Au sura' susura ia fee neu basa nggi fo Lamatualain pili nala ena. Ama dad'i atahori fea' mana leo sea-saranggaa sia mamana' hetar sia profinsi Pontus, profinsi Galatia, profinsi Kapadokia, profinsi Asia, ma profinsi Bitinia.

Toronoo susue ngga ra, e! Mia fefeun, Ama' Lamatualain pili nala nggi ena fo dad'i atahori na. Dula-d'alen o tao nameu nggi soa' neu E, naa fo ama tao tungga basa parenda' fo Yesus Kristus fee nggi' a. Ma mete ma ama tao tungga basa parenda na ra, naa 'ona' Lamatualain bib'irus Yesus raan neu nggi, dad'i tatanda' 'oi, ama dad'i meu' fee neu E ena.

Au hule-o'e fo Lamatualain natud'u rala malolen neu nggi, fo 'ona bee, na, ama misod'a tamba fai, na, tamba nee-nee lino-lino ma mole-d'ame.

3 Basa kokoa-kikio' soa' neu Lamatualain! Eni, hita Lamatuan Yesus Kristus Ama na. Huu Lamatualain rala susuen, naa de Ana sue naseli' nggita. Yesus Kristus mate, basa ma Ana nasod'a bali'. Dad'i mete ma Yesus Kristus tao nggita tasod'a, na, Ana fee nggita masod'a feu' 'ona' hita neneb'onggi bali'. Naa de tamahere takandoo neu Kristus, ma tamahena teb'e-teb'e' tae, dei fo Ana nanea ma na'ab'oi nggita noo malole'. 4 Sia raefafo' ia, mete ma ama' esa mate, na, ana lao hela hata-heton fee neu ana na ra. 'Ona' naa boe, Yesus mbed'a' hela pusaka fee nggita sia sorga. Pusaka naa meumare', nda bisa nambalutu sa, ma nda sambu-lalo sa. 5 Hei mimihere mae, Lamatualain na'ena koasa fo tulu-fali nala nggi. Ana na'ab'oi ma nanea nggi, fo nda hambu mana tao ralutu nggi sa. Ma mete ma raefafo' sambu-lalo, Ana nae natud'u, noo dala' bee Eni fee masoi-masod'a' neu nggi.

6 Naa de, mae 'ale' ia ama med'a beran seli huu ama musi hambu sususa' mata'-mata' o, rala ma ra mimiho'o. 7 Lamatualain hela nggita hambu sosob'a-d'od'ou' ra, fo nae fora nemehere ta ra neu E. Mete ma ata tala seri mia sosob'a' ra, naa natud'u 'oi, nemehere ta ra mahere' ma matetu'. Bisa ta'asasama' noo lilo a. Huu hita musi hotu lilo a neu ai a, fo 'orut hendi manggenggeon, dei fo ata fe'e hambu lilo a meu na. Tao-tao te, tungga Lamatualain dud'u'an, nemehere ta ra felin lena' lilo mbilas. Dad'i mete ma tala seri mia sosob'a-d'od'ou' naa ra, na, dei fo lele' Yesus Kristus bali' nema, Lamatualain o koa nggita, boe ma natud'u manaseli ta ra, ma fee nggita had'a-hormat.

8 Mae ama nda fe'e mita Yesus noo mata ma ra sa o, ama sue E. Mae lele' ia ama nda mita Yesus sa o, ama mimihere E. Hei rala ma ra o mimiho'o mala seli, mae nda hambu ded'ea deke' esa ndaa nafad'e atahori so'al rala ma'ahee ma ra sa. 9 Huu mimihere Yesus, de hahambu ma ra, naeni Lamatualain fee masoi-masod'a' neu nggi mia sala-singgo ma ra.

10 Lamatualain mana 'ola-'olan dalahulu' ra sangga dala' fo rae rahine noo malole', noo dala' bee Lamatualain fee masoi-masod'a neu atahori mia sala-singgo na ra. Mana 'ola-'ola' naa ra rafad'e mema' so'al Lamatualain natud'u rala malolen neu nggi, huu Ana sad'ia mema' nae fee masoi-masod'a' neu nggi ena. 11 Kristus Dula-d'alen ue-tao sia rala na ra fo nafad'e mema' 'oi, dei fo Kristus musi hambu sususa', ma noo dala' bee Ana musi hambu doid'oso'. Basa dei fo Lamatualain so'u nananaru E. Naa de mana 'ola-'ola' naa ra rae rahine fai hira' fo dala' ia ra dad'i. 12 Boe ma, Kristus Dula-d'alen nafad'e neu mana 'ola-'ola' naa ra nae, ara nda rita sa, te hei mana mita dala' ia ra. De ia naa, ama o bisa rena so'al dala' ia ra, huu Lamatualain Dula-d'ale Meumaren mia sorga denu atahori laen fo reu rafad'e Lamatualain Hara-lii Malolen neu nggi. Tao-tao te, Lamatualain ate na ra sia sorga o nau rae rita dala' ia ra boe.

13 Naa de ama musi mihehere fo mihine malolole basa dala' ia ra. Minea malolole fo ama dud'u'a noo ndoos. Mihehere fo mimihere mikindoo neu Yesus Kristus losa Ana bali' nema. Huu lele' naa, Lamatualain nau natud'u rala malolen neu nggi. 14 Ama musi rena neu Lamatualain, 'ona' anak ara rena neu ina-ama na ra. Fe'esa'an, ama nda fe'e mihine Lamatualain dala masod'a ndoo-tetun sa. Te ia naa, mihine ena. De 'afi' misod'a tungga dud'u'a de'ulaka' ma ra fai. Huu naa, hei dala masod'a mbaraa ma ra. 15 Naa de ia naa ama musi misod'a meumare'. Huu Lamatualain, meumare'. Ana mana no'e nala nggi fo dad'i Eni ana na. Huu naa, basa dala masod'a ma ra musi meumare'. 16 Huu nenesura' sia Lamatualain Susura Meumaren 'oi, “Ama musi meumare', huu Au meumare'.”^a

17 Hei hii 'a 'ola-'ola' moo Lamatualain 'ona' a Eni, hei Ama ma. Ana o dad'i Mana Ma'etu' Ded'eat dei fo mana paresa' atahori esa-esa' masod'a na. Te Ana nda 'ona' mana ma'etu' ded'eat laen ra sa. Huu Ana na'etu' atahori ded'ean noo matetu', nda soko seseri' sa. Naa de ama musi misod'a besa-b'esa. Huu hei 'ona' atahori fui' mana leo na'atataa' a sia raefafo' ia.

18 Hei bub'ulu' ena mae, Kristus bae 'etu ena de soi-tefa nala nggi mia masod'a ma ra nda mana na'ena huu-pata' sa. Hei simbo mala masod'a' mata' naa mia bei-ba'i ma ra, 'ona' su'i pusaka esa. Te misined'a, Kristus nda bae nala nggi nendi' lilo do doi fula' fo mana mopo' a sa. 19 Te Ana bae nala nggi nendi' raa na. Naa, felin manaseli'! Ana mate 'ona' bib'i lombo ana' esa nda mana tao sala' sa, fo ara hala tao dad'i tutunu-hohotu'.

20 Lele' Lamatualain nda fe'e na'ad'ad'ad'i' raefafo' ia sa, Ana nahine mema' saa fo Kristus nae tao' a. Te fe'esa'an, Lamatualain nda fe'e natud'u Kristus neu atahori sia raefafo' ia sa. Ia dei de, Ana natud'u Kristus, fo dad'i papala-b'ab'anggi' soa' neu nggi. 21 Huu Kristus tao ta'o naa, naa de ama bisa mimihere neu Lamatualain. Huu Ana tao nasod'a bali' Kristus, ma so'u nanaru E. Lamatualain tao ta'o naa, fo ama mimihere neu E, ma mimihena fo Ana tao tungga saa fo Ana helu-fuli mema' a ena.

22 Hei tao tungga saa fo matetu' a. Dad'i ia naa ama bisa ue-tao noo manggate fee neu Lamatualain. Naa tao nggi sue teb'e-teb'e' neu toronoo atahori mamahere' ra. Hei susue ma ra musi bau manggatee', huu rala ma ra meumare'. 23 Ia naa, ama hambu masod'a feu' ena. Te masod'a feu' ia, ama nda hambu mia ina-ama ma ra fo dei fo mana mate sia raefafo' ia sa, te ama hambu mia hita Aman mana sia sorga fo nda mana mate' a sa. Hei masod'a feum ia, hei hambu tungga Lamatualain Ded'ea-'o'ola na. Ded'ea-'o'olan ia, nendi masod'a ndoo-tetu', ma na'atataa' nakandoo. 24 Huu nenesura' sia Lamatualain Susura Meumaren 'oi,

Lamatua' Ded'ea-'o'olan naa, naeni, Hara-lii Malole' fo hai mifad'e neu nggi ena.^b