10
A'ari aa'i-aa'i! Ja'a neo dhèu Isra'el abhu ngaa? Ja'a sabaj'a ho hud'i laa Lamatua patalale rèngu nèti koasa sasala-sasigo ra. Ladhe j'aj'i ka sèmi èèna, d'ara ja'a heka karej'e kèna!2 Ja'a bisa peka j'ara-j'ara nèti tatao dhèu se'e: rèngu se maj'èni neo madhutu Ama Lamatua. Masi ka ra maj'èni sèmi èèna, te ngaa re'a mèu boe j'ara dhu lèke. 3 Lula rèngu re'a boe j'ara mamuri dhu mola, dhu bisa pabe'a dhèu dènge Lamatua, nèti èèna ka dhèu se bhoke j'ara unu ra, ho neo sèku pabe'a dènge Lamatua. Dènge sèmi èèna, rèngu ro'o boe nanene Ne.
4 Ladhe dhèu madhutu dhoka atora di, sèna ka Lamatua sèmi nare si, na, èèna d'ai mèka. Nèti èèna ka, Kristus pamèci nare aa'i mèu-mèu le, sèna ka èdhi bisa pabe'a dènge Lamatua. Ka limuri ne dhèu aa'i-aa'i dhu parcaya Kristus bisa pabe'a dènge Ama Lamatua.
Lamatua neo patabuli dhèu aa'i-aa'i nèti koasa sasala-sasigo ra
5 Uru èèna, Musa pad'elo le j'ara ètu d'ara Sasuri Mola-Mèci, sèna ka dhèu bisa pabe'a dènge Ama Lamatua, sad'i ra tao madhutu aa'i mèu-mèu Atora Lamatua. Nèngu suri, peka na, “Dhèu cee dhu tao madhutu aa'i Atora ne, bèli-camèd'a rèngu abhu mamuri mola.”a
6 Te ngaa Sasuri Mola-Mèci Lamatua pad'elo j'ara leo, peka na, dhèu bisa pabe'a dènge Ama Lamatua sad'i rèngu parcaya Yesus Kristus. Dhu suri tèke, na, “Mage karèi, peka na, ‘Cee ka dhu bisa ca'e asa sorga?”’ (Èèna, nuka sèmi dhèu neo ca'e la'e peka dènge Kristus, na, èdhi dhèu rai-haha d'èi ladhe Nèngu puru mai sèna ka hia mamuri mi èdhi.) 7 Sasuri Mola-Mèci suri kahèi, peka na, “Mage karèi, na ‘Cee ka dhu neo puru la'e asa d'ara naraka, ètu era dhèu madhe sèra?”’ (Èèna, nuka sèmi dhèu dhu puru la'e ho paca'e Kristus nèti era mamadhe Na, sèna ka hia mamuri mi èdhi.)
8 Baku sèmi èèna! Te ètu d'ara Sasuri Mola-Mèci suri, na, “Lii moa nèti Lamatua ètu katanga madha èu! Te lii moa èèna abhu le ètu hèb'a dènge d'ara èu.” Lii moa ne dhu èdhi peka-padhai dènge dhèu, peka na, “Ladhe èu neo abhu mamuri, na, hud'i parcaya ku Kristus!”b 9 Ladhe èu mangaku dènge hèb'a mu, peka na, “Kristus èèna, Kètu ja'a,” aa parcaya ètu d'ara èu, na, Ama Lamatua pamamuri hari le Yesus Kristus nèti mamadhe Na, ka Ama Lamatua patabuli èu nèti koasa sasala-sasigo èu. 10 Te ladhe èu parcaya Kristus dènge d'ara kateme, Ama Lamatua cap èu, peka na, èu dhèu d'ara mola dhu pabe'a dènge Ne. Aa ladhe èu mangaku dènge hèb'a mu, peka na, Yesus j'aj'i Kètu èu, Ama Lamatua patabuli èu nèti koasa sasala-sasigo èu kahèi. 11 Ètu d'ara Sasuri Mola-Mèci Lamatua, dhu suri, peka na, “Cee dhu parcaya Ama Lamatua, bèli-camèd'a, na'e boe makae, lula Lamatua neo tao j'aj'i aa'i mèu-mèu, ngaa dhu Na peka nare le.”c 12 Dhèu Yahudi dènge dhèu Yahudi boe, èci èèna ka. Beda boe. Abhu dhoka Kètu èci di, aa Nèngu ka Kètu nèti suku aa'i-aa'i. Nèngu neo pad'elo d'ara hua iia Na ae-ae mi dhèu aa'i-aa'i dhu manèngi bara nèti Nèngu. 13 Te ètu d'ara Sasuri Mola-Mèci dhu suri, na, “Dhèu aa'i-aa'i dhu manèngi Lamatua soru-bara si, pe Nèngu patabuli si nèti koasa sasala-sasigo ra.”d
14 Te ngaa tasamia dhèu bisa manèngi bara nèti ca dhèu, ladhe rèngu dhae parcaya mèka ne? Aa tasamia rèngu bisa parcaya ne, ladhe rèngu dhae tadèngi mèka j'ara mamuri dhèu ne? Tasamia rèngu bisa tadèngi lula-nèti nèngu ne, ladhe abhu boe dhèu dhu lole dènge ra? 15 Aa tasamia rèngu bisa lole dènge dhèu, ladhe abhu boe dhu pua-paleha si? Ètu d'ara Sasuri Mola-Mèci, peka na, “Ladhe dhèu rèti mai Lii Lolo Be'a, mamai dhèu se'e se be'a titu kèna!”e
16 Te ngaa miu kahèi me'a, na, abhu dhèu Isra'el cahag'e ro'o boe nanene Lii Lolo Be'a Lamatua. Te Yesaya, ca dhèu dhu nèti lii padhai Lamatua, suri peka na,
“Lamatua!
Dhèu se'e ro'o boe lèka lii moa
dhu rèngu tadèngi le nèti ji'i!”f
17 De ladhe neo parcaya Ama Lamatua, na, hud'i nanene uuru ku Lii Holo-Nori Na. Aa neo me'a lii moa Na, hud'i tadèngi uuru ku lula-nèti Kristus.
18 Ja'a karèi sèku, sèmi ne'e: ele boe miu pangee, na, dhèu Isra'el sèra tadèngi rèdhi mèka lula-nèti Kristus, do? Tatu ra tadèngi le! Nuka sèmi dhèu dhu suri tèke ètu d'ara Sasuri Mola-Mèci Lamatua, peka na,
“Dhèu rèti lii padhai Lamatua, dhu palolo lula-nèti Lamatua ne
pale-palème le rai-haha;
Lii rèngu
d'ai aa'i le palème rai-haha toke d'ai suu-suu rai.”g
19 Ja'a neo karèi hari ca j'ara, “Dhèu Isra'el sèra dhane rare mèka j'ara Ama Lamatua, do?” Musa ka, dhèu uru j'ara dhu suri peka na, Lamatua peka mi dhèu Isra'el sèmi ne'e:
“Ja'a neo tao j'ara èci
hia dhèu nèti suku leo sèra.
J'ara ne tao miu tèka d'ara.
Aa Ja'a neo tao j'ara èci,
hia dhèu dhu mi pangee na kahadhu ènyu.
J'ara ne tao miu kadhi ngutu.”h
20 Limuri hari, Yesaya suri dhu paled'a risi lula-nèti dhèu Yahudi boe, dhu peka na,
“Abhu dhèu dhu uru èèna tenge boe Ja'a,
te ngaa rèngu paraga le dènge Ja'a.
Abhu dhèu dhu uru èèna manèngi boe ho rèdhi Ja'a,
te ngaa Ja'a pad'elo iisi le mi rèngu.”i
21 Te ngaa, lula-nèti dhèu Isra'el sèra, Lamatua peka le sèmi ne'e:
“Mèda-mèu, ai Ja'a dhu pakabhèle tèke,
sèna ka tatae mamai dhèu Isra'el asa Ja'a.
Te ngaa ro'o boe nanene Ja'a,
aa ra d'èi palab'a dènge Ja'a.”j