Paulus pa'adhu lii maho'o asa a'ari ètu Roma
16
Dènge sasuri ne'e, ja'a neo patadha miu dènge ana hèni èdhi Febe, aa manèngi ho miu sèmi mere ne. Nèngu ka dhu ra ded'e ho ladhe-leru juma'at ètu kota Kengkrea. 2 Ja'a manèngi ho miu sèmi mere ne dènge be'a. Tao dhu pantas mi nèngu, nuka sèmi hia dhèu sarani sèra, lula nèngu ne pa'èki dènge Kètu èdhi, Yesus Kristus. Ladhe na parluu ngaa, soru-bara ne. Te nèngu biasa soru-bara le ja'a dènge dhèu ae-ae, karèi nèti uru ka.3 Hia lii maho'o ja'a mi ana hèni èdhi, Priskilaa dènge dhèu èmu na, Akila. Ji'i ka dhu sama-sama pakako sasab'a ae-ae nèti Yesus Kristus.b 4 Dua ra oe madhe sad'i neo pamamuri ja'a. Te ngaa mesa boe ja'a di dhu manèngi makasi mi dua ra. Te dhèu Yahudi boe dhu j'aj'i le dhèu sarani, nèti juma'at aa'i-aa'i buli mia-mia, manèngi makasi kahèi, lula tatao ra dhu be'a.
5 Hia lii maho'o ja'a mi dhèu aa'i-aa'i dhu pakaboko ho manèngi-mangaj'i ètu d'ara èmu Priskila dènge Akila.
Hia lii maho'o ja'a mi angalai ja'a, Epenetus. Nèngu ka, dhèu uru tèka parcaya Kristus ètu propensi Asia.
6 Hia lii maho'o ja'a mi ana hèni èdhi, Maria. Nèngu dhu sab'a ne'a boe j'èra ètu talora aae miu.
7 Hia lii maho'o ja'a mi Andronikus dènge ana hèni èdhi, Yunia.c Dua ra dhèu Yahudi, sama sèmi ja'a kahèi. Dua ra parcaya uuru Kristus nèti ja'a. Uru èèna, rèngu sama-sama dènge ja'a ètu d'ara bèdho. Dua ra j'aj'i dhèu pajuu-paleha Lamatua, aa dhèu ae tadhe si.
8 Hia lii maho'o ja'a mi Ampliatus. Ja'a sue ne, lula nèngu dhu pa'èki dènge Kètu èdhi, Yesus Kristus.
9 Hia lii maho'o ja'a mi Urbanus. Nèngu kahèi pakako sasab'a Kristus sama-sama dènge èdhi.
Hia lii maho'o ja'a mi Stakis, dhu ja'a sue.
10 Hia lii maho'o ja'a mi Apeles. Masi ka nèngu lèke dadugu-rariu, te ngaa na segi ka nare li'u, lula lèka èra Kristus.
Hia lii maho'o mi a'ari aa'i-aa'i nèti Aristobulus.
11 Hia lii maho'o ja'a mi a'a Herodion. Nèngu dhèu Yahudi kahèi, sama sèmi ja'a.
Hia lii maho'o ja'a mi isi èmu Narkisus dhu parcaya Kristus.
12 Hia lii maho'o mi ana hèni èdhi, Trifena dènge Trifosa. Rèngu pakako kahèi sasab'a nèti Kètu èdhi, Yesus Kristus.
Hia lii maho'o mi angalai ja'a, ana hèni èdhi, Persis. Te nèngu kahèi sab'a bia hia Kètu èdhi, Yesus Kristus.
13 Hia lii maho'o mi Rufus. Kètu èdhi, Yesus Kristus ka dhu hag'e nare ne.
Hia lii maho'o mi ina na kahèi. Te nèngu ne, nuka sèmi ina d'èlu ja'a.d
14 Hia lii maho'o ja'a mi Asinkritus, Flegon, Hermes, Patrobas, Hermas dènge a'ari aa'i-aa'i dhu pea dènge rèngu.
15 Hia lii maho'o ja'a mi Filologus, ana hèni èdhi, Yulia, Olimpas, Nereus dènge ana hèni na, dènge dhèu-dhèu sarani aa'i dhu sama-sama dènge rèngu.
16 Ladhe miu pakaboko, na, mi pa'uu èci dènge èci, dhu pantas mi dhèu parcaya. Juma'at Kristus aa'i-aa'i ètu se'e, hia lii maho'o mi miu kahèi.e
Lii pasanèd'e nèti Paulus
17 A'ari aa'i-aa'i! Ja'a manèngi sèna ka miu mage-mage! J'aga paie-iie, te abhu dhèu dhu tao miu mae-manyèla, aa dhu neo sii pabèbhe miu. Ngaa dhu rèngu peka dènge miu sèra, palab'a dènge ngaa dhu ji'i aj'a-nori le miu. De baku pa'angalai dènge dhèu sèmi sèra! 18 Dhèu sèra sab'a boe hia Kètu èdhi, Yesus Kristus. Rèngu sèra dhoka sab'a ho pa'oto ngi'u rèngu unu ra. Dhèu sèra dhoka hèb'a mènyi mi dhèu dhu dhae re'a mèka mia ka dhu be'a, aa mia ka dhu karehe. Rèngu hèb'a mènyi ho kapod'e-kabèli dhèu.
19 Dhèu aa'i-aa'i dhu tadèngi le, na, miu loe boe madhutu dad'èi Lamatua. Nèti èèna ka d'ara ja'a karej'e titu kèna lula miu. Dad'èi ja'a ka, ladhe miu d'èlu-mèu ètu j'ara-j'ara be'a, aa baku pakihu kee dènge j'ara-j'ara karehe. 20 Ama Lamatua ka dhu bisa hia èdhi mamuri dame dènge mera-milu. Nèngu ka dhu èèna na palaho koasa nèti dhèu aae nidhu, aa pad'elo, peka na, miu ka dhu segi. Se'e se nèbhu heka j'aj'i. Ja'a sabaj'a, manèngi sèna ka Kètu èdhi, Yesus Kristus, pad'elo d'ara hua iia Na mi dedha miu.
21 Ari èdhi, Timotius, dhu sab'a sama-sama dènge ja'a, hia lii maho'o mi miu kahèi.
Lukius, Yason, dènge Sosipater, hia lii maho'o kahèi. Rèngu se dhèu Yahudi, èci èèna ka dènge ja'a.f
22 (Ja'a ne, Tertius, ka dhu suri sasuri ne'e madhutu ngaa dhu Paulus pua ja'a suri. Lii maho'o nèti ja'a, te ja'a ne dhèu unu Kètu èdhi, Yesus Kristus kahèi.)
23 Ja'a, Paulus, manubha ètu èmu Gayus. Dhèu sarani aa'i-aa'i tema pakaboko ètu èmu na ho manèngi-mangaj'i. Nèngu hia lii maho'o kahèi.
Erastus, dhu j'aj'i bendahara kota, dènge a'ari èdhi Kuartus, hia miu lii maho'o kahèi.g
24 [Ja'a manèngi, sèna ka Kètu èdhi, Yesus Kristus, pad'elo d'ara hua iia Na mi miu aa'i-aa'i mi! Lèke tare'a!]h
Ama Lamatua ne, kapai titu kèna!
25 Koa-kio mi Ama Lamatua! Te Nèngu ka dhu unu koasa, sèna ka tao miu j'aj'i èra. Lii Lolo Be'a Na peka sèmi èèna ka, aa ja'a aj'a-nori dhèu sèmi èèna kahèi, ropa ja'a peka dènge rèngu lula-nèti Yesus Kristus. Lamatua ka dhu bhoke paled'a hia mi èdhi j'ara aa'i-aa'i lula-nèti Kristus, dhu uru-uru sèra dhèu dhae re'a mèka, lula dhu pahuni era. 26 Te ngaa j'ara-j'ara dhu uru sèra dhèu rèti lii padhai Lamatua suri ètu Sasuri Mola-Mèci, limuri ne mèu aadha-aadha le. Ama Lamatua dhu madhe nèdhi boe, Nèngu ka ator sèna ka dhèu nèti suku aa'i-aa'i, re'a mèu madha j'ara dhu pahuni uru sèra. Dènge j'ara ne'e, dhèu sèra bisa parcaya Ne, aa tao madhutu dad'èi Na. 27 Dhodhoka Nèngu mesa-mesa Na di, Ama Lamatua. Dhodhoka Nèngu mesa-mesa Na, dhu ne'a aa'i mèu-mèu j'ara. Ja'a d'èi j'oka padedha-dedha Ne, lula tatao Yesus Kristus! Lèke tare'a!
Sasuri ja'a d'ai sange ne'e ka,
Saloom,
Paulus