Au sura' susura ia

3 Au 'o'e Lamatualain noo hita Malanggan Yesus Kristus ratud'u Rala Malole na ra neu nggi, fo 'ona bee, na, misod'a noo mole-d'ame.

4 Filemon! Mete ma au hule-o'e fee nggo, au 'o'e makasi neu Lamatualain huu masod'am. 5 Au rena nae', so'al nemeherem neu Lamatua' Yesus, ma susuem neu atahori mamahere' ra. 6 Huu nemeherem naa, ho bisa musod'a rala' esa moo atahori mamahere' laen ra. Au hule-o'e fo mete ma hei mitud'u rala malole ma ra esa noo esa, na, hei mihine lena' basa dala malole', fo hita bisa tao fee neu Lamatua' Yesus. 7 'A'a! Huu susuem naa, de 'a'a tao rala ngga namaho'o ma tao manggatee rala ngga ena. Ma susuem naa o, tao manggatee atahori mamahere' hetar rala na ra ena boe.

8-9 'A'a, e! Au parluu ta'o ia: au dad'i Kristus ded'enu na. Noo ta'o naa, au 'u'ena hak fo parenda nggo tao dala' ia. Te au nda nau parenda-parenda' sa, au 'ae 'o'e tulun 'a, 'ona' atahori lasi' ra ro'e tulu na. Au dad'i atahori bui huu au tungga Yesus Kristus. Naa de au 'umburani 'o'e tulun nggo, huu 'uhine susuem neu atahori hetar. 10 Au 'o'e nggo mutud'u susuem neu ana ngga, Onesimus. Eni, 'ona' ana bonggi ngga, huu namahere Lamatua' Yesus mia ue-tatao ngga lele' au mia bui ia rala.^c

11 Au bub'ulu' Onesimus naa, ho atem mana nela hela nggo. Au o bub'ulu', fe'esa'an ana nda ma ngguna saa fee nggo sa boe. Te 'ale' ia, au 'umuhere ana na'ena ngguna' naen seli soa' neu ru'a nggita.^d 12 Au sue 'ala e seli, te hela neu, au fee bali' e nisi' nggo.

13 Matetun, au 'ae hela e, fo nggati nggo, fo mete-se'u au sia ia. Huu au nda ka'e 'ala fo tao saa-saa sia ia sa boe. Au dad'i atahori bui huu dui-b'engga Lamatua' Yesus Hara-lii Malolen neu atahori. 14 'Aka' au nda nau fo ho tungga-tungga 'a sa, huu atahori 'aka' ra'asusuu' nggo. Au hihii ngga naa, ho tao malole' huu hihii-nanaum. Dad'i mete ma ho nda fe'e nau sa, na, au o nda nau tao saa-saa so'al Onesimus ia sa boe, huu naa ho hak ma.

15 Mbei ma ho du'a ta'o ia: Lamatualain hela Onesimus dinggo' hela nggo nda doo' sa, fo neti leo bali' noo nggo losa doo na. 16 Lele' ana nela, ana dad'i' a ate ma. Te 'ale' ia ana bali', ana dad'i 'od'i susuem ena. Au o sue 'ala e seli boe! Dad'i ia naa, nggunan bau namanae fee nggo. Huu ana nda dad'i' a ate sa, te ana o dad'i 'od'im mana mimihere bela' neu Kristus.

17 Dad'i, ta'o ia 'a'a. Mete ma 'a'a mae au ia 'ona' toronoo mana tao ues ma, na, au 'o'e fo simbo e 'ona' 'a'a simbo au boe. 18 Te 'ita' mbei ma hambu Onisimus tao nasala' nggo, do, fe'e nahuta nggo, hela fo au tanggon 'ala. 19 Mete 'a! susura huta' ia, au sura' 'endi' lima heheli ngga: Au, Paulus, dei fo au bae 'ala Onisimus huta-b'ukun mana sia Filemon. Dai ena, do? Ma au o nda parluu 'u'ingga ho huta-b'ukum nae' lena' neu au sa. Naeni, ho dad'i muu Lamatua' atahorin, huu au.

20 Teb'e, 'a'a! Hela neu fo 'a'a tulun au sia dala' ia, huu hita bob'onggi' sia Lamatua' rala. Au tao rala ngga manggatee ta'o naa, huu basa nggita dad'i Kristus 'enan ena.

21 'A'a! Au sura' susura ia fee nggo, huu au 'umuhere nggo nau rena malolole neu au. Au du'a 'ae, ne'o tao mulena' saa fo au o'e' a.

22 Hambu dala' esa fai. Tulun sad'ia fee au kama esa dei. Huu au 'umuhere Lamatualain rena hule-o'e ma ra, de dei fo Ana soi dala' fo au kalua mia bui ia, fo bali' 'eti 'ita nggi sia naa.

23 Epafras sia ia. Ana o dad'i atahori bui huu ana dui-b'engga so'al Yesus Kristus, 'ona' au boe. Ana haitua hara sod'a-mole' neu nggo boe.^e 24 Markus, Aristarkus, Demas, noo Lukas o sia ia boe. Ara tao ues ra'ab'ue roo au boe. Ara o haitua hara sod'a-mole' boe.^f

25 Au 'o'e neu hita Malanggan Yesus Kristus fo natud'u rala malolen neu basa nggi.

Ba'u 'a naa ena!