3 Ele boe miu me'a boe, na, ropa sarani èdhi, èèna j'aj'i tadha, na, èdhi tèke eele le mamuri dhui, ho abhu mamuri hiu, nuka dhu pa'èki dènge Yesus Kristus. Èèna sama sèmi èdhi madhe le palere-lere dènge Ne. 4 Lod'o Kristus madhe, ra padhane Ne. Aa lod'o ra sarani èdhi, èèna nuka sèmi èdhi madhe kahèi, tèke eele mamuri dhui, hèia ra padhane èdhi. De Ama Lamatua pake koasa Na dhu kapai aae èèna, ho pamamuri hari Kristus nèti mamadhe Na. Ama Lamatua d'èi ladhe èdhi sèmi tare koasa Na kahèi, ho mamuri hari j'aj'i dhèu dhu hiu.^a

5 Te èèna sama sèmi èdhi madhe palere dènge Yesus. De èdhi dhu pa'èki dènge Ne, tatu bèli-camèd'a èdhi mamuri hari nèti mamadhe, sama sèmi Nèngu mamuri hari.

6 Uru èèna, èdhi j'aj'i dhèu dhu tao rupa-rupa sasala. Te ngaa mamuri èdhi dhu dhui èèna, madhe le, èci èèna ka dènge paku pamadhe èdhi ètu aj'u palolo-palèbha palere-lere dènge Kristus. Limuri ne, bhabhelu ètu d'ara èdhi dènge heka koasa ho uri èdhi. Limuri ne, èdhi aad'o heka ètu d'ara a'èki sèna ka tao hari sasala. Te èdhi sèmi heka ènu dhu dènge boe hak ho pili neo tao ngaa. 7 Ladhe dhèu dhu madhe le, nèngu bebas le, si? Abhu heka ngaa èci sa laka-seti ne, ho ad'u-ue hari sasala.

8 De, lula èèna nuka sèmi èdhi madhe le palere-lere dènge Kristus, na, èdhi parcaya, peka na, bèli-camèd'a èdhi mamuri taruu dènge Ne kahèi. 9 Èdhi te'a, na, lula Yesus Kristus mamuri hari le nèti mamadhe Na, de Nèngu bisa heka madhe hari. Te abhu boe èci sa dhu dènge koasa ho pamadhe hari Ne. 10 Na madhe ca tèka èèna ka, ho segi koasa nèti sasala. Te ngaa limuri ne Na mamuri ho pakab'ua Ama Lamatua.

11 Miu hud'i tao ku iisi sèmi èèna. Nuka sèmi miu dhu madhe le, nèti èèna ka sasala dènge heka koasa mi dedha miu. De limuri ne, miu hud'i mamuri ku ho pakab'ua Ama Lamatua, lula miu dhu pa'èki le dènge Yesus Kristus.

12 Bhabhelu ètu d'ara èu dhu dènge koasa. Baku soro tèke bhabhelu èèna ator èu, ka èu dhoka madhutu dad'èi ngi'u aae sèna ka èu tao bhabhelu-katub'a. Te èèna na ngi'u aae èu madhe. 13 Aa baku soro isi èu sèna ka tao j'ara dhu lèke boe, te èèna sala kahèi. Te ngaa pangèd'u mamuri èu mi Ama Lamatua di, sèna ka Nèngu ka dhu uri mamuri èu. Sama sèmi èu dhu madhe le, ka mamuri hari. De pake la mamuri èu kateme aa'i, sèna ka tao j'ara dhu lèke sèra, hia mi Lamatua. 14 Baku soro tèke sèna ka sasala ator miu, sama sèmi sasala ka dhu j'aj'i lamatua miu. De limuri ne miu hud'i mamuri madhutu ia ka atora Musa, sèna ka pabe'a hari dènge Ama Lamatua. Te miu dhu mamuri mola le, lula Lamatua dhu pad'elo le d'ara hua iia Na mi miu. De limuri ne d'ara hua iia Lamatua ka dhu uri mamuri miu.

15 De tasamia? Ele boe miu ngee, na, “Èdhi madhutu ia ka atora Musa, ho pabe'a hari dènge Ama Lamatua. De hud'i laa èdhi tao sala taruu di. Te Lamatua neo pad'elo d'ara hua iia Na era mi èdhi!” Miu pangee sèmi èèna ka, si? Ja'a pasanèd'e, èèna na sale!

16 Ja'a kore upama nèti ènu dènge lamatua na. Ladhe miu soro ngi'u mi ho sab'a hia dhèu èci, na, miu hud'i nanene, aa sab'a madhutu dad'èi na. Te nèngu èèna kètu miu, aa miu j'aj'i ènu na. Sèmi èèna kahèi, miu bisa pili neo madhutu mia. Te miu bisa pili, sèna ka ad'u-ue sasala, hèia miu j'aj'i mi ènu nèti sasala ne. Te ngaa ladhe miu pili sèmi èèna, miu tao iisi mi pacèri nèti Ama Lamatua. Do, miu bisa pili tao dhu lèke, dènge j'aj'i ènu dhu tao madhutu ngaa dhu Lamatua pua mi. Ladhe pili sèmi èèna, miu bisa pabe'a dènge Ne!

17 Uru èèna, miu soro tèke sèna ka sasala uri miu, te ngaa limuri ne miu nanene d'ara iiki miu, sèna ka tao madhutu ngaa dhu dhèu sarani aj'a-nori miu. Nèti èèna ka ja'a manèngi makasi mi Lamatua. 18 Te Lamatua dhu patalale le miu nèti koasa sasala, toke sasala sèra uri heka miu. De limuri ne, j'ara dhu lèke ka dhu uri miu.

19 Ja'a peka ne'e, pake conto dhu j'aj'i bèli-bèli, nèti lamatua dènge ènu, sèna ka miu me'a malai ngaa dhu ja'a peka-padhai. Uru èèna, miu hia ngi'u miu j'aj'i ènu sèna ka tao sala, dhu pakaj'alu miu madhutu atora Musa. Te ngaa limuri ne, miu hud'i hia ngi'u miu j'aj'i ènu dhu me'a dhoka tao dhu be'a di, dhu hia miu j'aj'i dhèu mola-mèci ètu madha Ama Lamatua.

20 Uru èèna, ropa miu dhoka nanene aa tao madhutu dad'èi sasala, miu mo'o boe nanene aa tao dhu lèke. 21 De ja'a neo karèi sèmi ne'e: Miu abhu ngaa dhu be'a nèti tatao miu sèra? Aad'o, sina ma? Aa te ngaa, ngaa dhu miu abhu sèra tao miu mi'e makae di. Lula miu tao sala sèmi èèna, ka dhu miu abhu, nuka Lamatua soro kabodho mi miu.

22 Te ngaa limuri ne, Ama Lamatua patalale eele le miu nèti lamatua uru èèna, de miu parluu ia ka tao sasala. De ne'e ne miu hud'i j'aj'i ku dhèu sab'a nèti Ama Lamatua. Lèpa lod'o limuri, pe miu j'aj'i mola-mèci hia Ne, aa abhu mamuri mola-mèci dhu d'ai mia-mia. 23 Te ropa èdhi tao sasala, Lamatua tule eele èdhi toke d'ai mia-mia. Èèna ka dhu èdhi abhu. Èdhi madhe kèna! Te ngaa Ama Lamatua bhoke le j'ara èci hia èdhi. Te Na neo hia iia èdhi mamuri mola dhu ma'ète boe. Èdhi abhu mamuri èèna, ladhe èdhi j'aj'i dhèu unu Kètu èdhi, Yesus Kristus.