Èdhi hud'i lole paled'a-led'a ku mi dhèu aa'i-aa'i, mamadhe Lamatua Yesus ètu aj'u palolo-palèbha
2
A'ari pasue aa'i-aa'i! Uru èèna, lod'o ja'a dhiu asa miu, ja'a bhoke paled'a j'ara-j'ara Lamatua dhu uru èèna dhèu rai-haha ne re'a mèka. Te ngaa ja'a kèti boe lii sèra ho padedha iisi. Aa ja'a padhai boe pake lii dhu carui, sèna ka pad'elo mamèu ja'a unu ku. 2 Lod'o ja'a bera-bera dènge miu, ja'a pangee sèmi ne'e ka: ja'a pad'elo dhoka ca j'ara di, nuka Yesus Kristus. Nèngu ne, Dhèu dhu Ama Lamatua pajaji mema karèi nèti uru ka, ho hia mai. Te ngaa ropa Yesus mai, dhèu paku pamadhe Ne ètu aj'u palolo-palèbha. Dhoka j'ara ne'e di, dhu ja'a ke'a mèu.3 Uru èèna, lod'o ja'a bera-bera dènge miu, ja'a rasa mamèu ja'a d'ai boe, aa ja'a madha'u ka isi karèbha.a 4 J'ara lii padhai ja'a, aa ngaa dhu ja'a lole, mud'a di. Te ja'a ko'o boe pake lii dhu karisi sèna ka pamako miu. Aad'o! Te ngaa ropa ja'a peka-padhai, na, lii padhai ja'a j'aj'i led'a, lula Roh Lamatua dhu Mola-Mèci ka dhu ator ja'a, aa koasa Na sab'a ètu ja'a kahèi. 5 Te ja'a pangee, na, be'a boe ladhe miu parcaya Ama Lamatua, lula miu nanene lii padhai dhèu d'èlu-mèu di. Dhu be'a risi, ladhe miu parcaya Lamatua, lula Na pad'elo koasa Na mi dedha miu.
Ama Lamatua aj'a-nori èdhi j'ara-j'ara mamèu dhu lèke
6 Aa te ngaa, ladhe ji'i padhai lii dènge dhèu dhu parcaya èra le, ji'i aj'a rèngu pake lii padhai dhu dhèu bisa re'a mèu. Te ngaa dhu re'a mèu èèna, madhutu boe ngangee dhèu ètu rai-haha ne, do, madhutu ngaa dhu dhèu paredha sèra aj'a limuri ne. Te sèra sa, bèli-camèd'a ele iie aa'i si. 7 Te ngaa ji'i aj'a dhoka j'ara mamèu dhu mai nèti Ama Lamatua. Lula uru-uru sèra, lod'o rai-haha j'aj'i mèka, Lamatua pahuni j'ara sèra. Te ngaa limuri ne, Nèngu pama'ète le, sèna ka neo bhoke patalele lii pahuni èèna hia èdhi, ho èdhi kahèi abhu pala ètu d'ara kolongara Na dhu kapai risi eele. 8 Te ngaa dhèu paredha limuri ne, re'a mèu iia boe mamèu Lamatua. Te ladhe re'a tare'a, tatu ra paku pamadhe boe Kètu èdhi dhu dedha risi èèna, ètu aj'u palolo-palèbha.
9 Ètu d'ara sasuri Mola-Mèci Ama Lamatua dhu suri lula-nèti rahasia Lamatua dhu uru èèna pahuni tèke, peka na,
“Abhu j'ara dhu dhèu rai-haha dhae rèdhi mèka dènge musi madha ra,
aa abhu j'ara dhu dhèu rai-haha dhae tadèngi rèdhi mèka dènge ro'a dhilu ra,
dhu dhèu rai-haha bisa ngee rèdhi boe.
Aa te ngaa, madhutu iia-iia na Lamatua sadia tèke le j'ara sèra aa'i-aa'i,
bagi mi dhèu dhu sue Nèngu.”b
10 Uru èèna, mema dhèu re'a boe j'ara sèra, te ngaa limuri ne Ama Lamatua pake Roh Na ho bhoke paled'a hia èdhi.
Roh Lamatua èèna ne'a aa'i mèu-mèu. Te Nèngu parisa toke lutu d'ara iiki Lamatua kahèi. 11 Èdhi èci-èci ka dènge roh ètu d'ara èdhi. Nèti èèna ka, èdhi dhèu rai-haha, èci-èci ka dènge ngangee aa tatao na. Aa abhu boe dhèu leo èci sa dhu ne'a mèu d'ara iiki èdhi, dhoka roh èdhi unu ti dhu ne'a. Sèmi èèna kahèi dènge Ama Lamatua. Abhu boe ca dhèu sa kahèi dhu ne'a d'ara iiki Lamatua. Dhoka Roh Nèngu mesa Na ka dhu ne'a mèu.
12 Èdhi dhu sèmi tare le Roh Lamatua, ka Nèngu ka dhu ator èdhi. Nèti èèna ka, èdhi madhutu boe ngangee dhèu ètu rai-haha ne. Lula Roh Lamatua ètu d'ara èdhi, nèti èèna ka èdhi tadhe aa'i j'ara dhu be'a, dhu Nèngu tao le hia èdhi.
13 J'ara sèra ka dhu èdhi tema padhue-padhai. Te ji'i lole j'ara-j'ara dhu Roh Lamatua aj'a-nori ji'i. Ka ji'i se aj'a boe pake lii dhu nèti mamèu madhutu a'abhu dhèu rai-haha. Te ngaa ji'i aj'a-nori pake lii dhu mai nèti Roh Lamatua mi dhèu dhu tadhe Nèngu. 14 Te ngaa ladhe abhu dhèu dhu tadhe boe Roh Lamatua, ropa na nanene lii padhai ji'i, nèngu d'èi boe sèmi. Lula nèngu ngee, na, “Ngaa kèna? Maso boe d'ara kahadhu!” Aa te ngaa, masi ka tasamia èèna ka, dhèu ne bisa boe ne'a j'ara sèra, te nèngu dhu mamuri pa'èki boe dènge Roh Lamatua. 15 Dhèu dhu mamuri pa'èki dènge Roh Lamatua, heka re'a j'ara sèra aa'i-aa'i, aa bisa re'a mia ka dhu lèke. Te ngaa dhèu leo pajiko rare boe ngangee dhèu sèmi sèra. 16 Bisa tasamia? Te abhu dhu suri tèke ètu d'ara Sasuri Mola-Mèci Lamatua, peka na:
“Cee ka dhu bisa re'a ngangee Ama Lamatua?
Do, cee ka dhu bisa ator Lamatua,
ho Ama Lamatua tao madhutu lii holo-nori dhèu èèna?
Abhu boe ca dhèu sa!”c
Madhutu iia-iia na, èdhi te'a j'ara se'e, lula Kristus ka dhu soru-bara sèna ka èdhi bisa pangee madhutu ngangee Nèngu.