3 Masi ka èdhi tao madhutu atora Musa, èèna bisa boe patabuli èdhi nèti koasa sasala, lula èdhi se dhoka dhèu rai-haha biasa di dhu tao bhabhelu katub'a taruu. Te ngaa Lamatua ka dhu bhoke j'ara. Te Nèngu pua Ana Mone mesa Na mai, sèna ka j'aj'i dhèu rai-haha biasa, sama sèmi èdhi kahèi. Masi ka èdhi dhèu rai-haha biasa tao rupa-rupa sasala, te ngaa Yesus mesa-mesa Na dhu tao nèdhi boe sasala ngaa-ngaa. Ngaa hari, Nèngu j'aj'i korban, ho saku eele sasala-sasigo dhèu. 4 Ama Lamatua hia Kristus mai, sèna ka Na madhe, ho hud'i laa èdhi bisa tao j'ara aa'i-aa'i dhu lèke, madhutu Atora Lamatua. Ka limuri ne, èdhi tao j'ara-j'ara dhu mola madhutu dad'èi Roh Lamatua, aa tao heka madhutu dad'èi d'ara unu ti.

5 Dhèu dhu mamuri madhutu dad'èi d'ara unu ra, tao sèmi èèna lula ra pangee dhoka j'ara bhabhelu di. Te ngaa dhèu dhu mamuri madhutu dad'èi Roh Lamatua, rèngu dhoka pangee j'ara-j'ara dhu pakarej'e d'ara Roh Lamatua di. 6 Dhèu dhu soro tèke bhabhelu ator ngangee na, sama sèmi dhèu dhu nanene boe Roh Lamatua, nuka sèmi d'ara nèngu aad'o heka dènge Lamatua. Te ngaa dhèu dhu soro tèke Roh Lamatua ator ngangee na, mamuri na mola, aa d'ara na mera-milu.

7 Dad'èi èdhi dhèu rai-haha ne, palab'a bia dènge dad'èi Lamatua. Hèia èdhi to'o boe pahaha iisi ho nanene Lamatua, lula èdhi mesa ti bisa boe. 8 Te dhèu dhu soro tèke dad'èi ra ator rèngu, d'èi do d'èi boe, èèna bisa boe pakarej'e d'ara Lamatua.

9 Te ngaa miu se, dhèu dhu mamuri bhelu heka, madhutu dad'èi d'ara mi. Te ladhe abhu Roh Lamatua dhu mamuri ètu d'ara miu, miu tao j'ara-j'ara dhu pakarej'e d'ara Nèngu. (Te ngaa ladhe abhu dhèu dhu Roh Kristus pea boe ètu d'ara na, nèngu j'aj'i boe dhèu unu Lamatua.) 10 Ngi'u aae miu bèli-camèd'a madhe, lula sasala dhu miu tao uru sèra. Te ngaa, lula limuri ne Kristus mamuri ètu d'ara miu, roh miu mamuri taruu, lula Ama Lamatua cap le miu dhèu d'ara mola, hèia miu pabe'a hari le dènge Ne. 11 Te Ama Lamatua ka dhu pamamuri hari Yesus Kristus nèti mamadhe Na. De masi ka èdhi madhe, te ngaa ladhe Roh Lamatua dhu mamuri ètu d'ara èdhi, pe Nèngu pamamuri hari èdhi kahèi. Sasoa na, Na pamamuri èdhi sama sèmi Na pamamuri hari Kristus.^a

12 De sèmi ne'e a'ari aa'i-aa'i! Èdhi dhu dènge kèlu-g'ètu. Mage nèti kèlu-g'ètu ne, ho mamuri èdhi madhutu dad'èi dhèu rai-haha di, te ngaa èdhi hud'i mamuri madhutu dad'èi Ama Lamatua. 13 Te ladhe èdhi mamuri madhutu dhoka bhabhelu ètu d'ara èdhi di, tatu Lamatua soro kabodho mi èdhi, aa èdhi pasae tare huku madhe! Te ngaa ladhe èdhi soro tèke Roh Lamatua palaho koasa sasala ètu d'ara èdhi, èèna na èdhi heka bisa mamuri dhu mola kèna.

14 Dhèu dhu nanene Roh Lamatua, sèna ka Na ator si, na, dhèu se'e ka dhu j'aj'i ana-ana Ama Lamatua. 15 Ladhe èdhi soro tèke Roh Lamatua ator èdhi, Na tao boe èdhi sèmi ènu dhu mamuri dhoka dènge d'ara madha'u di. Uru èèna, èdhi mamuri sèmi èèna ka. Te ngaa, lula èdhi sèmi tare le Roh Lamatua ho uri èdhi, èdhi te'a le, na, èdhi j'aj'i le ana-ana Ama Lamatua. Nèti èèna ka, Nèngu d'èi tadèngi, ladhe èdhi paroa Ne, “Ama Pasue!”^b

16 D'ara èdhi unu ti ka dhu peka na, èdhi j'aj'i ana-ana Lamatua. Aa Roh Lamatua kahèi peka sèmi èèna. 17 Ladhe èdhi j'aj'i ana-ana Lamatua, èèna sasoa na, bèli-camèd'a èdhi sèmi tare pusaka Na, lula Nèngu j'aj'i Ama èdhi. Aa ladhe Ama hia pusaka mi Ana Na Kristus, èdhi kahèi sèmi palere-lere dènge Ne. Te ngaa abhu ca j'ara era: èdhi hud'i abhu ku j'aj'èra, sama sèmi Kristus kahèi dhu abhu le j'aj'èra, sèna ka bèli-camèd'a Lamatua ded'e èdhi padedha-dedha, nuka sèmi Nèngu ded'e padedha-dedha le Kristus.^c

18 Te ngaa madhutu a'abhu ja'a, j'aj'èra dhu èdhi pasae ne'e ne, kab'ua na aad'o, ladhe pasoro dènge dadedha dhu Lamatua neo pad'elo mi èdhi. 19 Madhutu iia-iia na, aa'i-aa'i dhu Ama Lamatua paj'aj'i ètu dedha-liru dènge rai-haha, dhu mate tatae neo rèdhi Na pad'elo ana-ana Na sèra, nuka cee! Te Na neo pad'elo dènge ra, dènge d'ara karej'e-karae. 20 Te Ama Lamatua paj'aj'i dedha-liru dènge rai-haha, aa dènge isi ra aa'i-aa'i, sèna ka tao madhutu dad'èi Na. Te ngaa ra madhutu boe, lula boe dad'èi rèngu, te ngaa nèti dad'èi Lamatua, te Na huku si sèna ka pa'ele iie si. Masi ka sèmi èèna, te ngaa abhu era maena era.^d 21 Te limuri ne aa'i-aa'i dhu Lamatua paj'aj'i sèra ele iie, aa abhu boe j'ara kalua. Te ngaa èèna na, Lamatua neo patabuli si, sèna ka ra ele iie heka, te ngaa rèngu bisa j'aj'i kapai titu kèna madhutu dad'èi Na. Lamatua kahèi neo ded'e padedha-dedha ana-ana Na, ho patabuli rèngu nèti dhu ele iie sèra.

22 Te èdhi te'a le, na, abhu j'aj'èra ae ètu rai-haha ne. Karèi nèti uru ka d'ai doe ne'e, aa'i-aa'i dhu Lamatua paj'aj'i sèra, taraa pèd'a, dhu ra tatae ho Lamatua tao aa'i-aa'i j'aj'i hiu. Èèna nuka sèmi bhèni dhu taraa kabake pèd'a neo nara iisi. 23 Mesa boe rai-haha di dhu tatae, te ngaa èdhi kahèi mate sèmi èèna. Masi ka Lamatua hia uru le Roh Na mi èdhi, èdhi taraa d'ara pèd'a kahèi. Te èdhi dhu tatae mate Ama Lamatua ded'e nare èdhi j'aj'i ana-ana dhu mola, dènge patabuli ngi'u èdhi aa'i-aa'i nèti dhu ele iie.^e

24 Lod'o Lamatua hia èdhi mamuri, Na peka kahèi, bèli-camèd'a Na tao sèmi ngaa. Te ngaa limuri ne, èdhi dhu tatae era lula dhae j'aj'i mèka. Ladhe èdhi tèdhi ka j'ara èci dhu j'aj'i le, èdhi pamata heka neo tèdhi j'ara èèna. Te dhèu parluu heka mate, sèna ka rèdhi j'ara dhu j'aj'i le, sina ma? 25 Te ngaa ladhe èdhi dhu tatae ho neo tèdhi ca j'ara dhu dhae j'aj'i mèka, èdhi pa'èra d'ara taruu.

26 Sèmi èèna kahèi, lod'o èdhi mate tae-tae èèna, Roh Lamatua ka dhu soru-bara èdhi, lula èdhi se dhu roe-bhilu, aa te'a boe sabaj'a dhu lèke. Te ngaa Roh Lamatua unu Na ka dhu sabaj'a gati èdhi, masi ka te'a dhoka taraa di, aa te'a boe sabaj'a peka lii ngaa. 27 Ama Lamatua mesa Na ka dhu ne'a aa'i mèu-mèu, dhu èdhi neo peka nèti d'ara èdhi. Nèngu ne'a ngangee Roh Na kahèi. Nèti èèna ka, Nèngu ne'a aa'i j'ara-j'ara dhu Roh Na neo peka ho soru-bara èdhi. Te ngangee Roh Lamatua, èci èèna ka dènge ngangee Ama Lamatua mesa Na. Aa Roh Na dhu sabaj'a mi Ama Lamatua, manèngi sèna ka Lamatua soru-bara dhèu parcaya sèra. Te Roh ne sabaj'a madhutu dad'èi Lamatua.

28 De limuri ne èdhi te'a le sèmi ne'e: Ama Lamatua tao aa'i-aa'i j'aj'i mi be'a hia dhèu dhu sue Nèngu. Te karèi nèti uru ka, Lamatua dhu ator nare le j'ara tasamia dhu Na neo tao hia mi rèngu. Aa Na paroa le rèngu, peka na, “Mai ka! Mai j'aj'i dhèu unu Ja'a!” 29 Lula uru-uru sèra, Na tadhe le rèngu aa hag'e nare si, sèna ka j'aj'i ca ropa dènge Ana Na, nuka Kristus. Te Kristus ka dhu Ana uuru, aa dhu leo sèra j'aj'i mi ari Na. 30 Dhèu dhu Lamatua tadhe karèi nèti uru sèra, Na paroa nare le, sèna ka j'aj'i dhèu unu Na. Aa rèngu kahèi, dhu uru èèna dhèu sala, Na tao si j'aj'i dhèu mola, sèna ka pabe'a hari dènge Ne. Aa Na ded'e si padedha-dedha.

31 De èdhi peka ngaa hari nèti j'ara se aa'i-aa'i ra? Ama Lamatua dhu bhiri nare èdhi. Aa ladhe sèmi èèna, dhèu cee dhu bisa lab'a hari èdhi? Abhu boe, sina ma? 32 Ama Lamatua taha boe Ana Na. Te ngaa soro Ana Na ho madhe j'aj'i korban, sèna ka soru-bara èdhi aa'i-aa'i ti. Lula Ama Lamatua taha boe Ana Na, èdhi bisa te'a, na, bèli-camèd'a Na hia iia èdhi j'ara aa'i-aa'i dhu be'a. Lèke, si?

33 Ele boe miu pangee, na, abhu dhèu dhu bisa pèci sasala asa dhèu dhu Lamatua hag'e nare sèra? Te ngaa aad'o, si? Te Lamatua mesa Na ka dhu cap èdhi j'aj'i dhèu mola dhu dènge heka sasala, ho èdhi pabe'a hari dènge Ne.

34 Ele boe miu pangee, na, abhu dhèu era dhu peka na, hud'i Lamatua huku ku dhèu dhu Na hag'e nare sèra. Te ngaa bisa boe! Te Yesus Kristus dhu madhe le. Risi-risi hari, Lamatua ka dhu pamamuri hari Ne nèti mamadhe Na. Hèia Lamatua ded'e Ne, sèna ka pamadhèdi Ne ètu era dhu kab'ua risi re baboa g'ana Na. Aa ètu èèna, Nèngu loe boe sabaj'a hia èdhi.

35 Ele boe miu pangee, na, abhu dhèu do, j'ara dhu leo, dhu bisa tao Kristus sue heka èdhi, do? Bisa boe! Masi ka èdhi paraga dènge lii langu do, sasusa do, manganga-mad'èu do, unu boe mèdha-papake do, mamadhe-mamopo do, dhèu neo pamadhe do, te ngaa Kristus sue èdhi taruu. Abhu boe èci sa dhu bisa pacèri èdhi nèti sasue Kristus. 36 Ètu d'ara Sasuri Mola-Mèci Lamatua suri tèke, peka na,

37 De masi ka èdhi paraga dènge sasusa sèmi ngaa èèna ka, te ngaa èdhi segi le, lula Kristus sue èdhi titu kèna!

38 Ja'a ke'a mèu le, na, abhu boe j'ara èci sa dhu bisa hag'e eele sasue Lamatua nèti dedha èdhi. Masi ka èdhi mamuri do, èdhi madhe do, abhu ana pajuu nèti sorga do, dhu rèd'u paredha do, abhu koasa do, lii langu dhu j'aj'i limuri do, dhu j'aj'i bèli-camèd'a do, 39 koasa ètu dedha-liru do, koasa ètu rai-haha do, mèdha leo dhu Lamatua tao nare le -- abhu boe èci sa dhu bisa pacèri èdhi nèti Ama Lamatua, dhu kai Ne, sèna ka sue ia ka èdhi! Lula èdhi dhu pa'èki le dènge Kètu èdhi, Yesus Kristus, dhu Lamatua pua mai.