3 Ladhe miu tao j'ara dhu lèke, baku madha'u dènge dhèu dhu rèd'u paredha. Te ngaa ladhe miu ad'u j'ara bhelu, be'a risi miu madha'u dènge ra! De j'aga ngi'u ho tao dhu lèke, sèna ka miu baku madha'u dènge ra. Aa ladhe miu tao ka j'ara sèmi èèna, pe ra koa-kad'iri miu. 4 Te dhèu dhu rèd'u paredha, rèngu sèra ka dhu Lamatua hag'e nare si, ho ladhe-leru miu. Te ngaa ladhe miu loe boe nèti tao sala, be'a risi miu madha'u! Te rèngu dènge hak dhu iia d'ara boe ho huku miu. Rèngu, nuka sèmi ana pua-paleha Lamatua, sèna ka huku dhèu dhu ad'u-ue bhabhelu-katub'a. Te Lamatua sèmi nare boe bhabhelu dhu dhèu tao; Na nasa dènge ra.

5 Nèti èèna ka, miu hud'i nanene ku, mi dhèu dhu rèd'u paredha. Te miu dhu me'a mèu le, èèna ka dhu lèke mola-mola. Aa miu me'a kahèi, na, Lamatua nasa, ladhe èdhi tao boe dhu lèke.

6 Sèmi èèna kahèi, miu hud'i b'ae bea dhu madhutu atora, lula dhèu dhu rèd'u paredha sèra, pakako sasab'a Lamatua. 7 De miu hud'i b'ae aa'i-aa'i dhu lèke madhutu atora. B'ae hia dhèu roro bea sèra, bea aa'i-aa'i dhu miu hud'i b'ae ku. Pakab'ua mi dhèu aa'i-aa'i dhu mema nia sèmi lii pakab'ua. Aa ladhe abhu dhèu dhu tao j'ara be'a taruu, ded'e padedha kolongara si, sèna ka dhèu re'a, na, rèngu tao j'ara dhu be'a.^a

8 B'ae pama'ète kèlu èu aa'i-aa'i, sèna ka baku mamuri ètu d'ara kèlu-g'ètu. Te èdhi pakèlu dhoka ètu ca madha j'ara di, nuka pasue. Ladhe miu sue dhèu, miu tao le madhutu Atora-atora nèti Lamatua. 9 Te Atora sèra peka na, “Baku tao j'ara makae dènge dhèu dhu j'aj'i boe dhèu èmu-kamali mu; baku pamadhe dhèu; baku mana'u; baku d'èi leli neo unu mèdha-panyau dhèu,” aa dhu leo hari. Ladhe neo madhutu aa'i Atora se'e, hud'i tao madhutu ku Atora èci ne'e, dhu peka na, “Èu hud'i sue ku dhèu leo, nuka sèmi èu sue ngi'u èu unu mu.”^b 10 Te ladhe èdhi pad'elo sasue mi dhèu leo, èdhi tao boe bhelu mi nèngu, si? De ladhe èdhi loe boe pad'elo sasue èdhi, èdhi bisa tao madhutu aa'i Atora Lamatua.

11 Ama Lamatua neo patabuli èdhi nèti bhabhelu-katub'a dhèu rai-haha. Aa limuri ne, lod'o sèna ka dhèu abhu mamuri nèti Lamatua dètu ae le, ladhe èdhi pasoro dènge lod'o dhu èdhi heka parcaya Yesus Kristus. Nèti èèna ka, èdhi hud'i mamuri pasue, lula èdhi te'a le madha j'ara ne'e. Nuka sèmi uru èèna, èdhi dhu bhèj'i era. Te ngaa limuri ne d'ai le lod'o na, ho èdhi kèd'i ka nèti bhabhèj'i èdhi! 12 Nèbhu boe, te mèda oe èle kèna, aa lod'o rea kèna. De be'a risi èdhi ae eele ka nèti bhabhelu-katub'a èdhi. J'ara ne, nuka sèmi dhèu dhu mamuri ètu d'ara maroga, aa ad'u-ue madha j'ara bhabhelu, te rèngu pangee, na, abhu boe dhu ladhe rèdhi tatao rèngu sèra. Te ngaa limuri ne, èdhi hud'i j'aj'i ku sama sèmi sordad'u dhu bori mema mèdha-papake pamusu, ho pa'èra ngi'u sèna ka tao j'ara dhu be'a, nuka sèmi dhèu dhu mamuri ètu d'ara saraa. 13 Èdhi hud'i mamuri mola ku, sèna ka dhèu aa'i-aa'i bisa rèdhi, na, èdhi dhu tao j'ara be'a. Be'a boe ladhe èdhi mamuri dhoka ètu d'ara tao pesta, dènge tinu mahu di. Be'a boe ladhe èdhi tao j'ara makae. Be'a boe ladhe bau lii langu g'ana-kariu. Aa be'a boe ladhe èdhi tèka d'ara, lula èdhi d'èi boe dhèu risi èdhi. 14 Te ngaa dhu be'a risi ka, miu ub'a d'ara miu, ho j'aj'i sama sèmi Kètu èdhi, Yesus Kristus, dhu Lamatua pua mai. Aa ladhe èu neo ad'u-ue j'ara dhu lèke boe, na, taha d'ara mu! Mage soro tèke ho madhutu dad'èi mu dhu lèke boe j'ara.