Ama Lamatua hag'e nare dhèu Isra'el sèra
9
Èdhi dhu pa'èki dènge Kristus, padhai lii dhu lèke. De ja'a monya boe miu. D'ara iiki ja'a kahèi, peka na, Roh Lamatua dhu ator d'ara ja'a. 2-3 Ja'a peka sèmi ne'e ka: d'ara ja'a susa. Ja'a rasa bia, lula ja'a ngee kèdhi dhèu-dhèu ja'a mesa ku. Te ja'a neo sèna ka dhèu ja'a, dhèu Yahudia sèra, pa'èki dènge Kristus kahèi, te ngaa ae dhu parcaya boe Nèngu. Ladhe sèmi ja'a dhu bisa bhoke j'ara hia rèngu, ja'a sadia manèngi ho Lamatua huku ja'a, sèna ka gati si. Aa ja'a sadia manèngi kahèi, sèna ka Lamatua hag'e eele ja'a nèti Kristus, ho rèngu bisa pa'èki dènge Ne. 4 Aa te ngaa, rèngu se dhèu Isra'el, nuka bangsa èci dhu kalua hua iia titu kèna. Lamatua dhu ded'e le rèngu se, j'aj'i ana-ana Na karèi nèti katanga rai ka. Na pad'elo dadedha Na mi rèngu. Na pa'èki dènge ra rupa-rupa lii pajaji. Na pangèd'u si Atora Na. Rèngu ka dhu re'a mèu pahaha iisi mi Lamatua, aa sab'a hia Ne. Lamatua dhu pamoa le, neo pad'elo d'ara hua iia Na mi rèngu.b 5 Dhèu Yahudi j'aj'aj'i ra nèti bèi-baki ji'i, nuka: Abraham, Isak dènge Yakob (dhèu rare ngara ‘Isra'el’ nèti Yakob). Aa Kristus, dhu Lamatua pajaji mema karèi nèti uru-uru ka ho pua mai èèna, j'aj'aj'i Na nèti bèi-baki ji'i dhèu Yahudi kahèi. Kristus ne'e ka, Ama Lamatua kahèi dhu nèd'u paredha mi aa'i-aa'i se. De lèke, ladhe dhèu ded'e koa-kio hia Ne toke d'ai mia-mia. Lèke tare'a!c6 Masi ka abhu dhèu Isra'el ae ka dhu sèmi mèka Kristus, te ngaa dhèu bisa boe peka, na, lii pajaji Lamatua èèna j'aj'i boe. Baku ngee, na, dhèu aa'i-aa'i dhu j'aj'i nèti bèi-baki Isra'el sèra, j'aj'i bangsa Isra'el dhu Ama Lamatua hag'e nare ho j'aj'i dhèu unu Na. 7 Nuka sèmi, dhèu ae-ae j'aj'aj'i ra nèti bèi-baki ji'i, Abraham. Te ngaa rèngu aa'i-aa'i j'aj'i boe ana-èpu d'èlu Abraham dhu Ama Lamatua hag'e nare. Te Lamatua dhu peka le dènge Abraham, aku Nèngu na, “Ana-èpu èu dhu Ja'a tadhe, dhoka rèngu dhu j'aj'i nèti ana mu Isak di.”d
8 Sasoa na, karèi nèti uru d'ai sange ne'e, ana-èpu aa'i-aa'i boe nèti baki ji'i Abraham, dhu j'aj'i ana-ana Ama Lamatua. Dhodhoka ana-èpu dhu j'aj'i nèti lii pajaji Lamatua dènge Abraham di, dhu Lamatua tadhe. Rèngu ka di dhu j'aj'i ana-ana Lamatua dhu lèke. 9 Te Lamatua pa'èki lii pajaji dènge Abraham, peka na, “Pe d'ai tèu mai nèi, Ja'a lèpa hari mai. Lod'o èèna dhèu èmu èu Sara nara iisi le ana mone ca dhèu.”e
10 Mesa boe èèna di. Te Isak dènge dhèu èmu na Ribka, nara iisi ana kajari dua. 11-12 Lod'o Ribka nara iisi mèka ana na si, rèngu se dhae tao mèka j'ara dhu mola, do dhu bhelu. Masi ka sèmi èèna, te ngaa Lamatua peka uuru le dènge Ribka lula-nèti ana kajari dhu kalua uuru, peka na, “Bèli-camèd'a a'a ne sab'a hia ari na.” Lamatua peka sèmi èèna ho pad'elo, na, ladhe Nèngu hag'e nare le dhèu èci, Nèngu dhu ne'a le, neo pake dhèu ne sèna ka tao tasa mera mia. Hèia Lamatua pili ari na, j'aj'i dhèu unu Na. Lamatua parluu heka pamata, ho laladhe ari ne neo tao ngaa, lula Lamatua dhu ne'a mema le.f 13 Te Lamatua dhu peka le ètu d'ara Sasuri Mola-Mèci Na, aku Nèngu na,
“Ja'a pili kore le Yakob,
te ngaa Ja'a tule eele Esau.”g
14 De èdhi peka tasamia? Ele boe cahag'e peka na, “Lamatua pama'ète lii langu, bia cabèka, do?” Bisa boe! 15 Te uru èèna, Ama Lamatua dhu peka le dènge Musa, na,
“Ladhe abhu dhèu dhu paraga dènge sasusa,
Ja'a ka dhu pili neo pad'elo rasa kasia mi cee, aa Ja'a ka dhu pili neo bhoke d'ara Ja'a mi dhèu dhu Ja'a paj'uj'u unu Ku.”h
16 De dhèu ne'e rasa boe d'ara taleo Lamatua, lula dad'èi nèngu unu na, do, lula tatao unu na. Te ngaa lula Lamatua mesa Na ka dhu neo pad'elo d'ara taleo Na mi dhèu ne'e. 17 Te ètu d'ara Sasuri Mola-Mèci, Lamatua padhai lii dènge dhèu aae Masir, peka na, “Ja'a ded'e kore èu j'aj'i dhèu aae, lula Ja'a neo pake èu ho pad'elo koasa Ja'a mi dhèu ae-ae. Dènge sèmi èèna, dhèu dhu pale-lème rai-haha ne, bisa koa-kio kolongara Ja'a.”i
18 De ladhe Lamatua neo pad'elo rasa kasia Na mi dhèu èci, na, Nèngu tao. Aa ladhe Na neo tao d'ara ca dhèu adhu sèmi hadhu, na, Nèngu tao sèmi èèna kahèi.j
Lamatua bisa pad'elo rasa kasia Na, te ngaa Na sèmi nare boe bhabhelu
19 Ladhe sèmi abhu dhèu dhu sisu ja'a, peka na, “Kèri sèmi èèna, ladhe Lamatua neo ad'u j'ara èci, cee ka dhu bisa lab'a Ne? Aad'o, sina ma? De nga tao ka Nèngu neo pèci sasala mi dedha èdhi? Èèna adil boe!”
20 Ladhe abhu dhu pangee sèmi èèna, ja'a dhaa sèmi ne'e ka: “Èu pangee na, èu ne cee?! Èu neo padhai lii lab'a Lamatua, do?” Baku sèmi èèna! Te ètu d'ara Sasuri Mola-Mèci, abhu dhu suri, peka na, “Ladhe dhèu tao mèdha èci, abhu ètu mia mèdha ne karèi hari dhèu dhu tao ne peka na, ‘Nga tao ka èu tao ja'a sèmi ne'e!?”’k 21 Nuka sèmi dhèu tao èru rai. Nèti rai mea ca kahore, nèngu dènge hak tao g'ala dhu kale'e cue, sèna ka dhèu koa ne. Dhèu ne dènge hak kahèi, pake rai mea ca kahore ne tao era kaboko maruru èci, madhutu dad'èi na.
22 Sèmi èèna kahèi dènge Ama Lamatua. Nèngu dènge hak ho tao madhutu dad'èi Na. Nèngu neo pad'elo mi dhèu aa'i-aa'i, na, Nèngu nasa, aa tule eele bhabhelu-katub'a dhu dhèu tao. Nèngu neo ho dhèu re'a kahèi, na, Nèngu unu koasa ae-ae. Sèna ka dhèu bisa re'a, Nèngu taha d'ara dènge dhèu dhu tao rupa-rupa bhabhelu-katub'a. Te ngaa mi dhèu bhelu-katub'a, dhoka mate lod'o di, ho ra ele iie aa'i. 23 Lamatua ad'u-ue j'ara ne, ho paj'uj'u mi dhèu ae, na, Nèngu neo pad'elo rasa kasia Na mi dhèu cahag'e. Rèngu se'e ka dhu Na hag'e nare mema le, sèna ka ded'e si padedha-dedha. Aa Na neo sèna ka dhèu re'a, na, Nèngu mesa Na ka dhu dedha risi aa'i. 24 Te èdhi se dhu Na pili nare le, ho j'aj'i dhèu unu Na. Èdhi se, cahag'e nèti dhèu Yahudi, aa cahag'e hari nèti dhèu leo rai kara. 25 Uru èèna, Lamatua pake dhèu nèti lii padhai Na, ngara na Hosea, ho suri dhèu leo rai kara sèra, peka na,
“Abhu dhèu dhu uru èèna, unu boe Ja'a,
te ngaa Ja'a neo paroa kore si, na,
‘Miu se, dhèu Ja'a.’
Aa abhu suku dhu uru èèna, Ja'a sue boe,
te ngaa Ja'a neo paroa kore si, na,
‘Miu se, suku dhu Ja'a sue.”’l
26 Hosea suri kahèi, na,
“Ètu èèna,
ètu era dhu Lamatua peka dènge si, na,
‘Miu se, j'aj'i boe dhèu Ja'a!’
Pe Lamatua dhu Mamuri èèna, neo peka dènge si, aku Nèngu na,
‘Limuri ne, miu j'aj'i le ana-ana Ja'a!”’m
Na peka sèmi èèna, lula Na kasia mi dhèu Yahudi boe sèra.
27 Dhèu nèti lii padhai Lamatua èci hari, nuka Yesaya, peka nèdhi le lula-nèti suku Isra'el, na,
“Masi ka dhèu Isra'el ca nau-ca nadha,
nuka sèmi salae dhasi,
te ngaa bèli-camèd'a Ama Lamatua patabuli rèngu nèti koasa sasala-sasigo ra,
dhoka dhèu ciki di.
28 Te èèna d'ai lod'o na,
ho Ama Lamatua pama'ète lii langu nèti dhèu aa'i-aa'i ètu rai-haha ne,
sama sèmi dhu Na peka mema le.
Te ngaa Na pamata heka,
te Na pamèci nare lai-lai!”n
29 Lod'o uru èèna, Yesaya peka le lula-nèti dhèu Yahudi sèra, aku nèngu na,
“Èdhi oto,
lula Ama Lamatua dhu Koasa Risi Aa'i èèna,
soro tèke sèna ka ana-èpu èdhi cahag'e abhu sod'a.
Te ladhe aad'o sèmi èèna,
na, èdhi se aad'o heka le,
nuka sèmi dhèu kota Sodom dènge kota Gomora sèra.”o
Lii Lolo Be'a hia suku Isra'el dhu ro'o boe nanene Lamatua
30 De èdhi neo peka ngaa? Èdhi neo peka, na, “Dhèu dhu Yahudi boe sèra mai nèti mia-mia. Uru èèna rèngu tenge boe j'ara ho pabe'a rèngu dènge Lamatua. Te ngaa limuri ne, ra pabe'a le dènge Ne, lula parcaya Yesus Kristus. 31 Te ngaa dhèu Isra'el sèra, neo ae le tenge j'ara sèna ka tao madhutu atora Musa, ho pabe'a rèngu dènge Lamatua, te ngaa j'aj'i boe.”
32-33 Nga tao ka rèngu bisa boe pabe'a dènge Lamatua? Lula rèngu dhodhoka neo tao madhutu atora di, sèna ka Na sèmi nare si nuka sèmi dhèu dhu d'ara mola, te ngaa rèngu parcaya boe Yesus Kristus. Hèia rèngu oe sèmi kadhunu sa, lèke “hadhu kadhunu” cue. Ne'e ne ka naneo nèti Sasuri Mola-Mèci Lamatua, dhu peka na,
“Ladhe ku sa ne'e!
Te Ja'a pamadhèdi le ca Dhèu
ètu ledhe Sion, nuka kota Yerusalem.
Dhèu ne nuka sèmi hadhu cue,
dhu dhèu kadhunu lèke Ne.
Te ngaa cee dhu parcaya Ne,
nèngu parluu boe makae.”
Hadhu ne, nuka Yesus. Te ngaa dhèu Isra'el tule eele Ne. Èèna na sama sèmi rèngu kadhunu, ka bèbha lula hadhu deo na.p