Atahori mana dad'i Lamatualain ana na ra, musi rasod'a noo ndoo-tetu' — Lamatualain ana na ra nda rasod'a tao sala' rakandoo 'a sa ena
3
Sob'a ama dud'u'a Ama' sia sorga susuen neu nggita dei! Huu susuen naa manaseli', losa Ana so'u nggita dad'i Eni ana na ra. Naa teb'e! Te atahori mana rasod'a tungga raefafo' ia hihii-nanaun, nda rahine hita ia see sa boe, huu nda rahine Lamatualain sa.a2 Ana susue ngga ra, e! Ata dad'i Lamatualain ana na ra ena, te nda fe'e bub'ulu' dei fo ata dad'i ta'o bee sa boe. 'Aka' na ata bub'ulu', ta'o ia: lele' Kristus bali' nema ena, na, hita dad'i 'ona' E boe, huu tita E relo-relo. 3 Basa atahori mana rahani Kristus neneman, tantu ara tao ramemeu masod'a na ra, fo rasod'a meumare' 'ona' Kristus boe. 4 Basa sala-kilu' ra ralena-langga Lamatualain parenda na. Naa de basa atahori mana tao sala' ra ralena-langga Lamatualain parendan ena, ma lab'an Lamatualain boe. 5 Ama bub'ulu' ena mae, Kristus dad'i atahori fo 'ose hendi sala-kilu' ta ra. Ana bisa tao ta'o naa, huu Eni nda tao nita sala' sa.b 6 Dad'i atahori mana nasod'a nenepa'a' nakandoo noo E, nasod'a nda tao sala' nakandoo 'a sa ena. Te mete ma atahori esa nasod'a tao sala' nakandoo 'a, na, sosoan nae, ana nda nahine ma nda nenepa'a' noo Kristus sa.
7 Ana susue ngga ra, e! 'Afi' losa ama nenepeko-leleko nala'. Te atahori mana nasod'a tungga saa fo ndoo-tetu' a, na, eni atahori rala ndoos, 'ona' Kristus boe. 8 Te atahori mana nasod'a tao sala', eni na'oka sia nitu de'ulaka' ra malangga na. Huu eni mana tao de'ulaka' mia fefeu na. Naa de Lamatualain Anan nema fo tao nalutu nitu a tatao-nono'i de'ulakan naa.
9 Atahori mana dad'i Lamatualain anan, nda nasod'a tao sala' nakandoo 'a sa ena, huu Lamatualain leo sia rala na. Ana nda bisa tao sala' nakandoo 'a sa, huu na'oka sia Lamatualain ena. 10 Noo ta'o naa, ata bisa bub'ulu' see na'oka sia Lamatualain, ma see na'oka sia nitu ra malangga na. Huu atahori nda mana tao tungga ndoo-tetu' a sa, ma atahori nda mana sue nahine toronoon sa, naa dad'i bukti 'oi, eni nda na'oka sia Lamatualain sa.
Lamatualain ana na ra esa musi sue-lai esa
11 Mia lele ulu' a, ama rena mema' hehelu-fufuli' ia, mana 'oi, “Esa sue-lai esa!”c 12 Fe'e misined'a Kaen noo Habel dud'uin, to? 'Afi' tao tungga Kaen, te ana na'oka sia de'ulaka manaseli' a, losa tao nisa 'od'in Habel. Saa de ana tao ta'o naa? Naa, huu eni tao dala de'ulaka' ra, te 'od'in tao dala ndoo-tetu' a.d
13 Toronoo ngga ra, e! 'Afi' heran mete ma atahori mana tungga raefafo' ia hihii-nanaun ra, mburu-oe' roo nggi. 14 Hita bub'ulu' ena 'oi, mete ma atahori mana tao sala' esa mate, na, ana saranggaa mia Lamatualain. Te, huu hita sue toronoo ta ra, naa dad'i bukti 'oi, lele' hita mate, na, tasod'a takandoo too Lamatualain. Te lele' basa atahori nda mana ra'ena susue' sa mate, na, ara saranggaa mia Lamatualain.e 15 Te atahori mana mburu-oe' noo toronoon, eni 'ona' atahori mana tao nisa atahori boe. Ama bub'ulu' ena mae, atahori mata' naa nda hambu nasod'a nakandoo noo Lamatualain sa. 16 Ata bisa tahine susue matetu' mia Kristus conto na. Huu Ana sue nggita, losa Ana fee masod'an de mate, fo nggati nggita ena. Huu naa, ata o musi sad'ia fee masod'a ta ra neu toronoo ta ra boe. 17 Mete ma hambu atahori esa masod'an hambu-d'ai, basa ma nita toronoon esa sia sususa' rala, te ralan nda na'ena susue' mbei sa boe, fo tulu-fali e sa, ta'o bee fo atahori naa bisa 'ola' nae, “Au sue Lamatualain!” Nda bisa sa!
18 Ana susue ngga ra, e! 'Afi' sue noo 'a ded'ea-'o'ola malole' ra, te tao dala malole' boe, fo mitud'u susue ma ra noo matetu'. 19 Huu mete ma ata tatud'u susue' ma tao dala malole' ta'o naa, na, ata bisa bub'ulu' tae, ata tasod'a tungga ndoo-tetu' a ena. Noo ta'o naa, ata nda parluu tamatau sa, ma bisa boti' mata ta ra lele' tandaa too Lamatualain. 20 'Ita' mae rala ta ra fe'e fua sala' neu nggita so'al dala nda malole' fo tao tita' ra sa o, 'afi' tamatau. Huu Lamatualain na'ena kasian lena' seli mia nggita. Ma Ana o bub'ulu' basa-b'asa' e.
21 Ana susue ngga ra, e! Mete ma rala ta ra 'oi ata nda sala sa, na, ata bisa tamahere ao ta ra ma nda mae sa lele' ata hule-o'e mbali Lamatualain. 22 Huu ata tao tungga parenda na ra, ma tao ralan namaho'o, naa de ata bisa simbo basa saa fo to'e mia E. 23 Parendan nae ta'o ia: tamahere takandoo neu Anan Yesus Kristus, fo Ana denu nema' a. Ma esa sue-lai esa nekendoo' a, 'ona' Yesus parenda na.f 24 Atahori mana tao tungga Lamatualain parenda na ra, nasod'a nenepa'a' noo Lamatualain ena. Ma Lamatualain o nenepa'a' noo e boe. Ata bub'ulu' Eni sia rala ta ra, huu Dula-d'alen nasod'a sia naa.