Lamatua nasa kahèi dènge dhèu Yahudi dhu Na hag'e nare le
2
Èu dhu tadèngi le rupa-rupa j'ara bhabhelu-katub'a deo na, si? Hèia èu pangee, na, “Bhabhelu dhèu se'e seli-kolane!” Ladhe èu pangee le sèmi èèna, na, mu mage-mage, ee! Te èu mesa mu bhelu sèmi èèna kahèi. Nèti èèna ka, èu dènge boe alasan ho siri iisi èu, masi ka èu ne cee èèna ka. Ladhe èu peka, na, lèke tare'a dhèu dhu bhelu sèra abhu huku, te ngaa baku bhèlu, na, èu mesa mu ka pèci sasala mi ngi'u èu unu mu. Te èu tao sala sèmi èèna kahèi!a 2 Te ngaa èdhi te'a, peka na, ladhe Ama Lamatua hia huku mi dhèu bhelu sèra, tatu Nèngu pama'ète lii langu ra dènge mola. 3 Do, tasamia? Ele boe èu pangee, na, “Lèke tare'a ladhe dhèu dhu tao bhelu-katub'a sèra abhu hahuku nèti Lamatua.” Aa te ngaa èu kahèi dhu ad'u-ue bhabhelu sama sèmi rèngu. Te èu pangee, na, “Ja'a abhu boe hahuku nèti Lamatua.” Ngangee èèna mai nèti mia?4 Ama Lamatua dhu pad'elo d'ara hua iia Na mi èu. Aa Na mau-mau era, nèti tatao èu sèra. Te ngaa tasamia ka èu pahahe Ne? Ele boe èu me'a boe, na, Lamatua dhu pad'elo d'ara hua iia Na mi èu ne, sèna ka èu tèke eele sasala èu, aa lèpa hari asa Nèngu.
5 Te ngaa èu ne kètu hadhu, aa mo'o boe nanene! Aa mo'o boe core eele sasala èu, ciki sa hèi! De èu mesa mu ka dhu ad'u ho abhu huku dhu bia risi hari. Te ropa d'ai lod'o èle rai-haha ne, Lamatua tai-dadoo mamuri dhèu aa'i-aa'i. Aa èèna na dhèu aa'i-aa'i re'a, na, Lamatua pama'ète lii langu dènge mola. Pe Na huku èu bia, lula Na sèmi nare boe tatao èu sèra. 6 Mamuri èu tasamia èèna ka, pe Lamatua ka dhu b'ala madhutu tatao èu.b
7 Te dhèu dhu tao j'ara be'a taruu-taruu, Lamatua hia ne mamuri dhu mola d'ai mia-mia. Rèngu abhu pakab'ua nèti dhèu kahèi, kolongara hua iia, dènge mamuri taruu dènge Ne toke d'ai mia-mia la'e. 8 Te ngaa Ama Lamatua sèmi nare boe dhèu dhu tao bhelu-katub'a. Nèngu nasa titu kèna dènge si, te re'a dhoka palab'a di. Dhèu se tao boe madhutu j'ara dhu lèke, te re'a dhoka tao madhutu j'ara dhu bhelu di.
9 Dhèu aa'i-aa'i dhu tao bhelu, bèli-camèd'a abhu j'aj'èra. Masi ka dhèu Yahudi, do dhèu Yahudi boe èèna ka, aa'i-aa'i ra pasae rare.c 10 Te ngaa dhèu aa'i-aa'i dhu tao j'ara dhu be'a, bèli-camèd'a Lamatua ded'e padedha-dedha, aa pakab'ua si, sèna ka ra abhu mamuri mera-milu. Masi ka dhèu Yahudi, do dhèu Yahudi boe èèna ka, rèngu aa'i-aa'i ra abhu. 11 Te Lamatua dhu hag'e boe rèhu dhèu!d
12 Atora Lamatua lèke mi dhèu aa'i-aa'i. Ladhe abhu dhèu dhu re'a boe Atora ne, dhu tao sala, èèna na cèri eele nèngu nèti Lamatua. Aa ladhe dhèu dhu re'a le Atora ne, te ngaa na tao sala, pe Lamatua pake hari Atora ne, ho pama'ète hahuku na. Rèngu cèri eele nèti Lamatua kahèi, lula ra sisu le Atora Na. 13 Neo pabe'a dènge Ama Lamatua, ladhe nanene dhoka Atora di, èèna d'ai mèka. Te hud'i tao madhutu ku Atora Na, heka Na sèmi nare si kèna. De baku dhoka nanene di!
14 Masi ka dhèu Yahudi boe sèra, re'a boe isi nèti Atora Lamatua, te ngaa abhu kahèi nèti rèngu dhu tao madhutu Atora ne. Lula d'ara iiki rèngu unu ra ka dhu peka, mia ka dhu lèke, aa mia ka dhu sale. 15 Dènge j'ara ne rèngu pad'elo, na, Atora Lamatua dhu suri ètu d'ara ra, nuka sèmi loa hèngu dhu Lamatua manènu ètu d'ara ra. D'ara rèngu mesa ra, ka dhu tai-dadoo ngaa dhu rèngu ad'u-ue. Hèia ngangee rèngu unu ra ka dhu galaa, na, rèngu dhu tao sale, aa peka na abhu dhu tao lèke. 16 De lod'o Ama Lamatua ded'e Yesus Kristus j'aj'i Dhèu Pama'ète Lii Langu, Na parisa toke lutu j'ara-j'ara dhu pahuni ètu d'ara dhèu. Ja'a aj'a sèmi ne'e, sama sèmi dhu suri le ètu d'ara Lii Lolo Be'a Lamatua.
Masi ka dhèu Yahudi tao madhutu Atora Lamatua, te ngaa j'ara èèna patabuli boe rèngu nèti koasa sasala-sasigo ra
17 De miu dhèu Yahudi, tasamia? Miu d'èi padedha iisi, peka na, dhoka miu di dhu kèpe Atora Lamatua, dhu Na papuru mai re Musa, sina ma? Miu kahèi d'èi koa iisi, lula pa'èci miu dènge Ama Lamatua. 18 Tare'a! Miu dhu me'a le, dad'èi Lamatua. Miu dhu me'a kahèi, mia ka dhu be'a risi. Miu me'a mèu le j'ara se aa'i-aa'i, lula mese agama ka dhu aj'a-nori miu nèti Atora Lamatua. 19 Miu padedha iisi, peka na, miu bisa paj'uj'u j'ara hia dhèu dhu re'a boe lasi sa mia. Miu tao iisi nuka sèmi saraa dhu pasaraa dhèu dhu mamuri ètu d'ara maroga. 20 Lula miu kèpe pa'èra Atora Lamatua, ka miu pangee, na, miu me'a aa'i mèu-mèu, aa miu kèpe pa'èra-èra aa'i dhu lèke, sina ma? Nèti èèna ka, miu pangee, na, miu bisa nori dhèu goa dènge ana iiki dhu re'a boe ngaa-ngaa.
21 De ja'a neo karèi sèmi ne'e: miu d'èi aj'a dhèu leo, te ngaa tasamia ka miu mo'o boe nori ngi'u mi?! Miu d'èi ca'e mimbar, ho peka na, “Dhèu baku mana'u.” Te ngaa, nga tao ka miu unu mi mana'u?! 22 Miu aj'a, na, “Baku tao j'ara makae dènge dhèu dhu j'aj'i boe dhèu èmu-kamali mu.” Te ngaa, nga tao ka miu mesa mi tao j'ara makae sèmi èèna?! Miu mesa mi d'èi boe mèdha sogo-tagu, te ngaa nga tao ka miu mana'u pahuni mèdha nèti d'ara èmu nidhu? 23 Miu d'èi lole pakapai Atora Lamatua, te ngaa nga tao ka miu mesa mi sisu Atora ne, aa pamakae Lamatua?! 24 Te karèi nèti uru ka, dhu suri tèke le ètu d'ara Sasuri Mola-Mèci, na, “Lula bhabhelu miu dhèu Yahudi, nèti èèna ka dhèu leo kara pahahe kolongara Lamatua.”e
Masi ka dhèu Yahudi suna, te ngaa j'ara èèna patabuli boe rèngu nèti koasa sasala-sasigo ra
25 Miu dhèu Yahudi hud'i suna ku madhutu Atora Lamatua, sina ma? Èèna j'aj'i mi tadha, peka na, miu dhèu Yahudi dhu unu hak, ho sèmi mere lii padhadha Lamatua. Te ngaa ladhe miu sisu Atora Lamatua, na, Lamatua sèmi nare boe miu. Miu j'aj'i èci èèna ka dènge dhèu Yahudi boe, aa sama sèmi dhèu dhu suna rèdhi mèka. 26 Pangee paie-iie! Te ladhe dhèu dhu suna boe, tao madhutu Atora Lamatua, èèna na Lamatua sèmi nare ne, nuka sèmi dhèu Yahudi dhu suna, si? 27 Te ngaa baku pamud'e! Te ladhe dhèu Yahudi boe, dhu suna boe, tao madhutu Atora Lamatua, èèna na ra pad'elo ngaa? Ra pad'elo sasala miu, peka na, dhèu Yahudi dhu suna, sisu Atora Lamatua, masi ka miu dhu unu le Atora ne karèi nèti uru ka.
28 Baku pangee, na, dhèu dhu j'aj'i ana-èpu Abraham, aa dhu suna ètu ka'uri, èèna ka dhu tao ne j'aj'i dhèu unu Lamatua dhu lèke. Aad'o! 29 Dhu j'aj'i dhèu unu Lamatua dhu lèke, nuka dhèu dhu pabe'a dènge Lamatua. Te suna dhu lèke, èèna ka hia dhèu j'aj'i ana Ama Lamatua, dhu tao boe tadha ètu ka'uri, te ngaa tadha ètu d'ara dhèu, dhu Roh Lamatua tao. Dhèu rai-haha koa boe dhèu sèmi sèra, te ngaa Lamatua ka dhu ded'e padedha si.f