Hita Lamatuan nae bali' nema
3
Toronoo susue ngga ra, e! Ia, au susura karua ngga fee neu nggi. Sia susura karua' ia ra, au fee nesenened'a' neu nggi, fo ama bisa dud'u'a so'al dala ndoo-tetu' a. 2 Misined'a Lamatualain mana 'ola-'ola meumare dalahulu na ra ded'ea 'o'ola na ra. Misined'a Yesus ded'enu na ra boe. Dud'u'a malolole so'al saa fo hita Lamatuan parenda se fo rafad'e nggi. Huu Eni mana fee masoi-masod'a' neu nggi mia sala-kilu' ra! 3 Misined'a ta'o ia dei: mae raefafo' nda fe'e natete'e sa, te hambu mana ma'ae'ei' mana tao leli tungga 'a hihii-nanau na ra. Ara 'ola' ra'amuti basa dala ndoo-tetu' ra.a 4 Ara 'ola' rae, “Cii! Yesus helu-fuli nae, Eni nae bali' nema, do? Mete ma ta'o naa, na, Ana sia bee? Huu eni' a mia hita bei-ba'i na ra mate, losa ia nema, basa' e fe'e naa ena. Basa' e lao' nekendoo, eni' a Lamatualain na'ad'ad'ad'i' lalai noo raefafo'.”5-7 Te hambu dala' esa fo atahori mana peko-leleko' ra nda nau rasaned'a sa. Naeni, mia fefeun Lamatualain 'ola 'a, ma lalai dad'i neu' ena. Ma Lamatualain tao oe boe. Basa ma Ana tad'a-b'anggi oe mia rae mad'a', ma tao rae mad'a' sou mia oe' a. Lamatualain 'ola' ta'o bee, na, naa o dad'i boe.b Doo-d'oo ma, Lamatualain tao nalutu basa atahori sia raefafo' ia fo mana rasod'a mia ba'i Noh lelen, nendi' oe mandali monae'.c Te lele' ia, Lamatualain nafad'e mema' saa fo Eni nau tao soa' neu lalai noo raefafo'. Lele' ia Ana fe'e na'atataa', te dei fo losa fain, Ana nae hotu hendi se. Te dei fo Lamatualain natud'a' huku-d'oki' fo nalutu atahori nda mana nau taoafi' neu E sa. Mae ta'o naa o, atahori mana peko-leleko' ra nda nau rasaned'a rae, dei fo Lamatualain tao tungga saa fo Eni 'ola' ena.
8 Toronoo susue ngga ra, e! 'Afi' lilii' dala' ia, naeni, hita Lamatuan nda 'ito-reken fai ra 'ona' hita sa. Te tungga Eni, fai esa bisa 'ona' too rifon esa. Ma too rifon esa bisa 'ona' fai esa.d 9 Mete ma hita Lamatuan helu-fuli nae tao dala' esa, na, Ana tao nandaa noo fain, nda nahani sa. Hambu atahori ruma du'a rae Ana ue-tao bab'anggo. Tao-tao te hoko'! Huu Ana na'atataa', fo nahani fain dei. Hita Lamatuan nau fo basa atahori doa' dei, fo lao hela sala-kilu na ra, ma heo' bali' tungga Eni. Huu Ana nda nau atahori nenesaranggaa' mia Eni sa.
10 Te dei fo hita Lamatuan bali' nema naa, nda hambu atahori rahine mema' sa. Te neneman naa, 'aib'oi' 'ona' na'o esa maso' ume rala neu. Lele' naa, basa saa mana sia lalai a nenelalangge hendi se, 'ona' relo, fulan, ma nduu' ra. Basa' e basa! 'Ona' naa boe, raefafo' noo basa isi oe na. Kad'e hendi se!e
11 Dad'i mete ma basa e nenelalangge hendi 'ona' naa, na, hei musi dad'i atahori 'ona bee fai? Ama musi mimbirii' mihere' fo misod'a tungga Lamatualain hihii-nanau na. Ama musi misod'a meumare'. 12 Ama o musi mihani mikindoo Lamatua' nenema na. Dad'i ama musi mihehere fo tao fain nema lalai leo. Lele' naa, lalai nenelalangge hendi' boe. Ma basa saa-saa sia lalai ra o nenelalangge' de noe hendi se.
13 Te dei fo hambu lalai mata feu' noo raefafo mata feu' boe. Lamatualain helu-fuli ta'o naa ena, ma hita o tahani' naa boe. Sia naa hambu 'a atahori mana rasod'a ndoo-tetu' ra.f
14 De toronoo susue ngga ra, e! Lele' ama mihani dala' ia ra, musi mihehere fo dad'i atahori malole', tungga Lamatualain nile na. Noo ta'o naa, nda hambu atahori esa bisa fua sala' neu nggi sa. Mihehere fo misod'a bad'ame boe.
15a Huu hita Lamatuan naa na'atataa', naa fo Ana bisa fee masoi-masod'a' neu nggi mia sala-kilu ma ra.
Petrus nate'e susura na
15b Naa, hita toronoon Paulus o sura' fee nggi so'al dala' hetar mana 'ona esa', to? Lamatualain mana fee ne nahine ta'o naa, naa de ana sura' ta'o naa boe. 16 Lele' Paulus sura' susura na ra, ana o 'ola' dala' ia ra boe. Mia susura na ra, mema' hambu dala' ruma fo hita susa tahine masud na. Ma hambu atahori tao 'o'o-heheo' Paulus masud na boe. Ara o tao 'o'o-heheo' dala' laen sia Lamatualain Susura Meumaren boe. Sira, naeni atahori manambera' ra, ma atahori fo nemeheren nda manggatee' sa. Atahori mata' naa ra, dei fo lutu-'eto' nala se.
17 Toronoo susue ngga ra, e! Hei mihine meser mana peko-leleko' naa ra dala masod'a na ra ena. De besa-b'esa, o! Te ara nda nau rena hohoro-lalane' saa sa boe. Ara sob'a peko-leleko' nggi, naa fo ama dinggo' lao hela dala ndoo-tetu' a. Te 'afi' hela se rasenggi' nggi ta'o naa. Huu naa de ama musi mi'itataa' mihere'. 18 Malole lena', nemehere ma ra boe mori nekendoo. Huu mihine hita Lamatuan Yesus Kristus ena, mana fee masoi-masod'a' neu nggita mia sala-kilu ta ra. Ana nau natud'u rala malolen neu nggi. Ma Ana o nau fo mihine E noo malole lena' fai.
Au nau fo basa atahori so'u rananaru E, mia lele' ia losa doo ndu'u-d'oon neu.g
Sod'a-mole',
Petrus