Masi ka dhèu Yahudi dènge hak ho abhu pusaka nèti lii padhadha Lamatua, te ngaa j'ara èèna patabuli boe rèngu nèti koasa sasala-sasigo ra
3
Ladhe sèmi èèna, dhèu Yahudi dhu suna sèra, a'oto na ngaa? Ele boe miu pangee, na, dhèu Yahudi abhu ae dènge dhu be'a risi nèti dhèu Yahudi boe, do? 2 Tare'a! De dhèu Yahudi abhu oto ètu j'ara ae-ae. Ka èci, lula Lamatua pangèd'u sasab'a sa dhèu Yahudi, ho suri aa j'aga paie-iie Lii Holo-Nori Na. 3 De tasamia? Miu dhu pangee, na, Ama Lamatua bisa boe tao madhutu ngaa dhu Na padhai le, lula abhu dhèu Yahudi cahag'e dhu parcaya boe Nèngu, do? 4 Bisa boe! Masi ka dhèu aa'i-aa'i ètu rai-haha ne kapod'e-kabèli, te ngaa Ama Lamatua padhai lii dhu mola taruu! Sanèd'e, te dhu suri tèke ètu Sasuri Mola-Mèci lula-nèti ngi'u Lamatua, peka na,“Abhu dhèu dhu pèci sasala, peka na,
Nèngu pama'ète lii langu dhu bia cabèka.
Te ngaa pe rèngu re'a, na,
ngaa dhu Na peka-padhai èèna lèke tare'a.
Nèngu tatu segi,
lula Na bisa boe padhai lii sale.”a
5 Te ngaa ladhe èdhi tao sala, èèna ka dhu peka paled'a mi dhèu aa'i-aa'i, ngaa dhu Lamatua tao èèna mema lèke tare'a. Ladhe sèmi èèna, èdhi peka ngaa hari? Neo peka, na, Lamatua adil boe ladhe Na huku èdhi, do? (Te abhu dhèu cahag'e dhu padhai lii sèmi èèna.) 6 Bisa boe! Lamatua sala boe ladhe Na huku èdhi. Lula Na dènge hak ho huku dhèu dhu tao sala ètu rai-haha ne.
7 De ladhe ja'a padhai lii monya, èèna peka na, hahuku Lamatua lèke tare'a. Ladhe ja'a pad'elo dadedha Na sèmi èèna, nga tao ka Nèngu parisa mamuri ja'a, ka pama'ète lii langu ja'a, na, ngaa dhu ja'a ad'u-ue ne, sala? 8 Baku sèmi èèna! Ladhe madhutu ka ngangee sèmi èèna, miu madhutu dhèu dhu peka, na, “Hud'i laa èdhi tao bhelu-katub'a ae risi hari, sèna ka j'ara be'a asa tabha ae kahèi!” Dhèu dhu peka sèmi èèna, pantas abhu huku. Te ngaa abhu dhèu dhu pa'ele iie kolongara ja'a, peka na, ja'a ka aj'a dhèu sèmi èèna.
Abhu boe ca dhèu sa dhu d'ara mola, te dhèu aa'i-aa'i tao sala
9 De tasamia? Miu pangee, na, èdhi dhèu Yahudi be'a risi nèti dhèu Yahudi boe, do? Aad'o! Te ja'a peka le dènge miu, na, dhèu aa'i-aa'i dhu manahu le asa d'ara sasala, masi ka dhèu Yahudi, do dhèu Yahudi boe. 10 Te dhu suri mema ètu d'ara Sasuri Ama Lamatua dhu Mola-Mèci, na,
“Abhu boe ca dhèu sa dhu mamuri mola taruu.
Èci sa aad'o!
11 Abhu boe ca dhèu sa dhu re'a mèu j'ara-j'ara Ama Lamatua.
Abhu boe èci sa dhu neo patadha dènge Lamatua.
12 Rèngu pakaj'èu le nèti j'ara mamuri dhu mola.
Ka rèngu se guna heka mi ngaa èci sa.
Abhu boe ca dhèu sa dhu pad'elo d'ara be'a.
Èci sa aad'o hèi!b
13 Lii padhai ra dhu hèu bhob'o,
nuka sèmi ro'a dhèu madhe dhu ra kèi hari.
Nèti d'ara hèb'a ra kalua dhoka lii kapod'e-kabèli di.
Lii dhu kalua nèti d'ara hèb'a ra,
nuka sèmi raco mege.c
14 Hèb'a ra re'a dhoka padhèd'a di,
aa lii padhai ra karehe, dhu papèd'a d'ara dhèu,
te èèna ka dhu mai nèti d'ara rèngu dhu karehe.d
15 Re'a boe madha'u ladhe pamadhe dhèu.
16 Sad'i rèngu ètu mia èèna ka, na,
lii langu, muri ètu èèna,
aa pasusa rupa-rupa mi dedha dhèu.
17 Mamuri ra dhu re'a boe padame,
aa re'a boe mamuri dènge d'ara dhu mau.e
18 Rèngu se bisa boe taha rare d'ara ra,
lula dènge boe d'ara madha'u ciki sa mi Ama Lamatua.”f
19 De èdhi te'a, na, Lamatua hia Atora Na mi dhèu dhu pahaha iisi mi Atora sèra. Dènge sèmi èèna, dhèu abhu boe alasan ho siri iisi, peka na, rèngu se, dhèu d'ara mola. Ladhe dhèu aa'i-aa'i ètu rai-haha ne hud'i paraga ku dènge Ama Lamatua, te Nèngu ka dhu j'ue lii langu dhu peka na, sala do aad'o. 20 Nèti èèna ka, abhu boe ca dhèu sa dhu bisa peka, na, “Ama Lamatua cap ja'a, dhèu d'ara mola, lula ja'a tao madhutu aa'i Atora Lamatua.” Bisa boe! Te Atora Lamatua ka dhu pad'elo, na, èdhi aa'i-aa'i ti tao sala.g
Hud'i parcaya uuru ku Lamatua Yesus, heka Ama Lamatua cap èdhi, dhèu d'ara mola
21 Baku malaa dènge naneo Lamatua dhu paj'uj'u j'ara, ho èdhi bisa pabe'a hari dènge Nèngu. Dhu lèke, ladhe èdhi bisa pabe'a dènge Lamatua, te ngaa lula boe nèti èdhi tao madhutu Atora Na. Te Atora Na dhu suri le sèmi èèna, aa dhèu rèti lii padhai Na uru-uru sèra, peka sèmi èèna kahèi ètu d'ara Sasuri Mola-Mèci Na. 22 Ama Lamatua peka, na, èdhi dhèu d'ara mola dhu pabe'a dènge Ne, ropa èdhi parcaya Yesus Kristus. Nèngu dhu hag'e boe rèhu dhèu, te Na tao sèmi èèna mi dhèu aa'i-aa'i dhu parcaya Yesus.h
23 Te dhèu aa'i-aa'i tao sala. Nèti èèna ka, dhèu dhu tenge-tenge j'ara ho neo pabe'a ngi'u rèngu dènge Ama Lamatua, bisa boe pamèci dènge dadedha Lamatua. 24 Masi ka sèmi èèna, te ngaa Ama Lamatua mesa Na ka dhu pad'elo d'ara hua iia Na, aa pama'ète, peka na, èdhi dènge heka sasala. Na sèmi nare èdhi, lula Yesus Kristus sui nare le èdhi nèti sasala-sasigo èdhi.
25-26 Ama Lamatua paj'uj'u le Yesus, sèna ka j'aj'i korban papo makae ho saku eele sasala-sigo èdhi. Te ngaa èdhi hud'i parcaya Ne, na, Nèngu ka dhu tago nare hahuku èdhi. Ka Na pasuti raa Na, aa madhe gati èdhi. Dènge j'ara ne'e, Ama Lamatua peka na, ngaa dhu Na pama'ète ne, lèke tare'a. Uru èèna, d'ara Lamatua taleo titu kèna, hèia Na pama'ète ho pabhèlu eele sasala-sasigo dhu dhèu ad'u-ue le. Te ngaa ladhe Na huku boe dhèu dhu tao sala, Nèngu adil boe. De Na bhoke j'ara, sèna ka Yesus Kristus dui nare hahuku nèti dhèu sala. Limuri ne, Lamatua pad'elo mi dhèu aa'i-aa'i, peka na, Nèngu tao dhu be'a taruu. Ka dhèu sala aa'i-aa'i ra dhu parcaya Yesus, Na cap si dhèu mola.
27 De tasamia? Ele boe miu pangee, na, miu bisa padhai lii lela dedha, lula Ama Lamatua sèmi nare miu, do? Bisa boe! Miu neo pad'elo Atora èci dhu tao pabe'a miu dènge Lamatua, do? Miu pangee, na, Lamatua sèmi nare miu lula miu tao dhu be'a, do? Bisa boe! Èdhi te'a dhoka paj'uj'u mi Atora dhu peka na, Ama Lamatua sèmi nare èdhi, lula èdhi parcaya Yesus. Nèngu na, kèna!
28 Nèti èèna ka, èdhi te'a sèmi ne'e: dhèu bisa pabe'a dènge Lamatua, nèti ra parcaya Yesus, nèti boe rèngu tao madhutu Atora di.
29 De ja'a neo karèi sèmi ne'e: Ama Lamatua sèmi nare dhoka dhèu Yahudi di, do Nèngu sèmi nare dhèu leo kahèi? Lèke! Na sèmi nare aa'i!
30 Te Ama Lamatua ne, dhoka èci di. Aa dhoka j'ara èci di, dhu Na sèmi nare sèna ka èdhi dhèu rai-haha ne bisa pabe'a dènge Ne. Nuka èdhi hud'i parcaya Kristus. J'ara ne pala mi dhèu Yahudi dènge dhèu Yahudi boe kahèi.i
31 De ja'a neo karèi sèmi ne'e: ladhe èdhi parcaya Lamatua, èèna na tao Atora Na j'aj'i heka ngaa-ngaa, do? Aad'o! Dhu lèke ka, parcaya èdhi èèna ka dhu tao pamèci Atora Na.