3 Lod'o èèna, kèpe rare bhèni ca dhèu dhu talora na ad'u-ue j'ara makae. Ka pèri-pèri mese agama dènge dhèu Parisi ère rèti bhèni ne asa Yesus. Hèia ra laka-seti bhèni ne titu ètu madha rèngu aa'i-aa'i. 4 Ka ra peka dènge Yesus, aku rèngu na, “Ama Mese. Kèpe ngare bhèni ne dhu talora nèngu dhu ad'u-ue j'ara makae. 5 Ètu d'ara atora Musa, abhu paredha èci dhu peka na, ‘Dhèu dhu ad'u-ue j'ara makae dènge dhèu èmu na boe, hud'i abhu hahuku pèci toke madhe.’ De madhutu Ama Mese, na, tasamia?”^a 6 Dhèu se sèku Ne, sèna ka abhu j'ara ho pèci sasala asa Yesus ho pamanahu Ne.

Yesus lii boe, te ngaa madhèdi pasaboti suri rai, pake suu kolo ai Na. 7 Dhèu se loe boe karèi Nèngu. Hèia Na titu, ka padhai lii, aku Nèngu na, “Sèmi ne'e. Ladhe nèti miu abhu dhu tao mèdhi mèka sasala, na, nèngu ka dhu bisa pèci uuru ku, sèna ka huku bhèni ne'e.” 8 Ka Na madhèdi pasaboti hari, hèia suri hari rai.

9 Ropa dhèu se tadèngi lii padhai Na, rèngu j'aj'i makae. Lula rèngu re'a ètu d'ara ra, rèngu ad'u-ue sasala kahèi. Ka lasi ka èci-èci, mulai nèti dhèu heka toke d'ai ana ngèru, tèke eele dhodhoka Yesus dènge bhèni ne ètu era èèna. 10 Hèia Yesus titu hari, ka Na karèi, “Eea! Mia lasi? Abhu heka ca dhèu sa ètu ne'e ho pèci sasala mi èu, do?”

11 Hèia bhèni ne dhaa, aku nèngu na, “Aad'o, Ama.”

Ka Yesus lii dènge dhèu ne, peka na, “Ja'a neo boe huku èu kahèi. Lèpa ka, te ngaa sanèd'e. Tao ia ka sasala!”]^b

12 Ka Yesus tuhu hari lii padhai dènge dhèu ae se, peka na, “Ja'a ne, nuka sèmi saraa hia dhèu ètu rai-haha ne. Dhèu dhu madhutu Ja'a mamuri boe ètu d'ara maroga, te ngaa na pea ètu d'ara saraa dhu nèti mamuri dhu lèke.”^c

13 Abhu pèri-pèri dhèu Parisi dhu pab'ala, peka na, “Weh! Èu mesa mu neo j'aj'i sakasii nèti ngi'u Èu unu mu, do? Bisa boe sèmi èèna! Te madhutu atora èdhi, hud'i dhèu leo ku dhu j'aj'i sakasii hia dhèu èci, bisa boe nèngu unu na. De ji'i ngo'o boe sèmi, aa ngo'o boe parcaya.”^d

14 Ka Yesus dhaa, peka na, “Sèmi ne'e. Hud'i laa Ja'a j'aj'i sakasii mi ngi'u Ja'a mesa ku, te lii padhai Ja'a ne, lèke. Lula Ja'a mesa ku ke'a mola-mola Ja'a ne mai nèti mia, aa neo laku asa mia. Miu me'a boe Ja'a mai nèti mia, aa me'a boe neo laku asa mia kahèi. 15 Miu nile dhèu madhutu a'abhu dhèu rai-haha. Te ngaa Ja'a madhutu boe a'abhu dhèu rai-haha ho nile dhèu èci sa. 16 Ladhe Ja'a nile dhèu, a'uku dhu Ja'a pake, lèke mola-mola. Te Ja'a mesa ku boe dhu nile dhèu, te ngaa Ja'a tao aa'i-aa'i sama-sama dènge Ama Ku dhu pua Ja'a mai. 17 Baku bhèlu. Te dhu suri tèke ètu Atora agama miu, peka na, ‘Ladhe abhu dhèu dua j'aj'i sakasii dhu padhue j'ara dhu sama, èèna lèke tare'a.’ 18 De Ja'a mesa ku boe dhu j'aj'i sakasii mi ngi'u Ja'a unu ku. Te Ama Ku dhu pua Ja'a, j'aj'i sakasii kahèi dhu padhai lii lula-nèti Ja'a.”

19 Hèia dhèu se karèi, aku rèngu na, “Te Ama Èu èèna, ètu mia?”

Ka Yesus b'ala, peka na, “Miu se tadhe iie boe Ja'a. Miu tadhe boe kahèi Ama Ku. Te ladhe miu tadhe iie Ja'a, tatu miu tadhe Ne kahèi.”

20 Aa'i-aa'i se, Yesus peka-padhai lod'o Nèngu aj'a-nori dhèu ètu Èmu Kapua Manèngi-Mangaj'i, padètu dènge era rèngu kaboko doi kolete. Abhu boe ca dhèu sa dhu kèpe Ne, lula d'ai mèka lod'o na.

21 Yesus padhai lii tabha hari, peka na, “Bèli-camèd'a Ja'a tèke eele miu, ho laku asa era leo. Miu èèna na patangi-tenge Ja'a, te ngaa mèdhi boe, te miu dhu dènge boe hak sèna ka lami asa era èèna. Aa ladhe miu madhe, miu pasae sasala miu era.”

22 Hèia ama dhèu Yahudi sèra pakarèi iisi-aanga ra, peka na, “Na padhai lii ngaa, nèi? Neo pamadhe iisi Na, do? Te Na peka, na, ‘Miu bisa boe lami asa era èèna.”’

23 Ka Yesus peka dènge dhèu se'e, aku Nèngu na, “Miu nèti rai-haha. Te ngaa Ja'a mai nèti dedha-liru. Miu dhèu nèti rai-haha ne, te ngaa Ja'a nèti boe rai-haha ne. 24 Nèti èèna ka, deo na Ja'a peka dènge miu, na, bèli-camèd'a ladhe miu madhe, miu pasae sasala-sasigo miu era. De ladhe miu parcaya boe, na, Ja'a ne, Kristus, dhu Ama Lamatua pua mai, ladhe miu madhe, tatu miu pasae sasala miu era.”

25 Ka ra karèi, peka na, “Weeh! Te Èu ne, cee?”

Yesus dhaa, aku Nèngu na, “Ja'a dhu peka mema karèi nèti uru ka.^e 26 Abhu j'ara ae dhu Ja'a bisa peka lula-nèti miu. Sasala miu ae kahèi. Te ngaa Ja'a pad'elo boe j'ara sèra. Te Dhu pua Ja'a mai asa rai-haha ne, ladhe Na padhai lii, ne'a dhoka peka dhu mola di. Aa Ja'a peka dènge dhèu ètu rai-haha ne, dhoka j'ara-j'ara dhu Ja'a tadèngi nèti Nèngu di.” 27 (Dhu Nèngu padhue-padhai, nuka Ama Na ètu sorga. Te ngaa dhèu se re'a rare boe sasoa lii padhai Na.)

28 Ka Yesus padhai lii tabha hari, peka na, “Pe ladhe miu ded'e ka Ja'a, Dhèu Rai-haha Tare'a-re'a ne, ètu aj'u palolo-palèbha, heka miu me'a kèna, na, Ja'a ne, Kristus. Aa Ja'a bisa boe tao ngaa-ngaa madhutu dad'èi Ja'a mesa ku, te ngaa Ja'a aj'a-nori dhoka j'ara-j'ara dhu Ama ètu sorga aj'a-nori le Ja'a. 29 Dhu pua-paleha Ja'a bera-bera dènge Ja'a taruu. Nèngu tèke eele nèdhi boe Ja'a mesa-mesa ku, lula Ja'a loe boe sab'a madhutu dad'èi Na.”

30 Ropa Yesus peka j'ara se'e, dhèu ae parcaya Nèngu.

31 Èle èèna ka, Yesus peka dènge dhèu-dhèu Yahudi dhu parcaya Nèngu, na, “Ladhe miu mamuri pa'èki taruu dènge Lii Holo-Nori Ja'a, aa aj'a taruu nèti Ja'a, na, miu bisa j'aj'i ana madhutu Ja'a dhu lèke. 32 Miu bisa me'a mèu j'ara-j'ara dhu lèke. Dènge j'ara-j'ara dhu lèke sèra ka dhu patabuli miu, sèna ka miu j'aj'i ia ka ènu.”

33 Ka dhèu se pab'ala, aku rèngu na, “Hee! Ji'i se, j'aj'i boe ènu dhèu! Te ji'i se, ana-èpu Abraham! De, nga tao ka Èu peka, na, èèna na ji'i bebas?”^f

34 Hèia Yesus dhaa, peka na, “Dhu Ja'a peka ne, lèke. Te dhèu aa'i-aa'i dhu mamuri ètu d'ara sasala, j'aj'i sama sèmi ènu dhu dhoka madhutu dad'èi sasala di. 35 Te ngaa dhu tema, sèmi ne'e: ènu se abhu boe pala nèti lamatua èmu na. Te dhoka ana lamatua èmu di dhu abhu pala taruu ètu èèna. 36 De Ja'a, nuka Ana Ama Lamatua ne, ladhe saku eele sasala-sasigo miu, na, miu bebas, aa j'aj'i heka ènu nèti koasa sasala-sasigo. Dènge j'ara ne, miu madhutu heka dad'èi sasala, aa tare'a-re'a bebas!

37 Ja'a ke'a le miu se, ana-èpu Abraham. Masi ka sèmi èèna, te ngaa miu loe boe patangi-tenge j'ara ho pamadhe Ja'a, lula mo'o boe sèmi mere a'aj'a Ja'a. Te ètu d'ara miu, abhu heka era tatèka Lii Holo-Nori Ja'a. 38 Ja'a peka-padhai j'ara-j'ara dhu Ja'a kèdhi le, dhu Ama Ku paj'uj'u le dènge Ja'a. Aa miu tao madhutu j'ara-j'ara dhu miu tadèngi le nèti ama-ama miu.”

39 Dhèu se dhaa, peka na, “Ji'i se, ana-èpu Abraham!”

Ka Yesus peka dènge ra, aku Nèngu na, “Ladhe miu j'aj'i tare'a-re'a ana-èpu Abraham, miu hud'i madhutu j'ara mamuri nèngu. 40 Te ngaa Abraham tao boe bhabhelu sama sèmi dhu miu tao! Te miu loe boe tenge j'ara ho neo pamadhe Ja'a. Aa te ngaa Ja'a ne, dhu peka dènge miu j'ara-j'ara dhu lèke, dhu Ja'a tadèngi nèti Ama Lamatua. 41 Tatao miu se mema beda boe nèti tatao ama miu.”

Te ngaa rèngu pab'ala, aku rèngu na, “Heh! Ji'i se, ana d'èlu! Baku peka na ji'i se, ana ama aad'o! Te Ama ji'i, èci di, nuka Ama Lamatua!”

42 Hèia, aku Yesus na, “Ladhe Ama Lamatua tare'a-re'a j'aj'i Ama miu, tatu miu sue Ja'a. Te Ja'a mai nèti Nèngu, nèti èèna ka Ja'a ka ne'e ne. Ja'a mai ne madhutu boe dad'èi Ja'a mesa ku. Te ngaa Ja'a mai, lula Nèngu ka dhu pua Ja'a. 43 Nga tao ka miu dhane mere boe lii padhai Ja'a? Ele boe, lula miu mema mo'o boe nanene!

44 Miu se, ca ropa dènge dhèu aae nidhu. Te miu d'èi madhutu dad'èi na! Karèi nèti uru j'ara ka, nèngu d'èi dhoka pamadhe dhèu. Nèngu lab'a j'ara dhu lèke, lula na tule eele j'ara aa'i-aa'i dhu lèke! Ladhe na kapod'e-kabèli, mema sasab'a na kèna. Te nèngu ne, tuka kapod'e-kabèli, aa baki nèti leko-monya! 45 Ja'a ne'e ka dhu lole j'ara dhu lèke. Te ngaa miu parcaya boe Ja'a. 46 Pangee sèku! Nèti miu se, cee ka dhu bisa pad'elo bukti, peka na, Ja'a ne ad'u-ue sasala? Malaa, nga! Ladhe Ja'a peka lèke, nga tao ka miu mo'o boe lèka Ja'a?

47 Dhèu dhu j'aj'i nèti Ama Lamatua nanene Lii Holo-Nori Na. Te ngaa miu se j'aj'i boe nèti Ama Lamatua, nèti èèna ka miu mo'o boe nanene Ja'a.”

48 Ama-ama dhèu Yahudi b'ala, peka na, “Lii padhai ji'i lèke tare'a-re'a. Te ji'i dhu peka le, na, Èu ne, dhèu Yahudi boe, te ngaa dhèu Samaria. Èu ne nidhu tao!”

49 Hèia Yesus dhaa, aku Nèngu na, “Ja'a nidhu tao boe. Ja'a pakab'ua Ama Ku ètu sorga, te ngaa miu mo'o boe pakab'ua Ja'a. 50 Ja'a padedha boe iisi ho pad'elo kolo-karisi Ja'a. Te ngaa abhu Èci dhu neo pad'elo dadedha Ja'a. Hud'i laa Nèngu ka dhu pama'ète, na, lii padhai Ja'a ne lèke, do aad'o.

51 Lii Holo-Nori Ja'a, lèke tare'a. De dhèu dhu nanene aa tao madhutu Lii Holo-Nori Ja'a, madhe boe.”

52 Ropa tadèngi rare lii ne, hèia ama-ama dhèu Yahudi se peka dènge Ne, aku rèngu na, “Limuri ne ji'i nge'a le Èu dhèu huj'u, lula nidhu tao le Èu. Te Abraham, madhe. Dhèu rèti lii padhai Ama Lamatua uru-uru sèra, madhe le kahèi. Te ngaa aku Èu, na, ‘dhèu dhu nanene dènge madhutu Lii Holo-Nori Ja'a, madhe boe.’ Mema Èu ne tare'a-re'a huj'u le! 53 Do, Èu ne pangee, na, Èu ne kapai risi nèti Abraham dhu madhe le? Do, Èu kapai risi nèti dhèu-dhèu rèti lii padhai Ama Lamatua dhu madhe sèra? Èu ngee, na, Èu ne, cee?”

54 Hèia Yesus dhaa, peka na, “Ladhe Ja'a ka dhu padedha iisi, dhèu ro'o boe sèmi rare. Madhutu iia-iia, na, Ja'a boe ka dhu ded'e padedha-dedha iisi, te ngaa dhu ded'e Ja'a padedha-dedha nuka Ama Ku. Nèngu ne'e ka dhu miu mangaku, na, Nèngu j'aj'i Ama Lamatua miu. 55 Te ngaa miu tadhe boe Ne. Dhu tadhe mèu ka Ja'a ne. Ladhe Ja'a peka na Ja'a tadhe boe Ne, Ja'a leko-monya, sama sèmi miu. Te ngaa Ja'a tadhe mèu Ne, aa Ja'a tao madhutu Lii Holo-Nori Na kahèi. 56 D'ara baki miu Abraham karej'e titu kèna, lod'o na tatae neo nèdhi mamai Ja'a. Nèngu mema nèdhi le, ka na karej'e-karae.”

57 Ama-ama dhèu Yahudi se b'ala Ne, aku rèngu na, “Umur Èu dhae d'ai mèka lèmi nguru tèu sa hèi! Te ngaa Èu peka na, mèdhi le Abraham. Tare'a, do?”

58 Hèia Yesus dhaa, peka na, “Tare'a! Te dhae rara iisi mèka Abraham, Ja'a dhu mema-mema le.”

59 Ka dhèu se rare hadhu ho neo pèci Ne, lula Na tao iisi sama sèmi Ama Lamatua. Te ngaa Yesus kako mau-mau kalua nèti madha Èmu Kapua Manèngi-Mangaj'i.^g