Hita musi tasod'a malole' esa noo esa
13
Naa, toronoo susue ngga ra, e! Au 'ae fee nesenened'a' dala' hira neu nggi.'Afi' lilii' sue mikindoo toronoo atahori mamahere' ra.
2 'Afi' lilii' soi ralam fo simbo atahori fo hei nda mihine sa nisi' ume ma ra. Te atahori ruma simbo rita atahori 'ona' naa ena, tao-tao te atahori naa ra, Lamatualain aten mia sorga.a
3 'Afi' lilii' tao mata' neu atahori mana sia bui, te ara neneto'u' huu ramahere neu Kristus. Naa de hei musi tulu-fali se, 'ona' hei mana neneto'u'.
Boe ma 'afi' lilii' tulu-fali atahori nenetao doid'oso'. Mete-se'u se noo malolole, 'ona' hei mana hambu susa-sona' naa.
4 Sasaot naa, meumare'. Te 'afi' losa sasaot meumare' naa dad'i nanggenggeo. Huu Lamatualain mana fee huhuku-d'od'oki' neu basa atahori mana hohongge.
5 'Afi' dale sala doi'. Te musi misod'a mimed'a dai moo 'a saa fo hei 'enam. Huu Lamatualain 'ola' ena nae,
“Au nda lilii' nggi sa.
Au nda lao hela nggi sa.”b
6 De tao manggatee rala ma ra, 'ona' atahori esa sura' nita nae,
“Huu au Malangga ngga nae tulun au,
naa de au nda 'umutau sa.
Huu nda hambu atahori esa boe,
bisa ngganggu nala au sa.”c
'Afi' tungga bali' agama mbaraa' a hohoro-lalanen, te mimihere mikindoo neu Kristus
7 'Afi' lilii' hei malangga ma ra fo mana ranori Lamatualain Ded'ea-'o'olan neu nggi. Du'a malolole dala masod'a na ra, ma tungga nemehere na ra. Te saa fo ramahere' naa, naeni:
8 Yesus Kristus naa, nda mana 'ub'a' sa.
Eni' a mia teteri-netehuun, losa 'oras ia, ma losa doo ndu'u-d'oon neu,
Ana fe'e naa ena.
9 Huu naa, ama 'afi' tungga-tungga' leli neu nenori' mana sala' ra. Lamatualain tao manggatee rala ma ra, huu natud'u rala malolen neu nggi ena. Nda huu hei tungga atoran so'al nanaa-nininu'. Huu atoran naa ra nda mangguna' sa.
10 Lele ulu' a, sia Lamatualain Lalaat Hule-o'en sod'an hambu mei tutunu-hohotu' esa soa' neu banda tutunu-hohotu' ra. Malangga agama mana mete-se'u sia naa na'ena hak naa-ninu sisi lena' mana sia mei ata. Te 'ale' ia, ta'ena mei laen.d Ma malangga agama mbaraa' ra nda ra'ena hak raa sia naa sa. 11 Fe'esa'an, tungga too agama Yahud'i malangga monaen nendi banda tutunu-hohotu' a raan fo neu tao neu Lamatualain Kama Meumare manaseli na. Noo ta'o naa, Lamatualain lilii' hendi sala-kilu na ra. Basa fo ara rendi banda naa, fo tunu sia kambo' a dea'.e 12 Yesus o 'ona' naa boe. Ana dad'i tutunu-hohotu' fo Lamatualain 'ose hendi atahori sala na ra. Lele' Ana doid'oso, ara o lea rendi E boe, de reu risa E sia Kota Yerusalem dea'. 13 Huu naa, la'i fo ata tisi' Yesus, fo tamahere takandoo neu E. 'Ona' mae atahori ra'amuti nggita o, ata musi simbo 'a, 'ona' E boe. 14 Huu hita leo 'aka' hate-mata' sia raefafo' ia. Te tamahena fo leo sia kota feu' esa sia sorga losa doo ndu'u-d'oon neu. 15 Huu Yesus dad'i tutunu-hohotu' fee nggita ena, naa de hita nda parluu tendi banda tutunu-hohotu' fee ne sa ena. Te hambu tutunu-hohotu' laen fo hita musi tendi takandoo 'a fee neu Lamatualain, naeni tutunu-hohotu' koa-kio tananaru nara na. 16 'Afi' lilii' tao dala malole' fee atahori laen. Mete ma ara parluu saa, na, tulu-fali se. Huu basa naa ra dad'i 'ona' tutunu-hohotu' fo mana tao Lamatualain ralan namaho'o.
17 Hei musi tao rerena' neu basa atahori mana mete-se'u nggi. Huu ara ranea ao samana ma ra hatu'-rerelo na. Dei fo ara musi rataa ue-tatao na ra sia Lamatualain mata na. De rena malolole se, fo ara bisa ue-tao ma rataa noo rala nemeho'ot. 'Afi' losa ara rataa noo rala mambalutu', huu hei lao hela Yesus Kristus dala masod'a na. Te noo ta'o naa, hei nda 'onton sa ena.
Mana sura' susura ia, koa-kio ma hule-o'e fee atahori Ibrani ra
18 Tulun hule-o'e nekendoo fee hai. Huu hai ralam mema' ndoos, ma hai mae tao mikindoo dala malole' ra. 19 Lelenan fai, tulun hule-o'e fo au bali' lai-lai 'isi' nggi.
20-21 Lamatualain naa, mana tao namaho'o rala ta ra. Au 'o'e Lamatualain fo tulu-fali nggi, naa fo ama tao tungga basa hihii-nanau na. Au o 'o'e Ana tulu-fali basa nggita, fo dad'i atahori mana tao nemeho'o rala na. Huu Lamatualain hengge-nee hehelu-fufulin noo nggita nendi' Yesus Kristus raan mana nandali' a. Hehelu-fufuli' naa sia nakandoo losa doo ndu'u-d'oon neu. Boe ma, Lamatualain fee hita Lamatuan Yesus Kristus nasod'a bali'. 'Oras ia, Yesus na'ab'oi nggita 'ona' manatad'a manaseli'. Naa de ata koa tananaru naran, ma koa-kio takandoo E! Naa nandaa ena.
Sod'a-mole'
22 Toronoo ngga ra, e! Au 'o'e fo ama simbo mala au nenori ngga ia noo rala loa'. Huu susura ia 'e'eku 'a. 23 Hambu hara' fo au nau basa nggi mihine. Naeni: Hita toronoon Timotius kalua mia bui ena. Mete ma nema lai-lai nisi' au, na, dei fo hai ru'a nggi meti sia nggi.
24 Au fee sod'a-mole' neu malangga ma ra, ma sod'a-mole' fee neu basa nggi fo mana mimihere neu Yesus Kristus. Toronoo-toronoo' sia profinsi Italia o haitua hara sod'a-mole' boe.
25 Au 'o'e fo Lamatualain natud'u rala malolen neu basa nggi.
Ta'o 'a naa ena!