Nenori-nefad'e' soa' neu mananuni atahori sarani' ra
5
Naa, au mananuni' esa boe. Dalahulun, lele' Kristus lemba-d'oi doid'oson, au 'ita noo mata ngga. Dei fo lele' basa atahori rita Lamatualain mandete-masa'an, na, au o nau 'ita noo mata ngga dala' naa ra boe. Dad'i au nau fee nenori-nefad'e' neu mananuni laen ra, ta'o ia: 2 Hei 'ona' manatad'a mana ra'ab'oi bib'i lombo na ra. Dad'i ama musi minea ma mi'iboi malolole atahori fo Lamatualain fee neu nggi ena. Mete-se'u se noo malole'. 'Afi' mete-se'u se huu naa hei ue-tatao ma ra, te huu hei hii tao ta'o naa. Mete-se'u se tungga Lamatualain hihii-nanau na. 'Afi' hii mia 'onton lena'-lena', te ue-tao noo manggate fo tulu-fali Lamatua' atahori na ra.a 3 'Afi' hii parenda leli, fo tao mimib'era atahori fo Lamatualain fee nggi mete-se'u' ra. Te ama musi dad'i conto malole', fo mitud'u dala' fee se. 4 Yesus naa, 'ona' Manatad'a ra Malangga na. Lele' Ana bali' nema, na, Lamatualain nau fee nggad'i ma ra, huu ama mete-se'u atahori ma ra noo malole'. Nggad'i' naa, nda bisa nambalutu sa, huu ana na'atataa' nakandoo 'a.Nenori-nefad'e' soa' neu ana soru' ra
5 Ana soru' ra, e! Hei o musi tao rerena' neu mananuni atahori sarani' ra. Basa nggi 'afi' so'u-so'u' ao ma ra. Huu nenesura' sia Lamatualain Susura Meumaren 'oi,
“Lamatualain lab'an atahori mana so'u-so'u' ao na ra,
te Ana hii 'a natud'u rala malolen neu atahori mana naloe-nad'ae rala na.”b
6 Naa de basa nggi musi misined'a Lamatualain koasan, fo ama 'afi' koao. Boe ma, doo-d'oo nandaa noo fain, Lamatua nau koa nggi.c 7 So'u rala ma ra fo hela fee Lamatualain mana mete-se'u basa dala' mana tao nggi dud'u'a. Huu Ana fad'uli nggi.
8 Besa-b'esa, o! Dud'u'a naru'! Minea malolole te hita musun, naeni nitu ra malanggan, nae tao nalutu nggi. Ana nae 'od'o hendi nggi 'ona' meo-aku mana mamanasa' esa nae sangga banda nanaa na. 9 Te 'afi' mimitau. Ama musi lab'an nitu ra malanggan naa. Ama o musi mi'itataa' fo mimihere mikindoo neu Lamatualain. Huu ama mihine ena mae toronoo atahori mamahere ma ra sia bee-b'ee sia raefafo' ia o, musi hambu doid'oso' 'ona' nggi boe. 10 Misined'a te Lamatualain hii natud'u rala malolen neu nggita. Ana mana no'e nala nggi fo dad'i Eni atahorin, huu ama simbo mala Kristus ena. Naa de Ana nae so'u nananaru nggi, fo ama bisa misod'a mikindoo moo E. Te mete ma ama hambu mala doid'oso' nda doo' sa sia raefafo' ia ena, na, Lamatualain nae tao nggi malole bali'. Ana nae tao manggatee rala ma ra, ma tao fee nggi mi'itataa'. Ana o naririi nggi sia fanderen manggatee'. 11 Ata to'e fo basa koasa sia Lamatualain liman losa doo ndu'u-d'oo na neu. Teb'e!
Petrus nate'e susura na
12 Silasd tulun au de sura' susura e'eku' ia. Eni, hita toronoo nemeheren, ma au lima 'ona ngga boe. Au 'unori-'ufad'e nggi, fo ama mi'itataa' mihere', huu Lamatualain hii natud'u rala malolen nakandoo neu nggita. Dad'i ama musi mimbirii' mihere' fo 'afi' mi'id'ed'ea'.
13 Atahori mamahere' mana ra'ab'ue sia kota Bab'el haitua hara sod'a-mole' fee neu nggi boe. Lamatualain pili nala se, 'ona' Ana pili nala nggi boe.
Au ana ngga Markus o haitua hara sod'a-mole' boe.e
14 Lele' hei mindaa, na, esa mitea esa mendi' i'id'u susue' mana natud'u susue ma ra.
Au nau fo basa hei mana mimihere neu Kristus bisa misod'a noo mole-d'ame, ma nee-nee lino-lino.
Sod'a-mole',
Petrus