2
Ana susue ngga ra, e! Au sura' fo 'ufad'e basa ia ra, naa fo ama misod'a sud'i boe tao sala' mikindoo fai. Te mete ma hambu mana tao sala', dei fo hambu mana masala'e hita sia Ama' Lamatualain mata na. Eni, Yesus Kristus, Atahori Meumare' fo Lamatualain denu nema sia raefafo' ia. 2 Ana mate dad'i tutunu-hohotu' fee neu nggita, fo Lamatualain 'ose hendi sala-kilu ta ra. Nda fee neu 'aka' a hita sa, te fee neu basa atahori sia raefafo' ia.Atahori mana rasod'a sia manggarelo' a, tao tungga Lamatualain parendan, lelenan parenda' so'al susue'
3 Ata bub'ulu' tae, ata tahine Lamatualain noo malole, mete ma ata tungga Eni parenda na ra. 4 Atahori bisa 'ola' rae, “Au 'uhine Lamatualain.” Te mete ma ana nda tao tungga Lamatualain parendan sa, na, eni mana pepeko-leleko', mana 'ola' laen te tao laen. 5 Te atahori mana tao tungga Lamatua' parendan, naa dad'i bukti 'oi, eni sue teb'e-teb'e' Lamatualain ena. Noo ta'o naa, ata bub'ulu' tae, hita ia ra, Lamatua' atahori na. 6 Dad'i mete ma atahori esa 'ola' nae, “Au 'usod'a nenepa'a' 'oo Lamatualain,” na, eni masod'an musi 'ona' Yesus Kristus.
7 Ana susue ngga ra, e! Parenda' fo au sura' ia, nda dala feu' soa' neu nggi sa. Huu parenda' ia mema' sia Lamatualain Ded'ea-'o'olan fo ama rena mia lele ulu' a.a 8 Mae ta'o naa o, te hambu dala feu' fo au 'ae sura' so'al Lamatualain parendan ia. Parenda' ia lao' noo matetu' sia Yesus masod'an ena. Ma parenda' ia mulai lao' sia hei ena, huu hatu' mana sia rala ma ra mopo hendi ena, ma manggarelo matetu' a mulai naronda sia masod'a ma ra ena.
9 Atahori esa bisa 'ola' nae, “Au 'usod'a sia manggarelo' a.” Te mete ma ana mburu-oe' noo toronoon, na, naa dad'i tanda 'oi, eni fe'e nasod'a sia ma'ahatu' a. 10 Huu atahori mana nasod'a sia manggarelo' a, ana musi sue toronoo na ra, ma nda hambu de'ulaka' saa sa boe sia ralan fo na'atutud'a' e. 11 Naa de, mete ma hambu atahori mburu-oe' noo toronoon, na, naa dad'i tanda 'oi, eni nasod'a sia ma'ahatu' a. Ana lao' hama-hama, huu ma'ahatu' a tao matan poke ena.
Atahori mana nasod'a sia manggarelo' a, nda nasod'a tungga raefafo' a hihii-nanaun sa
12 Ana ngga ra, e! Au sura' susura ia fee neu nggi,
huu Kristus mate soa' neu nggi ena,
ma Lamatualain 'ose hendi sala-kilu ma ra ena.
13 Ina-ama' ra, e! Au sura' susura ia fee neu nggi,
huu ama mihine Yesus Kristus,
mana sia mema' eni' a lele ulu' a.
Ana soru' ra, e! Au sura' susura ia fee neu nggi,
huu ama mitati lab'an de'ulaka manaseli' a,
losa ama misenggi' e.
14 Ana ngga ra, e! Au sura' susura ia fee neu nggi,
huu ama mihine Ama' Lamatualain.
Ina-ama ra, e! Au sura' susura ia fee neu nggi,
huu ama mihine Yesus Kristus,
mana sia mema' eni' a lele ulu' a.
Ana soru' ra, e! Au sura' susura ia fee neu nggi,
huu ama mbed'a' Lamatualain Ded'ea-'o'olan sia rala ma ra ena,
losa ama dad'i ma'ad'ere',
ma mitati lab'an de'ulaka manaseli' a,
losa misenggi' e.
15 Ama 'afi' sue raefafo' hihii-nanaun, ma raefafo' sud'i 'a saa na ra. Te atahori mana sue raefafo' a, nda bisa sue Ama' Lamatualain sa. 16 Saa mana sia raefafo' ia nda na'ena huu-pata' noo Lamatualain sa. Conto 'ona', atahori mana nasod'a tao namaho'o' a aon; atahori mana bare-na'o; ma atahori mana koao' huu hata-heto na. Dala' naa ra nda ra'oka sia Ama' Lamatualain sa. Te ra'oka sia 'a raefafo' a. 17 Tao-tao te, dei fo raefafo' ia mopo hendi e, bela' noo basa dala' fo atahori hii 'a sangga' ra. Te atahori mana hii 'a tao tungga Lamatualain hihii-nanaun, ana nda mopo sa, te dei fo nasod'a nakandoo 'a.
Atahori mana nasod'a sia manggarelo' a, musi besa-b'esa fo 'afi' nenepeko-leleko nala'
18 Ana ngga ra, e! Fai matete'en deka-d'eka nema ena. Ama rena ena 'oi, atahori mana lab'an Kristus dei fo sou nema boe. Tao-tao te ara sia mema' ena. Huu hambu mana lab'an Kristus sia bee-b'ee ena. Naa dad'i tanda 'oi, fai matete'en deka-d'eka nema ena.b 19 Mana lab'an naa ra lao' mia hita talad'a na. Tao-tao te, sira nda hita atahori na ra sa. Te mete ma sira teb'e-teb'e' hita atahori na ra, na, tantu ara nda lao hela nggita sa. Te ra'atataa' rakandoo roo nggita. Te ara fela lao ena. Dad'i manggarelo' ena, sira nda hita atahori na ra sa, to?
20 Te ama nda 'ona' se sa. Huu ama simbo mala Lamatualain Atahori Meumaren Dula-d'alen ena. Ma Ana o tulu-fali nala nggi ena, fo basa nggi mihine dala ndoo-tetu' a. 21 Se'u te ama mae au sura' susura ia, huu au 'ae ne'o ama nda mihine dala ndoo-tetu' a sa, do? Hoko'! Huu ama mihine ena! Ama mihine bee ndoo-tetu' a, ma bee pepeko-leleko'.
22 Tao-tao te, hambu mana pepeko-leleko' ra lao-lao' sia raefafo' ia. Ta'o bee fo bisa tahine se? Sira, naeni atahori mana 'ola' rae, Yesus naa, nda Kristus sa. Tungga sira, na, Yesus nda Atahori Meumare' fo Lamatualain helu mema', nae denu nema' a sa. Atahori mana 'ola' ra'o naa, lab'an Kristus, huu ara nda simbo Ama' Lamatualain noo Anan sa. 23 Atahori nda mana simbo Lamatualain Anan sa, na, ara o nda simbo Eni Aman sa boe. Te mete ma atahori rataa Lamatualain Anan, na, ara o dad'i Lamatualain ana na ra ena boe.
24 Dad'i ama musi to'u mikindoo saa fo rena mia lele ulu' a. Noo ta'o naa, ama nenepa'a' mikindoo moo Ama' Lamatualain noo Anan boe. 25 Ana o helu-fuli noo nggita nae, dei fo ata tasod'a takandoo too E boe.
26 Au sura' susura ia fo mihine so'al atahori mana rae peko-leleko' nggi. 27 Ama simbo Lamatualain Dula-d'ale Meumaren ena, ma ama o misod'a nenepa'a' moo E ena. Dad'i ama nda parluu atahori laen ranori nggi sa ena. Lamatualain Dula-d'alen dai ena, huu Ana bisa nanori basa dala ndoo-tetu' ra. Ana nda peko-leleko', 'ona' mana peko-leleko' naa ra sa. Dad'i to'u mihere' neu saa fo Ana nanori' a ena, fo misod'a rala' esa mikindoo moo Kristus.
28 Ta'o ia, ana ngga ra, e! Ama musi misod'a nenepa'a' mikindoo moo Kristus. Naa fo Ana bali' nema, na, ama nda mimitau ma mae-mae' mimbirii' sia matan sa. 29 Huu ama bub'ulu' mae, Ana soa tao' a ndoo-tetu' ra, naeni de ama o bisa bub'ulu' mae, basa atahori mana tao tungga ndoo-tetu' ra o dad'i Lamatualain ana na ra boe.