4 Ropa dhèu Malta sèra ladhe rèdhi mege dhu dhone-dhone ètu kacui-aai Paulus, ka ra paka'uu èci dènge èci, peka na, ‘‘Èle boe dhèu ne, tuka pamadhe dhèu. Ka masi ka nèngu madhe boe dhasi, te ngaa ne'e ne d'ai unu nèngu kèna. Nèti èèna ka, nèngu bisa heka mamuri! Lula cee dhu ad'u-ue bhabhelu, nèngu ka dhu sèmi nare babia na.’’ 5-6 Dhèu se pangee, na, tatu ciki oo'e hari, kacui-aai Paulus bai, ho na madhe dènge ka.

Te ngaa Paulus pici mege ne asa d'ara ai la'e. Aa na rasa boe pèd'a ciki sa. Ka dhèu se'e tatae ku nèbhu j'oo aae, te ngaa Paulus ngaa-ngaa tao boe. Hèia ra pangee, na, ‘‘Èle boe dhèu ne, dewa!’’

7 Kaj'èu boe nèti era èèna, abhu èmu-èmu gubernur ètu rai dhu taleo. Gubernur èèna, ngara na Publius. Na mai soru ji'i ètu nebhe dhasi, ka gale nèti ji'i la'a pea ètu èmu na. Ètu èèna, na ladhe-leru ji'i tèlu lod'o.

8 Lod'o èèna, ama d'èlu gubernur pèd'a maringi sagoro, dènge pèd'a po'e taruu. Ka Paulus la'e ladhe ne asa d'ara kama na. Hèia na soro kacui-aai na g'ag'e dhèu pèd'a ne, ho na sabaj'a hia ne. Ka na èle dènge ka. 9 Ropa ladhe rèdhi ama d'èlu gubernur èle le, ka dhèu pèd'a dhu leo sèra mai asa Paulus. Ra manèngi tulu nèti nèngu, ka na puri-pa'èle si. 10a Hèia dhèu se pad'elo tadha makasi rèngu, dènge rèti mèdha ae titu kèna hia ji'i.

10b-11 Ji'i pea ètu Malta tèlu hèru, toke pa'èle hèru dhasi-ngèlu aae. Lod'o èèna, abhu kapa cue nèti Alexandria dhu karèi nèti hèru dhasi aae ngèlu aae panahu le ètu èèna. Ngara kapa na, Ana Kembar,^a lula ètu kaduru kapa ne, ra tao patung dewa kembar. Ka ji'i neo ca'e kapa èèna, ho la'a taruu asa Roma. De lod'o ji'i neo ca'e asa dedha kapa, dhèu Malta sèra hia ji'i parèko j'ara dènge mèdha leo dhu ji'i parluu ètu d'ara kakako.

12 Ji'i kako mau-mau, ka ji'i d'ai kota Sirakusa, ètu pulu Sisilia. Hèia ji'i panahu ètu èèna, tèlu lod'o. 13 Nèti èèna, ji'i kako oro-oro re sebhe pulu Sisilia, ka ji'i d'ai kota Regium. Asa bèli èèna, ngèlu balèu mèdhu aae, hèia ji'i kako taruu, ka d'ai malai. Asa camèd'a èèna, ji'i d'ai kota hèb'a-namo cue, ngara na Putioli. 14 Ètu èèna, ji'i puru tèke eele kapa èèna. Hèia ji'i la'a tenge dhèu sarani dhu ètu era sèra. Ropa paraga dènge ra, ka ra manèngi sèna ka ji'i pea dènge rèngu. Ka ji'i manubha ètu èèna, ca migu. Èle èèna ka, ji'i kako haga la'a asa Roma. 15 Ropa dhèu sarani ètu Roma sèra tadèngi, na, ji'i neo la'a asa nèi, hèia rèngu mai soru ji'i ètu talora j'ara. Cahag'e paraga dènge ji'i ètu Pasa Apius; aa cahag'e hari paraga dènge ji'i ètu era èci, ngara na Pasanggrahan Tèlu.^b Lod'o Paulus ladhe nèdhi si, ka na manèngi makasi ae-ae mi Ama Lamatua, ka d'ara na èra dènge.

16 Ropa d'ai Roma, [sordad'u sèra pamaso dhèu bèdho sèra asa d'ara bèdho.]^c Te ngaa ra pamaso boe Paulus. Ra hud'i ne sène, ho bisa seb'a èmu cue. Ètu èmu èèna, na pea dènge sordad'u dhèu èci dhu j'aga ne. Kacui-aai rèngu dua ra, dhu èki pake rate.^d

17 Èle tèlu lod'o, hèia Paulus paroa dhèu heka-dhèu heka dhèu Yahudi ètu sèra, ho mai paraga dènge ne. Ropa ra pakaboko, hèia Paulus padhai lii dènge si, aku nèngu na, ‘‘A'ari aa'i-aa'i! Ja'a ètu ne'e ne, lula a'ari èdhi dhèu Yahudi sèra kèpe rare ja'a ètu Yerusalem. Ka ra soro ja'a asa d'ara kacui-aai dhèu paredha Roma. Te ngaa ja'a tao sala boe ngaa-ngaa! Ja'a tao boe ngaa-ngaa dhu lab'a isi kabarai èdhi. Aa ja'a lab'a boe kahèi atora ad'a dhu èdhi sèmi tare nèti bèi-baki èdhi sèra. 18 Dhèu paredha parisa le lii ja'a ne ètu nèi. Te ngaa ra abhu boe sasala ja'a èci sa dhu bisa abhu huku madhe. Nèti èèna ka, ra neo patalale eele ja'a. 19 Te ngaa, lula ama-ama dhèu Yahudi sèmi boe lii pama'ète nèti dhèu paredha ho patalale ja'a, nèti èèna ka, ko'o do ko'o boe, ja'a hud'i ca'e banding ku mai asa Roma. Masi ka ja'a tao sèmi ne'e, te ngaa dènge boe d'ara neo galaa dhèu ja'a unu ku.^e 20 Nèti lii langu ne'e ka, ja'a pakaboko a'ari aa'i-aa'i ètu ne'e. Madhutu dad'èi ja'a, èdhi bisa padhue-padhai ngaa dhu èdhi dhèu Yahudi sanao-maena: nuka, èdhi aa'i-aa'i ti sanao mi Dhèu Aae dhu Ama Lamatua neo hia mai, sèna ka hia mamuri mi èdhi dhèu Isra'el. Nèti j'ara se'e ka, ra èki ja'a dènge rate ne.’’

21 Hèia dhèu se dhaa, aku rèngu na, ‘‘Toke d'ai lod'o deo ne'e ne, ji'i sèmi mèka sasuri èci sa nèti Yudea, dhu peka lii langu èu ne. Sèmi èèna kahèi, a'ari dhu mai nèti nèi, lolo boe ngaa-ngaa èci sa lula-nèti èu. 22 Te ngaa ji'i neo nanene ngaa dhu èu parcaya, lula ji'i tadèngi le ètu mia-mia, peka na, dhèu sèmi boe ngaa dhu partei Kristen sèra aj'a-nori si. De mamèci na, tasamia? Ji'i dhae nge'a mèka. De lolo ku dènge ji'i laa.’’

23 Ka rèngu rare lii èci ho pili ca lod'o dhu leo, sèna ka ra paraga hari. Ropa d'ai lod'o pamoa èèna, dhèu ae titu kèna mai pakaboko ètu era pea Paulus. Hèia Paulus mulai lole ka dènge rèngu, dad'èi Ama Lamatua mi dhèu unu Na. Na pake isi nèti sasuri Musa, dènge sasuri dhèu rèti lii padhai Lamatua dhu leo sèra, sèna ka rèngu bisa parcaya Yesus. Na padhai lii nèti mad'ae toke d'ai lod'o nihia.

24 Ropa tadèngi rare lii padhai lii Paulus ne, abhu ka cahag'e dhu parcaya. Te ngaa abhu kahèi dhu parcaya boe. 25 Nèti èèna ka, rèngu pab'ala èci dènge èci, toke cahag'e neo lèpa. Te ngaa Paulus peka, aku nèngu na, ‘‘Mema lii pasisu miu ne, lèke sama sèmi ngaa dhu uru èèna Roh Ama Lamatua dhu Mola-Mèci peka le dènge Yesaya, 26 peka na,

28 Hèia Paulus katange lii padhai lii na, aku nèngu na, ‘‘Sèmi ne'e, a'ari! Sèna ka miu se me'a, na, Ama Lamatua sadia tèke le mamuri hia dhèu Yahudi boe, lula rèngu dhu d'èi nanene Ne.’’ 29 [Ropa Paulus padhai lii nare sèmi èèna, ka dhèu se lèpa ka. Te ngaa ngangee rèngu pa'èci boe, lula ra pasisu èci dènge èci.]^g

30 Paulus pea ka ètu èmu dhu na seb'a èèna, d'ai dua tèu. Na sèmi dènge karej'e dhèu aa'i-aa'i dhu mai tenge paraga dènge ne.

31 Dènge j'ara sèmi ne'e, nèngu abhu j'ara sèna ka na aj'a-nori si lula-nèti paredha Ama Lamatua, aa J'ara Mamuri Lamatua Yesus kahèi. Na lole dènge pahuni boe, aa na abhu boe dhu pahèb'e ne.

Ama Teofilus dhu be'a. Lii lolo ja'a d'ai sange ne'e ka.