Dhèu parcaya hud'i sab'a d'ara èci hia Lamatua, aa baku patao-palaha
3
A'ari pasue aa'i-aa'i! Lod'o ja'a ètu èèna era, miu nuka sèmi dhèu dhu dhae pa'èki èra mèka dènge Roh Lamatua. Lula miu madhutu dhodhoka dad'èi d'ara miu dhoo-dhoo di, èci èèna ka dènge dhèu rai-haha dhu leo sèra. Nèti èèna ka, ja'a bisa boe padhai lii dènge miu, nuka sèmi padhai lii dènge dhèu ee'a, te miu nuka sèmi ana iiki sa. 2 Ja'a hud'i aj'a miu j'ara-j'ara dhu carui boe, lula miu bisa mèka sèmi mere j'ara dhu carui, nuka sèmi ana iiki dhu bisa mèka ra'a sisi. Miu hud'i kadhii ku, sama sèmi dhèu ee'a dhu tema ra'a sisi. Te ngaa limuri ne, miu nuka sèmi ana rara iisi hiu era, dhu me'a dhoka minu susu di.a 3 Lula ngangee miu cakaraa dhèu dhu neo dhoka madhutu dad'èi d'ara di. Ladhe abhu dhèu dhu risi nèti miu, miu tèka d'ara aa patao-palaha leli! Nèti èèna ka, ja'a peka na, miu me'a dhoka madhutu dad'èi miu dhoo-dhoo. De sèmi èèna na, miu sama sèmi dhèu leo ètu rai-haha ne. 4 Lula miu cahag'e peka na, “Ja'a ne, re Paulus!” Aa cahag'e dhu peka na, “Ja'a ne, re Apolos!” Lod'o-lod'o miu padhai lii sèmi èèna, miu pad'elo, na, miu èci èèna ka dènge dhèu leo ètu rai-haha ne.bMiu nuka sèmi oka
5 Madhutu iia-iia na, Apolos èèna, cee? Aa ja'a, Paulus ne, cee? Te ji'i dua mi se, dhoka ana pua-paleha di. Ji'i dhoka pad'elo j'ara ho miu bisa parcaya Kristus. Apolos pakako sasab'a madhutu paredha Kètu èdhi. Aa ja'a sèmi èèna kahèi! 6 Ja'a ka dhu uru tèka lole dènge miu lula-nèti Kristus. Èèna nuka sèmi ja'a ka dhu sèle hini. Hèia Apolos mai aj'a-nori miu. Èèna nuka sèmi nèngu ka dhu bui-tatee hini dhu ja'a sèle kore sèra. Te ngaa Ama Lamatua ka dhu tao hini sèra muri j'aj'i kapai aae.c
7 De dhèu dhu sèle hini sèra dènge boe kab'ua. Sèmi èèna kahèi dènge dhèu dhu bui. Dhodhoka èci di dhu dènge kab'ua, nuka Ama Lamatua. Lula Nèngu ka tao hini sèra muri, ka sub'u dènge sega. 8 Dhèu dhu sèle, aa dhèu dhu bui-tatee, sab'a sama-sama, te sasab'a rèngu èci èèna ka. Aa dhèu aa'i-aa'i dhu pakako sasab'a Lamatua, bèli-camèd'a Na b'ae rui-j'aj'èra ra. 9a Te ji'i sama-sama dhèu sab'a nèti Lamatua. Aa miu nuka sèmi oka Lamatua, dhu Nèngu neo uri.
Miu nuka sèmi èmu
9b Sèmi èèna kahèi, miu nuka sèmi èmu dhu Ama Lamatua patitu. 10 De Lamatua pad'elo le d'ara hua iia Na mi ja'a. Nèti èèna ka ja'a sama sèmi dholu. Ka Lamatua soru-bara ja'a ho ke'a mèu j'ara-j'ara nèti kapua, sèna ka ja'a tao era padhèdi dhu èra ètu d'ara mamuri miu. Hèia dhèu leo aj'a-nori miu kahèi, ho rèngu patitu mi era padhèdi dhu ja'a tao kore èèna. Te ngaa tuka èci-èci hud'i sab'a ku dènge d'ara kateme, ho rèngu patitu èmu dhu èra. 11 Era padhèdi dhu èra èèna, abhu le. Nuka Yesus Kristus. Nèti èèna ka, dhèu leo bisa boe tao era padhèdi leo ètu d'ara miu, te Lamatua dhu tao tèke le era padhèdi dhu lèke.
12 Tatu abhu dhèu dhu neo patitu kahèi ètu era padhèdi èèna pake rupa-rupa nèu. Abhu dhu neo pake nèu dhu kab'ua, sèmi hualaa, doi pudhi do hadhu kale'e. Abhu dhu pake nèu biasa, nuka sèmi aj'u, j'u'u do rèu hidhu. 13 Te ngaa sasab'a tuka èci-èci ka bisa te'a, aa dhèu aa'i-aa'i ra bisa re'a sasab'a rèngu èèna, be'a do aad'o. Te lod'o èle rai-haha, Lamatua neo sèku ne, sama sèmi Na pake ai ho pad'elo, na, sasab'a dhèu sèra, bisa taha do aad'o. 14 Ladhe uji nare sasab'a nèti ca dhèu pake ai, aa nèu dhu na pake bisa taha, bèli-camèd'a Lamatua b'ae rui-j'aj'èra na ètu sorga. 15 Te ngaa ladhe uji nare sasab'a dhèu pake ai, aa ai na'e aa'i nèu dhu nèngu pake patitu ètu era padhèdi èèna, na, Lamatua hia boe dhèu ne ngaa-ngaa. Te ngaa tuka ne abhu mamuri era, masi ka sèmi dhèu dhu rai kalua nèti d'ara èmu ai na'e.
Miu sama sèmi èmu sabaj'a unu Lamatua
16 Miu hud'i me'a ku, dhu peka na, miu sama sèmi èmu sabaj'a Lamatua, aa Roh Na dhu pea ètu d'ara.d 17 Aa ladhe abhu dhèu dhu pa'ele iie èmu sabaj'a Lamatua, nuka era pea Na, na mage-mage! Bèli-camèd'a Lamatua pa'ele iie ne kahèi! Te èmu sabaj'a Lamatua èèna mola-mèci. De miu hud'i mola-mèci ku kahèi.
18 Miu baku tipu ngi'u miu unu mi! Ladhe abhu ca dhèu dhu pangee, na, nèngu d'èlu-mèu aa ne'a aa'i madhutu mamèu dhèu ètu rai-haha lod'o limuri ne, èèna peka na, nèngu ne'a boe ngaa-ngaa èci sa. Ladhe èu mase'a le, peka na, èu me'a boe ngaa-ngaa èci sa, heka èu mulai me'a kèna. 19 Ngangee dhèu ètu rai-haha taa limuri ne, Ama Lamatua peka na, goa. Te ètu d'ara Sasuri Mola-Mèci dhu suri tèke, peka na:
“Abhu dhèu dhu pangee, na, nèngu d'èlu-mèu,
te ngaa èèna na Lamatua pake hari ngangee na dhu karehe sèra,
j'aj'i mi sasii, ho sii pa'ele iie hari nèngu!”e
20 Ètu era leo dhu suri kahèi, peka na,
“Lamatua èdhi dhu ne'a le ngaa dhu dhèu d'èlu-mèu sèra pangee,
aa dhèu dhu hud'i re'a ku neo tao ne tasa mere mia,
Nèngu dhu ne'a nare le, na, rèngu dhoka ngee iia d'ara di.”f
21-22 De miu baku padedha dhèu èci sa, dhu peka na, nèngu èèna lènge aa'i dhèu. Te Lamatua ka dhu ded'e dhèu, ho ator miu. Aa'i-aa'i sèra j'aj'i le unu miu. De dhèu dhu ator miu sèra, sama sèmi: ja'a, Apolos, dènge Petrus,g ji'i se j'aj'i unu miu. Aa aa'i-aa'i ètu rai-haha ne unu miu kahèi, masi ka miu mamuri do miu madhe, masi ka deo ne'e do lod'o dhu mai, aa'i-aa'i j'aj'i unu miu kateme aae. 23 Aa miu j'aj'i dhèu unu Kristus. Aa Kristus unu Ama Lamatua!