Susura fee atahori
Ibrani
mana fe'e na ramahere Yesus Kristus
ma lao hela bei-ba'i na ra agaman
Lamatualain Anan manaseli', lena' mana 'ola-'ola ma'ahulu na ra
1
Dalahulun, Lamatualain denu mana 'ola-'ola na ra 'ola-'ola' roo hita bei-ba'i atahori Ibrani na ra.a Ana pake dala' mata'-mata' de 'ola' lao hetar noo se.b 2 Te ia naa, Ana haitua Anan, fo 'ola' mata' noo nggita.Mia fefeun, Lamatualain pili nala Anan ia ena,
fo parenda na'ab'ue noo Eni.
Lele' Ana na'ad'ad'ad'i' lalai noo raefafo' noo basa isi-oen,
Anan ia o na'ad'ad'ad'i' noo E boe.
3 Lamatualain Anan ia natud'u Aman Lamatualain mandete-masa'an,
'ona' relo a rondan naronda mia tiro-ao.
Huu mata-aon 'ona' Ama na.
Mia Ded'ea-'o'ola manaselin,
Ana nalalao basa mana sia lalai noo raefafo'.
Ana o natud'u dala',
fo 'ose hendi atahori sala-kilu na ra,
fo ara dad'i meumare'.
Basa de Ana bali' sorga neu,
fo 'endo' sia Lamatualain bob'oa 'onan,
sia mamana nenefee had'at manaseli'.
Lamatualain Anan manaseli', lena' ate mana sia sorga ra
4 Lamatualain ate na ra mana sia sorga mema' manaseli'. Te Anan manaseli' lena' basa se. Lamatualain panggat na, monaen seli. Ana fee panggat na neu Anan ena. Naa de Anan, lena' basa ate na ra mana sia sorga.
5 Lamatualain 'ola' nita noo Anan nae,
“Fai' ia, Au so'u nggo to'u parenda'.”c
Lamatualain o 'ola' nae,
“Au ia, Eni Ama na.
Ma Eni ia, Au Ana ngga.”d
Lamatualain 'ola' mema' ta'o naa so'al Anan, te Ana nda 'ola' nita ta'o naa so'al ate na ra mana sia sorga sa.
6 Lele' Lamatualain haitua Ana manaselin naa nema, Ana o parenda ate na ra sia sorga nae,
“Wee! Ate ra, e!
Hei musi mii fee had'a-hormat,
ma sende' be'utee neu Ana ngga dei!”e
7 Lamatualain o 'ola' so'al ate na ra sia sorga nae,
“Au tao ate ngga ra sia sorga,
dad'i 'ona' anin.
Au tao ate ngga ra,
dad'i 'ona' ai.”f
Lamatualain 'ola' na'asasama' ate na ra 'ona' anin ma ai, huu sira, 'aka' Eni ded'enu na ra.
8 Te Ana 'ola' laen fai noo Anan nae,
“Ho ia, Lamatualain.
Dei fo Ho 'endo' sia kad'era parenda' losa doon neu.
Dei fo Ho to'u koasa fo parenda noo rala ndoos.
9 Ralam namaho'o mete atahori mana nasod'a ndoos.
Te ralam susa mete atahori mana nasod'a tao leli.
Naa de ralam namaho'o,
de Au mbo'a mina neu langgam,
fo so'u nggo dad'i mane' lena' laen ra.”g
10 Lamatualain o 'ola' neu Anan nae,
“Ana ngga, e!
Ho ia, Malangga mana to'u parenda' eni' a ma'ahulu na.
Ho, mana denu fo lalai dad'i.
Ho ia, mana parenda fo raefafo' dad'i.
11-12 Dei fo lalai noo raefafo' sambu-lalo hendi se.
Dei fo lalai noo raefafo' mopo hendi se.
Te Ho musod'a mukundoo.
Dei fo Ho piru hendi lalai noo raefafo',
'ona' atahori piru hendi bua-b'a'u sid'e' ra.
Dei fo Ho nggati lalai noo raefafo',
'ona' atahori nggati bua-b'a'u feu'.
Te Ho nda ta'o naa sa.
Huu musod'a losa doo ndu'u-d'oon neu.”h
13 Lamatualain o 'ola' neu Anan nae,
“Ana ngge!
'Uma 'endo' sia ia, sia mamana nenefee had'a-hormat a,
sia Au bob'oa 'ona ngga.
Dei fo Au tao musu ma ra,
Losa ara be'utee neu nggo.”
Lamatualain 'ola' mema' ta'o naa so'al Anan, te Ana nda 'ola' ta'o naa so'al ate na ra sia sorga sa.i 14 Ate na ra mema' pantiin boe. Huu Ana denu se, fo reu tao mata' neu basa atahori na ra, fo dei fo Ana fee se masoi-masod'a' mia sala-kilu na ra. Te mae ta'o naa o, Lamatualain Anan, fe'e lena' basa se.