge kab'ua ka, nuka èdhi madhutu lii paredha Ama Lamatua. 20 Lod'o Ama Lamatua hag'e nare miu j'aj'i dhèu unu Na, Lamatua pua boe miu suna, do baku suna. De hud'i ka laa sèmi èèna. Baku ub'a ia ka.

21 Ja'a hia hari conto èci. Ladhe èu j'aj'i ènu lod'o Ama Lamatua paroa èu, na, hud'i laa sèmi èèna, ngaa-ngaa tao boe. Te ngaa ladhe sèmi èu dhu ènu boe, na, hud'i laa! Ladhe bisa boe j'aj'i dhèu bebas, ngaa-ngaa tao boe kahèi. 22 Te ropa Lamatua paroa ca dhèu ènu j'aj'i dhèu unu Na, ènu ne j'aj'i le sèmi ca dhèu dhu bebas, dhu sab'a hia Lamatua na ètu sorga. Aa lod'o Ama Lamatua paroa ca dhèu bebas j'aj'i dhèu unu Na, dhèu ne j'aj'i ana pua-paleha Kristus. 23 Kristus tihe pama'ète nare le miu dènge kab'ua titu kèna! De miu baku j'aj'i ènu hia dhèu leo.

24 A'ari pasue aa'i-aa'i! Lod'o Ama Lamatua paroa nare miu j'aj'i dhèu unu Na, mamuri miu tasamia èèna ka, hud'i laa sèmi èèna. Baku ub'a ia ka. Hud'i laa sèmi èèna ka, hia mi Lamatua.

25 Miu karèi ja'a lula-nèti dhèu kalora iisi dhu j'unu pa'èci rèdhi mèka dènge dhèu èci sa. Ama Lamatua peka boe ngaa-ngaa dènge ja'a nèti j'ara èèna. Te ngaa miu bisa sèmi ngaa dhu ja'a peka-padhai, lula Ama Lamatua pad'elo rasa kasia mi ja'a. Madhutu a'abhu ja'a sèmi ne'e ka: 26 limuri ne èdhi abhu j'aj'èra rupa-rupa. De mamuri dhèu tasa mera mia èèna ka, hud'i laa sèmi èèna. Dad'èi ja'a sèmi ne'e ka: 27 ladhe èu pa'èki dènge dhèu èmu èu, na, baku ia eele ne. Ladhe èu dhu pa'èki heka dènge dhèu èmu èu, na, tenge ia ka bhèni leo, sèna ka leo ia ka èmu. 28 Te ngaa ladhe èu leo hari èmu, na, èu sala boe ngaa-ngaa. Aa ladhe bhèni dhu pa'èci rèdhi mèka dènge dhèu mone leo-èmu, nèngu ad'u-ue boe sasala ngaa-ngaa. Te ngaa sanèd'e, dhèu dhu paleo èmu, bèli-camèd'a paraga dènge j'aj'èra rupa-rupa ètu rai-haha ne. Dad'èi ja'a sèna ka miu baku susa sèmi èèna.

29 A'ari pasue aa'i-aa'i! Madhutu ngangee ja'a, nuka: lod'o oe èle rai-haha ne dètu ae le. De mone dhu dènge dhèu èmu, mage ladhe dhoka dhèu èmu nèngu di, te ngaa laladhe kahèi asa Lamatua. 30 Sèmi èèna kahèi, ladhe abhu dhu tangi, be'a risi pa'èra d'ara ho baku tangi, sèna ka laladhe asa Ama Lamatua. Ladhe abhu dhu karej'e-karae, be'a risi baku karej'e seli, te ngaa laladhe asa Ama Lamatua. Ladhe abhu dhu hèli ngaa-ngaa, be'a risi tao mamuri na nuka sèmi dhèu dhu dènge boe unu, sèna ka laladhe asa Ama Lamatua. 31 Ladhe abhu dhu pake mèdha-panyau nèti rai-haha ne, be'a risi tao ngi'u na, nuka sèmi dhèu dhu mamuri na dhu maena boe mi mèdha-panyau rai-haha ne, sèna ka na laladhe dhoka asa Ama Lamatua di. Lula j'ara mamuri rai-haha ne bèli-camèd'a ele.

32 Ja'a d'èi sèna ka miu baku pangee ae-ae. Te dhèu dhu leo boe èmu, lod'o nèngu ae ho na tao madhutu dad'èi Ama Lamatua. Sèna ka nèngu bisa tenge j'ara ho sab'a pakarej'e d'ara Lamatua. 33-34 Te ngaa dhèu dhu leo le èmu, hud'i taru kira dad'èi rai-haha ne. Nèngu kahèi hud'i taru kira ku mi dad'èi Ama Lamatua, te ngaa nèngu hud'i tenge j'ara ho pakarej'e d'ara dhèu èmu na kahèi. J'ara se'e se ka tao ngangee na j'aj'i mi kajari.

Sèmi èèna kahèi, bhèni dhu dènge heka dhèu èmu, aa bhèni kalora iisi. Rèngu taru kira dad'èi Ama Lamatua, sèna ka bisa mamuri mola-mèci ètu d'ara dènge ngi'u aae. Te ngaa bhèni dhu leo le èmu, d'ara na kajari. Nèngu taru kira ka mi dad'èi Lamatua, te ngaa na tenge j'ara ho pakarej'e d'ara dhèu èmu na kahèi. 35 Ja'a lole j'ara se'e, sèna ka nèti babe'a hia miu. Ja'a ko'o boe ho miu lèke sasii. Dad'èi ja'a ka, miu tao dhu lèke, aa tangare asa dad'èi Ama Lamatua, sèna ka ngangee miu baku kajari.

36 Ladhe dhèu mone dhu lii d'ai le bhèni dhu d'ai umur paleo èmu, na, hud'i laa ra paleo, ladhe mone ne d'èi heka pamata. Dènge j'ara sèmi èèna, rèngu tao boe j'ara sala. Te ladhe ra mate panèbhu, mage dhoka mone èèna taha nare boe d'ara, hèia nèngu tao j'ara dhu lèke boe. 37 Te ngaa ladhe mone ne bisa taha nare d'ara, nèngu baku laka-seti ho kab'i lai-lai. Te ne'a ngaa dhu nèngu neo tao. Masi ka nare nèbhu, dènge boe ngaa-ngaa. 38 De dhèu mone dhu leo dènge bhèni na, èèna be'a. Aa dhu leo boe èmu èèna, be'a risi hari.

39 Bhèni dhu leo le èmu, pa'èki toke madhe dènge dhèu èmu na. Te ngaa ladhe dhèu èmu na madhe, nèngu bisa leo hari dènge dhèu mone leo, sad'i mone ne dhèu dhu parcaya Kristus kahèi. 40 Madhutu a'abhu ja'a, be'a risi bhèni balu ne, leo ia ka èmu. Ja'a pangee, na, lii holo ne cèu nèti Roh Lamatua dhu ètu d'ara ja'a kahèi.