2 Mae ta'o naa o, dei fo atahori hetar tungga se, ma sud'i 'a tao leli nda rahine mamaet sa. Dei fo atahori 'ola' nda malole' sa so'al nenori matetu' a, huu sira tatao-nono'i na ra naa ra. 3 Meser mana peko-leleko' naa ra, mana bare-na'o ra. Ara 'e'ed'ik mata'-mata' fo tipu-laka rala doi ma ra. Te 'afi' lilii', huu Lamatualain dad'i Mana Na'etu' Ded'eat nda sunggu' nita sa. Mia dalahulun, Ana sad'ia fo huku-d'oki se. Dei fo ara rambalulutu.

4 Conto 'ona', dalahulun, Lamatualain ate na ra ruma sia sorga tao sala'. Te Lamatualain dad'i Mana Na'etu' Ded'eat nda mbo'i se sa. Ana nggari se naraka rala reu, ma 'ena nala se sia ndola ma'ahatu' a rala. Ara rahani sia mamana' naa losa fain fo reu rataa mbali E.

5 'Ona' naa boe noo atahori lele ulu' ra. Lele' naa, ara rasod'a tao' a de'ulaka', ma nda taoafi' neu Lamatualain sa. Te Lamatualain nauli de atahori rala ndoos na esa, naran Noh, natud'u dala' fo atahori bisa rasod'a matetu'. Te ara nda nau rena e sa boe. Naa de Lamatualain na'onda' oe mandali monae' a tao nalutu atahori nda mana taoafi' neu E sa. Te Ana tao nasod'a Noh noo sao-ana na ra. Basa se atahori falu.^a

6 Lele' esa fai, ma'ahulun atahori mia kota Sod'om noo kota Gomora ra rasod'a tao de'ulaka manaseli'. De Lamatualain hukun se. Ana hotu hendi basa sud'i 'a saa mana sia naa ra losa dad'i reu afu. Ma basa atahori mana sia naa ra mate. Naa dad'i conto fee neu atahori laen mana nasod'a nau 'a tao de'ulaka', ma nda taoafi' neu Lamatualain sa. Ara rahine mema' sira ua-nale na ra, mete ma ara nda nau doa' sa.^b 7 Te lele' naa, hambu atahori esa, naran Lot, nasod'a tungga 'a ndoo na. Ana bengge noo 'a atahori de'ulaka' ra tatao mana ma'alelena na ra, mana nda nau rena neu Lamatualain sa. Basa de, Lamatua tao nasod'a Lot mia naa.^c 8 Lot mesa' ne hii 'a tao matetu' ra, te ana leo sia atahori Sod'om ra talad'a na ra. Boe ma, tungga-tungga fai, na, ana nita noo rena ara ralena-langga neu Lamatualain Hohoro-lalane na ra. Naa tao fee ralan susa.

9 Basa conto naa ra ratud'u 'oi, Lamatualain nahine fee masoi-masod'a' neu atahori mana hii 'a rena Eni, mia sosob'a' mata'-mata'. Ana o nahine na'etu' huku-d'oki mamab'era' fee neu atahori mana nasod'a noo 'a sora-senggo' ra. Boe ma Ana tao ta'o naa nakandoo 'a losa fain dei fo Ana na'etu' basa atahori ra ded'ea na. 10 Huku-d'oki' mamab'era' naa, tud'a lelenan neu atahori mana hii 'a rasod'a noo manggenggeo' tungga 'a hihii-nanau na ra. Ara nda nau rena atahori esa sa boe, ma ara raneneut basa mana to'u koasa ra. Dei fo Lamatualain hukun se.

Boe ma, meser mana peko-leleko' naa ra, rambarani seli, ma koao. Ara nda nau ratud'u had'a-hormat, ma nda ramatau 'ola' ra'amuti Lamatualain noo ate na ra mana sia sorga. 11 Tao-tao te, ate mana sia sorga ra ma'ad'ere' lena' meser mana peko-leleko' ra. Mae ta'o naa o, ate naa ra nda 'ola' ra'amuti meser naa ra sia sira Lamatuan matan sa. Ma ara o nda fua sala' leli neu meser naa ra sa boe.

12 Te meser mana peko-leleko' ra hii 'a 'ola' ra'amuti so'al dala-d'ala' fo sira o nda rahine sa boe. Huu ara 'ona' a banda nda mana dud'u'a nahine sa! Malole lena', to'u mala se fo tao milulutu se! Te ua-nale na ra ta'o naa. Tantu rambalutu, huu tatao-nono'i na ra. 13 Ara tao ra'asususa' atahori hetar. Basa dei fo Lamatualain o tao na'asususa' se boe, huu tatao-nono'i nda matetu na ra sa. Ara hii 'a feta-d'ote tao de'ulaka' mata'-mata'. Ara o hii 'a tao sora-senggo' sia fai rerelo', naa fo basa atahori bisa rita de'ulaka na ra. Ara nda rahine mamaet sa, ma tao ralutu hei nara malole ma ra. Mete ma ara raa fefetas ra'ab'ue roo nggi, na, ara hii tao tungga 'a hihii-nanau de'ulaka na ra. 14 Mata na ra feruk leli fo sangga ina' mana nau tao sala' roo se. Ara rasod'a tao de'ulaka' rakandoo 'a. Ara hii 'a sangga atahori fo nemeheren neu Lamatualain nda manggatee' sa, ma fufud'i se fo tao tungga de'ulaka'. Ara 'aka' sangga dala' fo bare-na'o rakandoo 'a. Tantu Lamatualain huku-d'oki se!^d

15-16 Dalahulun, meser mana peko-leleko' naa ra, atahori mana tungga dala ndoo-tetu' a, te doo-d'oo ma ara lao' sora-senggo. Noo ta'o naa, ara 'ona' Balaam dalahulun, naeni Bosor ana na. Eni, Lamatualain mana 'ola-'olan esa. Te ana hii 'a sangga doi', naa de ana tao dala nda matetu' ra sa. Lao esa, Balaam sae banda keled'ei. Keled'ei ra nda bisa 'ola-'ola' sa. Te lele' naa Lamatualain tao banda keled'ei a 'ola' 'ona' atahori e! De banda keled'ei naa, 'ena-'ai Balaam, huu tatao-nono'i de'ulaka na. Banda keled'ei naa, nau fo ana doa', naa fo ana sud'i boe tao sora-senggo' ra fai, 'ona' atahori mulu' e.^{e f}

17 Meser mana peko-leleko' naa ra 'ona' oe mata' esa nda ma ngguna saa sa boe, huu meti hendi ena. Ara o 'ona' lume-masu' nda ma ngguna saa sa boe, huu anin fuu hendi e. Lamatualain sad'ia hela mamana ma'ahatu' esa fo 'ena se reu rala. 18 Huu, ara 'ola' nae', te nda maisi' sa. Ara rae fufud'i atahori, fo tao tungga sira hohongge-b'ub'uni na ra. Ara hii 'a kokoe-nanasi atahori mana fe'e lao bali' risi' dala ndoo-tetu' a, fo tao selu' sala' fai. 19 Atahori mana peko-leleko' naa ra helu rae, “Mete ma ama rena neu hai, na, ama bisa tao tungga 'a hihii-nanau ma ra!” Te atahori mana 'ola' ta'o naa ra, 'ona' ate nda mana bisa mbo'i ao na ra mia de'ulaka' ra sa. Huu atahori mana hela fee dala' esa nauli nala e, na, naa 'ona' ana dad'i neu dala' naa aten ena. 20 Mete ma nau nenembo'it mia de'ulaka' sia raefafo' mana tao nanggenggeo nggita, na, musi tahine hita Lamatuan Yesus Kristus. Te mete ma hambu atahori dinggo' hela E, fo reu ra'ab'ue selu' roo de'ulaka 'ona' dalahulun, na, naa 'ona' dala de'ulaka' nauli se. 'Ale' ia, ara boe hambu sosoe' ena! 21 Mete ma ara rahine dala masod'a matetu' a ena, te ara dinggo, ma nda tao tungga dala malole' ma meumare' a sa ena, fo Lamatualain parenda neu nggita, na, naa nda malole' sa. Malole lena' ara nda parnaa rahine dala ndoo-tetu' a sa. 22 Hambu ded'ea lasi' dai meser mana peko-leleko' ra 'oi, “Mete ma busa muta, na, ana neu dalo bali' mutas na.” Hambu laen fai 'oi, “Mae fafi esa neneneriu' ena o, ana bali' neu loli tane a fai.”^g