Lamatualain ana na ra musi besa-b'esa fo 'afi' nenepeko-leleko nala'
4
Ana susue ngga ra, e! Mete ma atahori esa nema nae eni nendi Lamatualain hehelu-fufulin, na, 'afi' simbo leli. Te ama musi paresa' matalolole fo bub'ulu' 'o'olan naa, teb'e-teb'e' mia Lamatualain nema, do hoko'. Te 'ale' ia mana peko-leleko' hetar lao' ndule raefafo' ia ena. Ara leleko' atahori rae, sira, Lamatualain mana 'ola-'ola na ra. 2 Ata bisa bub'ulu' hehelu-fufuli' bee teb'e-teb'e' na'oka mia Lamatualain Dula-d'alen, ta'o ia: Lamatualain helu mema' mia lele ulu' a, nae denu Anan raefafo' nema. Mete ma atahori mana nendi hehelu-fufuli' naa nataa nae, Yesus Kristus naa, teb'e-teb'e' Lamatualain Anan fo mana dad'i atahori 'ona' nggita, na, hehelu-fufulin mema' lao' mia Lamatualain. 3 Te atahori mana nda nau nataa Yesus ta'o naa sa, eni nda na'oka sia Lamatualain sa. Te naa nema mia mana lab'an neu Kristus. Hei rena mita 'oi, dei fo mana lab'an Kristus naa, sou nema. Tao-tao te, mana 'ona' naa sia raefafo' ia ena.4 Ana susue ngga ra, e! Mema' hei mi'oka sia Lamatualain ma koasan sia rala ma ra ena. Naa de ama misenggi' mana lab'an neu Lamatua'. Huu Dula-d'alen mana sia rala ma ra naa, manaseli' lena' koasa mana sia raefafo' ia. 5 Te mana pepeko-leleko ra ra'oka sia 'a raefafo' ia. Naa de 'o'ola na ra o ra'oka sia 'a raefafo' ia hihii-nanaun boe. Ma atahori sia raefafo' ia hii 'a rena se. 6 Te hita ta'oka sia Lamatualain. Naa de atahori mana nahine Lamatualain nau rena nggita. Ma atahori nda mana na'oka sia Lamatualain sa, na, ara nda nau rena nggita sa. Noo ta'o naa, mete ma atahori esa nae eni nendi hehelu-fufuli' mia Lamatualain, na, ata bisa bub'ulu' bee matetu', mana na'oka sia Lamatualain Dula-d'alen, ma bee mana pepeko-leleko'.
Susue' ma nemehere' — Susue' naa, saa?
7 Ana susue ngga ra, e! Ata musi sue-lai esa noo esa, huu susue' a na'oka sia Lamatualain. Basa atahori mana sue-lai' ra, ara ra'oka sia Lamatualain, ma rahine E noo malole. 8 Te atahori nda mana na'ena susue' a sa, nda nahine Lamatualain sa. Huu Lamatualain naa, naeni susue' a. 9 Lamatualain natud'u susuen neu nggita ta'o ia: Ana denu Ana Mone 'isen raefafo' ia nema, fo soi dala' fee nggita. Noo ta'o naa, ata bisa tasod'a takandoo too Lamatualain. 10 Mete ma nau mita susue matetu' a, na, 'afi' mete hita susuen neu Lamatualain. Te mete neu Lamatualain susuen nema nggita, huu Ana denu Anan nema fo mate dad'i neu tutunu-hohotu' nggati nggita ena. Noo ta'o naa, Ana 'ose hendi sala-kilu ta ra ena, fo ata bisa malole' bali' too E.
11 Ana susue ngga ra, e! Huu Lamatualain sue-lai naseli' nggita ta'o naa, de ata o musi sue-lai esa noo esa boe. 12 Nda hambu atahori esa sa boe mete nita Lamatualain relo-relo. Mae 'ona' naa o, mete ma ata esa sue-lai esa, naa sosoan nae, Lamatualain na'ab'ue noo nggita ena. Ma Susuen boe namanae sia masod'a ta ra, losa dad'i susue matetu' a.a
13 Lamatualain fee Dula-d'alen sia rala ta ra ena. Naa de ata bub'ulu' tae, ata tasod'a rala' esa too Lamatualain ena, ma Ana o rala' esa noo nggita boe. 14 Au 'oo nonoo ngga ra mita Lamatualain Anan noo hai mata ao ma ra ena. Basa de hai mifad'e neu basa atahori mae, Ama' Lamatualain denu Anan nema ena, fo fee masoi-masod'a' neu atahori sia raefafo' ia mia sala-kilu na ra. 15 Basa atahori mana rataa rae, Yesus naa, Lamatualain Anan, rasod'a malole roo Lamatualain, ma Lamatualain o malolole noo se boe. 16 Hita bub'ulu' ena tae, Lamatualain sue naseli' nggita. Naa de tamahere tae, dei fo Ana sue nakandoo nggita.
Lamatualain sue naseli' atahori. De atahori mana nasod'a sue-lai, ana nasod'a rala' esa noo Lamatualain, ma Lamatualain o rala' esa noo e boe. 17 Ma, mete ma hita rala' esa too Lamatualain, na, hita susuen dad'i matetu'. Basa fo, neu fai matete'en, Lamatualain nae paresa' basa atahori masod'a na ra, na, ata nda tamatau tambarii' sia Lamatualain matan sa, huu ata dad'i 'ona' Kristus, lele' Ana nasod'a sia raefafo' ia. 18 Mete ma hita tasod'a too susue-lalai', na, nda med'a tamatau mbei sa boe. Huu mete ma ata sue noo matetu', na, naa 'ona' a ata nggari hendi basa nemetaus sia rala ta ra ena. Mete ma atahori esa namatau, na, ralan susa, huu namatau hambu huku-d'oki' a. Ana 'ona' anad'iki' nda fe'e nahine sue atahori noo matetu' sa.
19 Hita sue-lai, huu Lamatualain sue-lai na'ahulu' nggita ena. 20 Mete ma atahori esa 'ola' nae, “Au sue-lai Lamatualain,” tao-tao te ana mburu-oe' noo toronoon, na, ana leleko'. Huu mete ma atahori nda sue toronoon mana sia matan sa, na, ta'o bee fo ana bisa sue-lai Lamatualain fo nda fe'e nita' a sa? Hoko', to? 21 Huu Lamatualain mana na'onda' parenda' ena nae, ata 'afi' sue-lai' a Eni, te ata musi sue-lai toronoo atahori mamahere' ra boe.