Kristus atahori na ra musi rasod'a noo matetu'
4
Kristus naa, atahori 'ona' nggita boe. Huu Ana hambu doid'oso' naen seli ena, de ama musi sad'ia hambu doid'oso' 'ona' E boe. Ma misined'a, te atahori mana sad'ia hambu susa-sona' huu nenepa'a' noo Kristus, ana na'etu' nae, eni nda nau tao sala' sa ena. 2 Mae ana fe'e nasod'a sia raefafo' ia o, ana nda nasod'a tao sala' nakandoo 'a sa, 'ona' atahori laen ra. Huu ana nasod'a tungga 'a Lamatualain hihii-nanau na.3 Fe'esa'an, hambu fai nae', mete ma hei mae tao sud'i 'a de'ulaka' saa, 'ona' atahori nda fe'e rahine Lamatualain sa. Conto 'ona': ara tao leli'. Ara hohongge. Ara tungga hihii-nanau de'ulaka na ra. Ara rinu mafu. Ara feta-d'ote tao de'ulaka' mata'-mata'. Ara feta hohongge ra'ab'ue. Ara 'aka' songgo fo mana bisa tao ao fulu ta ra tenggou. 4 Ara 'ola' ra'amuti nara malole ma ra, huu nda rahine ta'o bee de ama nda tao tungga de'ulaka manaseli' 'ona' sira tao' a sa.
5 Ma misined'a, te dei fo ara musi reu rataa mbali Lamatualain, Mana Na'etu' Ded'eat. Ara musi rafad'e neu E saa de sira rasod'a de'ulaka' ta'o naa. 'Afi' lilii', te basa atahori musi reu rataa mbali E boe. Mae atahori fe'e masod'a' ra, do mana mate' ra ena. 6 Teb'e! Lamatualain nae paresa' atahori mates ra 'ona' Eni paresa' atahori laen ra boe. Huu Ana nae mete dala masod'a ma'ahulu na ra. Naa de Yesus neu nafad'e Lamatualain Hara-lii Malolen neu se, naa fo ara o bisa hambu masod'a ndoo-tetu' fo tao tungga Lamatualain hihii-nanaun boe.
Ata musi tanea ma ta'ab'oi malolole basa saa fo Lamatualain fee neu nggita ena
7 Fai matete'en deka-d'eka nema ena. Naa de ama musi dud'u'a losa lolosan, ma sub'a-sub'a, fo ama bisa hule-o'e noo malole'. 8 Pantiin na, ama musi misod'a esa sue esa mikindoo 'a. Te mae atahori laen ra tao sala' naen seli o, mete ma ama fe'e sue e, na, bisa mi'ib'ue moo e boe.a 9 Simbo atahori mia mamana' laen mana numban sia ume ma ra noo lima' rua. Ma misined'a. 'Afi' simbo noo unggu-remu'.
10 Atahori mana simbo papala-b'ab'anggi' mia Lamatualain ena, musi mete-se'u toronoo atahori mamahere na ra nendi' papala-b'ab'anggi naa ra. Tao mata' ma pake noo malole papala-b'ab'anggi' naa fo na'ena ngguna soa' neu Lamatualain. 11 Conto 'ona': mete ma hambu papala-b'ab'anggi' fo nenori atahori, na, misined'a te ama musi mifad'e atahori mendi' Lamatualain Ded'ea-'o'ola na. Mete ma hambu papala-b'ab'anggi' fo mete-se'u atahori, na, mete-se'u mendi' beb'e'i-b'ara'ai' fo Lamatualain fee' a. Noo ta'o naa, basa atahori rita rae, hei Yesus Kristus atahori na. Huu naa, ara so'u rananaru Lamatualain. Te Eni mandete-masa'an manaseli'! Ma na'ena koasa fo to'u parenda' nda nama'etu sa. Teb'e ta'o naa!
Hita hambu doid'oso', huu dad'i atahori Kristen
12 Toronoo susue ngga ra, e! 'Afi' heran, mete ma ama hambu sosob'a'-d'od'ou' beran seli. 'Afi' du'a mae, 'aka' mesa' nggi mana hambu sosob'a 'ona' naa. Te naa fora nemehere ma ra. 13 Rala ma ra bisa ramaho'o, huu ama hambu doid'oso' 'ona' Kristus o hambu doid'oso' ena. Noo ta'o naa, dei fo rala ma ra ramaho'o lele' basa atahori hambu rita Kristus mandete-masa'a na. 14 Lele' atahori 'ola' ra'amuti nggi huu ama nenepa'a' moo Kristus, na, ama 'onton, huu Lamatualain Dula-d'ale manaselin sia nggi. 15 Te mete ma ama musi hambu doid'oso', na, 'afi' hambu huu hei misa atahori, do, mimina'o, do, tao de'ulaka', do, mana mii sardod'od'oo moo atahori laen ue-tatao na. 16 Te mete ma atahori hambu sususa' huu dad'i Kristus atahorin, na, ana nda parluu med'a mamaet saa sa boe. Malole lena' ara koa-kio Lamatualain, huu sira dad'i atahori Kristen ena.
17 Fain losa ena fo atahori rataa sia Lamatualain mata na. Ana paresa' na'ahulu' atahori nara masod'a na ra. De d'u'a neu' ena! Mete ma Ana paresa' na'ahulu' hita atahori Kristen, na, ta'o bee noo atahori nda mana nau simbo Hara-lii Malolen sa? Tantu huku-d'oki na ra beran lena'! 18 Te nenesura' sia Lamatualain Susura Meumaren 'oi,
“Mete ma atahori mana nasod'a ndoos ra rae' a nda hambu masoi-masod'a' sa,
na, ta'o bee fai atahori nda mana taoafi' neu Lamatualain sa?
Ma ta'o bee noo atahori mana nasod'a sia 'a sala' rala?”b
19 Dad'i mete ma Lamatualain hela atahori na ra hambu sususa' tungga Lamatualain hihii-nanaun, na, ara bisa ramahere rae, dei fo Ana nanea se boe! Huu Eni mana tao nala se. Ana o tao tungga saa fo Ana 'ola' a. Huu Eni nanea se ta'o naa, naa de ara fe'e bisa tao ndoo-tetu' rakandoo 'a.