Tenge j'ara ho pa'èra lalèka dhèu leo
15
Èdhi dhu parcaya èra, hud'i dènge d'ara maho'o ho bara dhèu dhu parcaya èra mèka, sèna ka rèngu taha ètu d'ara sasusa. Be'a boe, ladhe èdhi dhoka pakarej'e ngi'u èdhi mesa ti. 2 Madhutu a'abhu ja'a hud'i sèmi ne'e ku: èdhi èci-èci ka tenge j'ara, sèna ka tao dhu be'a hia a'ari èdhi dhèu sarani, ho parcaya ra asa tabha èra. Dènge j'ara ne'e, rèngu bisa karej'e dènge èdhi. 3 Te Yesus Kristus mesa Na, pakako boe sasab'a Na ho pakarej'e d'ara Nèngu unu Na, te ngaa Na neo pakarej'e d'ara Ama Lamatua kahèi. Èèna nuka sèmi dhu suri tèke ètu d'ara Sasuri Lamatua lula-nèti ngaa dhu bèli-camèd'a j'aj'i mi dedha Yesus, dhu peka na,“Lii pa-aape rèngu hia mi Èu,
noto mi dedha Ja'a kahèi.”a
4 Aa'i-aa'i dhu uru èèna dhèu suri ètu d'ara Sasuri Lamatua, sèna ka nori èdhi. Nèngu pad'elo j'ara sèna ka asa pa'èra èdhi, taha pa'èra-èra, aa Lii Holo-Nori Na pa'èra d'ara èdhi kahèi. Dènge j'ara sèmi èèna ka, èdhi bisa taha ètu d'ara tatae neo tèdhi Lamatua pad'elo d'ara hua iia Na mi èdhi.
5 Lamatua ka dhu hia dhèu a'èra, sèna ka ra bisa taha ètu d'ara j'aj'èra. Aa Nèngu ka dhu pa'èra d'ara èdhi kahèi. Ja'a sabaj'a, manèngi Lamatua pad'elo j'ara, ho miu mamuri d'ara èci madhutu dad'èi Yesus Kristus. 6 Te ladhe miu mamuri d'ara èci, miu bisa sama-sama koa-kio Ama Lamatua. Nèngu èèna, Ama nèti Kètu èdhi, Yesus Kristus.
Lii Lolo Be'a Lamatua hia mi dhèu Yahudi dènge dhèu Yahudi boe
7 De miu isi-aanga mi hud'i sèmi mere èci dènge èci, sama sèmi Kristus sèmi nare le miu. Te ladhe miu mamuri sèmi èèna, pe dhèu ae j'oka padedha-dedha kolongara Lamatua. 8 Ja'a peka sèmi ne'e: Kristus tao iisi Na nuka sèmi Ana pua-paleha, sèna ka hia dhèu Yahudi re'a mèu, peka na, Ama Lamatua padhai lii lèke mola-mola. Aa Kristus tao iisi Na nuka sèmi Ana pua-paleha kahèi, ho pamèci aa'i mèu ngaa-ngaa dhu Lamatua padhadha neo tao, hia mi bèi-baki èdhi sèra. 9 Dènge j'ara ne'e, dhèu Yahudi boe aa'i-aa'i koa-kio Ama Lamatua. Te rèngu re'a, na, Nèngu dhu rasa kasia mi èdhi aa'i-aa'i ti. Sèra nuka sèmi dhu Daud suri uru èèna ètu Sasuri Mola-Mèci, peka na,
“Nèti èèna ka, ja'a neo ded'e padedha-dedha kolongara Èu,
mi suku dhu leo sèra.
Ja'a neo sod'a lii koa-kio kolongara Èu
ètu katanga madha udhu rasa dhu leo sèra.”b
10 Ètu era leo, d'ara Sasuri Mola-Mèci suri kahèi, na,
“We! Miu dhèu leo rai kara dhu nèti rai leo.
Tao d'ara miu karej'e kea rae-rae,
palere-lere dènge dhèu unu Lamatua sèra.”c
11 Ètu era leo, d'ara Sasuri Mola-Mèci, Daud suri, peka na,
“Miu dhu nèti suku leo sèra.
Lami peka palème mi dhèu aa'i-aa'i lula-nèti dadedha Lamatua,
sèna ka rèngu koa-kio Kètu èdhi, Yesus Kristus kahèi.”d
12 Ètu era leo hari, d'ara Sasuri Mola-Mèci, Yesaya suri, peka na,
“Nèti dhèu aae Daud, ana Isai,
bèli-camèd'a cèu mai ana-èpu na ca dhèu.
Nèngu ka dhu nèd'u paredha mi suku leo sèra.
Rèngu dhu re'a le, naneo mamai Nèngu èèna.
Hèia rèngu mate tatae Ne,
te rèngu re'a mèu, na, Nèngu ne, cee.”e
13 Ama Lamatua ka dhu j'aj'i mi kapua nèti aa'i-aa'i dhu èdhi sanao-maena. Ladhe miu parcaya Ne, Nèngu ka dhu pakarej'e d'ara miu aa pamau d'ara miu. Hud'i laa sèna ka koasa nèti Roh Lamatua dhu Mola-Mèci, tao miu asa me'a mèu lula-nèti ngaa dhu Nèngu neo tao.
Lamatua pua Paulus la'e peka-padhai Lii Lolo Be'a Na
14 A'ari aa'i-aa'i! Ja'a ke'a tare'a, na, d'ara miu pènu dènge madha j'ara-madha j'ara dhu be'a, j'ara ae-ae dhu miu me'a mèu le, aa me'a holo èci dènge èci. 15 Ja'a suri paled'a-led'a ètu d'ara sasuri ne'e, ho pasanèd'e miu catèka hari nèti rupa-rupa madha j'ara. Ja'a suri sèmi ne'e, lula Lamatua pad'elo d'ara hua iia Na mi ja'a, 16 ropa Na ded'e ja'a j'aj'i mi dhèu pajuu-paleha Yesus Kristus, ho laku peka-padhai Lii Lolo Be'a Nèngu asa dhèu Yahudi boe sèra. Ja'a pakako sasab'a ja'a èèna, nuka sèmi ama agama èci dhu neo pa'èra dhèu ae-ae dhu j'aj'i mi persembahan èci dhu pamaho'o d'ara Lamatua. Te Roh Lamatua dhu Mola-Mèci ka dhu tao si j'aj'i mola-mèci, sèna ka Ama Lamatua sèmi nare si.
17 Lula ja'a dhu pa'èki le dènge Yesus Kristus, nèti èèna ka ja'a bisa boti kètu ètu madha Ama Lamatua. 18 Ja'a bani boe padhai lii j'ara leo. Ja'a dhoka lole tatao dhu Kristus ad'u-ue, aa dènge j'ara sèmi ngaa Na pake ja'a. Limuri ne, abhu dhèu Yahudi boe dhu madhutu Kristus, lula Lamatua pake ja'a ho pad'elo j'ara pake lii padhai dènge tatao ja'a. 19 Kristus pangèd'u le mi ja'a koasa nèti Roh Lamatua, sèna ka bisa tao rupa-rupa tadha malaa. Na pangèd'u koasa èèna mi ja'a, sèna ka neo pad'elo, peka na, Kristus ne cee. Dènge j'ara ne'e, ja'a peka-padhai le aa'i-aa'i lula-nèti Lii Lolo Be'a Kristus dènge dhèu ètu mia-mia. Nèti èèna ka, ja'a lole nèti kota Yerusalem, pale-lème toke d'ai rai Ilirikum dètu dènge Italia. 20 Karèi nèti uru ka, ja'a dhu pangee, na, “Ja'a d'èi titu kèna lole lula-nèti Kristus mi dhèu-dhèu dhu tadèngi rèdhi mèka Lii Lolo Be'a Na!” Te ja'a d'èi boe aj'a-nori ètu era dhu dhèu leo aj'a le. 21 Ètu d'ara Sasuri Mola-Mèci Lamatua, dhu suri, peka na,
“Suku dhu tadèngi rèdhi mèka lula Lamatua,
rèngu sèra ka dhu bèli-camèd'a ladhe rèdhi Ne.
Dhèu dhu tadèngi rèdhi mèka ngaa-ngaa,
rèngu sèra ka dhu pe re'a mèu lula Nèngu.”f
Paulus nelu neo la'e asa kota Roma
22 Lula sasab'a ja'a ae sèmi èèna, ka lake kore mèka dhiu pa'asu-pareo dènge miu.g 23 Te ngaa limuri ne, sasab'a ja'a ètu ne'e èla aa'i le. Aa ja'a nelu nèbhu ae le pèri-pèri tèu kèna, dhiu paraga dènge miu. 24 De ladhe ja'a laku asa Spanyol, ja'a neo dhuli miu. Aa ladhe ja'a dhuli taha ètu era miu, miu bisa ogo ja'a kahèi laku asa Spanyol.
25 Te ngaa limuri ne ja'a neo laku uru asa Yerusalem, ho lalau-lalo'o dhèu parcaya Lamatua ètu nèi. 26 Te a'ari èdhi ètu propensi Makedonia dènge propensi Akaya, hia le doi kolete, sèna ka soru-bara dhèu dhu dènge boe ngaa-ngaa dhu parcaya Lamatua ètu Yerusalem.h 27 Rèngu neo tao sèmi ne'e, lula ra pangee, na, rèngu oe sèmi pakèlu sa, mi a'ari èdhi ètu Yerusalem. Te dhèu-dhèu nèti suku leo ètu mia-mia, rèngu abhu le j'ara hua iia kahèi dhu uru èèna Roh Lamatua hia le mi dhèu Yahudi sèra. De lèke mola-mola ladhe dhèu sarani dhu dhèu Yahudi boe, pake mèdha-panyau ra ho soru-bara a'ari ra dhèu Yahudi sèra.i
28 De ladhe ja'a pabagi kore ka doi se'e mi a'ari èdhi ètu Yerusalem, ja'a neo dhuli pangad'o dènge miu, ropa laku asa Spanyol. 29 Ladhe ja'a dhiu, kèti dènge mèngi-nale ae-ae nèti Kristus.
30 A'ari aa'i-aa'i! Lula Yesus Kristus j'aj'i Kètu miu, aa lula Roh Lamatua ka tao miu pasue èci dènge èci, nèti èèna ka ja'a manèngi ho miu sabaj'a patare'a-re'a, sèna ka Lamatua soru-bara ja'a. 31 Manèngi sèna ka Lamatua bhiri-sarobho ja'a ètu propensi Yudea, ho dhèu dhu ro'o boe parcaya Lamatua baku tao bhelu mi dedha ja'a. Aa manèngi ho ladhe ja'a lalau-lalo'o dhèu sarani ètu Yerusalem, rèngu sèmi rare ja'a dènge be'a. 32 Èle èèna, ladhe madhutu dad'èi Lamatua, ja'a bisa dhiu asa miu dènge d'ara karej'e, lula ja'a neo ae kore ciki dènge miu. 33 Ja'a sabaj'a sèna ka Lamatua bera-bera dènge miu. Te Nèngu ka dhu bisa tao ho dhèu mamuri dame dènge mera-milu. Lèke tare'a!