'Afi' pili-tad'a tae, atahori moko do anak
2
Toronoo ngga ra, e! Saa de mae hei mimihere neu Yesus Kristus, hita Malangga mandete-masa'an naa, te hei fe'e mete mata'? 'afi' ta'o naa! 2 'Ona' hambu atahori rua risi' hei ume hule-o'e ma. Esa pake bua makahahad'o' ma ndeli lilo' sofe lima na. Esa fai pake bua manggenggeo'. 3 De hei mutumue simbo atahori mana pake bua makahahad'o' a, ma fee ne mamana malole' sia mata', te mana pake bua manggenggeo' a, hei denu e mae, “Mumburii' sia dea' naa! Hoko' na, 'endo' muu' a rae' a!” 4 Mete ma hei mete mata' ta'o naa, hei 'ona' mana nggero ded'eat nda tungga ndoon sa. Hambu dud'u'a de'ulaka' nauli nggi ta'o naa.5 Toronoo susue ngga ra, e! Lamatualain pili nala atahori mana tud'a-loloe' sia raefafo' ia, fo ramahere teb'e-teb'e' neu E, naa 'ona' su'it sia rala na ra. Ana o pili nala se fo dad'i Eni rauinggun boe. Ana helu-fuli basa naa fee neu atahori mana sue Eni. 6 Noo mete mata' ta'o naa, hei miloe-mid'ae atahori mana tud'a-loloe' ra. Tao-tao te ara nda tao de'ulaka saa neu nggi sa boe. Lilii', do? Atahori mamasu'i ra mana tuni-ndeni nggi. Ara o soa 'a rapepenggo, lea-nore nggi misi' mamana nggero-furi' a. Ara soa mina-ma'een, ma hei hambu see na. 7 Hei ia ra, Lamatua' Yesus atahori na ra. Te atahori mamasu'i' ra 'aka' 'ola' ralutu Lamatua' Yesus nara malolen! Saa de ama 'aka' sangga rala' moo se?
8 Malole lena', ama tao tungga Lamatualain hohoro-lalanen esa meulaun lena' 'oi, “Musi sue atahori laen 'ona' ho sue aom boe.” Hohoro-lalane' naa nenesura' sia Lamatualain Susura Meumare na.a 9 Te mete ma hei 'aka' mete mata' ma ha'i rala' moo atahori mamasu'i' a, hei milena-langga Lamatualain hohoro-lalanen ena. Tungga Lamatualain hohoro-lalanen, na, hei sala ena. 10 Mete ma atahori tao tungga basa Lamatualain hohoro-lalanen, te ana nalena-langga 'aka' atoran esa o, naa 'ona' ana nalena-langga basa se ena. 11 Lamatualain fee basa atoran nae, “'Afi' hohongge.” Ana o fee atoran laen nae, “'Afi' tao misa atahori.” Dad'i mete ma hei nda hohongge sa, te tao misa atahori, na, naa 'ona' hei milena-langga basa Lamatualain hohoro-lalanen ena.b
12 De mete ma hei mae 'ola' do tao dala' esa, hei musi misined'a ta'o ia: dei fo Lamatualain mana na'etu' nae hita tao tungga Eni atoran na fo sue atahori do hoko'. Atoran naa, mana mbo'i hendi nggita mia Lamatualain huku-d'oki na. 13 Lamatualain nda kasian atahori mana nda kasian atahori laen sa. Te mete ma hei mi'ena kasian mbali atahori laen, na, Lamatualain o na'ena kasian neu nggi boe. 'Afi' mimitau simbo Lamatualain huku-d'okin, Huu Ana 'ito-reken basa naa ra ena.
Mete ma hita tamahere teb'e-teb'e' neu Lamatualain, na, hita musi tao tungga Ded'ea-'o'ola na
14 Toronoo ngga ra, e! Mete ma atahori sa nae eni namahere Lamatualain, te nda tao saa-saa natud'u nemeheren sa, na, naa nda ngguna saa sa boe. Nemehere' mata' naa nda fee ne masoi-masod'a' sa. 15 'Ona' hambu toronoo tou' do ina' sa to'a saa esa teb'e-teb'e', 'ona' nda ma bua-b'a'u' sa, do nda na'ena nanaat fai-fai esa sa. 16 Mete ma hei mifad'e mae' a, “Mumuhena Lamatualain fee papala-b'ab'anggi' neu nggo! 'Afi' mumuhed'i, ma 'afi' mate-ndoes, e!” 'Ola' ta'o naa nggunan saa, mete ma hei nda tao saa sa boe fo tulun neu se?
17 Dad'i mumuhere' a, na, naa nda fe'e dai sa! Mete ma nemehere, te nda tao tungga nemehere' naa sa, naa nda naran ‘nemehere'’ sa. Nemehere' naa mate ena, huu nda na'ena ngguna saa sa boe.
18 Hambu atahori rareresi rae, “Atahori ruma bisa ramahere neu Lamatua' te nda tao dala malole' sa. Ma atahori ruma tao dala malole' ra te tatao na ra nda netehuu sia Lamatua' sa.” Te dalan ta'o ia: bukti mia nemeherem naa, naeni tatao malole ma ra. Mete ma nda tao dala malole' ra sa, au nda 'ita bukti mia nemeherem sa. Au bisa 'utud'u nemehere ngga, noo dala malole' fo au tao' ra. 19-20 Tungga nenori' mana nae, “Lamatualain naa, mesa' ne, nda hambu laen sa.” Naa, malole boe! Te nitu ra rahine lena' nggo, huu ara o ramehere ta'o naa boe, losa ara ramatau ma nggengge'er. Dad'i 'afi' du'a mae, “Muhine mendi' a 'utam, na, naa dai ena.” Hoko'!
Nggoa' e! Matetun, nemehere' mana nda na'ena bukti sa, nda ma ngguna saa sa boe.
21 Ha'i conto mia ba'i Abraham. Lele' naa, ana tao tungga saa fo Lamatualain parenda neu e, de nendi anan Isak fo ndae neu mei tutunu-hotu' ata. Huu naa, Lamatualain nae “Abraham tao ndaa ena.”c 22 Abraham namahere neu Lamatualain, losa ana simbo fo tao tungga Lamatualain parenda na. Dad'i tahine tae, ana namahere teme-ao neu Lamatualain, huu ana tao tungga parenda' naa. 23 Dad'i basa ia ra dad'i 'ona' saa manasura' sia susura meumare' 'oi, “Abraham namahere neu Lamatualain, ma Lamatualain simbo nala e dad'i atahori rala ndoos.” Ma nenesura' boe 'oi, “Abraham naa, Lamatualain nonoo na.”d
24 Mihine ena, to! Hita tahine tae, Lamatualain simbo atahori, mete ma ana namahere neu Lamatualain ma hii 'a tao dala malole' ra boe. 'Aka' nemehere' a, naa nda fe'e dai sa.
25 Nekendandaa' esa fai mia ina Rahab. Ina' naa langga fatu eni' a ma'ahulu na. Lele' atahori Jeriko ra sangga rae risa atahori Isra'el mana maku-ma'u na ra, Rahab neu na'akekeke' se. Ana denu se rela tungga dala' laen, fo atahori ra nda humu rala se sa. De Lamatualain simbo nala e dad'i ina rala ndoos, huu tatao malole na.e
26 Nemehere' mana nda na'ena bukti sa, 'ona' ao-sisi' nda na'ena 'ani-hahae' sa, naa mates ena. 'Ona' naa boe, mete ma atahori sa 'oi eni namahere Lamatualain, te nda tao dala malole' sa, naa 'ombo-koson! Naa nda nemehere' matetu' a sa.