2 Èdhi bisa te'a sèmi ne'e: ladhe Abraham bisa pabe'a dènge Lamatua, lula na tao j'ara be'a, nèngu kahèi abhu hak ho koa iisi ètu madha dhèu rai-haha. Te ngaa ètu madha Lamatua, nèngu bisa boe bhoka hèb'a. 3 Te dhu suri ètu Sasuri Lamatua dhu Mola-Mèci, peka na,

4 Dhèu sab'a, tatu abhu gaji. Èèna na doi iia d'ara boe, te ngaa doi dhu lamatua na b'ae ne gati rui-j'aj'èra. Te sèra sa hak nèti dhèu sab'a. 5 Lamatua ka dhu unu hak, ho peka na, dhèu cee dhu parcaya Yesus Kristus bisa pabe'a hari dènge Ne, masi ka uru èèna, dhèu ne tao sala aa pahae boe Lamatua. Abhu boe j'ara èci sa, dhu dhèu bisa ad'u-ue, ho pabe'a ngi'u nèngu dènge Lamatua. Te dhèu hud'i parcaya uuru ku Yesus Kristus, heka Lamatua peka na, nèngu dhèu d'ara mola, aa Lamatua sèmi nare ne.

6 Dhèu aae Daud peka kahèi, na, d'ara dhèu karèj'e-karae, ropa Ama Lamatua peka na, dhèu se dhu d'ara mola, masi ka rèngu tao boe ngaa-ngaa. Te Daud suri, na,

9 De ele boe miu pangee, na, dhodhoka dhèu Yahudi dhu suna di, dhu bisa oto, ho ra pabe'a dènge Lamatua, si? Aa dhèu suku leo dhu suna boe, bisa boe, si? Aad'o! Ngangee sèmi sèra sala! Nèti èèna ka, ji'i dhu peka mema-mema le, lula Abraham parcaya Lamatua, ka Lamatua cap ne, dhèu d'ara mola dhu pabe'a dènge Nèngu. 10 Lod'o mia Lamatua cap Abraham sèmi èèna? Lod'o dhu na suna le, do dhae? Dhu mola-mola, nuka lèke lod'o dhu na suna mèka.

11 Tare'a! Lod'o Abraham suna mèka, Ama Lamatua cap nare le nèngu dhèu d'ara mola dhu pabe'a dènge Lamatua. Nèbhu ku, heka na suna kèna, ho j'aj'i tadha, na, nèngu j'aj'i le dhèu dhu lèka Lamatua. Dènge sèmi èèna ka, Abraham j'aj'i dhèu oti j'ara hia dhèu aa'i-aa'i dhu parcaya Lamatua. Te Lamatua sèmi nare dhèu dhu parcaya, ho ra pabe'a dènge Lamatua, masi ka ra suna, do aad'o.^c 12 Abraham bhoke j'ara kahèi hia èdhi dhèu Yahudi dhu suna le. Lula boe nèti èdhi suna, te ngaa lula èdhi parcaya Kristus sama sèmi Abraham parcaya Lamatua lod'o dhu na suna mèka.

13 Ama Lamatua dhu pa'èki pajaji dènge Abraham, dènge ana-èpu na, peka na, nèbhu-nèbhu rai-haha kateme j'aj'i mi pusaka rèngu. Lamatua pajaji sèmi èèna, lula Abraham parcaya Ne, aa Lamatua cap ne dhèu d'ara mola dhu pabe'a dènge Ne. Te ngaa Lamatua pajaji boe sèmi èèna, ladhe dhoka Abraham tao madhutu Atora Lamatua.^d

14 Te ladhe dhèu dhu madhutu dhoka Atora Lamatua di, bisa sèmi rare pusaka dhu Lamatua moa, sasoa na, parcaya mi Lamatua parcuma di. Aa lii pajaji Lamatua èèna guna boe ngaa-ngaa.^e 15 Ètu era mia abhu Atora Lamatua, ètu èèna kahèi dhèu sisu Atora èèna. Aa ladhe dhèu sisu Atora Lamatua, na, Lamatua nasa, hèia Na huku si. Aa ladhe Atora Lamatua aad'o, tatu dhèu sisu boe.

16 Nèti èèna ka, èdhi hud'i parcaya ku Lamatua. Èèna ka dhu risi eele nèti aa'i-aa'i. Te Lamatua d'èi pad'elo dènge mola-mola d'ara hua iia Na mi dhèu dhu parcaya Ne. Aa ladhe èdhi lèka Ne, sama sèmi Abraham, tatu èdhi abhu ngaa dhu Na moa, masi ka èdhi dhèu Yahudi dhu tao madhutu Atora Na, do aad'o. De èdhi aa'i-aa'i dhu parcaya Ne, sama sèmi ana-èpu Abraham.^f 17 Lamatua dhu peka tèke le ètu d'ara Sasuri Mola-Mèci Na, aku Nèngu na, “Ja'a ad'u-ue sèna ka èu j'aj'i bèi-baki nèti suku ae-ae.” Abraham parcaya Ama Lamatua. Nèbhu-nèbhu ka Ama Lamatua tao paj'aj'i lii moa Na. Nèngu kahèi dhu pamamuri hari dhèu madhe. Lamatua dhoka padhai lii di, ka ngaa-ngaa dhu aad'o, j'aj'i dènge.^g

18 Masi ka Abraham dènge mèka ana, te ngaa na lèka Ama Lamatua, aa tatae Lamatua tao madhutu lii pajaji Na. Nèti parcaya èèna ka, Lamatua tao ne j'aj'i mi “bèi-baki nèti suku ae-ae.” Èèna nuka sèmi dhu suri ètu d'ara Sasuri Mola-Mèci, na, “Ana-èpu ae-ae bèli-camèd'a mai nèti èu.”^h 19 Abraham lèka èra Lamatua, masi ka ne'a nèngu dhu heka bhora le, umur dhu cangasu tèu kèna. Era ana nèti Sara dhu bèdho mèno le, aa na heka d'ai seli le.ⁱ 20 Te ngaa lalèka Abraham kura boe, ho pangee na, Lamatua bisa boe tao madhutu lii padadha Na. Parcaya na asa tabha èra mi Lamatua, aa na ded'e padedha kolongara Lamatua. 21 Abraham lèka tare'a-re'a, ngaa dhu Lamatua padhadha le, Nèngu bisa tao. 22 Nèti èèna ka, Ama Lamatua cap Abraham, peka na, dhèu d'ara mola dhu pabe'a dènge Nèngu.

23 Sasuri Mola-Mèci Lamatua peka na, Lamatua ige boe sèmi èèna hia Abraham mesa na, 24 te ngaa mi èdhi kahèi! Te ladhe èdhi parcaya Lamatua, Na cap èdhi kahèi dhèu d'ara mola dhu pabe'a dènge Ne. Lamatua ka dhu pamamuri hari Kètu èdhi, Yesus nèti mamadhe Na. 25 Yesus madhe, lula èdhi ad'u-ue sasala-sasigo. Hèia Na mamuri hari, ho bhoke j'ara, sèna ka èdhi bisa pabe'a hari dènge Ama Lamatua.^j