2 Ja'a kore pakasame nèti atora dhèu èmu-kamali. Ladhe dhèu bhèni èci leo le èmu dènge mone èci, na, madhutu atora huku, dua ra j'aj'i dhèu èmu-kamali toke madhe. Te ngaa ladhe dhèu mone madhe uuru, bhèni balu ne pa'èki heka dènge atora deo na. Nèngu bisa hari leo-èmu. 3 Te ngaa ladhe bhèni ne leo hari èmu lod'o dhèu èmu na mamuri era, nèngu bersina. Te ngaa ladhe dhèu èmu na madhe le, atora nèti laleo èmu lèke heka nèngu. Bhèni ne j'aj'i dhèu kalora iisi. De ladhe na madhèdi hari dènge dhèu leo, madhutu atora, nèngu bersina boe.

4 Sèmi èèna kahèi dènge miu dhèu parcaya! Sèmi ne'e: Kristus madhe le. Èèna nuka sèmi miu madhutu madhe dènge Ne kahèi, hèia tèke eele mamuri miu dhu dhui. Ka atora huku lèke heka mi miu. Limuri ne atora huku lèke heka miu, te ngaa mamuri miu pa'èki dènge Kristus, dhu mamuri hari nèti mamadhe Na. Èèna cakaraa dènge bhèni balu dhu leo hari èmu. Ngaa-ngaa tao boe. De limuri ne aa'i-aa'i dhu miu ad'u-ue sèra, hia mi Lamatua.

5 Te uru èèna, èdhi tao dhoka madhutu dad'èi ngi'u aae èdhi di. Lula èdhi te'a atora, èèna ka dhu hia èdhi sisu atora sèra, ho tao j'ara-j'ara dhu lèke boe. De sasala èdhi sèra ka dhu tao Ama Lamatua soro kabodho mi èdhi. 6 Uru èèna, èdhi hud'i tao madhutu ku atora. Te ngaa limuri ne, atora ne lèke heka èdhi, dhu tèke eele le mamuri dhu dhui. Madhutu dad'èi j'ara dhui, na, Atora Musa dhu suri ètu d'ara Sasuri Mola-Mèci èèna, dhu èki tèke èdhi. Te ngaa madhutu dad'èi j'ara hiu, na, èdhi pa'èki heka dènge atora èèna. Te Roh Lamatua ka dhu uri èdhi! Nèti èèna ka, limuri ne èdhi sab'a dhoka hia Lamatua.

7 De èdhi neo peka ngaa? Neo peka, na, “Atora dhu Lamatua hia re Musa ne, sala!” Aad'o! Te ladhe ja'a ke'a mèu boe atora ne, tatu ja'a bisa boe ke'a j'ara-j'ara dhu lèke boe ètu d'ara ja'a. Nuka sèmi, abhu atora dhu peka na, “Mage d'ara neo mere mèdha-panyau dhèu.” Te ngaa dènge j'ara tasamia ka, ja'a bisa ke'a, na, d'ara neo sèmi èèna, sala, ladhe ke'a boe atora èèna? Bisa boe!^a 8 Te ngaa lula abhu atora dhu peka sèmi èèna, èèna nuka sèmi j'ara-j'ara bhelu ètu d'ara ja'a, sèna ka ja'a neo kore rupa-rupa mèdha-panyau dhèu. Ladhe dènge boe atora dhu kai, sasala na abhu boe koasa ho ator dhèu.

9 Ètu mamuri ja'a uru èèna, ja'a ke'a mèu mèka dad'èi nèti Atora Lamatua. Nèbhu-nèbhu ku, heka ke'a kèna. Nèti èèna ka, ja'a mulai mase'a, na, ja'a sisu le Atora sèra ka ad'u-ue sasala. De hua nèti sasala èèna ka, ja'a hud'i madhe ku. 10 Hèia d'ara ja'a roe bhilu, te ke'a na, ja'a mesa ku bisa boe pabe'a ja'a dènge Lamatua, ladhe tao madhutu dhoka Atora Na. De pantas ladhe ja'a abhu nanasa nèti Lamatua, nuka huku madhe èèna, lula ja'a sisu le Atora Na. Aa te ngaa Lamatua hia atora ne, sèna ka dhèu bisa mamuri dhu lèke. Te ngaa bagi ja'a, Atora ne ka dhu pa'ele iie ja'a, ka Lamatua soro kabodho mi ja'a. 11 Atora ne mema pad'elo j'ara mamuri dhu mola. Te ngaa abhu bhabhelu dhu sub'u ètu d'ara ja'a. Nèti èèna ka, ja'a tipu hari ngi'u ja'a mesa ku, ho pangee na, ja'a bisa pabe'a ja'a dènge Ama Lamatua, sad'i ja'a tao madhutu Atora Na. Hèia èèna nuka sèmi Atora mesa èèna ka dhu tao toke Lamatua mad'enge dènge ja'a.^b

12 De ladhe deo na dhèu peka na, “Atora dhu Lamatua hia re Musa èèna, sala,” na, ja'a dhaa na, “Aad'o! Atora Lamatua ne, mola-mèci!” Aa paredha aa'i-aa'i ètu d'ara Atora ne mola-mèci, lèke, aa be'a kahèi.

13 Ele boe miu pangee, na, Atora ne ka dhu tao Lamatua soro kabodho mi ja'a, do? Aad'o! Te masi ka ja'a ke'a Atora sèra, te ngaa ja'a nanene taruu bhabhelu ètu d'ara ja'a, nèti èèna ka ja'a tao sala. De nèti sasala ja'a èèna ka Lamatua soro kabodho mi ja'a. Atora ne mema be'a, te èèna ka dhu pad'elo j'ara-j'ara bhelu-katub'a dhu tao èdhi pacèri nèti Ama Lamatua. De ropa Lamatua pad'elo j'ara mamuri dhu lèke, Atora èèna ka dhu peka paled'a, na, bhabhelu ètu d'ara èdhi èèna, be'a boe.

14 Èdhi te'a, na, Atora dhu Lamatua pangèd'u re Musa, puru mai nèti Roh Lamatua. Te ngaa ja'a ne dhoka dhèu rai-haha biasa di, dhu dènge d'ara dhu èra boe. Hèia ja'a nanene j'ara-j'ara bhelu ètu d'ara ja'a, toke ja'a manahu asa d'ara sasala. Èèna nuka sèmi sasala dhu j'aj'i lamatua ja'a, aa ja'a j'aj'i mi ènu nèti sasala. 15 Pamalaa ja'a. Ja'a ke'a boe ngaa ka dhu ja'a tao. Te ja'a tao boe madhutu ngaa dhu ja'a neo tao. Te ngaa ja'a tao madhutu ngaa dhu ja'a d'èi boe tao.^c 16 Ladhe ja'a tao ngaa dhu ja'a neo boe tao, ja'a mangaku, na, Atora Lamatua ne lèke. 17 De ja'a boe ka dhu uri ngi'u ja'a. Te bhabhelu dhu muri ètu d'ara ja'a ka dhu uli ja'a!

18 Ja'a ke'a le, na, abhu boe j'ara dhu be'a muri ètu d'ara ja'a. Te ja'a ne dhèu rai-haha dhu d'ara karehe. D'èi do d'èi boe, ja'a bisa boe pakaseti iisi sèna ka tao dhu lèke. Ja'a d'èi tao dhu be'a, te ngaa j'aj'i boe! 19 Te ja'a d'èi tao dhu be'a, te ngaa j'aj'i boe tao. Aa ko'o boe tao dhu bhelu, te ngaa cèku tao! 20 De ladhe ja'a ad'u-ue ngaa dhu ko'o boe tao, èèna mai boe nèti ja'a mesa ku, te ngaa lula sasala dhu muri ètu d'ara ja'a.

21 Ne'e ne j'aj'i mi tate'a èci, sèmi ne'e ka: masi ka ja'a neo tao dhu be'a, te ngaa abhu bhabhelu dhu palab'a ètu d'ara ja'a. 22 Aa te ngaa madhutu iia-iia ètu d'ara ja'a karej'e titu kèna, ladhe ja'a pangee Atora Lamatua. 23 Te ngaa nuka sèmi abhu koasa ètu d'ara ja'a dhu pa'ele iie ja'a. Te ja'a neo tao dhu be'a, te ngaa j'aj'i boe. Èèna nuka sèmi koasa bhabhelu ètu d'ara ja'a dhu kèpe nare ja'a, ho laka-seti madhutu ne. 24 Ira ii, kasian, ee! Ja'a ne dhèu j'èra! Dhèu cee ka dhu bisa patabuli ja'a nèti koasa bhabhelu dhu muri ètu d'ara ja'a ne, dhu tao Lamatua mad'enge dènge ja'a?

25 Te ngaa malo-malo ka! Ama Lamatua unu Na ka dhu bhoke j'ara ho patabuli eele ja'a! Ja'a manèngi makasi ae-ae mi Lamatua, lula Kètu èdhi Yesus Kristus bisa hia mamuri mi ja'a! De ladhe ja'a mamuri maena dhoka mi ngi'u ja'a di, na, ja'a j'èra. Masi ka ja'a neo tao madhutu Atora Lamatua, te ngaa abhu koasa bhabhelu ètu d'ara ja'a, dadugu ja'a, sèna ka tao taruu dhoka bhabhelu-katub'a di.