'Afi' tungga raefafo' hihiin
4
Hei 'aka' mireresi ma mitofa esa noo esa. Naa huu-patan saa? Naa dad'i, huu sia talad'a ma ra hambu atahori rae sangga nemeho'ot soa' neu ao na ra 2 Hei misuu' a hambu saa esa, te nda nai dai sa. Boe ma hei rala ma ra mera, de 'aka' mireresi, ma mifetu, losa hei nda hia-b'ii mae misa atahori sa.Hei nda hambu e sa, huu hei nda hule-o'e, ma nda mo'e mia Lamatualain sa. 3 Te mae hei hule-o'e losa 'etu fatu hau ra o, hei nda hambu saa fo mo'e' a sa, huu mo'e tungga 'a hihii ao-sisi ma ra.
4 Mema' hei atahori nda mana ma'atataa' sa! hei 'ona' atahori masao' ra esa ralan nda na'atataa' noo esa sa, de hohongge leli. Mete ma hei tungga 'a raefafo' ia hihii-nanaun, na, tao ao ma ra musu moo Lamatualain. Naa eni ena! 5 Naa de, nenesura' sia Lamatualain Susura Meumaren 'oi, “Lamatualain fee Dula-d'alen sia rala ta ra ena. Ma Dula-d'ale' hihiin, fo ta'atataa' takandoo too E. Te huu, Ana horo-mbala.” 6 Lena' fai, Lamatualain fe'e nau fee tamba rala malole na. Naa de, nenesura' sia Susura Meumare' a 'oi:
“Lamatualain lab'an atahori mana koao' ra,
te natud'u rala malolen neu atahori mana raloe-rad'ae rala na ra.”a
7 Lamatualain naa, hita Malanggan mana na'ena hak parenda nggita! Dad'i fee ao ma ra reu E, fo tungga hihii na. Ama 'afi' tungga nitu ra malanggan hihii-nanau na. Lab'an mihere' e. Noo ta'o naa, ana nela hela nggi. 8-9 Sangga dala' fo misod'a rala' esa moo Lamatualain. Noo ta'o naa, Ana deka noo nggi.
Weh, mana masod'a sia sala-kilu' ra, e! Ama musi tao mitetu dala masod'a ma ra. Ma, rala mana banggi-b'anggi' ra, e! Ama musi lao' noo ndoos moo Lamatualain, 'afi' dinggo' dii-'ona mii fai. Doo basa ia misod'a noo nemeho'ot ma kid'o-ked'e' a. De miloe' leo! Hei bub'ulu' rala mana banggi-b'anggi ma ra ma sala-kilu ma ra ena. Malole lena' fale rala ma ra ma nggae ei-ei leo. 10 Mete ma hei mihine teb'e-teb'e' mae, mema' hei nda mindaa sia Lamatualain matan sa, dei fo Ana so'u nala nggi dad'i atahori mana nandaa sia mata na.
'Afi' 'ola' mi'imuti-mi'imuu atahori
11 Toronoo ngga ra, e! 'Afi' 'ola' mi'imuti-mi'imuu esa noo esa nara malole na. Te mete ma hei 'ola' ta'o naa, ma fee sala' mikindoo 'a neu atahori ra, hei milena-langga neu Lamatualain hohoro-lalanen mana 'oi, “Musi sue toronom, 'ona' hei sue ao ma ra boe.” Mete ma hei nda tungga hohoro-lalane' naa sa, hei so'u minanaru ao ma ra lena' Lamatualain hohoro-lalane na. 12 'Aka' Lamatualain mesa' ne, mana tao hohoro-lalane' naa, na'ena hak na'etu' hita ded'ea na. Ma 'aka' Eni na'ena hak fee masoi-masod'a' neu nggita, do, fee huku-d'oki mate neu nggita. Hei nda mi'ena hak mi'etu' atahori ded'ean sa, do 'ola' mi'imuti atahori nara malole na.
'Afi' koa-kaa
13 Ta'o ia! Hei, musi mihine ena fo 'afi' 'ola' mae, “Fai' ia do mbila na, hai mae mii sia kota naa! Hai mae leo sia naa too esa. Hai mae danggan fo hambu buna' mbei!” 14 Ho bub'ulu' saa so'al fai mana nema ia ra? Nda hambu esa nahine masod'a' ia nenendin sa. Atahori masod'an 'ona' lume' sou, te 'aib'oi' ma mopo neu' ena.b 15 Malole lena' hei 'ola' mae, “Mete ma Lamatualain sue, na, hai misod'a. Ma mete ma Lamatualain nau, na, hai tao ia,” 16 Te mete ma nda 'ola' ta'o naa sa, na, hei koa-kaa' a. Naa 'ona' hei lilii' Lamatualain sia dud'u'a-afi ma ra. Naa sala monae'.
17 Misined'a malolole! Atahori mana nahine dala matetu' a, te nda tao tungga ta'o naa sa, naa eni tao sala' ena.