Ded'ea-'o'ola mana Nendi Masod'a' ia, sia eni' a mia raefafo' fefeu na. Lele' ia, au 'oo nonoo ngga ra mita E noo mata ma ra ena. Hai rena E noo hai ndiki ma ra. Ma hai o nggama E noo lima ma ra boe. Hai mita E 'ona' naa,^a 2 huu Ana nema sia hai talad'a ma ra. Dalahulun, Ana leo noo Aman, te ia naa Ana natud'u aon neu nggita. Huu naa, hai mimbirani mifad'e neu nggi ta'o bee fo atahori bisa hambu masod'a ndoo-tetu', nda mana 'etu' sa. Te Eni ia, Ded'ea-'o'ola' mana Nendi Masod'a'.^b 3 Hai mae mifad'e nggi, basa saa fo hai mita' a, ma basa saa fo hai rena' a ena, naa fo ama bisa rala' esa moo hai boe. Huu basa hita nenepa'a' too Lamatualain noo Anan fo Ana denu nema' a, naeni Yesus Kristus. 4 Dad'i hai sura' susura ia, fo tao nemeho'o rala ma ra. Noo ta'o naa, hai rala ma ra o boe ma'ahee.

5 Nenori' fo Yesus nanori neu hai, ia naa hai mae mifad'e neu nggi, naeni ta'o ia: Lamatualain naa, malolen seli. Ana nda na'ena de'ulaka' mbei sa boe. Huu Ana 'ona' manggarelo' mana naronda, nda na'ena ma'ahatu' mbei sa boe. 6 Mete ma ata 'ola' tae, “Hita tasod'a rala' esa too Lamatualain,” tao-tao te ata fe'e tasod'a tao de'ulaka', na, naa 'ona' a ata tasod'a sia ma'ahatu' a. Huu hita 'ola' peko-leleko', ma nda tasod'a tungga dala ndoo-tetu' a sa. 7 Te mete ma tasod'a tungga dala ndoo-tetu' a, na, hita 'ona' atahori mana nasod'a sia Lamatualain manggarelon rala. Noo ta'o naa, ata bisa tasod'a rala' esa, esa noo esa. Ma rala ta ra dad'i meumare', huu Lamatualain Anan Yesus mate, ma raan 'ose hendi basa sala-kilu ta ra ena.

8 Mete ma ata 'ola' tae, “Hita nda tao sala' sa,” na, naa dad'i tanda 'oi, ata 'e'ed'ik tala bali' ao ta ra, ma nda tahine ndoo-tetu' a sa. 9 Te mete ma ata tataa sala-kilu ta ra, dei fo Lamatualain mana na'ena rala ndoos, tao tungga hehelu-fufulin ma 'ose hendi sala ta ra, ma tao nameu rala ta ra. 10 Mete ma ata 'ola' tae, “Hita nda tao tita sala' sa,” na, naa ata tae Lamatualain mana peko-leleko'! Huu Ana 'ola' ena nae, basa atahori tao sala'. Ma mete ma ata 'ola' ta'o naa, na, naa natud'u ena 'oi Ded'ea-'o'olan nda hambu sia rala ta ra sa.