Hei ue-tatao ma ra sia raefafo' ia, naeni 'aka' tao mimiho'o neu 'a ao ma ra, ma misod'a mimiho'o 'a. Ia naa hei 'ona' sapi mbaruna' fo rae tati' a. Hei o huku-d'oki ma misa atahori malole', mana nda rasala'e rala ao na ra sia mata ma ra sa.

Atahori mamasu'i' ra, e! Ama nggae ei-ei leo! Te dei fo doid'oso' mata' hetar dai nggi. Hata-heto ma ra sangga rambalutu hendi se ena. Bua-lo'a meulau ma ra o, mba'i a naa hendi se. Lilo mbilas noo lilo fula ma ra nda rafeli sa ena. Dei fo lilo mbilas noo lilo fula ma ra bu'i nggi, 'ona' ai hotu hendi hau meto'. Ta'o bee de raefafo' nae sambu-lalo, te hei fe'e tasib'u mi'id'uru hata-heto mates naa ra? Hata-heto ma ra dei fo dad'i bukti 'oi, hei nda mihine saa mana mafelit sia Lamatualain matan sa!^b

7 Dad'i toronoo ngga ra, e! Hei musi mi'itataa' mihani Lamatua' nenema na. Mete neu atahori mana ue-rae a, na'atataa' nahani rae a mbule-b'oa na. 'Ud'an nema, ma ana sela-nggari boe. Basa naa ma, ana nahani 'ud'an fai fo tao sela-nggari' ra nggarui. Doo-d'oo ma rambule-rab'oa. Losa fain ma, atahori naa neu 'etu-'oru raen mbule-b'oa na ra. 8 Hei musi mihani 'ona' naa boe. Ma'ad'ed'ere ao ma ra, nda doo sa te, Lamatua' nema ena!

9 Toronoo ngga ra, e! 'Afi' unggu-remu esa noo esa. Unggu-remu mikindoo 'a, te dei fo Lamatualain na'etu' huku-d'oki' neu nggi! Mete neu' ena, te Mana Nggero-furi mana sia ata' a, nambarii' sia mata ma ra ena.

10 Toronoo ngga ra, e! Tungga conto mia Lamatualain mana 'ola-'ola na ra. Mae ara hambu sususa' mata'-mata', te ara ra'atataa' rakandoo 'a. 11 Mete ma hambu atahori ra'atataa' sia sususa-sosona', hita hii 'a so'u tananaru atahori naa nara na. 'Ona' ba'i Ayub. Ana hambu sususa-sosona' mata'-mata', te ana na'atataa' nahere'. Boe ma Lamatualain tud'a kasian neu e, de ana tao basa' e dad'i malole' fee neu e. Lamatualain tao ta'o naa, huu ralan malole' ma sofe' noo susue'.^c

12 Toronoo ngga ra, e! Tungga matetun, ama 'afi' so'u susumba'. Mete ma mae mifad'e mae, “hei”, na, mitaa mae “hei”. Ma mete ma mae mifad'e mae, “hoko'”, na, mitaa mae “hoko'” 'ona' naa dai ena! 'Afi' miseli' so'u susumba' mendi' atahori raefafo' nara na. Lelenan fai, 'afi' sumba mendi' Lamatualain mana masod'a' sia lalai a nara na. Nda hambu nggunan so'u susumba' mata'-mata' sa. Te mete ma ta'o naa, na, simbo teme-ao huku-d'okim, huu susumba ma ra.^d

13 Mete ma hambu sia hei mana susa-sona', malole lena' ana hule-o'e. Ma mete ma hambu mana namaho'o', malole lena' ana sod'a koa-kio Lamatualain. 14 Mete ma hambu sia hei mana mamahed'i' ra, na, malole lena' mo'e lasi-lasi sarani' ra rema. Mo'e se 'o'ose mina neu mamahed'i' a, ma hule-o'e mendi' Lamatualain naran, fo Lamatua' na'ahahai' e.^e 15 Mete ma hei hule-o'e fee atahori hed'is ra, ma mimihere teb'e-teb'e' neu Lamatualain, dei fo Lamatualain na'ahahai' atahori naa. Ma mete ma atahori naa tao sala' ena, dei fo Lamatualain 'ose hendi sala-kilu na. 16 Dad'i mete ma hambu sia hei tao sala', na, hei musi mitaa sala ma ra. Noo ta'o naa, hei esa hule-o'e fee esa, naa fo hei dad'i malole'.

Atahori rala meumare', hule-o'en sofe' noo koasa, ma bisa nendi hahambu malole'. 17 'Ona' ba'i Elia. Eni o, atahori 'ona' hita boe. Te ana hule-o'e na'anggee 'ud'an, ma nda doo' sa ma 'ud'an o naloe' boe. De nda 'ud'a losa too telu seseri' sa.^f 18 Basa ma, ana hule-o'e no'e 'ud'an, ma nda doo' sa ma 'ud'an o nema boe. Uru a mod'o-mod'o bali', ma osi-lutu ra o rambule-rab'oa bali' boe.^g

19 Toronoo ngga ra, e! Mete ma hambu ruma sia hei mulai tao sala' de lao hela dala ndoo-tetu' a, basa ma hambu mana tulu-fali de roo bali' e nisi' Lamatualain dala ndoo-tetun, na, naa malole. 20 Misined'a ia malolole! Mete ma hei tulun atahori mana tao sala', fo ana bali' nisi' Lamatualain, ma nda tao sala' sa ena, hei moo bali' atahori naa nisi' dala masod'a' ena, de ana hambu masod'a' nakandoo noo Lamatualain. Noo ta'o naa, Lamatualain 'ose hendi basa sala-kilun ena.^h

Ba'u 'a naa ena!