3 Raefafo' noo lalai fo hita tita' lele' ia, tamahere tae, Lamatualain mana tao basa ia ra. Huu Ana nda tao nendi' saa fo mana sia mema', fo atahori bisa mete rita' a. Basa ia ra, dad'i huu Ana 'ola' nendi 'a Ded'ea-'o'ola na.^a

4 Habel namahere neu Lamatualain. Huu naa, de ana nendi tutunu-hohotu malole' lena' 'a'an Kaen. Lamatualain simbo malole Habel noo tutunu-hohotun, huu ralan ndoos. Dad'i 'ona' mae ana mate doo' ena o, te hita fe'e bisa tanori mia e, huu nemehere na.^b

5 Henok o namahere neu Lamatualain boe. Huu naa, Lamatualain so'u e sorga neu, fo ana nda mate sa. Atahori ra sangga e boe, te nda randaa roo e sa, huu Lamatualain so'u e ena. Lamatualain simbo e noo malole', huu Lamatualain nae, “Henok ia, Atahori mana tao rala ngga namaho'o.”^c

6 De ta'o ia, toronoo ngga ra, e! Matetun, Lamatualain nda simbo atahori mana nda ramahere neu E sa. Te atahori mana nae nisi' Lamatualain, musi namahere nae, Lamatualain mema' sia. Boe ma musi namahere nae, Lamatualain nau tulu-fali atahori mana nau sangga Eni.

7 Noh o namahere Lamatualain boe. Huu naa, Noh namahere Lamatualain lele' Ana nafad'e mema' nae, “Noh! Musuned'a, e! Dei fo Au 'ulutu raefafo' ia noo 'a oe mandali monae manaseli' fo atahori nda fe'e rita sa.” Mae Noh nda fe'e nita 'ona' naa sa, te ana tao rerena' neu Lamatualain, ma tao 'ofa' fo noo ume-isi na ra rasod'a. Huu nemeheren naa, de Lamatualain nae eni atahori rala ndoos. Te basa atahori nda mana ramahere' ra sa, Lamatualain fee se huhuku-dod'oki' beran seli.^d

8 Ba'i Abraham o namahere neu Lamatualain boe. Huu naa Lamatualain no'e e nae, “Abraham, e! Lao hela kambom fo muu sia mamana' fo dei fo 'utud'u neu nggo. Te rae naa dei fo dad'i tititi-nonosi ma ra pusaka na.” Abraham rena ta'o naa ma, ana tao tungga Lamatualain hihii-nanaun, mae ana nda nahine nita' nae bee neu sa boe.^e 9 Lele' ana losa rae naa, ana naririi lalaat na, de leo 'ona' atahori fui' sia rae naa fo Lamatualain helu-fuli nae fee neu e. Boe ma anan Isak noo umbun Yakob o leo sia naa boe, Huu Lamatualain helu-fuli nae fee rae naa dad'i sira pusaka na.^f 10 Ana namahena nae dei fo eni nasod'a sia kota esa manaseli' teb'e. Huu Lamatualain mesa' ne mana tao nggambar fo nafefela kota naa.

11 Sara, ba'i Abraham saon, o namahere neu Lamatualain boe. Mae ana nda fe'e bonggi nita sa, ma lasi' ena o, Lamatualain tao e dad'i bei-ba'i' soa' neu nusa monae' esa. Huu namahere nae, dei fo Lamatualain tao tungga saa fo nenehelu-fuli basa' ena.^g 12 Huu naa de, 'ona' mae eni lasi nae' ena o, fe'e bisa bonggi nala tititi-nonosi' hetar, losa atahori nda 'ito-eken rala se sa. Te ded'esi na ra 'ona' nduu' sia lalai, ma sara'ae' sia retaan a.^h

13 Hita ba'i na ra ba'i Abraham, ba'i Isak, ma ba'i Yakob ramahere rakandoo neu Lamatualain losa ara mate. Te ara nda fe'e simbo nusa' fo Lamatualain helu-fuli' a sa. Mae ta'o naa o, ara ramahena rakandoo noo rala nemeho'ot, huu ara lalanik rita nusa' naa mia doo-d'oo' ena. Huu ara rataa rae, sira 'aka' atahori fui' mana leo ra'atataa' sia raefafo' ia'ⁱ 14 Tao-tao te, atahori mana 'ola' mata' naa, ara rae 'a doo bee fo hambu mamana' fo dad'i 'ena na ra. 15 Mete ma nusa' fo ba'i ta ra rae 'a doo bee fo ara hambu' a, naeni ba'i Abraham kambo leleo-lulu'un, na, tantu ara hambu kaka'e' nae' fo bali' naa reu. 16 Te mamana' fo rae 'a doo bee fo hambu' naa, naeni nusa manaseli' sia sorga. Huu naa, Lamatualain simbo noo malole' ma tao se dad'i atahori na ra. Huu Ana sad'ia hela mema' kota esa fee neu se sia sorga.

17-18 Ba'i Abraham namahere teb'e-teb'e' neu Lamatualain lele' Lamatualain sob'a nemehere na. Huu naa, de ana tao tungga Lamatualain parendan de fee hendi' anan Isak dad'i tutunu-hohotu'.^j Tao-tao te, fe'esa'an Lamatualain helu-fuli so'al 'ana' naa nae, “Mia anam Isak ia, dei fo hambu tititi-nonosi' hetar, losa ara dad'i nusa manaseli'.”^k 19 Te ba'i Abraham du'a ena nae, Lamatualain na'ena koasa fo tao nasod'a bali' atahori mana mate'. Mema' teb'e ta'o naa, huu lele' naa, 'ona' eni hambu bali' anan mana dad'i tutunu-hohotu' ena.

20 Ba'i Isak o namahere neu Lamatualain boe. Huu naa de, ana no'e fo Lamatualain pala-b'anggi fee ana na ra Yakob noo Esau papala-b'ab'anggi'.^l

21 Ba'i Yakob o namahere neu Lamatualain boe. Huu naa de, lele' ana nae 'a mate ma, nambarii' ruku-ruku to'u tetean, de be'utee neu Lamatualain. Basa de ana no'e Lamatualain fee papala-b'ab'anggi' neu umbun mia anan Yusuf.^m

22 Ba'i Yusuf o namahere neu Lamatualain boe. Lele' ana nae 'a mate, ana namahere nae, dei fo Lamatualain noo eni atahori Isra'el na ra lao hela rae Masir. Naa de ana helu se nae, mete ma ara lao hela rae Masir, na, musi rendi eni rui na ra.ⁿ

23 Ba'i Musa ina-ama na ra o ramahere neu Lamatualain boe. Lele' inan bonggi hendi e ma, ara ra'afuni' e doon fula telu, huu rita aon noo matan malole'. Ma ara nda ramatau mane Masir a sa, 'ona' mae ana parenda atahori na ra nae, “Misa basa anad'iki tou' fo mana neneb'onggi feu' mia atahori Ibrani ra!”^o

24 Lele' ba'i Musa na'amoko ma, ana o namahere Lamatualain boe. Huu fe'esa'an Mane Masir a ana feton so'u nala e dad'i ana na. 'Ona' mae ta'o naa o, ana nda nau atahori rae, eni mane Masir bob'onggin sa.^p 25 Huu ana du'a nae, “Malole lena' 'usod'a susa 'u'ub'ue 'oo Lamatualain atahori na ra, te soa saa 'usod'a 'umuho'o 'oo dala de'ulaka' mana na'atataa' losa 'a.” 26 Ana hela atahori ra'amuti e, huu namahena Kristus, naeni Atahori fo Lamatualain helu-fuli nae haitua nema' a. Ana na'atataa' 'ona' naa, huu bub'ulu' nae dei fo Lamatualain bala-b'ae eni malole lena' basa hata-heto' mana sia rae Masir.

27 Ba'i Musa o namahere Lamatualain boe lele' ana no'e mane Masir fo noo bei-ba'i ta ra lao hela rae na. Mae mane Masir a namanasa seli te, ba'i Musa nda namatau e sa. Ba'i Musa namahere nakandoo neu Lamatualain fo nda nenenita' a sa, 'ona' ana nita E ena.^q

28 Ba'i Musa o namahere Lamatualain boe lele' rahehere rae lao hela rae Masir. Naa de, ana tao tungga Lamatualain parendan, de denu bei-ba'i ta ra tao fai Paska fefeun noo mbau-hala bib'i lombo fo dad'i banda tutunu-hohotu'. Basa ma ara ha'i rala banda raan de tao tatanda' hela neu ume na ra. Tetemba' naa, Lamatualain aten mia sorga neu tao nisa basa ana-ana ulu' mana sia rae Masir a. Te nda neu nisi' bei-ba'i ta ra ume na ra rala sa, huu nita raa' naa sia ume na ra lelesu na.^r

29 Lele' bei-ba'i ta ra lao hela rae Masir, ara o ramahere neu Lamatualain boe. Huu nemehere na ra, de Lamatualain tad'a banggi oe' mia Tasi Mbilas, fo ara lao' noo masod'a' tungga rae mad'a'. Te sold'ad'u Masir mana reu 'oi tungga se, rasamele mate lele' ara rae sob'a lao' ta'i naa.^s

30 Lele' bei-ba'i ta ra maso' risi' rae Kana'an rala reu ena, ara o ramahere neu Lamatualain boe. Huu ara tungga parendan, ma lao rereo' kota Yeriko tembok na dea' losa fai hitu lala'e na. Boe ma, tembok naa ndefa' hendi' e neu' ena boe.^t

31 Boe ma hambu Rahab sia naa boe. Fe'esa'an ana dad'i ina manendit sia kota naa. Te, huu namahere neu Lamatualain, naa de ana simbo noo malolole atahori Isra'el ra mana maku-ma'u na ra, de na'afuni' se mia ume na. Boe ma Lamatualain tao nalutu basa atahori Yeriko ra, huu ara nda nau rena E sa. Te Lamatualain fee Rahab nasod'a, huu nemeheren.^u

32 Au fe'e bisa 'ola' naru' fai, so'al atahori laen mana ramahere neu Lamatualain. Te nda ka'e 'ala fo dui lutu'-lelo' so'al Gideon, Barak, Simson, Yefta, Daud, Samuel, boe ma Lamatualain mana 'ola-'ola laen na ra.^v 33 Basa se ramahere neu Lamatualain. Huu naa, hambu ruma lab'an rasenggi' mane' ra. Ruma to'u parenda' noo rala ndoos, fo rasala'e atahori nda masala' ra sa, ma hukun atahori masala' ra. Ruma fai simbo saa fo Lamatualain helu-fuli ena. Ma hambu ruma ramahere neu Lamatua' de singa nda nasenggi' se sa.^w 34 Hambu ruma nenenggari' risi' ai mana mbila monae', te nda mate sa. Ruma fai Lamatualain mbo'i se mia atahori mana nae tati se nendi' fela tafa'. Ruma nda ma'ad'ere' sa, te Lamatualain fee se ma'ad'ere'. Lamatualain fee ruma dad'i manaseli' sia netatis, losa ara rasenggi' sold'ad'u musu mia mamana' laen ra.^x 35 Hambu mama ra ruma o simbo bali' bob'onggi na ra, fo Lamatualain tao nasod'a bali' ra.

Te ruma hambu doid'oso', huu ramahere neu Lamatualain. Ara hii 'a mate, fo 'ona bee, na, sira 'afi' heo' rasad'ea hela Lamatualain. Ara nda ra'etu' nemehere na ra sia Lamatualain sa. Dad'i ara ramahena rae, dei fo Lamatualain so'u sira fo hambu masoi-masod'a malole' lena' sia sorga.^y 36 Ruma fai nenene'emuti', ma hambu ue-hehemba'. Ruma fai nenerante' sia bui rala.^z 37 Ruma mate, huu nenehonda-mbia' noo fatu. Ruma mate, huu atahori horo banggi rua ao na ra. Ruma mate, huu nenetati' noo fela tafa'. Ruma rasod'a to'a-taa de pake 'a bua-b'a'u mia banda rou', huu atahori tao doid'oso ma ra'asususa' se, losa 'use-'oi hendi se,^a 38 de rela reu leo sia mamana rou', sia lete' ra, sia luat, ma ndola-ndola' ra. Atahori raloe-rad'ae se, ma 'use-'oi se reu leo sia mamana nda malole' sa. Tao-tao te sira nemehere na ra manggatee', de atahori mana sia raefafo' ia nda randaa rasod'a ra'ab'ue roo se sa.

39 Lamatualain koa-b'o'u basa se, huu ara ramahere neu E. Te losa mamate na ra o, ara nda fe'e simbo saa fo Lamatualain helu-fuli' a sa. 40 Ana nae tao tungga hehelu-fufulin nendi' dala malole' lena'. Huu Ana nau fo basa hita tasod'a takandoo ta'ab'ue too E: naeni hita, fo 'ale' ia tahine Kristus ena, too sira mana mate mia lele ulu' ra.