3 Ka Yesus dhaa, peka na, “Dhèu bèdhu ne tao boe sala. Aa ina-ama na aad'o kahèi. Rara iisi na sèmi ne'e, ho hud'i laa dhèu aa'i-aa'i ra ladhe rèdhi tatao Ama Lamatua dhu be'a mi dedha nèngu. 4 Ama Lamatua ka dhu pua Ja'a. De èdhi hud'i tenge j'ara, sèna ka pakako sasab'a Na, lod'o saraa era. Te ladhe maroga mai, dhèu bisa heka sab'a. 5 Ropa Ja'a ètu rai-haha ne era, Ja'a nuka sèmi saraa dhu d'elo hia mi dhèu aa'i-aa'i.”^a

6 Ropa Yesus padhai lii nare, ka Na paru'e ilu mi rai. Hèia Na madhèdi pasaboti, ho pakihu rai ne j'aj'i kabheca. Ka Na lame musi madha dhèu ne dènge kabheca deo na. 7 Hèia Na peka, na, “Lamu asa kolam Siloam, sèna ka riu rèhu èu.” (Ètu d'ara lii Ibrani, Siloam, sasoa na, ‘nèti mai’.) Ka dhèu bèdhu ne la'e, ka riu rèhu na. Ropa na lèpa hari mai, nèngu bisa nèdhi le!^b

8 Hèia rae lesa dènge dhèu dhu rèdhi ne, dhu tema manèngi ngaa-ngaa nèti dhèu, ra pakarèi èci dènge èci, peka na, “Dhèu ne'e ne, dhèu bèdhu dhu tema madhèdi ho kanata ai manèngi ngaa-ngaa nèti dhèu, sina ma?”

9 Dhèu cahag'e dhaa, peka na, “Oo! Nèngu ka!”

Dhèu cahag'e hari, peka na, “Aad'o! Nèngu ne, rèhu na oe sèmi dhèu èèna!”

Te ngaa dhèu ne dhaa, aku nèngu na, “Aad'o! Ja'a èèna ka, ne'e ne! Dhu uru èèna bèdhu!”

10 Ka dhèu se karèi ne, peka na, “Tasamia ka èu bisa ladhe mèdhi?”

11 Hèia na peka, aku nèngu na, “Sèmi ne'e! Dhèu dhu ngara Yesus èèna, pakihu kabheca ka lame mi musi madha ja'a. Ka Na pua ja'a, aku Nèngu na, ‘Lamu asa kolam Siloam, ho riu rèhu èu ètu nèi.’ Hèia ja'a tao madhutu sèmi èèna. Nèti èèna ka, ja'a bisa ladhe kèdhi le!”

12 Èle ka dhèu se karèi ne, peka na, “Dhèu èèna, ètu mia?”

Ka na dhaa, “Ke'a boe, mia la'e!”

13-14 Lod'o èèna, ropa Yesus pakihu rai j'aj'i kabheca, ka puri-pa'èle dhèu bèdhu ho bisa ladhe nèdhi èèna, lèke dènge lod'o a'ae sasab'a dhèu Yahudi. Ka lere rèti dhèu dhu uru èèna bèdhu, asa madha dhèu-dhèu partei agama Parisi. 15 Ka dhèu Parisi se karèi ne, “Èu lolo ku laa! Tasamia ka èu bisa ladhe mèdhi?”

Dhèu ne dhaa, peka na, “Sèmi ne'e. Dhèu èèna tao kabheca mi musi madha ja'a. Ka laku riu rèhu. Hèia limuri ne, ja'a bisa kèdhi le.”

16 Ka abhu dhèu Parisi cahag'e, peka na, “Dhèu dhu puri-pa'èle èu èèna, mai boe nèti Ama Lamatua. Ji'i nge'a, lula Nèngu sisu atora nèti lod'o a'ae sasab'a.”

Aa abhu cahag'e hari, peka na, “Tasamia ka dhèu dhu ad'u-ue sasala bisa tao tadha-tadha malaa sèmi sèra?” Ka rèngu patao-palaha èci dènge èci toke ra pahag'a.

17 Hèia ra karèi hari dhèu dhu uru èèna bèdhu, aku rèngu na, “Madhutu a'abhu èu, Dhèu dhu puri-pabe'a musi madha èu ne, Dhèu sèmi ngaa sa?”

Dhèu ne b'ala, peka na, “Madhutu a'abhu ja'a, Dhèu èèna ca dhèu nèti dhèu rèti lii padhai Ama Lamatua.”

18 Te ngaa ama-ama dhèu Yahudi se ro'o boe lèka, na, dhèu ne uru èèna bèdhu, ka limuri ne bisa nèdhi le. Hèia ra pua dhèu lasi paroa ina-ama na mai. 19 Ropa ina-ama na mai d'ai madha si, hèia ama-ama se karèi, aku rèngu na, “Dhèu ne, ana miu, do? Tare'a, do aad'o, nèngu ne dhu bèdhu mema karèi nèti mera iisi ne? Tasamia ka limuri ne nèngu bisa ladhe nèdhi?”

20 Ka ina-ama dhèu ne dhaa, peka na, “Nèngu ne, mema ana ji'i. Aa na bèdhu karèi nèti ngara iisi ne. 21 Te ngaa ji'i nge'a boe, na pake ngaa ka musi madha na bisa nèdhi sèmi ne'e. Cee ka dhu puri-pa'èle musi madha na, ji'i nge'a boe kahèi. Nèngu kapai le, de karèi ne, te nèngu bisa lolo unu na!” 22 Dua ra padhai lii sèmi èèna, lula rèngu madha'u dènge ama-ama dhèu Yahudi. Lula re'a, na, ama-ama dhèu Yahudi se dhu rare le lii èci, peka na, “Ladhe abhu dhèu mangaku, na, Yesus ne, nuka Kristus, na, babège eele dhèu sèra nèti d'ara èmu sabaj'a èdhi dhèu Yahudi.” 23 Nèti èèna ka, ina-ama dhèu ne dhaa, peka na, “Nèngu kapai le. De karèi ne.”

24 Hèia ra paroa hari dhèu dhu uru èèna bèdhu. Ka ra karèi ne, “Sèmi ne'e! Èu hud'i peka ku mola-mola ètu madha Ama Lamatua, sèna ka j'aga paie kolongara Na. Te ji'i nge'a, na, Yesus ne, dhèu bhelu-katub'a.”

25 Ka dhèu ne dhaa, peka na, “Ama si baku nasa! Te ja'a ke'a boe, na, Nèngu èèna, dhèu bhelu, do aad'o. Dhu ja'a ke'a mola-mola, nuka, uru èèna ja'a bèdhu, te ngaa limuri ne ja'a bisa kèdhi.”

26 Hèia ra karèi ne, aku rèngu na, “Te Na tao èu tasamia? Tasamia Na bhoke musi madha èu?”

27 Dhèu ne dhaa, na, “Eee! Te deo na ja'a lole le, te ngaa miu mo'o boe nanene. Tasamia ka miu neo ja'a lolo hari? Ele boe ama si neo j'aj'i ana madhutu Na, do?”

28 Ka ra padhai pa-aape ne, hèia ra peka, “Hud'i laa èu ka j'aj'i ana madhutu Na! Te ji'i se, ana madhutu Musa. 29 Ji'i nge'a Ama Lamatua ka dhu padhai lii dènge Musa. Te ngaa nge'a boe Dhèu èèna bhodho nèti ro'a mia.”

30 Ka dhèu dhu uru èèna bèdhu na, dhaa, “Ja'a malaa, nga! Miu me'a boe Nèngu mai nèti mia. Aa te ngaa Nèngu ka dhu bhoke pamèu musi madha ja'a, ka ja'a bisa kèdhi. 31 Èdhi aa'i-aa'i ti te'a, na, Ama Lamatua parluu boe nanene lii dhèu bhelu, si? Te ngaa Ama Lamatua nanene dhèu d'ara mola, dhu mamuri madhutu dad'èi Na.^c 32 Karèi nèti Ama Lamatua paj'aj'i liru dènge rai-haha toke d'ai sange ne'e, abhu mèka lii lolo èci sa hèi, lula-nèti dhèu dhu puri-pabe'a dhèu bèdhu karèi rara iisi ne, ho nèngu bisa nèdhi. 33 De ladhe Yesus mai boe nèti Ama Lamatua, tatu Nèngu bisa boe tao ngaa-ngaa, sina ma?”

34 Hèia ra b'ala, aku rèngu na, “Wee! Èu ne, dhèu bhelu karèi ina mu nara iisi èu! Èu ngee, na, èu bisa aj'a hari ji'i, do?” Ka ra babège eele dhèu ne nèti èmu sabaj'a rèngu.

35 Ropa Yesus tadèngi rèngu babège eele dhèu dhu uru èèna bèdhu nèti èmu sabaj'a ra, hèia Na la'e tenge dhèu ne, toke abhu. Ka Na peka, “Tasamia! Èu parcaya Dhèu Rai-haha tare'a-re'a ne, do?”

36 Ka dhèu ne karèi hari Ne, aku nèngu na, “Ama, te Nèngu èèna cee? Peka ku laa, sèna ka ja'a bisa parcaya Ne.”

37 Hèia Yesus peka, na, “Èu paraga le dènge Ne. Nèngu èèna, nuka Ja'a ne, dhu padhai lii dènge èu ne.”

38 Ka dhèu ne dhaa, aku nèngu na, “Ama, ja'a parcaya!” Hèia na patitu kètu urutuu pahaha iisi mi Yesus.

39 Hèia Yesus lii dènge ne, aku Nèngu na, “Mamai Ja'a asa rai-haha ne, sèna ka pad'elo sasala-sasigo dhèu, ho dhèu bèdhu bisa ladhe rèdhi, aa dhèu dhu rèdhi bisa j'aj'i bèdhu.”

40 Ètu era èèna abhu dhèu Parisi pèri-pèri, dhu tadèngi lii padhai Yesus. Hèia ra karèi Ne, aku rèngu na, “Tasamia! Ji'i se bèdhu boe, sina ma?”

41 Yesus b'ala, peka na, “Sèmi ne'e. Ladhe musi madha miu bèdhu, abhu boe dhu pasala miu. Te ngaa lula miu peka, na, miu bisa mèdhi, nèti èèna ka miu pasae sasala miu era.”