Kristus pua dhèu pajuu-paleha Na lasi asa mia-mia
4
De miu baku koa-kad'iri ji'i, te ji'i dhoka ana pua-paleha Kristus di. Aa Ama Lamatua lèka ji'i, sèna ka j'aga paie-iie j'ara-j'ara dhu uru èèna pahuni tèke. 2 Dhèu dhu madhenga mèdha-panyau lamatua na, nèngu hud'i j'aj'i ku dhèu dhu tao madhutu ngaa dhu lèke. 3 Tasamia dènge ja'a? Ja'a sab'e madhutu ngaa dhu lèke, do aad'o? Ja'a ko'o boe ke'a, miu nile ja'a tasa mera mia. Aa ja'a pusi-pahae boe kahèi dhèu leo nile ja'a sèmi ngaa sa. Ja'a ke'a boe nile ngi'u ja'a unu ku kahèi. 4 Te masi ka d'ara iiki ja'a peka na, ja'a be'a le, tatu boe sasoa na, ja'a be'a. Dhu mèci ka, Lamatua ka dhu nile ja'a tasa mera mia. 5 De miu baku tao ngi'u sèmi dhèu pama'ète lii langu ho nile dhèu leo sèra. Mate mamai hari Lamatua, te Nèngu ka dhu èèna na bhoke patalele aa'i mèu-mèu. Nèngu ka pasabhoka aa'i bhabhelu-katub'a dhu dhèu tao pahuni ètu d'ara maroga. Nèngu neo bhoke paled'a j'ara-j'ara dhu dhèu ngee ètu d'ara ra. Hèia Ama Lamatua neo peka aa'i j'ara-j'ara dhu be'a, dhu dhèu tao le.6 A'ari aa'i-aa'i! Ja'a dhu padhai lii lula-nèti ja'a dènge Apolos, nuka sèmi ja'a j'aj'i mi conto ho miu bisa aj'a nèti ji'i, nuka: Tao madhutu j'ara-j'ara dhu suri tèke ètu d'ara Sasuri Ama Lamatua. Baku tao dhu leo. Ladhe miu madhutu ka j'ara se'e, miu baku bia re èci sa, aa padedha iisi lula madhutu ca dhèu, aa pahahe dhèu leo. 7 De tasamia? Miu pangee, na, miu risi nèti dhèu leo, do? Baku! Te aa'i-aa'i dhu miu unu, miu abhu nèti Ama Lamatua. De ladhe sèmi èèna, nga tao ka miu nged'e ej'a ai, nuka sèmi miu ad'u-ue unu mi? 8 Nuka sèmi aa'i-aa'i dhu miu parluu, miu abhu le. Nuka sèmi miu kaja le! Miu tao ngi'u mi, èci èèna ka dènge dhèu kapai sama sèmi dhèu aae sa, aa ji'i soru-bara boe ciki sa. Madhutu iia-iia na, Lamatua ka dhu hia aa'i-aa'i dhu miu parluu. Te ngaa ladhe miu tare'a-re'a j'aj'i dhèu aae, ele boe ji'i ngèd'u paredha sama-sama dènge miu, si?
9 Ama Lamatua ka dhu pua-paleha ji'i, ho la'a asa mia-mia ètu rai-haha ne, sèna ka lole dènge dhèu j'ara-j'ara Kristus. Te ngaa ca tèka-ca tèka sa ja'a pangee, na, Lamatua pua ji'i titu re limuri tèka, sama sèmi ana bèdho dhu tatae abhu huku madhe. Hèia Na hia dhèu aa'i-aa'i ètu rai-haha ne, aa dènge ana-ana pajuu Na ètu sorga mai laladhe ji'i. 10 Miu kapai titu kèna, nga! Te abhu dhèu dhu pangee, na, miu d'èlu-mèu, lula pa'èki dènge Kristus. Te ngaa rèngu pangee, na, ji'i goa titu kèna, lula ji'i j'aj'i dhèu unu Kristus. Ele boe rèngu ngee, na, miu èra risi, aa ji'i se roe aala-aala. Ele boe ra ded'e miu padedha-dedha, te ngaa ro'o boe pusi-pahae ji'i ciki sa hèi. Seli-kolane, nga! 11 Toke d'ai deo ne'e, ji'i manganga dènge koko-kamango. Mèdha-papake ji'i kaha'i-kaheru. Dhèu loe boe game ji'i. Ji'i nuka sèmi dhèu dhu dènge boe era pea. 12 Ji'i sab'a dènge kacui-aai ji'i unu mi toke d'ai èi kabhèsu hae. Ladhe dhèu padhai-kakoli ji'i, ji'i dhoka b'ala, peka na, “Ji'i manèngi, sèna ka Ama Lamatua tao j'ara-j'ara dhu be'a hia miu.” Ladhe dhèu paj'èra ji'i, na, ji'i b'ala boe, dhoka mau-mau di.a 13 Ladhe dhèu padhai pa'ele iie kolongara ji'i, ji'i dhoka dhaa dènge rèhu mare di. Masi ka sèmi èèna, te ngaa abhu dhèu dhu pangee, na, ji'i se nuka sèmi kaj'alu do mamumu dhu core eele.b
14 Ja'a suri j'ara se'e, neo boe pamakae miu. Te ngaa ja'a neo pasanèd'e miu, lula ja'a sue miu nuka sèmi ana matana ja'a sa. Nèti èèna ka, ja'a peka dènge miu, ho lèpa asa j'ara dhu mola. 15 Masi ka dhèu riho-riho dhu bisa pad'elo j'ara hia miu lula-nèti Kristus, te ngaa dhoka ja'a mesa ku dhu j'aj'i ama miu. Te ja'a ka dhèu uru j'ara dhu peka-padhai dènge miu Lii Lolo Be'a nèti Yesus Kristus. Nèti èèna ka, miu parcaya Ne. Ja'a tao j'ara èèna, lula ja'a dhu pa'èki mèno dènge Ne. 16 De ja'a manèngi, sèna ka miu madhutu j'ara mamuri ja'a ne.c
17 Nèti èèna ka ja'a pua Timotius dhiu soru-bara miu. Ja'a sue ne, sama sèmi ana matana ja'a. Ja'a lèka ne, te nèngu kahèi mamuri pa'èki dènge Lamatua èdhi. Èèna na nèngu soru-bara miu ho pasanèd'e miu nèti mamuri ja'a. J'ara mamuri ja'a sèmi èèna, lula ja'a pa'èki dènge Yesus Kristus, dhu Ama Lamatua hia mai. Èèna ka dhu ja'a aj'a-nori dènge dhèu sarani dhu pakaboko ètu mia-mia.
18 Abhu nèti miu dhu pangee, na, ja'a lake kore boe dhiu dènge miu. Nèti èèna ka rèngu nged'e titu kèna. 19 Te ngaa ladhe Lamatua èdhi d'èi, nèbhu boe ja'a d'ai kota Korintus. Ho èèna na ja'a ke'a mèu, na, dhèu sèra padhai lii padedha iisi, do, rèngu tare'a dènge koasa! 20 Te Ama Lamatua èèna Dhèu Aae dhu unu koasa. Ka dhèu Nèngu hèb'a mènyi boe, ho pa'èra dhèu ètu d'ara lalèka ra, te ngaa rèngu pake koasa dhu lèke. 21 De dad'èi miu tasamia? Ladhe ja'a dhiu, na, ja'a tao lii sakaa aa huku miu? Do, ja'a dhiu pad'elo sasue dènge d'ara be'a?