Hita dad'i teu Lamatualain atahori meumare na
2
Dad'i hei 'afi' tao de'ulaka' saa-saa boe. 'Afi' peko-leleko' atahori. 'Afi' dea-rala'. Rala ma ra 'afi' mera mbali atahori fo masod'an lena' nggi. 'Afi' mi'imuti atahori nara malole na. Nggari hendi basa naa ra leo! 2 Rala ma ra musi hii mihine Lamatualain Ded'ea-'o'olan, 'ona' Ana mana bonggi feu' ra rae' a do bee fo rinu susu mia mama na ra. Huu naa mana tao nemehere ma ra boe manggate tungga-tungga fai. Noo ta'o naa, ama boe mimilasi, fo misod'a tungga Lamatualain hihii-nanau na. 3 Huu ama o med'a hambu hita Lamatuan rala malolen ena boe.a4 Misod'a mi'ib'ue moo Kristus mikindoo 'a. Huu Ana 'ona' fatu esa, mana na'ena masod'a'. Tukan ra nggari hendi fatu naa ena, huu ara du'a rae, fatu naa nda na'ena ngguna' saa sa boe. Te Lamatualain nae felin manaseli' teb'e, de pili nala E, dad'i fatu netehuu' pantiin manaseli'. 5 Hei o musi misod'a nenepa'a' moo Kristus, naa fo Lamatualain o pake nggi boe. Noo ta'o naa, ama 'ona' fatu fo Lamatualain pili nala fo nafefela ume fee Dula-d'ale na. Hei o 'ona' fatu mana na'ena masod'a', 'ona' Kristus. Hei o 'ona' malangga agama mana rasod'a meumare' fee neu Lamatualain. Naa 'ona' hei mendi tutunu-hohotu' fee neu E. Hei tutunu-hohotu ma ra tao Lamatualain ralan namaho'o, huu Yesus Kristus mate fee neu basa nggi ena. 6 Te nenesura' sia Lamatualain Susura Meumaren 'oi,
“Mete dei! Huu Au 'utetende fatu netehuu',
sia kota Yerusalem ia,
fo ara ro'e rae, ‘kota Sion’.
Au mana pili 'ala fatu naa ena.
Eni felin seli soa' neu Au.
Dad'i atahori mana ramahere neu E,
dei fo nda hambu mamaet saa sa boe.”b
7 Yesus 'ona' fatu naa boe. Ma soa' neu atahori mana ramahere neu E, Eni felin seli boe. Te soa' neu atahori nda mana ramahere neu E sa, nenesura' sia Lamatualain Susura Meumaren 'oi,
“Fatu fo tukan ra nggari hendi' a,
'ale' ia dad'i fatu netehuu',
pantiin manaseli' ena.”c
8 Ma hambu nenesura' boe 'oi,
“Hambu fatu mana tao atahori ra'atunu.
Hambu fatu mana tao se ra'aloli.”d
Ra'aloli huu ara nda nau tao tungga Lamatualain Ded'ea-'o'olan sa. Te Lamatualain tao mema' fo fee se ra'aloli ta'o naa ena.
9 Te hei nda 'ona' naa sa. Huu ama dad'i atahori fo Lamatualain pili nala ena. Ama dad'i Eni 'ena na. Ama 'ona' malangga agama mana mete-se'u mane' ra. Hei o 'ona' nusa' esa masod'an meumare' fee neu Lamatualain. Hei dad'i ta'o naa, fo ama bisa mifad'e basa atahori so'al Lamatualain rala malolen, fo Ana tao fee nggi' a. Huu Ana denu nggi lao hela dala de'ulaka' ra, fo misod'a tao malole'. Naa 'ona' ama lao hela ma'ahatu' a, fo misod'a sia Eni manggarelo meulau manaseli na.e 10 Dalahulun, hei dad'i 'ona' bob'onggi' esa nda mana na'ena sosoan saa sa boe. Te ia naa ama dad'i Lamatualain bob'onggin ena. Fe'esa'an, ama nda nau simbo Lamatualain susuen neu nggi sa. Te ia naa, ama simbo mala ena.f
Minea malolole fo misod'a noo ndoo-tetu'
11 Toronoo susue ngga ra, e! Hei ia ra, mema' fui' sia raefafo' ia. Huu hei 'ona' atahori dea' mana neu tungga-sangga sia atahori nusa na. Naa de au 'aka' 'o'e fo ama 'afi' 'ona' atahori laen mana sia raefafo' ia, mana tao de'ulaka' tungga 'a hihii-nanau na ra. Huu sia rala ma ra hambu netatis. Naeni, hihii-nanau' mae tao de'ulaka' lab'an noo hihii-nanau' mae tao malole'. Dad'i 'afi' hela hihii-nanau' mana nau tao de'ulaka' a nasenggi' nggi. Te mete ma ta'o naa, na, ama mimbilutu ena! 12 Minea malolole fo ama misod'a ndoo-tetu' sia atahori nda mana fe'e nahine Lamatualain sa mata na. Noo ta'o naa, mete ma ara rae rapepenggo nggi leli, na, ara rita 'a malole ma ra. Ma, mete ma Kristus bali' nema, dei fo sira mana so'u rananaru Lamatualain, huu hei tatao malolem naa.
Ata musi tao rerena' neu atahori mana to'u koasa
13 Hita Lamatuan nau fo ama tao rerena' neu basa atahori mana to'u koasa ra. 'Ona' a: tao rerena' neu mane' a, huu eni dad'i malangga mana sia ata' 14 Tao rerena' neu hofernor, huu mane' a mana denu e fo na'etu' hukun neu atahori mana tao dala de'ulaka' ra, ma fee kokoa' neu atahori mana tao dala matetu' ra. 15 Naa de Lamatualain nau fo ama tao ndoo-tetu' ra, naa fo atahori nggoa' mana nda nahine saa sa boe, nda na'ena dala' fo fua sala' neu nggi sa. 16 Mae ama dad'i atahori nenembo'it, mana mi'ena hak tao tungga hihii-nanau ma ra o, 'afi' tao dala-d'ala de'ulaka' mendi' hei hak ma. Tao ue-tataos fee neu Lamatualain mendi' hei hak ma, huu ama dad'i Lamatualain 'ena na. 17 Ama musi fee had'a-hormat neu basa atahori. Musi sue basa atahori mana ramahere neu Kristus. Musi misod'a nandaa sia Lamatualain matan, te dei fo Eni mana na'etu' huku-d'oki' neu nggi. Ma ama musi fee had'a-hormat neu mana to'u parenda' ra boe.
Ata musi ta'atataa' sia doid'oso', 'ona' Kristus
18 Atahori ded'enu' ra, e! Tao rerena' neu malangga ma ra, ma fee had'a-hormat neu se boe. 'Afi' tao rerena' neu 'a malangga rala malole' ra. Te 'ita' mae hei malanggam de'ulakan seli o, musi tao rerena' neu e boe. 19 Mete ma hei ruma nda sala saa sa boe, te hambu huku-d'oki' mata'-mata' mia malangga, ma ama mi'itataa' sia susa-sona' naa rala huu misined'a Lamatualain hihii-nanaun fee nggi, na, dei fo Lamatualain natud'u rala malolen neu nggi. 20 Mete ma hei tao sala', de hambu ue-hehemba', na, naa hahambun sa, mete ma mi'itataa' sia susa-sona' naa? Nda hambu sa, to? Te mete ma hambu susa-sona' huu ama tao malole', ma mi'itataa', na, Lamatualain tao mata' neu nggi. 21 Huu Kristus o nau ama misod'a tao ndoo-tetu', mae ama hambu susa-sona'. Huu Ana o lemba-d'oi susa-sona' fee nggita boe. Noo ta'o naa, Ana dad'i conto, fo ata tungga, 'ona' ata lao' tungga ei lele na. 22 Nenesura' sia Lamatualain Susura Meumaren 'oi,
“Ana nda tao nita sala' sa.
Nda hambu peko-leleko' kalua mia bafan sa.”g
23 Lele' ara 'ola' ra'amuti E o, Ana nda bala-b'ae sa. Lele' Ana doid'oso o, Ana nda na'atatata' nae lab'an sa. Te Ana fee aon neu Lamatualain lima na. Huu Ana namahere nae, Lamatualain naa, Mana Na'etu' Ded'eat noo ndoo-tetu'.h 24 Kristus naa, mana lemba-d'oi hita salan, lele' Ana mate mia hau nggangge' a. Ana tao ta'o naa, fo ata tasod'a sud'i boe tao sala' takandoo 'a fai. De ia naa, ata nda tasod'a tao sala' takandoo 'a sa, te tasod'a tao' a ndoo-tetu' a. Huu Ana nggati nala nggita ena, fo simbo nala huku-d'oki' ta ra ena. Huku-d'oki' naa tao E hambu hina-mbaes, losa Ana mate. Hina-mbaes mana tao E mate, na, mana tao malole nggi ena.i 25 Hei 'ona' bib'i lombo fo dalahulun mana lao ta ra leli' ena. Te ia naa, ama bali' misi' Lamatualain dala ndoo-tetun ena. Huu Ana mana nanea ma na'ab'oi nggi noo malole', 'ona' manatad'a esa nanea ma na'ab'oi bib'i lombo na ra.