Ladhe èdhi pa'èki dènge Kristus, mamuri hiu èdhi j'aj'i sèmi ngaa sa?
12
A'ari dhu pasue! Ama Lamatua pad'elo le d'ara hua iia Na mi èdhi. Nèti èèna ka, ja'a manèngi sèna ka saraka mamuri miu kateme mi Lamatua, sama sèmi korban dhu mamuri. J'ara sèmi ne'e ka dhu pakarej'e d'ara Lamatua. Pa'èra ngi'u miu ho madhutu dad'èi Na, aa mamuri mola, te j'ara sèmi èèna ka dhu pad'elo sasue miu aa pakab'ua Ne. Mema lèke, ladhe miu pahaha iisi mi Nèngu sèmi èèna. 2 Baku soro tèke ho dhèu rai-haha ne pua miu tao sèmi ne'e, do sèmi èèna, do mamuri sèmi ngaa sa, madhutu dad'èi d'ara ra. Baku sad'i madhutu iia d'ara di, j'ara ngangee ra, j'ara mamuri ra, do ad'a tatao ra. Te ngaa dhu be'a risi eele, ladhe miu soro tèke Lamatua ub'a ngangee miu j'aj'i hiu, sèna ka miu laladhe aa'i-aa'i se, madhutu j'ara hiu. Dènge j'ara ne'e, miu bisa me'a dad'èi Lamatua mi dedha miu. Te dad'èi Lamatua èèna, be'a, pamèci, dènge pakarej'e d'ara Na.3 Lula Lamatua pajuu le ja'a, aa pad'elo d'ara hua iia Na mi ja'a, nèti èèna ka, ja'a peka dènge miu sèmi ne'e ka: lee ngi'u miu dènge j'ara dhu lèke! Baku padedha ngi'u risi nèti dhu lèke. Baku pake j'ara dhu dènge boe kolo-kapua. Dhèu èci-èci hud'i tenge j'ara ho ne'a mèu a'èra dènge karunya dhu Lamatua hia le mi nèngu, lula na parcaya Kristus.
4 Tare pakasame dènge ngi'u dhèu. Ètu ngi'u ne, abhu bagian-bagian, dhu dènge sasab'a-la'a baka-leo. 5 Sèmi èèna kahèi, èdhi dhu pa'èki dènge Kristus. Èdhi se dhèu ae-ae, te ngaa pa'èki j'aj'i mi ngi'u èci. Aa dhèu èci-èci ka dènge sasab'a-la'a na, nuka sèmi bagian nèti ngi'u ne. Èci parluu èci. Tare conto nèti kacui-aai dhu poro pama'ète nèti ngi'u ne, gaguna na aad'o heka, si?a
6 A'abhu ja'a sèmi ne'e: Lamatua pangèd'u èdhi aa'i-aa'i ti koasa, sèna ka pakako rupa-rupa sasab'a-la'a Na, lula Na d'èi pad'elo d'ara hua iia Na mi èdhi. Nuka sèmi, ladhe Lamatua hia èu koasa sèna ka èu peka lii moa Na, èu hud'i peka aa'i lii moa deo na. Te ngaa baku peka risi nèti lii moa èèna.b 7 Ladhe Lamatua hia èu a'èra dènge karunya, ho lalau-lalo'o dhèu leo, èu hud'i lalau-lalo'o pake koasa deo na. Ladhe Na pala hia èu a'èra dènge karunya ho aj'a-nori dhèu lula-nèti Nèngu, na, èu hud'i aj'a-nori ku pake koasa deo na. 8 Ladhe Na pala hia èu a'èra dènge karunya, ho pa'èra d'ara dhèu, èu hud'i pa'èra si pake koasa deo na. Ladhe Na hia èu koasa ho soru-bara dhèu leo dènge mèdha-panyau dhu èu unu, hia la mèdha-panyau sèra mi dhèu sèna ka èu soru-bara si. Ladhe Na hia èu a'èra dènge karunya ho pad'elo j'ara mi dhèu leo, sèna ka ra pakako sasab'a Lamatua dènge be'a, na, èu hud'i maj'èni ho pimpin si pake koasa deo na. Ladhe Na pala hia èu rasa kasia ho soru-bara dhèu dhu ètu d'ara sasusa, èu hud'i bara si dènge d'ara karej'e-karae.c
Dhèu unu Kristus hud'i mamuri tasamia ku?
9 Ladhe miu pad'elo sasue mi dhèu, na, tao dènge d'ara mola; baku peka leo tao leo. Core eele bhelu-katub'a, aa kèpe pa'èra-èra j'ara dhu be'a. 10 Miu dhèu sarani hud'i mamuri pasue ku èci dènge èci. Pa'èra iisi ho pad'elo pakab'ua miu èci dènge èci. 11 Ladhe miu sab'a, sab'a dènge d'ara kateme, baku dènge paloa-pad'ui. Hud'i laa sèna ka d'ara miu karae, lod'o miu ètu d'ara sasab'a-la'a. Aa miu hud'i sab'a hia Kètu èdhi, Yesus Kristus. 12 D'ara miu hud'i karej'e mèda-mèu, te miu me'a le, bèli-camèd'a Lamatua neo tao tasamia hia miu. Pa'èra d'ara ladhe abhu sasusa. Baku roca sabaj'a mèda-mèu. 13 Pake mèdha-panyau miu, ho bara dhèu sarani dhu parluu miu bara si. Ladhe abhu dhèu dhu mai nèti rae leo, hia ra'a-rinu, aa sèmi mere si sèna ka manubha ètu d'ara èmu mi. Dènge j'ara ne'e, miu pad'elo le sasue miu mi dedha rèngu.
14 Ladhe abhu dhèu tino paj'èra miu, manèngi sèna ka Ama Lamatua hia si mèngi-nale. Tare'a! Baku dhoo si!d 15 Ladhe abhu dhu d'ara karej'e, na, karej'e sama-sama dènge ra. Aa ladhe abhu dhu tangi roma iisi, lula d'ara pèd'a, na, tangi sama-sama dènge ra. 16 Mamuri pasue dènge d'ara èci. Baku padedha iisi. Be'a risi miu pa'angalai dènge dhèu haha. Baku padedha iisi ho pangee, na, dhoka èu di dhu me'a.e
17 Ladhe abhu dhèu dhu tao bhelu mi dedha èu, na, èu baku b'ala dènge bhabhelu kahèi. Te ngaa èu hud'i tenge j'ara dhu be'a, dhu dhèu aa'i-aa'i bisa sèmi rare dènge d'ara karej'e. 18 Ladhe bisa, na, tenge j'ara ho mamuri padame dènge dhèu aa'i-aa'i ra.
19 A'ari dhu pasue! Ladhe dhèu tao sala mi miu, na, baku b'ala ne. Soro tèke, sèna ka Lamatua ka dhu ator. Te Lamatua nasa ladhe dhèu tao bhelu-katub'a sama sèmi dhu suri ètu d'ara Sasuri Mola-Mèci, peka na,
“Ama Lamatua mesa Na ka dhu peka, na,
Ja'a ka dhu dènge hak ho b'ala sasala dhèu.
Te Ja'a ka dhu huku bhabhelu dhèu.”f
20 Dhu be'a risi ka, tao madhutu ngaa dhu suri tèke ètu d'ara Sasuri Mola-Mèci, peka na,
“Ladhe musu èu manganga, na,
hia ne na'a.
Ladhe musu èu koko-kamango, na,
hia ne ninu.
Te ladhe tao ka sèmi èèna, nèngu makae unu na,
aa na pakab'ua hari èu.”g h
21 Baku soro tèke bhabhelu ator èu. Be'a risi ladhe j'ara-j'ara dhu be'a ka dhu uli èu. Dènge j'ara ne'e, èu bisa segi madha j'ara dhu bhelu sèra.