3 Masi ka èdhi abhu rupa-rupa sasusa, te ngaa d'ara èdhi karej'e-karae taruu. Te èdhi te'a, na, j'èra uuru ku heka bisa taha dènge èra risi hari. 4 Ladhe èdhi èra ka ètu d'ara j'aj'èra, èèna ka dhu tao èdhi manahu boe, aa mamuri èdhi pakarej'e d'ara Lamatua. Ladhe èdhi mamuri sèmi èèna, èèna ka dhu pa'èra parcaya èdhi, peka na, pe Lamatua neo pad'elo d'ara hua iia Na mi èdhi. 5 Ladhe lalèka èdhi asa èra sèmi èèna, èdhi makae boe. Te Lamatua dhu bagi le hia èdhi, Roh Na dhu Mola-Mèci, sèna ka èdhi te'a mèu, na, Nèngu dhu sue èdhi titu kèna.

6 Nèngu pad'elo sasue Na sèmi ne'e ka: ropa èdhi mampu boe pabe'a dènge Lamatua, te'a boe, na, Lamatua dhu pua Kristus madhe pala èdhi. Te ngaa èdhi dhu mamuri pusi-pahae boe Lamatua. Lamatua pili lod'o dhu lèke sèna ka tao aa'i-aa'i sèra. 7 Pangee paie-iie ku! Te cadhui ku abhu dhèu dhu sadia madhe hia angalai na dhu d'ara mola. Ele boe abhu dhèu cahag'e dhu sadia madhe, ho soru dhèu d'ara be'a. 8 Te ngaa Ama Lamatua pad'elo le sasue Na ae-ae mi dedha èdhi. Lula, lod'o èdhi mamuri ètu d'ara sasala era, Kristus madhe le gati èdhi.

9 Ama Lamatua cap èdhi, dhèu d'ara mola dhu pabe'a dènge Ne, lula Kristus pasuti raa Na, sèna ka madhe gati èdhi. Aa te ngaa, ladhe dhèu ue sasala, Lamatua nasa. Te ngaa nèti mamadhe Kristus, èdhi dhu tao sala abhu heka huku.

10 Uru èèna, èdhi pamusu dènge Lamatua. Te ngaa Ana Ama Lamatua mesa Na madhe, ho cuhi d'ara Lamatua, sèna ka èdhi bisa padame dènge Lamatua. De limuri ne, èdhi pamusu heka, te ngaa pabe'a hari le. Risi-risi hari, Kristus dhu mamuri hari le, pe d'ai lod'o èle rai-haha ne, Na hia èdhi mamuri, sèna ka èdhi baku lèke hahuku. 11 Mesa boe èèna di! D'ara èdhi bisa karae, peka na, “Lamatua ne, dedha risi eele!” lula èdhi pa'èki dènge Ne. Èdhi bisa j'aj'i dhèu unu Na, lula Kètu èdhi, Yesus Kristus, madhe le pala èdhi, sèna ka èdhi padame dènge Ama Lamatua.

12 De karèi nèti uuru èèna ka, Adam ka dhu tao uru sasala-sasigo. Nèti èèna ka, Ama Lamatua hia boe ne mamuri taruu. Hèia karèi nèti lod'o èèna ka, dhèu aa'i-aa'i ètu rai-haha ne madhutu ad'u-ue sasala kahèi, èci èèna ka dènge nèngu. Aa, lula rèngu tao sala sama sèmi Adam, ka rèngu aa'i-aa'i ra hud'i madhe ku nuka sèmi nèngu kahèi.^a 13 Uru-uru sèra, lod'o Ama Lamatua papuru mèka Atora Na, dhèu tao le sasala dhu pale-lème le rai-haha ne. Te ngaa, lula dènge mèka Atora, ka abhu boe dhu ige sasala-sasigo dhèu sèra. 14 Mulai nèti Adam toke d'ai Musa sèmi rare Atora Lamatua èèna, dhèu aa'i-aa'i tatu madhe. Masi ka rèngu sisu boe paredha Lamatua dhu pangèd'u mi Adam, te ngaa ra tao rupa-rupa sasala. Nèti èèna ka, rèngu hud'i madhe ku, nuka sèmi Adam.

Ladhe èdhi pasoro Adam dènge Lamatua Yesus, abhu dhu sama, aa abhu dhu sama boe. Te Adam èci èèna ka dènge rupa dhu paj'uj'u asa raropa Yesus, dhu bèli-camèd'a èèna cèu mai. 15 Te ngaa sasala Adam, sama boe dènge babe'a dhu Yesus hia èdhi. Te dhèu èci, nuka Adam, sisu paredha Lamatua. Nèti èèna ka, dhèu aa'i-aa'i ra hud'i madhe ku. Te ngaa Dhèu èci hari, nuka Yesus Kristus, tao rupa-rupa babe'a hia mi èdhi, aa pamata boe dhèu b'ala babe'a Na. Nèti tatao ca Dhèu ne'e ka, pad'ai mi dhèu aa'i-aa'i ra, te Ama Lamatua d'èi tao be'a hia èdhi. 16 Dhu Ama Lamatua pangèd'u mi èdhi, sama boe dènge sasala dhu Adam tao èèna. Ropa Adam tao sasala, Ama Lamatua pama'ète lii langu, peka na “Èu sala. De èu hud'i abhu huku!” Te ngaa masi ka dhèu ue sasala ae titu kèna, Ama Lamatua, dhu parisa mamuri dhèu aa'i-aa'i, neo pad'elo d'ara hua iia Na era, aa pama'ète, na, “Èu sala boe. De èu bebas le, aa mu abhu heka huku. Mai, sèna ka pabe'a hari dènge Ja'a!” 17 De ca dhèu nuka Adam dhu tao sala, aa sisu paredha Lamatua. Nèti èèna ka, limuri ne dhèu aa'i-aa'i hud'i madhe ku. Te ngaa Dhèu èci hari, nuka Yesus Kristus dhu tao be'a. Lula tatao Na dhu be'a èèna ka, èdhi bisa pabe'a hari dènge Lamatua. Èèna nuka sèmi mèdha èci dhu Na hia iia d'ara mi èdhi. Na neo hia èdhi mamuri dhu lèke, sama sèmi èdhi j'aj'i angalai Dhèu Aae.

18 De nèti ca dhèu dhu ad'u-ue sasala, na bhoke j'ara ho Ama Lamatua babège eele dhèu aa'i-aa'i nèti madha Na. Aa nèti ca Dhèu leo hari dhu tao j'ara dhu lèke, Na bhoke j'ara ho dhèu aa'i-aa'i bisa pabe'a hari dènge Lamatua, sèna ka mamuri mola dènge Ne. 19 Madhutu a'abhu ja'a sèmi ne'e: Adam ne, ca dhèu dhu d'èi boe nanene Lamatua, ka sisu paredha Lamatua. Aa dhèu ae kahèi madhutu tao sasala, sama sèmi Adam. Aa Yesus ne, ca Dhèu dhu nanene Lamatua, ka tao madhutu dad'èi Lamatua. Nèngu ka dhu bhoke j'ara, sèna ka dhèu ae bisa pabe'a hari dènge Lamatua.

20 Ama Lamatua papuru Atora Na re Musa, ho dhèu aa'i-aa'i re'a mèu, mia dhu sala. Te ngaa ètu mia-mia sasala dhèu asa tabha ae. Ètu èèna kahèi, Lamatua pad'elo d'ara hua iia Na ae risi hari. 21 Uru èèna, bhabhelu ètu d'ara dhèu abhu koasa dhu uri rèngu, toke ra tao sasala dhu nèti mamadhe. Te ngaa limuri ne, j'ara be'a dhu Kètu èdhi, Yesus Kristus tao èèna, Ama Lamatua pake ho pad'elo d'ara hua iia Na mi èdhi. Aa j'ara be'a ne dènge koasa sèna ka ator èdhi kahèi, hèia èdhi bisa pabe'a dènge Ama Lamatua, aa mamuri mola taruu dènge Ne.