6 Hèia Yesus dhaa, aku Nèngu na, “Sèmi ne'e. Lod'o Ja'a dhae d'ai mèka. Te ngaa ladhe miu neo lami, sad'i lake mere. 7 Dhèu ètu rai-haha ne tèka boe d'ara dènge miu. Te ngaa rèngu tèka d'ara dènge Ja'a, lula Ja'a bhoke patalele aa'i tatao rèngu. Te d'ara ra bhelu-katub'a. 8 Lod'o kalela agama èdhi dètu le. De miu ka laa lami asa Yerusalem. Ja'a neo mèka laku, te dhae d'ai mèka lod'o.” 9 Na peka nare, hèia Na pea ètu propensi Galilea.

10 Te ngaa ropa ari Na si lasi madhutu kalela agama dhèu Yahudi ètu Yerusalem, Yesus madhutu kahèi. Te ngaa la'e pahuni-pahuni, sèna ka dhèu baku rèdhi Ne. 11 Ètu Yerusalem, lod'o kalela agama dhèu Yahudi, ama-ama dhèu Yahudi patangi-tenge Yesus. Ra pakarèi, aku rèngu na, “Dhèu èèna, ètu mia?”

12 Dhèu ae dhu paka'uu lula-nèti Nèngu. Cahag'e peka na, “Nèngu ne, dhèu be'a.”

Cahag'e hari peka na, “Aad'o! Nèngu ne dhu kapod'e-kabèli dhèu ae-ae.” 13 Te ngaa abhu boe dhu pacèu lii padhai lula-nèti Yesus, te rèngu madha'u dènge ama-ama se.

14 Pas ètu talora kalela ne, Yesus maso la'e asa Èmu Kapua Manèngi-Mangaj'i. Ka Na aj'a dhèu ètu era èèna. 15 Hèia ama-ama dhèu Yahudi malaa, ka ra peka na, “Dhèu ne sakola nèdhi boe sèmi èdhi. Te ngaa tasamia ka ne'a aa'i mèu j'ara se'e?”

16 Ka Yesus peka dènge ra, aku Nèngu na, “Nanene. J'ara-j'ara dhu Ja'a lole, kapua boe nèti Ja'a mesa ku, te ngaa nèti Nèngu dhu pua Ja'a mai. 17 Dhèu dhu tare'a-re'a neo madhutu dad'èi Ama Lamatua, nèngu èèna na ne'a mèu, a'aj'a Ja'a ne, tare'a-re'a mai nèti Ama Lamatua, do nèti dhoka Ja'a mesa ku. 18 Te dhèu dhu padhai lii pake mamèu unu na, nèngu tenge dhoka kolongara di. Te ngaa dhèu dhu neo ded'e kolongara nèti dhèu dhu pua-paleha na, tatu lii padhai lèke mola-mola. Aa lii padhai nèngu koe-kapengo boe. 19 Musa pangèd'u le miu Atora Ama Lamatua. Te ngaa miu mo'o boe tao madhutu. De tasamia ka miu tenge j'ara ho neo pamadhe Ja'a?”

20 Hèia dhèu ae se karèi, peka na, “Èu peka ngaa, ne? Ele boe nidhu tao Èu, do? Cee ka dhu tenge j'ara neo pamadhe Èu?”

21 Ka Yesus b'ala, peka na, “Sèmi ne'e ka. Ja'a heka tao tadha malaa èci ètu lod'o manèngi-mangaj'i, te ngaa miu aa'i-aa'i mi kacèki le. 22 Te ngaa ca tèka-tèka, miu sab'a kahèi ètu d'ara lod'o sabaj'a, nuka sèmi: Musa hia le atora suna, dhu peka na, ladhe dhèu rara iisi ana mone ca dhèu, na, ètu d'ara lod'o ka aru, miu hud'i suna ku ana ne. Masi ka lod'o ne, lèke dènge lod'o sabaj'a, miu hud'i suna ku nèngu. (Te ngaa madhutu mola-mola na, atora ne uru tèka nèti Musa. Te Ama Lamatua dhu hia uru le atora ne mi Abraham.)^b 23 De ladhe suna ana iiki èci lèke dènge lod'o sabaj'a sisu boe atora Musa, nga tao ka miu nasa dènge Ja'a, lula Ja'a puri-pa'èle dhèu karuku lèke dènge lod'o sabaj'a? Maso boe d'ara ngangee, sina ma!?^c 24 Baku pasale dhèu lula j'ara-j'ara dhu miu mèdhi dènge musi madha di. Dadoo uuru ku dènge d'ara be'a, heka pama'ète dhu lèke.”

25 Hèia pèri-pèri dhèu nèti kota Yerusalem pakarèi, peka na, “Dhèu ne'e ne ka dhu ra patangi-tenge ho neo pamadhe Ne, do? 26 Ladhe ku laa! Na padhai lii pahuni boe ètu madha dhèu ae-ae. Te ngaa abhu boe dhu kai Ne ho hutu hèb'a Na. Madhutu miu, tasamia? Ele boe dhèu dhu rèd'u koasa sèra re'a le, peka na, Dhèu ne'e ne, nuka Kristus, dhu Lamatua pajaji tèke ho neo pua mai èèna, si? 27 Te ngaa j'aj'i mi lii langu, sèmi ne'e: ladhe Lamatua pua ka Kristus mai, abhu boe ca dhèu sa dhu re'a Nèngu nèti mia. Te ngaa èdhi te'a le Dhèu ne nèti mia.”

28 Lod'o èèna, Yesus aj'a dhèu era ètu madha Èmu Kapua Manèngi-Mangaj'i. Ropa tadèngi dhèu se peka sèmi èèna, hèia Na karèi si dènge lii mèdhu, aku Nèngu na, “Miu pangee, na, miu se tadhe Ja'a, aa me'a mèu Ja'a mai nèti mia, do? Ja'a ne, mai boe asa ne'e madhutu dad'èi Ja'a mesa ku. Te dhu pua Ja'a èèna, abhu tare'a-re'a. Aa miu tadhe boe Nèngu. 29 Te ngaa Ja'a tadhe Ne, lula Ja'a mai nèti Nèngu, aa Nèngu ka dhu pua Ja'a mai.”

30 Ka dhèu se'e neo kèpe Ne. Te ngaa abhu boe dhu bisa kèpe Ne, te d'ai mèka lod'o Na. 31 Nèti dhèu ae-ae dhu ètu èèna, abhu ae kahèi dhu parcaya Ne. Dhèu se padhai lii, peka na, “Dhèu ne'e ne tao tadha malaa ae le. Pe bèli-camèd'a, ladhe Kristus mai, tatu boe Na tao tadha malaa risi nèti Dhèu ne'e, si?”

32 Ètu talora aae dhèu ae se, abhu pèri-pèri dhèu nèti partei agama Parisi kahèi. Rèngu tadèngi dhèu ae se pakanucu j'ara-j'ara lula-nèti Yesus. Hèia, dhèu se, dènge kètu agama Yahudi se pua pèri-pèri dhèu j'aga Èmu Kapua Manèngi-Mangaj'i sèna ka lasi kèpe Yesus.

33 Ka Yesus peka, na, “Lod'o Ja'a pa'èci dènge miu di ciki oo'e ka, nare heka nèbhu. Te nèbhu heka, Ja'a laku hari asa Nèngu dhu pua Ja'a. 34 Pe èèna na, miu tenge Ja'a, te ngaa mèdhi boe Ja'a. Te Ja'a neo laku asa era èci dhu miu bisa boe madhutu.”

35 Ka ama-ama dhèu Yahudi se pakarèi iisi-aanga ra, aku rèngu na, “Dhèu ne neo la'e mia? La'e asa era mia, dhu èdhi bisa boe paraga dènge Ne? Nèngu la'e lu'u asa dhèu Yahudi dhu bali ètu rai kaj'èu, do? Neo la'e aj'a-nori dhèu-dhèu dhu pake lii Yunani ètu nèi, do? Do, tasamia? 36 A'abhu Na tasamia, ka Na peka, na, ‘Miu neo tenge Ja'a, te ngaa paraga boe.’ Aa, ‘Ja'a laku asa era èci dhu miu bisa boe madhutu.’?”

37 D'ai lod'o oe èle kalela, dhu j'aj'i lod'o kapai risi èèna, hèia Yesus kèd'i titu, ka Na rodhe, peka na, “Nanene, ee! Cee ka dhu koko-kamango, na, hud'i laa na mai asa Ja'a ho ninu!^d 38 Cee dhu parcaya Ja'a, na, mai sèna ka minu! Te ètu d'ara Sasuri Ama Lamatua, dhu suri tèke le, peka na, ‘Èi dhu nèti mamuri, èèna na hae mai nèti d'ara dhèu-dhèu parcaya.’ Ka rèngu abhu mamuri dhu lèke. Dènge j'ara ne, rèngu bisa soru-bara dhèu leo, sèna ka ra abhu mamuri dhu lèke kahèi.”^e 39 Yesus padhai lii lula-nèti Roh Ama Lamatua, lula dhèu aa'i-aa'i dhu parcaya Yesus abhu Roh èèna. Te ngaa lod'o Yesus padhai lii sèmi èèna, rèngu dhae sèmi rare mèka Roh èèna, lula Ama Lamatua dhae hia mèka. Ama Lamatua mema hia mèka, lula Na ded'e mèka padedha-dedha Yesus.

40 Dhèu ae-ae ètu sèra nanene lii padhai Yesus ne. Hèia abhu dhu peka, na, “Tatu Dhèu ne, Dhèu nèti lii padhai Ama Lamatua, dhu Na padhadha mema karèi nèti uru ka!”^f

41 Abhu cahag'e dhu peka na, “Aad'o! Nèngu ne, nuka Kristus dhu Ama Lamatua paj'uj'u karèi nèti uru ka mai!”

Te ngaa cahag'e hari pab'ala, peka na, “Bisa boe! Te Kristus èèna, dhèu Galilea boe. Tare'a, si? 42 Te Sasuri Ama Lamatua suri, na, Kristus èèna, ana-èpu nèti dhèu aae Daud. Ètu d'ara sasuri leo kahèi dhu suri, peka na, Nèngu ne, dhèu Betlehem, rae dhèu aae Daud. Sèmi èèna ka, si?”^g 43 Ka dhèu se mulai pahag'a lula Yesus. 44 Abhu pèri-pèri dhèu dhu neo kèpe Ne, te ngaa ca dhèu sa goi boe Ne.

45 Èle ka, dhèu-dhèu madhenga Èmu Kapua Manèngi-Mangaj'i dhu mai neo kèpe Yesus, lèpa asa kètu agama Yahudi dènge dhèu Parisi sèra. Hèia dhèu kapai se karèi, aku rèngu na, “Nga tao ka miu mèti boe Ne mai?”

46 Hèia dhèu se dhaa, na, “Ira ii! Ji'i dhae paraga ngèdhi mèka dènge dhèu èci sa dhu padhai lii sama sèmi Dhèu nèi!”

47 Ka dhèu Parisi se karèi, aku rèngu na, “Heh! Miu se lèke le tipu, si? 48 Sanèd'e! Te nèti ji'i dhèu-dhèu Parisi, do, ama-ama abhu boe ca dhèu sa dhu lèka Ne. Tare'a, si? Ladhe dhèu kapai parcaya boe, na, tasamia ka miu se lèka Nèngu? 49 Te ngaa dhèu ae dhu neo parcaya Ne, re'a boe Atora Ama Lamatua. Bèli-camèd'a rèngu dui rare huku dhu bia nèti Ama Lamatua!”

50 Te ngaa ètu era ne'e, abhu kahèi dhèu Parisi ca dhèu, ngara na Nikodemus. Nèngu ne'e ka dhu la'e asa Yesus re mèda, ho padhai lii dènge Ne. Ka na karèi dhèu se'e, peka na,^h 51 “Tasamia? Madhutu atora agama, èdhi pama'ète uru ku lii langu dhèu, do? Do, èdhi hud'i nanene uuru ku lii lolo na, sèna ka te'a mèu dhèu ne tao ngaa, heka pama'ète lii langu na kèna?”

52 Hèia ra jèke ne, aku rèngu na, “Èu ne, dhèu Galilea èci èèna ka dènge Nèngu, do? Parisa paie-iie uuru ku Sasuri Mola-Mèci Ama Lamatua! Baca paie-iie sèna ka me'a mèu, na, abhu boe dhèu rèti lii padhai Ama Lamatua dhu mai nèti Galilea!”

53 [Ka ra pacèri, èci-èci lèpa asa èmu ra.ⁱ