Baku kahèti leli a'ari miu dhèu Kristen
14
Abhu dhu parcaya Lamatua, te ngaa parcaya na èra mèka, aa j'ara ae ka dhu ne'a mèka. Pakabhèle ai èu ho sèmi more ne dènge d'ara kateme. Baku sisu ngaa dhu na peka-padhai. Hud'i laa nèngu pa'angalai dènge miu. 2 Abhu dhu parcaya Lamatua, dhu pangee na, dhèu sarani bisa ra'a ngaa sa, nuka sèmi sisi, do ngaa èèna ka. Te ngaa abhu dhèu sarani leo, dhu parcaya ra èra mèka, dhu ra'a dhoka sayur di. Te ra luri sisi. 3 Te ngaa nanene, ee! Dhèu sarani dhu bisa ra'a ngaa èèna ka, baku pahahe dhèu dhu neo boe ra'a sisi. Sèmi èèna kahèi dènge dhèu sarani dhu neo boe ra'a sisi, baku peka dènge dhèu dhu bisa ra'a sisi, na, “Weh! Mu'a sisi, sala!” Lula Ama Lamatua sèmi nare le dua ra ho j'aj'i dhèu unu Na!4 Ladhe èu me'a dhoka karitik a'ari mu dhèu parcaya sèra, te èu ngee na, èu ne cee? Èu dènge hak ngaa, ho pèci sasala mi dhèu leo? Dhèu ne ènu èu boe, si! Aa èu ne, lamatua boe nèngu, si. Te dhodhoka Lamatua nèngu di dhu unu hak, sèna ka peka paled'a, tatao na èèna lèke, do sala. Te ngaa baku bhèlu, bèli-camèd'a Lamatua na sèmi nare dhèu ne'e dènge be'a, lula Lamatua na bisa pa'èra ne, sèna ka na bisa titu èra.
5 Abhu dhèu cahag'e dhu pama'ète rare, peka na, lod'o èci be'a risi nèti lod'o leo. Abhu kahèi cahag'e dhu peka na, lod'o aa'i-aa'i ra èci èèna ka, lod'o èci sa risi boe nèti lod'o leo. Dhèu èci-èci ka pama'ète unu na j'ara ne'e. 6 Ladhe dhèu pangee, na, abhu lod'o dhu be'a risi nèti lod'o leo, nèngu tao sèmi èèna, sèna ka pakab'ua Kètu èdhi, Yesus Kristus. Dhèu dhu na'a sisi dènge nganga'a dhu leo, bisa na'a ho pakab'ua Kètu èdhi, Yesus Kristus, lula na manèngi makasi mi Lamatua. Sèmi èèna kahèi dènge dhèu dhu na'a boe sisi. Nèngu neo pakab'ua kahèi Kètu èdhi, Yesus Kristus, aa nèngu manèngi makasi mi Lamatua kahèi.a
7 Lod'o èdhi mamuri, èdhi mamuri boe dhoka hia ngi'u èdhi mesa ti. Aa ladhe èdhi madhe, madhe boe dhoka pala ngi'u mesa ti. 8 Te ladhe èdhi mamuri era, èdhi pa'èki dènge Lamatua èdhi. Sèmi èèna kahèi, ladhe èdhi madhe, èdhi pa'èki era dènge Kètu èdhi, Yesus Kristus. De masi ka èdhi mamuri, do madhe, èdhi j'aj'i dhèu unu Na era. 9 Nèti èèna ka, Kristus madhe, hèia mamuri hari. Na tao sèmi èèna, sèna ka Na bisa j'aj'i Kètu bagi mi dhèu dhu madhe le, dènge dhèu dhu mamuri era kahèi.
10 De, nga tao ka èu ded'e iisi mu, tao sèmi dhèu pama'ète lii langu, ho karitik leli lii padhai a'ari mu dhèu sarani? Nga tao ka èu pahahe ne? Te bèli-camèd'a èdhi aa'i-aa'i ti hud'i lati asa madha Ama Lamatua, ho Na parisa mamuri èdhi èci-èci.b 11 Abhu dhu suri tèke ètu d'ara Sasuri Ama Lamatua, dhu peka na,
“Ama èdhi mesa Na dhu peka, na,
‘Dhèu aa'i-aa'i pe patitu kètu urutuu, ho pahaha iisi mi Ja'a,
dènge pakab'ua Ja'a.
Bèli-camèd'a, nèti d'ara hèb'a dhèu èci-èci, ra mangaku, na,
Ja'a j'aj'i Kètu rèngu,
lula Ja'a ne, Ama Lamatua.”’c
12 De èdhi aa'i-aa'i ti, bèli-camèd'a hud'i dhaa ètu madha Lamatua, ho peka na, èdhi tao tasamia, aa nga tao ka èdhi tao sèmi èèna.
Baku ad'u-ue j'ara ho pamanahu a'ari dhèu sarani
13 Uru èèna, miu ètu Roma pèci sasala taruu mi a'ari miu dhèu sarani sèra. Tao ia ka sèmi èèna! Be'a risi èdhi pama'ète sèmi ne'e: èdhi baku tao sèna ka a'ari èdhi kadhunu. Èdhi baku tenge j'ara ho sii pamanahu si, sèna ka ra tao sasala.
14 Lula ja'a dhu pa'èki dènge Kètu èdhi, Yesus Kristus, ja'a ke'a mèu, sèmi ne'e: abhu boe ngaa èci sa dhu bisa pakaj'alu dhèu, toke na bisa boe sabaj'a mi Lamatua. Te ngaa ladhe abhu dhèu èci dhu pangee, na, mèdha èci tao ne kaj'alu, toke nèngu ngee na, bisa heka dènge hak sèna ka sabaj'a, na, hud'i laa mèdha ne j'aj'i mèdha luri hia nèngu. 15 Conto sèmi èu mu'a sisi, aa papèd'a d'ara a'ari mu, na, èu pad'elo boe sasue èu mi nèngu, si? Ladhe sèmi èèna, baku mu'a! Baku pa'ele iie a'ari mu, lula èu neo mu'a nganga'a èci! Te Kristus madhe pala mi dhèu ne'e kahèi. 16 Be'a boe ladhe èu ad'u-ue j'ara èci dhu madhutu a'abhu èu, be'a, te ngaa dhèu leo padhai kakoli kolongara èu, lula ra pangee na, tatao èu deo na, karehe.
17 Ngee paie-iie! Te Ama Lamatua ka, Dhèu Aae èdhi. Te ngaa èdhi j'aj'i boe dhèu unu nèti Dhèu Aae, lula èdhi ta'a-tinu madhutu dhoka atora di. Aad'o! Ladhe èdhi neo j'aj'i dhèu unu nèti Dhèu Aae, èdhi hud'i tao dhu lèke, d'ara mola-mèci, mamuri mola dènge mera-milu, aa d'ara dhu karej'e-karae. Aa'i-aa'i se bisa j'aj'i, ladhe èdhi pa'èki taruu dènge Roh Lamatua dhu Mola-Mèci. 18 Dhèu dhu lalau-lalo'o hia Kristus sèmi èèna, pakarej'e d'ara Ama Lamatua. Aa dhèu leo lee kahèi mamuri dhèu ne'e, hèia padedha kolongara dhèu ne'e, peka na, “Nèngu ne, be'a!”
19 De èdhi hud'i pa'èra ètu d'ara mamuri padame, aa maj'èni pa'èra èci dènge èci. 20 Baku pa'ele iie sasab'a Lamatua ètu d'ara mamuri dhèu leo, lula dhoka nèti j'ara ta'a-tinu di. Lamatua dhu peka le, èdhi bisa ta'a ngaa èèna ka, te aa'i-aa'i dhu mola-mèci. Te ngaa ladhe èu patao-palaha dènge a'ari mu lula j'ara nganga'a-nganginu di, èu sala le. Baku sèmi èèna!
21 Hua iia taha iisi mu. Mu'a ia ka sisi, do minu ia ka èi anggor, do baku mu'a-minu ngaa dhu leo, dhu tao a'ari mu kadhunu. 22 Madhutu a'abhu ja'a sèmi ne'e ka: ladhe èu more lii èci dènge Lamatua, hèia èu pama'ète, na, èu neo parcaya Ne lula-nèti nganga'a-nganginu, na, èu oto aa dènge heka lii langu. Pangee ia ka ngaa-ngaa dhu peka na, èu tao sala, do aad'o. Te èu dhu pama'ète more le sèmi èèna. 23 Te ngaa ladhe d'ara èu kajari, ka mu'a mèdha èci dhu èu ngee na pakaj'alu èu, Lamatua pasala èu, lula èu madhutu boe ngaa dhu èu parcaya lod'o dhu èu mu'a. Te ladhe èu neo ad'u-ue ngaa sa èci, te ngaa èu parcaya, peka na, èèna lèke boe ètu madha Lamatua, na, èèna èu sala le.