Ama Lamatua rasa kasia mi dhèu Isra'el sèra
11
De ja'a neo karèi sèmi ne'e: ele boe miu pangee, na, “Lula dhèu Isra'el ro'o boe nanene Ama Lamatua, nèti èèna ka Na tule eele le si.” Sèmi èèna ka, do? Aad'o! Te j'aj'aj'i ja'a nèti rèngu kahèi! Ja'a ne, nèti suku Benyamin. Ama Benyamin, nuka Yakob. Baki na, Isak, Ama Isak, ka Abraham, dhu j'aj'i bèi-baki nèti dhèu Isra'el aa'i-aa'i.a 2 Ama Lamatua tule eele nèdhi boe dhèu unu Na sèra. Rèngu se'e ka dhu Na tadhe karèi nèti uru-uru ka. Miu sanèd'e era, ngaa dhu suri tèke ètu d'ara Sasuri Mola-Mèci lula-nèti Elia, si? Elia ka'uu-kamuki mi Lamatua lula-nèti dhèu Isra'el sèra, hèia na manèngi, sèna ka Lamatua huku si, 3 peka na,“Ama! Dhèu se pamadhe dhèu rèti lii padhai,
dhu Ama pua mai.
Ra pa'ele iie le mei korban kahèi,
ètu era dhu dhèu tema pahaha iisi mi Ama.
Nèti dhèu rèti lii padhai Lamatua aa'i-aa'i,
ate dhoka ja'a mesa-mesa ku di dhu mamuri.
Te ngaa rèngu tenge j'ara,
ho neo pamadhe ja'a kahèi!”b
4 Te ngaa Lamatua dhaa, peka na: “Lii èu èèna, sala! Te dhèu dhu pahaha iisi mi Ja'a, abhu pidhu riho dhèu era. Rèngu se taha dènge èra, aa sogo-tagu boe Ba'al!”c
5-6 Sèmi èèna kahèi limuri ne. Te dhèu Yahudi aa'i-aa'i boe dhu soro kabodho mi Ama Lamatua. Abhu ciki nèti ji'i era dhu Lamatua pili nare, sèna ka hia mamuri, lula Na neo pad'elo d'ara hua iia Na mi ji'i, lula boe nèti tatao ji'i dhu be'a! Te ladhe Nèngu hud'i pili nare ku ji'i lula tatao ji'i dhu be'a, sasoa na, Nèngu bisa boe pama'ète sèna ka neo pad'elo, do pad'elo boe, d'ara hua iia Na mi ji'i. Ladhe sèmi èèna, peka iia ka, na, ‘Nèngu pad'elo d'ara hua iia Na’.d 7 De lala'e na sèmi ne'e ka: dhèu Yahudi ae ka dhu tenge-tenge j'ara ho Ama Lamatua pad'elo d'ara hua iia Na mi rèngu, sèna ka rèngu bisa pabe'a kahèi dènge Lamatua. Te ngaa abhu boe, lula d'ara rèngu adhu sèmi hadhu, dènge ro'o boe nanene Lamatua. Te ngaa cahag'e nèti dhèu se abhu. Dhèu se'e ka dhu Lamatua hag'e nare si. 8 Ètu d'ara Sasuri Mola-Mèci Lamatua, dhu suri lula-nèti dhèu kètu hadhu sèra, peka na,
“Lamatua hia si,
musi madha dhu bisa boe ladhe rèdhi,
ro'a dhilu dhu bisa boe tadèngi,
aa kahadhu dhu bisa boe pangee.
De rèngu re'a mèu iia boe,
toke d'ai sange ne'e.”e
9 Dhèu aae Daud suri le kahèi lula-nèti dhèu Yahudi se, ètu Sasuri Mola-Mèci, na,
“Hud'i laa ho ra tao pesta ètu mei unu ra.
Te tatao rèngu ne'e ka dhu j'aj'i sasii ho sii hari rèngu,
ka ra ngee na aa'i-aa'i se be'a le.
Aa nèti mèdha-panyau unu ra, ka dhu pasaleku rèngu.
10 Hud'i laa sèna ka musi madha ra maroga,
ho rèdhi boe ngaa-ngaa!
Hud'i laa rèngu dui bia taruu,
sèna ka kabodho ra asa kabhuku!”f
Lamatua neo hia mamuri mi dhèu Yahudi boe kahèi
11 De ja'a neo karèi sèmi ne'e: Nga tao ka dhèu Yahudi sèra kadhunu? Ra bèbha le, do? Aad'o! Te ngaa, lula rèngu ro'o boe nanene Ama Lamatua, aa ro'o boe parcaya Kristus, ne'e ne ka dhu bhoke j'ara hia dhèu Yahudi boe, sèna ka ra bisa abhu mamuri, lula Lamatua patabuli si nèti sasala ra. Nèti tatao Lamatua sèmi èèna, Nèngu neo ho dhèu Yahudi sèra tèka d'ara, hèia ra lèpa hari ho madhutu Ne. 12 De dhu mola na kèna, peka na, dhèu Yahudi se sisu ngaa dhu lèke. Nèti èèna ka, dhèu leo nèti palème rai-haha ne bisa rasa kakee-mamènyi d'ara hua iia Lamatua. De dhèu Yahudi rugi kapai. Te ngaa èèna tao dhèu Yahudi boe sèra oto titu kèna. De nèbhu-nèbhu, ladhe dhèu Yahudi aa'i-aa'i ra pabe'a hari dènge Lamatua, èèna be'a risi hari!
13 Ja'a neo peka j'ara èci dènge miu dhèu Yahudi boe, sèmi ne'e: Lamatua pua ja'a sèna ka, laku peka-padhai dènge miu, lula-nèti Lii Lolo Be'a Na. Nèti èèna ka, ja'a pa'èra ngi'u, sèna ka pakako sasab'a dhu be'a aae ne. 14 Te ladhe ja'a pakako sasab'a ne dènge be'a, ja'a sanao sèna ka dhèu Yahudi unu ku tèka d'ara. Dènge j'ara sèmi ne'e, ja'a bisa bara rèngu cahag'e sèna ka abhu mamuri. 15 Ropa Lamatua tule eele dhèu unu Na, lod'o èèna kahèi Lamatua bhoke j'ara, sèna ka dhèu leo abhu j'ara ho maso j'aj'i dhèu unu Lamatua. Te ngaa èle èèna, ladhe sèmi rèngu padame hari dènge Lamatua, èèna be'a risi. Te èèna sama sèmi rèngu mamuri hari nèti mamadhe ra!
16 Nuka sèmi dhèu neo tao roti. Ladhe nare tarigu ciki saraka mi Lamatua, èèna na roti se j'aj'i mola-mèci unu Lamatua. Aa ladhe dhèu hia amo aj'u èci, ho j'aj'i bua sulung mi Lamatua, èèna na aj'u ca kapua ne j'aj'i mola-mèci unu Lamatua kahèi.
17 Ja'a neo pakasame dhèu Yahudi dènge aj'u saitun ca kapua dhu ra piara ètu d'ara oka. Ama Lamatua dhu tutu eele le dadana cahag'e nèti aj'u ne. Te ngaa miu dhu Yahudi boe, nuka sèmi saitun j'ami. Hèia, nèti dadana miu cahag'e, Lamatua pare nare ka la'e patapa mi aj'u dhu ètu d'ara oka deo na. Dènge j'ara ne, dadana nèti aj'u dhu ètu li'u oka, sakid'o nare mamuri nèti aj'u ètu d'ara oka deo na. Ne'e ne, èci èèna ka dènge miu dhu Yahudi boe, dhu sèmi mere d'ara hua iia Lamatua kahèi, dhu Na neo hia mi dhèu unu Na, dhèu Yahudi sèra. 18 Te ngaa baku pamud'e! De mage mi padedha iisi, ho pangee na, miu dhu nèti li'u, be'a risi nèti dadana dhu Lamatua tutu eele sèra! Ladhe èu neo padedha iisi, mage èu bhèlu, te, èu ne dhoka ca dadana di! Èu boe ka dhu pa'èra kapua aj'u ne. Te amo ka dhu pa'èra aj'u ne!
19 Ele boe èu neo peka, na, “Lamatua pare eele dadana èci nèti aj'u dhu muri ètu d'ara oka Na, sèna ka Na pakaj'èpe ja'a mi era deo na, ho gati dadana deo na.” 20 Mema lèke. Te ngaa baku bhèlu, na, Lamatua tutu eele dadana sèra, lula rèngu parcaya boe Ne. Aa èu gati si, lula èu parcaya Nèngu. De baku padedha iisi! Be'a risi loe aa baku lela dedha! 21 Te dhèu Yahudi sèra nuka sèmi dadana dhu muri mema, dhu cèu uru tèka. Te ngaa Lamatua tèke eele boe si toke panèbhu ètu èèna. De ladhe èu parcaya boe taruu mi Lamatua, mage èu maena ho Na soro tèke èu taruu ètu èèna!
22 De miu hud'i pangee pabe'a-be'a ku. Ama Lamatua mema d'ara hua iia. Te ngaa ne'a hia huku dhu bia kahèi. Pe Nèngu huku dhèu dhu manahu le, dhu pabe'a heka dènge Ne. Te ngaa mi miu dhèu Yahudi boe, Lamatua pad'elo d'ara hua iia Na, sad'i miu pa'èki taruu dènge Ne, aa miu sèmi mere babe'a Na. Te ngaa ladhe miu sèmi mere boe j'ara sèmi èèna, Lamatua pare eele kahèi miu nèti aj'u Na. 23 Sama sèmi èèna kahèi dènge dhèu Yahudi sèra. Ladhe ra ele-ho'a ka, ho mulai parcaya Kristus, pe Lamatua tape hari rèngu mi aj'u uru èèna. Te Nèngu dènge koasa ho bisa tao j'ara sèmi èèna! 24 Te miu dhu dhèu Yahudi boe, nuka sèmi dadana nèti aj'u saitun hui, dhu muri tab'a ètu li'u oka. Te ngaa Lamatua hag'e nare miu, ka pakaj'èpe laa mi aj'u saitun dhu hua iia, dhu Na sèle ètu d'ara oka Na, sèna ka hud'i laa aj'u hui èèna leko-leo, aa aj'u ètu d'ara oka leko-leo. Te ladhe dhèu Yahudi boe, bisa j'aj'i sèmi sèra, ngaa hari dhèu Yahudi. Rèngu bisa risi eele hari, ladhe Lamatua pakaj'èpe hari si mi laa aj'u rèngu unu ra.
Bèli-camèd'a dhèu Yahudi pabe'a hari dènge Lamatua
25 A'ari ètu Roma! Miu hud'i me'a ku ngaa dhu uru èèna j'aj'i mi rahasia. Te ladhe miu me'a, miu mage pakapai iisi, dhu peka na, miu d'èlu-mèu risi. Te j'ara na sèmi ne'e: limuri ne d'ara dhèu Yahudi, adhu sèmi hadhu, aa ro'o boe parcaya Kristus. Te ngaa rèngu bisa boe sèmi èèna taruu. Te ladhe dhèu Yahudi boe aa'i-aa'i dhu Ama Lamatua pili nare si, parcaya le Kristus, bèli-camèd'a dhèu Yahudi sèra parcaya Ne kahèi. 26 De ladhe d'ai ka lod'o na, pe Lamatua patalale dhèu Yahudi aa'i-aa'i nèti koasa sasala-sasigo ra. J'ara ne'e j'aj'i, nuka sèmi dhu suri tèke ètu d'ara Sasuri Mola-Mèci, dhu peka na,
“Bèli-camèd'a Dhèu èci mai,
dhu patabuli èdhi nèti mamadhe-mamopo.
Nèngu mai nèti ledhe Sion, nuka kota Yerusalem.
Èèna na, Nèngu ka dhu tao ho ana-èpu Yakob ele-ho'a.
Te rèngu mamuri pusi-pahae boe Ja'a,
aa ra soro kabodho mi j'ara mamuri Ja'a dhu mola.g
27 Ja'a neo saku eele sasala-sasigo ra.
Te Ja'a pa'èki le lii padhadha dènge rèngu sèmi èèna ka.”h
28 Lod'o-lod'o dhèu Yahudi tadèngi Lii Lolo Be'a Lamatua, ra tao iisi ra nuka sèmi musu dhu palab'a dènge Ne. Dènge sèmi ne'e ka, rèngu hia j'ara mi miu dhu Yahudi boe! Masi ka sèmi èèna, te ngaa Lamatua sue si era, lula Na sue bèi-baki ra, aa Na hag'e nare si j'aj'i dhèu unu Na. 29 Te ladhe Ama Lamatua hia le mèdha èci, Na nare heka. Aa ladhe Na paroa nare le dhèu, peka na, “Mai madhutu Ja'a! Mai asa d'ara ho j'aj'i dhèu Ja'a!” Na babège eele heka si.
30 Uru èèna, miu dhèu Yahudi boe, mo'o boe nanene Lamatua. Te ngaa limuri ne, miu sèmi mere rasa kasia nèti Lamatua, lula dhèu Yahudi ro'o boe nanene Ne. 31 De rèngu se'e ka dhu limuri ne ro'o boe tao madhutu dad'èi Lamatua. Nèti èèna ka, Lamatua neo pad'elo rasa kasia Na mi miu era. Aa bèli-camèd'a Nèngu neo pad'elo rasa kasia Na mi dedha rèngu kahèi. 32 Limuri ne, Lamatua tao ai-hèb'a mi dedha dhèu Yahudi, èci èèna ka dènge dhèu Yahudi boe. Te aa'i-aa'i ra tao boe madhutu dad'èi Na, nuka sèmi rèngu ètu d'ara babèdho, aa re'a boe j'ara kalua. Lamatua soro tèke si sèmi èèna, sèna ka Na bisa pad'elo rasa kasia Na mi dhèu aa'i-aa'i ra.
Lamatua ne be'a seli eele!
33 Ama Lamatua d'èlu-mèu titu kèna!
Aa Na pake mamèu Na, sèna ka tao j'ara hua iia.
Abhu boe ca dhèu sa dhu tadhe mèu Ne.
Abhu boe dhèu èci sa dhu ne'a mèu j'ara-j'ara dhu Lamatua pama'ète lii langu.
Abhu boe ca dhèu sa kahèi dhu ne'a mèu,
nga tao ka Lamatua ad'u-ue j'ara èci.i
34 Abhu boe dhèu èci sa dhu ne'a mèu ngangee Ama èdhi.
Abhu boe ca dhèu sa dhu bisa holo Ne.j
35 Abhu boe dhèu dhu bisa hia iia Lamatua mèdha èci.
Abhu boe dhèu èci sa dhu bisa laka-seti Lamatua sèna ka Na b'ala hari!k
36 Te aa'i-aa'i kapua ra nèti Ama Lamatua!
Aa'i-aa'i j'aj'i, lula Nèngu ka!
Aa'i-aa'i dhu èdhi tao,
èdhi sab'a hia Ne.
Èdhi koa-kio Ne,
taa-taa toke d'ai mia-mia!
Lèke tare'a-re'a!l