5
Basa atahori mana ramahere rae, Yesus naa, mema' Kristus, fo Lamatualain denu nema' a, na, ara dad'i Lamatualain ana na ra ena. Huu atahori mana sue-lai ama' esa, eni o sue-lai ama' naa anan boe. 2 Mete ma ata sue-lai Lamatualain, ma tao tungga parendan, naa natud'u 'oi, ata sue-lai Eni ana na ra boe. 3 Dad'i mete ma hita sue-lai E, na, ata tao tungga parenda na ra. Ma parendan nda namab'era sa.a 4 Hita mana dad'i Lamatualain ana na ra ena, bisa lab'an tasenggi' raefafo' hihii-nanaun, huu tamahere neu E. 5 Huu atahori mana bisa nasenggi' raefafo' hihii-nanaun, naeni atahori mana namahere nae, Yesus naa, Lamatualain Ana na.Tamahere neu Yesus, naa nggunan saa? [
6 Sad'i ama bub'ulu' e: Yesus naa, nda atahori biasa sa. Huu Eni o Kristus fo Lamatualain denu nisi' raefafo' ia. Lele' Ana nae nalalao ue-tataon, ma Yohanis sarani E nendi' oe. Basa ma, Ana mate ma raan nandali boe. De nda 'aka' oe fo Yohanis sarani nendi' neu E sa, pantiin, te raan mana mandali' naa o pantiin boe. Huu Lamatualain Dula-d'alen mana nafad'e ta'o naa, ma Ana nda pepeko-leleko nahine sa. 7 Huu hambu dala' telu mana dad'i sakasii,b 8 naeni, Lamatualain Dula-d'alen, oe fo Yohanis sarani nendi' neu Yesus, ma Yesus raa na. Dala' katelu' naa ra, ratud'u dala 'ona esa' so'al Yesus. 9 Mete ma atahori mana dad'i sakasii, na, hita biasa tamahere e. Lelenan fai mete ma Lamatualain mana dad'i sakasii so'al Ana na. Tao-tao te Lamatualain pake dala katelu' ia ra, fo natud'u dad'i bukti 'oi, Yesus naa nda atahori biasa sa, te Eni o Kristus boe. 10 Atahori mana namahere neu Lamatualain Anan, sosoan nae, atahori naa simbo Lamatualain Ded'ea-'o'olan so'al Ana' naa. Te atahori nda mana namahere neu Lamatua' sa, ana 'ona' atahori mana 'ola' nae, “Lamatualain naa, mana peko-leleko'!” Noo ta'o naa, ana nda simbo Lamatualain Ded'ea-'o'olan so'al Lamatualain Anan sa. 11 Lamatualain Ded'ea-'o'olan isin na'o ia: Ana fee nggita masoi-masod'a ndoo-tetu' nda mama'etu' a sa. Ma ata hambu masoi-masod'a' naa, huu tamahere neu Ana na.c 12 De atahori mana nenepa'a' noo Lamatualain Anan, hambu nasod'a nakandoo noo E. Te atahori nda mana nenepa'a' noo Lamatualain Anan sa, nda hambu masod'a' 'ona' naa sa.
Ta'o bee de Yohanis sura' susura ia?
13 Au sura' basa dala' ia ra fee neu hei mana mimihere neu Lamatualain Anan, naa fo ama bub'ulu' teb'e-teb'e' mae, ama hambu masod'a' mikindoo 'a.
Yohanis sura' selu' so'al hule-o'e' a
14 Mete ma ata hule-o'e mbali Lamatualain ma to'e saa tungga Lamatualain hihii-nanaun, na, ata bisa tamahere teb'e tae Ana rena hule-o'e ta ra. 15 De mete ma tamahere teb'e ta'o naa ena, na, ata o tahine tae, simbo saa fo to'e mia E.
16 Mete ma mita toronoom tao sala' nda mana nendi mamates soa' neu e sa, na, malole lena' hule-o'e mo'e Lamatualain tulu-fali toronoom naa, fo nasod'a. Naa, masud ngga ta'o ia, hambu sala' ruma nda tao atahori mate sa. Ma hambu sala' ruma tao atahori mate. Te au nda denu hule-o'e fee atahori mana tao sala' mana nendi mamates sa. 17 Sia Lamatualain matan, basa dala' fo nda malole' ra sa, sala ena. Te nda basa sala' ra rendi mamates sa.
Yohanis fee nesenened'a' selu' so'al dala pantiin ra
18 Atahori mana na'oka sia Lamatualain, nda 'afi' nasod'a tao sala' nakandoo 'a sa ena, huu Lamatualain Anan nanea e. Ma mana tao de'ulaka manaseli' a nda nasenggi' e sa ena.
19 Hita tahine tae, ata ta'oka sia Lamatualain. Te hita o tahine tae, mana tao de'ulaka manaseli' a na'ena koasa fo nauli basa atahori sia raefafo' ia.
20 Hita tahine tae, Lamatualain Anan nema ena fo fee nggita tahine dala' ia ra, naa fo bisa tahine Lamatualain matetu' a. Lele' ia bisa tasod'a malole' too E, huu tasod'a rala' esa too Anan, Yesus Kristus. Huu Eni o Lamatualain matetu' a boe. Ma Ana mana fee atahori rasod'a rakandoo.
21 Ana ngga ra, e! Minea malolole masod'a ma ra. 'Afi' losa hambu mana seti hendi Lamatualain sia rala ma ra.
Ba'u 'a naa ena,
Yohanis