Au sura' susura ia fee hei atahori Yahud'i, mana tungga Lamatua' Yesus, mana leo-lao sia bee-b'ee.^{a b}

2 Toronoo ngga ra, e! Au 'ae 'ufad'e ta'o ia: mete ma ama hambu sususa' mata'-mata', na, 'afi' masaloe. Simbo noo rala nemeho'ot, te dei fo buna-b'oan malole'. 3 Te ata bub'ulu' tae, mete ma see na'atataa' sia sususa', losa nasenggi' sosob'a-d'od'ou' a, ma fe'e mimihere mikindoo neu Lamatualain, naa tao nggi bau matu-matu mete ma hambu sosob'a' laen. 4 Dad'i ama 'afi' mimitau sususa'. Te ama minori mi'itataa' sia sususa' losa ama dad'i matetu'. Noo ta'o naa, nemehere ma ra boe na'oka nahere' sia Lamatualain, de nda to'a-taa saa sa boe.

5 Mete ma hei ruma mimed'a nda hambu dala' fo mi'itataa' mia sususa' sa, hei mitane mbali Lamatualain mana nahine basa' e. Eni mana natud'u dala' fee nggi. Eni mana fee nggi dud'u'a malole' noo rala nemeho'ot, ma nda namanasa nggi sa, mete ma hei mo'e mbali E. 6 Mete ma mo'e mia E, 'afi mo'e noo rala seseri'. Hei musi mimihere teb'e-teb'e' mae Ana bisa fee saa fo hei mo'e' a. Te atahori mana ro'e noo rala seseri', ana 'ona' ree fo anin fuu e rae-ata nda natetu-nandaa sa. 7-8 Atahori see ralan nab'ab'anggi noo mud'a' 'ona' naa, ana nda matetu' sia basa dala' ra sa. 'Afi' mimihena mae ana hambu saa-saa mia Lamatualain boe.

9 Atahori mana tud'a-loloe' mana namahere neu Lamatua' Yesus, musi ramaho'o, huu Lamatualain so'u nala se dad'i bob'onggin ena.

10-11 Ma atahori mamasu'i' mana ramahere neu Lamatua' Yesus ena, ara o musi tao rala na ra ramaho'o, huu Lamatualain nanori se 'afi' koao. Ia naa rahine rae, dei fo su'i na ra mana sambu-lalo', 'ona' buna' sia lasi a nab'una meulau, te nda doo' sa ma relo a haa e, de ana male. Atahori mamasu'i' ra o 'ona' naa boe. Mae sira rasambute roo tatao-nono'i na ra, te sira o mana sambu-lalo' boe.^c

12 Lamatualain fee papala-b'ab'anggi' neu atahori mana na'atataa' mia sosob'a' a losa nasenggi'. Ma ana simbo nala hahambu masoi-masod'a' fo Lamatualain helu basa fee neu atahori mana sue E. Ana simbo hahambun 'ona' atahori mana nasenggi' a hambu beker.^d

13 Misined'a malolole! Mete ma hei ruma hambu sosob'a' ma mae tao sala', 'afi' rundu mae, “Lamatualain mana sob'a au!” Te Lamatualain nda hii-nau tao sala' sa. Ana o nda sob'a atahori fo atahori naa hii tao sala' sa. 14 Te sala' nema mia atahori rala na. Fefeun, ralan nau tao de'ulaka', de basa ma ana sangga dala' nae tao de'ulaka'. 15 Boe ma ana tao tungga dud'u'a de'ulakan nakandondoo' a. Matete'en, Lamatualain na'onda' huku-d'oki mamates neu atahori mana tao de'ulaka'.

16 Toronoo susue' ra, e! 'Afi' nenetipu' so'al dala' ia ra.

17 Dala de'ulaka' ra nda mia Lamatualain sa. Te ana mana fee basa papala-b'ab'anggi malole' ma basa dala meumare'. Eni mana na'ad'ad'ad'i' relo, fulan, ma nduu' ra. Basa se lali-lali' sia lalai, naa de salao na ra 'ub'a-'ub'a rakandoo 'a. 'Aka' a Lamatualain nda mana 'ub'a' sa. 18 Lamatualain hihii-nanaun fee hita ta'o ia: Ana fee Ded'ea-'o'ola matetun nema hita. Ma Ana pake Ded'ea-'o'olan naa, fo fee nggita masod'a'. Ana pili nala hita dad'i mbule ulu' mia basa saa, fo Ana na'ad'ad'i' sia raefafo' ia.

19 Toronoo susue ngga ra, e! Misined'a, e! Malolen ta'o ia: 'afi' sad'i' a 'ola 'a. Malole lena', mete ma atahori 'ola' malole', na, nenene malolole dei! Ma 'afi' haelai miminasa. 20 Te mete ma miminasa, na, ama nda bisa tao dala malole' tungga Lamatualain hihiin sa.

21 Dad'i ama musi nggari hendi basa sala-kilu ma ra. 'Ona' atahori raue rameu tine-osi na ra, ma ded'e hendi manggarau' ra. Hei o musi simbo Lamatualain Ded'ea-'o'olan noo rala neloe-ned'ae'. Ded'ea-'o'olan naa ra 'ona' fini nenesela' sia rala ma ra. Mete ma ama tao ta'o naa, dei fo Lamatualain mbo'i hendi nggi mia basa sala-kilu ma ra, ma simbo nggi fo misod'a mikindoo moo E.

22 Mete ma ama mihine Lamatualain Ded'ea-'o'olan, na, tao tungga e. 'Afi' rena 'a! Mete ma hei rena 'a, te nda tao tungga sa, hei 'e'ed'ik bali' ao ma ra. 23-24 Mete ma atahori rena basa Ded'ea-'o'ola' naa ra, te nda tao tungga sa, na, naa 'ona' atahori sa mete matan sia tiro-ao a. Ana heo' dean, ma lilii' hendi mata-aon neu' ena. 25 Te Ama 'afi' ta'o naa. Ama musi paresa' malolole Lamatualain Ded'ea-'o'ola matetun, mana bisa tao atahori nenembo'it mia sala-kilu na ra. Dei fo Lamatualain fee papala-b'ab'anggi' sia basa saa fo hei tao' ra, sad'i rena ma tao tungga Ded'ea-'o'ola' naa ra. 'Afi' rena mendi' ndiki diim ma kalua tungga ndiki 'onam!

26 Mete ma atahori sa nae eni atahori malole', te nda nanea nala bafan sa, eni 'e'ed'ik bali' aon! Eni nemeheren parsuma 'a. 27 Huu atahori mana namahere teb'e-teb'e' neu Ama' Lamatualain, ralan musi matetu' losa nda hambu manggenggeo' saa sa boe. Naa, tao Ama Lamatualain ralan namaho'o. Nemehere matetu' 'ona' naa, tao atahori hii tulu-fali ina falu roo ana maat ra. Atahori mana na'ena nemehere' mata' naa, nda hela atahori raefafo' ia kokoe-nanasi se noo tatao de'ulaka' sa.