Munea malolole bafam
3
Toronoo ngga ra, e! Atahori hetar rae ranori atahori mamahere' ra. Naa malole! Te misined'a, dei fo Lamatualain paresa' lutu'-lelo' atahori mana ranori atahori mamahere' ra. De nda sud'i 'a see bole nanori sa. 2 Basa nggita 'ola' sala mata'-mata'. Te atahori mana na'atataa' nala bafa-maan, fo nda sere-d'ed'ed'e sa, ana nauli nahine basa masod'a na. 3 Conto 'ona' ndara. Hita bisa lea ndara monae' suet na fo talalao e tungga hita hihii na. 4 Conto esa fai, 'ofa' a. 'Ani monae' fuu na'amimina' 'ofa' a tungga hihii na. Te uli ana' o bisa tao 'ofa' a dalan tungga mana to'u uli a hihii na. 5 Hita bafan o 'ona' naa boe. Bafa' a anad'iki' te tataon seli teb'e!
Naa 'ona' ai mbila' mbei lalangge nab'asa' lasi.a 6 Bafa' o, 'ona' ai mbila' boe. Hita bisa pake bafa ta ra fo talutu dala' nae'. Bafa ta ra bisa tao nalutu masod'a ta ra. De'ulaka' hetar sia raefafo' ia, kalua mia atahori bafa na. Nitu ra malanggan o pake atahori bafan fo nalalao eni ue-tatao na.
7 Atahori ramamau rita banda fui mata-mata', banda mananod'o', mbui' ma 'u'u sia tasi. 8 Te nda fe'e hambu atahori esa namamau nala bafan sa boe. Te bafa' a, bua de'ulaka' susa neneneuli'. 'Ona' raso mana maso' nisi' ao-sisi' fo tao nisa atahori.
9-10 Noo bafa' esa, atahori koa-kio ma rarai-oole. Naa nda nandaa sa! Hita pake bafa ta ra fo koa-kio Ama' Lamatualain. Ma noo bafa' naa boe, hita rarai-oole atahori, fo Lamatualain na'ad'ad'i' tungga mata-ao na. Saa de ta'o naa?b
11 'Ona' oemata' sa, nda bisa nandali oe mina' noo oe masi' lao esa' sa.c 12 Esa fai, nda'e huu' a nda bisa nab'oa dafa landu sa. Ma mbela' nda nab'oa boa anggor sa, to? Te hau a nab'oa tungga mata-ao na. 'Ona' hita nda bisa ndui oe mina' mia lifu oe masi' sa.
Dud'u'a malole' mia Lamatualain
13 Atahori mana dud'u'a malole' ma nahine dala' tungga Lamatualain hihiin, nda bole koa-b'o'u aon sa. Te ana bub'ulu' mahine' naa mia Lamatualain. Hela fo natud'u mahinen, nendi' masod'a ndoos na. 14-15 Mete ma ralam mera fo 'aka', mu'ututud'a' atahori ra, na, 'afi' oro-ara mae, ho atahori dud'u'a malole'. Naa 'ona' ho mana peko-leleko'. Te nesod'a ta'o naa, na, naa nda naran ‘dud'u'a malole'’ sa. Naa, nda 'onda mia Lamatualain sa, te lao' mia raefafo'. Naa, nandaa neu atahori mana nda fee masod'a na ra neu Lamatualain sa. Naa tungga nitu ra dala na. 16 Te mete ma hambu rala mera' ma netofa-nehuu', na, hambu nemue-anggi', ma atahori tao de'ulaka' mata'-mata'.
17 Te dud'u'a malole' mana 'onda mia Lamatualain naa, ta'o ia: Fefeun ana tao nggita tasod'a meumare'. Basa ma hita nda hii netofa sa, hita hii taloe ao ta ra, ta'atataa' ma nenee' a. Nenendin tao rala ta ra malole, hii tulu-fali atahori, nda soko seseri' sa, ma nda dea-mata' too atahori laen ra sa. 18 Ma atahori mana natud'u dala dame nenendin malole' boe. Naa 'ona' atahori sela fini, de doo-d'oo ma hambu mbule-b'oa malole'.