Nenori-nefad'e' fee neu masao' ra
3
Sao ina' ra, e! Faa' ra au 'ae ata musi tao rerena' neu atahori mana to'u koasa ra. De ama musi tao rerena' neu sao ma ra boe. Misined'a te hambu tou' ruma nda nau tao tungga Lamatualain Ded'ea-'o'olan sa. Mae ara nda nau rena ded'ea-'o'ola ma ra sa, te dei fo ara nau ramahere Lamatualain, huu masod'a ma ra.a 2 Huu ara mete hei tao basa-b'asa' e noo rala ndoos ma meumare' sia Lamatualain mata na.3 Ina' meulaun, nda mia saa fo nenenita' sia dea' sa. Conto 'ona': tao langga fulun dad'i mata'-mata', do, pake na'alelena' lilo mbilas-lilo fula', do, pake bua-b'a'u mafelit nda nandaa had'at sa.b 4 Te mana tao ina' ra meulau' teb'e naa, naeni: rala na ra nda nenenita' sia dea' sa. Conto 'ona': rala malole' ma mana sub'a-sub'a'. Huu meulau' mata' naa, nda mopo sa, mae ina' naa namalasi ena. Tungga Lamatualain mata memeten, meulau' mata' naa, mafelit. 5 Huu lele ulu' a, ina rala meumare' mana ramahere neu Lamatualain, meulau na ra o 'ona' naa boe. Ara o tao rerena' neu sao na ra boe. 6 Ha'i conto mia bei Sara. Ana tao rerena' neu saon Abraham. Ana hela saon nauli e. Hei ina' ra musi tungga eni dalan, huu mete ma ama tao dala matetu', na, 'afi' mimitau saa-saa boe.c
7 Sao tou' ra, e! Misod'a rala' esa moo sao ma ra. Timba-tai malolole saa fo malole' fee neu e, basa naa tao tungga. Mitud'u had'a-hormat mbali e sia basa dala' ra, huu ina' ra ma'ad'eren nda 'ona' tou' ra ma'ad'eren sa. Huu basa nggi simbo bela' pusaka fo Lamatualain nau fee neu nggi' a. Naeni, simbo bela' masod'a feu' fo Lamatualain fee neu nggi mia rala malolen ena. Te hei sao tou' ra musi misod'a rala' esa moo sao ma ra, naa fo mete ma ru'a nggi so'u rala ma ra fo hule-o'e mo'e saa esa mia Lamatualain, na, Ana nau rena nggi.d
Mae hei tao ndoo-tetu' a o, dei fo ama o hambu sususa' boe
8 Toronoo susue' ra, e! Neu mate'en, au 'ae 'ola' dala' esa. Basa nggi musi misod'a noo rala' esa. Mete ma atahori esa med'a susa-sona' do namaho'o, na, hei laen ra o musi med'a 'ona' naa boe. Sue-lai atahori mana ramahere neu Kristus. Mitud'u rala malole' esa noo esa. 'Afi' koa-b'o'u ao ma ra, te musi miloe-mid'ae rala ma ra. 9 'Afi' bala-b'ae de'ulaka' noo de'ulaka'. Mete ma atahori esa 'ola' nda malole' mbali nggi sa, na, 'afi' 'ola' nda malole' mbali e sa boe. Te mo'e Lamatualain tao malole' neu atahori naa. Huu Lamatualain no'e nala nggi dad'i Eni atahorin, naa fo ama bisa simbo malole' mia E boe. 10 Nenesura' sia Lamatualain Susura Meumaren 'oi,
“Atahori mana sangga masod'a malole',
ma mana sangga ua-nale naru' a,
atahori naa musi nanea bafan fo 'afi' 'ola' de'ulaka',
ma 'afi' 'ola' peko-leleko'.
11 Ana musi doa', fo sud'i boe tao de'ulaka' fai,
te tao bali' a ndoo-tetu' leo.
Ana musi nanori nasod'a mole-d'ame noo basa atahori,
ma sangga dala' fo malolole noo se.
12 Huu mana na'ena hak parenda nggita,
Ana tao mata' neu atahori mana nasod'a ndoo-tetu'.
Ma Ana o nau rena hule-o'e na ra boe.
Te hita Lamatuan lab'an nakandoo 'a
atahori mana nasod'a tao' a de'ulaka'.”e
13 Mete ma hei manggate tao' a ndoo-tetu', na, seka nae tao de'ulaka' mbali nggi fai? Nda hambu sa, to? 14 Te mae ama tao' a ndoo-tetu', te basa ma hambu atahori tao ra'asususa' nggi, na, ama 'onton. Mete ma hambu atahori nda rahine Kristus sa ramatau huu dala' esa, na, ama 'afi' mimitau tungga ta'o naa. Dud'u'a ma ra 'afi' liuali ma rala ma ra 'afi' susa 'ona' se boe.f 15 Tao rala ma ra nee-nee lino-lino, huu ama so'u Kristus sia rala ma ra fo dad'i hei Lamatua meumare ma.
Mete ma atahori ro'e nggi fo mifad'e nemehere ma ra, ma saa de ama mimihena mae, dei fo Kristus tao basa' e dad'i malole', na, ama musi sad'ia fo mitaa se.g 16 Te ama musi mitaa noo rala malole', ma mitud'u had'a-hormat mbali se, naa fo ara bub'ulu' ama tao matetu' mia rala meumare'. Mae ama tao malole' ta'o naa o, tantu hambu mana rae 'ola' ra'atutud'a' nggi, huu ama nenepa'a' moo Kristus. De mete ma ama tao malole' mikindoo 'a, na, dei fo mana ra'amuti nggi, ara mae. 17 Mete ma naa tungga Lamatualain hihiin, na, 'afi' lilii', te malole lena' ama hambu susa-sona' huu tao ndoo-tetu' a, 'afi' huu ama tao sala'.
18 Te Kristus mate lao esa' a,
huu hita atahori tao sala'.
Eni mana nasod'a ndoo-tetu' a,
mate soa' neu nggita mana tasod'a too manggenggeo' a.
Ana mate fo ama bisa malolole bali' moo Lamatualain.
Kristus naa, atahori 'ona' hita boe.
Atahori tao risa E,
te Lamatualain Dula-d'alen tao nasod'a bali' E.
19 Dula-d'ale' naa o nendi E neu nanori ao samana' mana nene'ena' ra sia mamana' esa 'ona' bui e. 20 Sira, naeni atahori dalahulu' fo nda mana nau rena Lamatualain sa. Lele' naa, ba'i Noh tao 'ofa monae' esa. Lamatualain nea-nea nae mete atahori tao tungga Eni hihii-nanaun, te ara nda nau tao tungga sa. Naa de 'aka' atahori falu' a hambu rasod'a mia oe mandali monae' a.h 21 Oe mandali' naa dad'i conto, 'ona' lele' hei nenesarani' boe. Sarani' naa natud'u 'oi, Lamatualain mbo'i hendi nggi mia sala-kilu ma ra, huu Yesus Kristus nasod'a bali' ena. Lele' ara sarani nggi, ara nda rariu nggi fo tao rameu ao ma ra sa. Te matetun, ama mitaa mbali Lamatualain, fo mae tao mimeu rala ma ra. Noo ta'o naa, ama bisa misod'a noo ndoo-tetu'. 22 Lele' ia, Yesus hene bali' sorga neu ena. Sia naa Ana 'endo' sia mamana nenefee had'a-hormat manaseli' a, sia Lamatualain bob'oa 'ona na. Boe ma, ate mana sia sorga ra, basa koasa ra, ma mana to'u koasa ra, musi tao rerena' neu Kristus.