12
Dad'i hita mana tasod'a lele' ia, ta'o bee? Ata 'ona' atahori mana tungga nekesesesu' nenelat ra. Bei-ba'i ta ra mana ramahere Lamatualain ma'ahulun, ara 'ona' mana manilu ra rambarii' rereo' fo huhuar nggita. Te mete ma hita fe'e nenepa'a' too sala-kilu' ra, na, naa tao nggita nda tela' be'i sa. Naa de ata musi nggari hendi basa sala-kilu' ra, naa fo ata bisa tela' tahere'. Huu Lamatualain pili nala hita ena fo tungga nekesesesu' ia, dad'i ta'atataa' fo tela' takandoo losa nggaris mate'en a. 2 Boe ma tela' naa 'afi' mete dii-'ona, te mete 'a Yesus. Huu Eni mana natud'u dala' fo bisa tamahere neu Lamatualain. Ma dei fo Ana tulu-fali nggita fo tamahere takandoo losa bab'asa na. Misined'a do hoko'? Lele' Yesus doid'oso sia hau nggangge' a, atahori raneneut E, te Ana na'atataa' nakandoo. Huu Ana bub'ulu' nae mete ma doid'oson basa, dei fo Eni ralan namaho'o. Naa teb'e. Huu Ana mate de basa ma, Lamatualain so'u E fo 'endo' sia Eni bob'oa 'onan, de Ru'a se parenda ra'ab'ue. 3 Mae atahori tao de'ulaka Yesus o, Ana na'atataa' nakandoo 'a. De ama 'afi' lilii' Yesus doid'oson ia, naa fo hei o mi'itataa' mikindoo, ma nda bengge sa boe.Lamatualain nae na'anggee fo nanori nggita, 'ona' ama' esa nanori anan
4 Hei lab'an dala de'ulaka ra ena, te nda fe'e lab'an mihere' losa raa ma ra sai sa. Teb'e, to? 5 Mbei ma hei lilii' Lamatualain Ded'ea-'o'olan fo Ana nafad'e neu nggi, 'ona' ama' esa 'ola' noo anan nae,
“Ana ngga, e!
Mete ma hita Lamatuan huku-d'oki fo nanori nggo, naa fo musod'a tungga dala ndoo-tetu' a,
na, 'afi' mae naa nda papake' sa!
Do mete ma Ana na'anggee fo nanori nggo,
na, ralam 'afi' na'aana.
6 Huu hita Malanggan na'anggee ma nanori atahori fo Ana sue' ra.
Mema' basa atahori fo Ana simbo dad'i anan,
dei fo Ana na'anggee fo nanori se.”a
7 De mete ma Lamatualain na'anggee fo nanori nggi misod'a tungga dala ndoo-tetu' a, na, mi'itataa'. Ana tao ta'o naa, huu hei dad'i anan ena. Te ama' musi na'anggee fo nanori anan, losa anan nahine nasod'a tungga dala ndoo-tetu' a. 8 Te mete ma Lamatualain nda na'anggee fo nanori nggi 'ona' anan laen ra sa, naa sosoan nae, hei ia nda Eni anan sa.
9 Hita biasa fee had'a-hormat neu ama bonggi ta ra sia raefafo' ia, huu ana na'anggee fo nanori nggita lele' ata fe'e anad'iki'. Naa ndaa ena. Te lelenan fai, ata musi tao rerena' neu Lamatualain, huu Eni, hita Aman sia sorga, de Ana na'anggee fo nanori nggita tasod'a tungga dala ndoo-tetu na. 10 Hita ama bonggin na'anggee fo nanori nggita noo 'a hate mata', tungga saa fo nae malole'. Te Lamatualain nahine lena' saa fo hita parluu tanori' a. Naa de Ana na'anggee fo nanori nggita tasod'a meumare' 'ona' E. 11 Mema' ata med'a susa mete ma hambu ne'enggees. Te doo-d'oo na rala ta ra lino-lende, huu tahine tasod'a tungga Lamatualain hihii-nanau na.
12-13 Toronoo ngga ra, e! Tao mi'id'ere lima mana bengge ma ra, ma mingganggafa ei mana manggu ma ra. 'Afi' mela' penggo-panggi, te mela' noo ndoos mikindoo, fo atahori mamahere' mana male-ma'a' ra, ma'ad'ere bali' fo rela' rakandoo boe. Hei musi tao manggatee rala ma ra fo mi'itataa' mikindoo sia nemehere ma ra neu Kristus.b
'Afi' tola hendi Lamatualain rala malolen neu nggi
14 Toronoo mana mimihere neu Kristus! Hei musi mihehere fo misod'a dame moo basa atahori. Ma mihehere fo misod'a meumare'. Te atahori nda meumare' sa, nda bisa nita Lamatualain sa.
15 Esa huhuar esa, naa fo 'afi' losa hei ruma dinggo' ao ma ra de nda mimed'a mita Lamatualain rala malolen sa. Minea matalolole fo 'afi' hela esa o named'a rala mera' sia talad'a ma ra boe. Te naa 'ona' raso mana meru', mana tao nalutu atahori hetar.c 16 Ma besa-b'esa, ma minea fo ruma 'afi' tao leli. Boe ma besa-b'esa ma minea fo masod'a ma ra 'afi' dinggo' hela Lamatualain 'ona' Esau. Esau naa, ba'i Isak ana ulu na. Fai' esa, Esau bali' noo ndoe na. De ana no'e nanaat pingga' esa mia 'od'in Yakob, de bae nendi' hak ulu na.d 17 Te nda doo' sa ma, ata bub'ulu' Esau fale ralan boe. Huu lele' ama Isak no'e Lamatualain fo fee papala-b'ab'anggi' ana ulu' neu e, Isak nda bisa no'e sa ena, huu Esau fee hendi parsuma 'a hak na. Naa de mae ana nggae ei-ei o, ana nda hambu bali' saa fo ana nggari hendi' ma'ahulun sa ena.e
18 Ta'o ia, toronoo ngga ra, e! Hita o bisa tema tisi' Lamatualain matan, tungga dala feu' fo Ana soi fee neu nggita. Te lele ulu' a bei-ba'i ta ra nda fe'e bisa ta'o naa sa. Huu lele' Lamatualain hengge-nee hehelu-fufulin noo se, ara deka roo lete' esa, naran Sinai. Sia lete' naa ata, hambu ai mbila. Hambu sanggu-anin boe. Ma lete' a hatu kib'u-kib'u', de ramatau rae mate. 19 Ara o rena ma'oa liin, boe ma rena Lamatualain hara manaseli na mia lete' naa. Ara rena Lamatualain 'o'olan ma, ara bau ramatau, de ro'e ba'i Musa rae, “Ad'uu! Hai nda bisa mi'itataa' rena hara' ia sa ena”!f 20 Mema' ara nda ra'atataa' sa ena, huu saa fo Lamatualain parenda' naa, beran seli. Huu Ana nafad'e nae, “Esa o nda bole tab'u lete' ia sa boe! Mae atahori do banda! Huu see tab'u lete' ia, musi honda se rendi' fatu losa mate.”g 21 Saa fo ara rita sia lete' naa, mema' nemetaus teb'e. Losa ba'i Musa o ngge'e-ngge'e boe.h
22 Te ia naa dala' nisi' Lamatualain nenesoi' ena, de ata bisa 'ola-'ola' mata' too E. Ia naa hita tema sia lete' esa, naran Sion. Sia naa hambu kota Yerusalem. Nda kota Yerusalem sia raefafo' sa, te kota Yerusalem feu' sia sorga, naeni Lamatualain mamana leleo-lulu'u na. Sia naa, hambu Lamatualain ate na ra hetar, losa rifon-rifon, ara 'aka' feta-d'ote ra'ab'ub'ue. 23 Kota naa o, dad'i mamana ne'eb'uet mia basa atahori mana ramahere neu Kristus ena. Huu Lamatualain tao susura fo sura' nala nara na ra esa-esa' sia sorga ena. Lamatualain o sia naa boe, dei fo Ana mana paresa' ma timba-tai basa atahori masod'a na. Basa atahori lele ulu' fo Lamatualain simbo se noo malole', ra'ab'ub'ue sia naa boe, huu ramahere neu E. Ara dad'i matetu'-manad'ai' sia naa ena. 24 Yesus o sia naa boe, fo dad'i lelete fee Lamatualain noo atahori. Yesus mate raan nandali, fo Lamatualain hengge-nee hehelu-fufuli feu' noo nggita. Naa de Yesus raan tao ma'asufu Lamatualain rala na. Te ia fea' noo Habel raan sia Dud'ui Fefeu' a. Huu lele' Kaen nisa Habel, Habel raan mana mandali' naa, tao Lamatualain namanasa, de Ana fee huhuku-d'od'oki' neu Kaen.i
25 Pasa ndiki ma ra malolole fo rena saa fo Lamatualain nae 'ola' fee nggi. 'Afi' tao 'ona' bei-ba'i ta ra, fo nda simbo ba'i Musa 'o'olan sa, lele' ana dad'i Lamatualain mana 'ola-'olan sia raefafo' ia. Basa ma Lamatualain fee huhuku-d'od'oki' neu se. Hita o 'ona' naa boe. Mete ma hita nda nau rena 'o'olan mia sorga sa, dei fo Ana huku-d'oki nggita beran lena'.j 26 Lele' bei-ba'i ta ra rambarii' mia lete Sinai, Lamatualain hara manaselin tao rae a nanggongga. Ia naa, Ana helu-fuli nae,
“Dei fo Au tao rae a nanggongga lao esa fai,
te nda 'aka' rae a nanggongga sa,
huu lalai a o nanggongga tungga boe.”k
27 Lele' Lamatualain 'ola' nae, Eni nae tao nanggongga basa' e “lao esa fai”, sosoan nae, Lamatualain nae uli-fae basa saa fo Eni tao sia lalai noo raefafo' ia, losa nda mana ma'atataa' ra sa, mopo hendi se. Te huu mana ma'atataa' ra, dei fo rahani rakandoo.
28 Lamatualain to'u parenda' sia sorga. Naa nda bisa nambalutu sa. Sofe' noo mole-d'ame. Huu nae simbo nggi fo dad'i atahorin sia naa, de, 'ima fo to'e makasi neu E, be'utee neu E, ma tananaru E huu manaselin! 29 Te ata musi besa-b'esa, te Lamatualain nasan 'ona' ai mana hotu hendi basa' e losa basa.l