Au sura' susura ia fee mama, fo Lamatualain pili nala dad'i atahorin ena, ma fee mama ana na ra boe.^a Au sue-lai basa hei, rala mana nenepa'a' noo dala ndoo-tetu' ra. Basa atahori laen mana rahine dala ndoo-tetu' ra, sue-lai nggi boe. 2 Hai sue-lai nggi, huu dala ndoo-tetu' ra nenesela' sia rala ta ra, ma dei fo rasod'a rakandoo sia nggita.

3 Au hule-o'e fo Lamatualain, noo Anan, Yesus Kristus, ratud'u rala malole na ra ma rala susue na ra neu nggita, fo ata bisa tasod'a noo mole-d'ame, esa sue-lai esa, ma nenepa'a' takandoo too dala ndoo-tetu' ra.

4 Au 'umuho'o 'ala seli, lele' 'undaa 'oo mama ana na ra ruma, ma 'ita rasod'a tungga dala masod'a ndoo-tetu', 'ona' Ama' Lamatualain fee parendan neu nggita ena.

5 Mama bo'i! Lele' ia au 'o'e fo basa nggita tasod'a sue-lai. Au o'o'e ngga naa, nda parenda feu' sa, te au fee' a nesened'a' sia parenda' fo hita to'u mema' mia fefeu na.^b 6 Hita bisa tatud'u susue-lalai ta ra, mete ma ata tao tungga Lamatualain parenda na ra. Eni' a lele ulu' a, Ana parenda nggita fo tasod'a esa sue-lai esa. Ia nda dala feu' sa, te ama rena parenda' ia eni' a lele ulu' a.

7 Mana peko-leleko' hetar lao ndule raefafo' ia ena. Ara ranori rae, Yesus Kristus nema sia raefafo' ia, te Eni nda atahori teteb'es sa. Sira o mana peko-leleko' mana lab'an Kristus, ma nda nau simbo rae, Yesus naa, naeni Kristus sa, fo Lamatualain pili nala mema' eni' a lele ulu' a. 8 Tanea matalolole, fo beb'engge ta ra 'afi' mopo hendi se. Dad'i ama musi manggate tao ues mikindoo, fo ama bisa hambu basa papala-b'ab'anggi' fo Lamatualain helu-fuli nae fee nggi sia sorga.

9 Huu atahori mana lao hela Kristus nenorin, nda nenepa'a' noo Lamatualain sa. Te atahori mana to'u nahere' nenori' naa ra, nenepa'a' noo Lamatualain ma Anan, Yesus Kristus.

10 Mete ma hambu atahori rema ranori dala-d'ala nda matetu' so'al Kristus, na, 'afi' simbo e sia ume ma ra, ma 'afi' taoafi' neu e. 11 Huu mete ma taoafi' neu e, na, ama tungga ue-tatao de'ulaka na ra ena.

12 Fe'e hambu dala' hetar 'ae 'ufad'e neu nggi, te malole lena' au 'afi' sura' neu susura. Huu nda doo' sa te, au 'ae 'eti 'ola-'ola' 'oo nggi, fo basa nggita tamaho'o 'ona esa'.

13 Lamatualain o pili nala mama 'a'a inan boe. Ana na ra haitua hara malole' fee mama se sia naa.

Ba'u 'a naa ena.