Maria nara iisi Lamatua Yesus
2
1-2 Ca tèka, ètu d'ara Kirenius j'aj'i gubernur ètu Siria, dhèu aae kapai Agustus, hia paredha, dhu peka na, “Dhèu aa'i-aa'i ètu paredha Roma, hud'i lèpa asa rae èta-èsu ra ho madhutu sensus!” Èèna heka hiu-lai kèna, dhèu paredha Roma ige ana kabarai na. 3 Ka dhèu aa'i-aa'i lèpa asa rai èta-èsu ra, sèna ka madhutu sensus.4-5 Lod'o èèna, Yusuf pea ètu rae Nasaret, ètu propensi Galilea. Nèngu dhu lii d'ai ana bhèni ca dhèu, ngara na Maria, dhu dènge le babia. Yusuf ne, ana-èpu nèti dhèu aae Daud. Ka nèngu hud'i lèpa ku asa kota Daud, nuka Betlehem ètu propensi Yudea, sèna ka madhutu sensus.
Nèti èèna ka, dua ra lasi asa kota Betlehem. 6 Ropa dua ra ètu nèi, Maria d'ai lod'o nara iisi. 7 Te ngaa ètu èèna, dua ra abhu boe kama ètu d'ara losmen. Nèti èèna ka, dua ra maso lasi asa d'ara oka badha. Hèia Maria nara iisi Ana uuru, mone ca dhèu. Ka pasig'i Ne dènge kaha'i bèla, aa paj'unu ètu d'ara karab'a, era badha ra'a-rinu.
Ama Lamatua peka dènge ana madhenge badha
8 Mèda èèna, abhu ana madhenga badha dhèu pèri-pèri dhu beke madhenge kahib'i-kalèbho ètu d'ara pad'a ètu li'u kota.
9 Kaca'a laa, rèngu rèdhi ana pajuu Ama Lamatua nèti sorga. Hèia saraa Lamatua rai-reo nare rèngu, ka ra madha'u bia. 10 Te ngaa ana pajuu ne peka,
“Baku madha'u! Nanene pabe'a-be'a! Te ja'a ne mai ho peka lii lolo be'a èci hia miu. Cee dhu tadèngi lii ne'e, tatu rèngu karej'e.
11 Lii lolo be'a ne, sèmi ne'e ka:
Deo ne'e, ca dhèu ina nara iisi le Kristus ètu Betlehem, nuka kota dhèu aae Daud.
Kristus ne'e ka dhu Ama Lamatua pajaji tèke le karèi nèti uru ka.
Lamatua hia Na mai, sèna ka Na patabuli dhèu nèti koasa sasala-sasigo ra.
Nèngu ne'e, èèna na dhèu paroa Na, ‘Lamatua’!
12 Pe miu tadhe Ne sèmi ne'e ka: miu paraga dènge Ana rara iisi hiu ca dhèu dhu pahutu dènge sig'i. Ra paj'unu Ne ètu d'ara karab'a.”
13 Ropa na padhai lii nare, hèia cag'ag'a laa, ana pajuu Ama Lamatua ae-ae mai nèti sorga. Ka ra pa'èci dènge ne. Hèia ra koa-kio kolongara Ama Lamatua dènge lii sod'a, peka na,
14 “Ji'i ded'e padedha-dedha kolongara Ama Lamatua!
Nèngu dhu nèd'u paredha ètu dedha-liru dhu dedha risi.
Ama Lamatua neo hia dame dènge mera-milu mi dhèu rai-haha,
dhu pakarej'e d'ara Na!”
15 Èle ka, ana pajuu se lèpa hari asa sorga. Hèia ana madhenga badha se padhai lii, peka na, “Mai lati ku asa Betlehem, ho ladhe ku Ana nèi! Te Lamatua pa'adhu le lii ne hia èdhi.”
16 Hèia lasi ka lai-lai asa Betlehem. Ka rèngu paraga Maria dènge Yusuf. Aa ladhe rèdhi kahèi Ana dhu heka rara iisi, dhu bhèj'i ètu d'ara karab'a.
17 Ropa rèngu rèdhi Ana ne, hèia ra lolo, peka na, “Deo na ana pajuu Ama Lamatua nèti sorga dhu peka le dènge ji'i, lula-nèti Ana ne'e ne!” Ka ra lolo aa'i-aa'i toke èle.
18 Dhèu aa'i-aa'i malaa-maloha, tadèngi lii lolo ana madhenga badha se. 19 Te ngaa Maria tèke ka ètu d'ara na, aa'i-aa'i dhu j'aj'i le. Aa na pangee mau-mau, ho neo ne'a sasoa na tasa mera mia. 20 Èle ka, ana madhenga badha se lèpa hari asa era kahib'i-kalèbho ra. Hèia ra ded'e padedha-dedha kolongara Ama Lamatua. Ra manèngi makasi mi Lamatua, lula dhu rèngu tadèngi aa rèdhi dènge musi madha ra, lèke tare'a-re'a sèmi ngaa dhu ana pajuu Ama Lamatua peka sèra.
Ana iiki ne, ra pangare Na, Yesus
21 Ropa Ana iiki ne d'ai aru lod'o, ka ra suna Ne madhutu atora Musa. Hèia ama dènge ina Na pangare Ne, ‘Yesus’. Ngara ne, ngara dhu ana pajuu nèti sorga peka le dènge rèngu, lod'o ina Na dènge mèka babia.a
Rèti Ana iiki ne, asa Èmu Kapua Manèngi-Mangaj'i
22 Atora èci nèti baki Musa peka na, bhèni dhu rara iisi rare, d'ai èpa nguru lod'o hud'i madhutu ku ad'a, pamèu iisi ra ètu Èmu Kapua Manèngi-Mangaj'i. Dènge j'ara ne'e, rèngu bisa maso sèmi biasa asa d'ara èmu sabaj'a. Nèti èèna ka, Yusuf dènge Maria lasi asa kota Yerusalem, sèna ka tao madhutu ad'a. Lasi rèti dènge Ana iiki èèna asa d'ara Èmu Kapua Manèngi-Mangaj'i, ho saraka Ne, sèna ka j'aj'i unu Lamatua.b 23 Rèngu madhutu atora Lamatua dhu peka na, “Bhèni dhu nara iisi ana mone uuru, nèngu hud'i saraka ana ne j'aj'i unu Lamatua.”c 24 Madhutu atora Lamatua, ladhe saraka ana èèna mi Lamatua, ina-ama hud'i hia ku koro iia ca pasa, do koro j'aha ngèru dua ngi'u. Nèti èèna ka, Yusuf dènge Maria tao madhutu atora èèna.d
Baki Simeon peka na, Ana iiki dhu ngara Na Yesus èèna, nuka Kristus, dhu Ama Lamatua jaji tèka le
25-26 Taa èèna, abhu mone heka ca dhèu ngara na Simeon, dhu pea ètu kota Yerusalem. Nèngu ne dhèu d'ara mola, aa d'èi Lamatua. Roh Lamatua dhu Mola-Mèci peka le dènge ne, na, nèngu hud'i nèdhi ku Kristus, heka na madhe kèna. Kristus èèna ka, dhu bèli-camèd'a hia mamuri mi dhèu Isra'el.
27 Lod'o èèna, Roh Lamatua lere Simeon la'e asa Èmu Kapua Manèngi-Mangaj'i. Lod'o èèna kahèi, ina-ama Yesus rèti Ne, ho saraka j'aj'i unu Lamatua. 28 Ropa ladhe nèdhi Ana ne, ka Simeon sa'u nare Ne, hèia na koa-kio kolongara Ama Lamatua, aku nèngu na,
29 “Koa-kio kolongara Lamatua!
Lamatua tao le madhutu lii pajaji Na mi dedha ja'a.
De ne'e ne Lamatua bisa le patabuli ja'a,
sèna ka ja'a madhe dènge mera-milu,
30 te ja'a kèdhi le Dhèu dhu Lamatua pua mai,
ho patabuli ji'i nèti koasa sasala-sasigo ji'i!
31 Lamatua neo pake Ana ne'e,
sèna ka hia mamuri mi suku aa'i-aa'i.
32 Nèngu nuka sèmi saraa,
dhu pakab'ua suku-suku Isra'el, dhèu Lamatua sèra.
Nèngu kahèi èci èèna ka dènge saraa,
dhu pad'elo j'ara Lamatua,
pala mi suku-suku leo kahèi.”e
33 Ropa tadèngi sèmi èèna, hèia Yusuf dènge Maria malaa lula lii padhai dhu Simeon peka lula-nèti Ana rèngu ne. 34 Èle ka Simeon padhai lii hia si mèngi-nale. Hèia na peka dènge Maria, aku nèngu na, “Ina Yesus! Bèli-camèd'a dhèu ae ètu Isra'el tule eele Ana èu ne. Te ngaa tatao rèngu mi dedha Nèngu ne, èèna na pamanahu hari rèngu. Ana ne'e, bèli-camèd'a pakarej'e d'ara dhèu ae kahèi. 35 Dènge j'ara èèna, Lamatua bhoke patalele d'ara dhèu. Te ngaa èu, Maria, pe mu paraga dènge j'aj'èra ae-ae, nuka sèmi samala dhu lose adhe-usu èu.”
Bèi Hana manèngi makasi mi Ama Lamatua, lula Yesus
36-37 Ètu Èmu Kapua Manèngi-Mangaj'i, abhu kahèi bhèni heka ca dhèu, ngara na Hana. Umur na, aru nguru èpa tèu kèna. Ngara ama na Fanuel, nèti suku Aser. Na leo-èmu pidhu tèu, ka dhèu èmu na madhe. Hana ne, dhèu nèti lii padhai Ama Lamatua. Nèngu loe boe sabaj'a dènge puasa ètu Èmu Kapua Manèngi-Mangaj'i, ho pahaha iisi mi Ama Lamatua mèda-mèu.
38 Lod'o Simeon padhai lii dènge Yusuf dènge Maria era, hèia Hana mai padètu-dètu. Ka nanene si padhai lii, hèia na koa-kio kolongara Ama Lamatua. Ka na padhai lii lula-nèti Yesus mi dhèu aa'i-aa'i dhu tatae mamai Dhèu Aae dhu Lamatua lii dhu moa tèke neo pua mai, sèna ka patabuli dhèu Isra'el.
Ina-ama dènge Ana ne lèpa asa rae Nasaret
39 Ropa Yusuf dènge Maria tao le madhutu atora nèti baki Musa ètu kota Yerusalem, ka ra lèpa asa rae Nasaret, ètu propensi Galilea.f 40 Ka Yesus asa kapai, asa èra, asa d'èlu-mèu dènge ne'a madha j'ara ae-ae. Aa Ama Lamatua pad'elo d'ara hua iia Na mi Yesus kahèi.
Lod'o Yesus ana iiki era, la'e d'ara Èmu Kapua Manèngi-Mangaj'i
41 Yusuf dènge Maria dhu tema le, tèu mai-tèu mai lasi asa kota Yerusalem ho madhutu kalela Paska ètu nèi.g 42 Ca tèka, ropa umur Yesus canguru dua tèu, hèia la'e palere dènge ina-ama Na asa Yerusalem, lasi ra'a kalela Paska sèmi biasa. 43-44 Lod'o èle Paska, Yusuf dènge Maria mulai lèpa lasi asa Nasaret palere-lere dènge dhèu ae dhu lèpa asa Galilea. Te ngaa rèngu re'a boe, na, Yesus ètu Yerusalem era. Ra pangee, na, Nèngu palere dènge mone aanga-angalai Na. Te ngaa ropa d'ai lod'o nihia, Yusuf dènge Maria rèdhi boe Ne. Ka dua ra mulai patangi-tenge kèna. Lasi pakarèi mi a'ari ra, aa mone aanga-angalai ra. 45 Lula rage boe Ne, hèia dua ra lèpa hari sa Yerusalem, lasi tenge Ne ètu nèi.
46 D'ai nèi, ra patangi-tenge Ne toke tèlu lod'o kateme, heka paraga dènge Ne kèna, ètu d'ara Èmu Kapua Manèngi-Mangaj'i. Nèngu dhu madhèdi padhue-padhai dènge mese agama Yahudi sèra. 47 Dhèu aa'i-aa'i dhu nanene lii dhaa Na, malaa-maloha, lula Nèngu tare'a-re'a ne'a mèu isi Sasuri Mola-Mèci Ama Lamatua, aa Na ne'a dhaa lii karèi dènge mola. 48 Rèdhi sèmi èèna ka, ina-ama Na malaa kahèi. Hèia ina Na lii, aku nèngu na, “Yesus! Nga tao ka Èu paj'èra ji'i sèmi ne'e? Ama Mu dènge ja'a patangi-tenge Èu heo d'èlu!”
49 Te ngaa Yesus dhaa, peka na, “Nga tao ka ina dènge ama paj'èra iisi tenge Ja'a? Me'a, si? Ja'a dènge urusan ètu Èmu Ama Ku.” 50 Te ngaa rèngu re'a rare boe sasoa lii Na.