Kristus mate lao esa 'a, fo atahori bisa rasod'a malolole roo Lamatualain losa bab'asan
10
Mete ma tae tahine teb'e-teb'e' Lamatualain hihii-nanaun, na, hohoro-lalane' fo Ana fee neu bei-ba'i ta ra naa, fe'e mana sambu-sambu'. Naa 'ona' a salao' mia dala-d'ala malole' fo Lamatualain nau fee neu nggita. Dad'i mae atahori tungga hohoro-lalane' naa ra, ma rendi banda tutunu-hohotu' rakandoo 'a, naa nda bisa nameu hendi sira sala-kilu na ra noo matetu' sa. 2 Huu mete ma hohoro-lalane' naa ra bisa 'ose hendi atahori ra sala-kilun noo matetu', na, ara nda rendi banda tutunu-hohotu' sa ena, huu ara nda 'afi' ramed'a rae sira sala sa. Tao-tao te nda ta'o naa sa. 3 Naa de tungga too na ara 'aka' ro'e rasafafali fo Lamatualain 'ose hendi sala-kilu na ra, 4 huu banda raa' naa nda bisa na'ena koasa fo nggari hendi atahori sala-kilu na ra sa.5-6 Naeni de Kristus 'ola' na'o ia lele' Ana raefafo' nema:
“Lamatualain!
Lamatualain nda ma'ahee noo banda tutunu-hohotu' noo tutunu-hohotu' laen fo rendi' ra sa.
Ara hala risa banda hetar,
fo dad'i tutunu-hohotu'.
Ma ara tunu banda hetar,
fo ro'e ambon.
'Ona' mae ta'o naa o, Lamatualain ralan nda namaho'o sa.
Naa de Lamatualain denu Au raefafo' 'uma,
fo dad'i atahori 'ona' se boe.”
7 Kristus o 'ola' nae,
“Lamatua'! Au sia ia ena!
Au 'uma fo tao tungga Lamatualain hihii-nanaun,
'ona' Lamatualain mana 'ola-'olan sura' mema' so'al Au.”a
8 Dad'i saa fo Kristus 'ola' fefeun, naeni:
“Lamatualain nda namaho'o noo banda tutunu-hohotu' ma tutunu-hohotu' laen fo rendi' a sa.
Ara hala banda hetar,
fo dad'i tutunu-hohotu'.
Basa ma ara tunu banda naa ra,
fo ro'e ambon.
'Ona' mae ta'o naa o, Lamatualain ralan nda namaho'o sa.”
Dad'i 'ona' mae ara tao tungga tetu-tetu ba'i Musa hohoro-lalane na ra o, Lamatualain ralan nda namaho'o sa. 9 Lele' Kristus 'ola' nae,
“Au 'uma fo tao tungga Lamatualain hihii-nanau na.”
Sosoan nae, Kristus nema fo nggari hendi dala mbaraa', ma nggati noo dala feu'. 10 Huu Lamatualain hihii-nanaun naeni, Yesus Kristus dad'i tutunu-hohotu' fo mate lao esa 'a soa' neu hita atahori. Noo ta'o naa, Ana tao nggita dad'i atahori meumare' losa bab'asan.
11 Tungga fai, na, malangga agama mbaraa' ra ralalao ue-tatao na ra, noo mbau-hala banda tutunu-hohotu' ra. Tao-tao te, tutunu-hohotu' naa ra nda parnaa hambu koasa fo nggari hendi atahori sala-kilu na ra sa.b 12 Te hita agaman malangga monaen, naeni Kristus, fee aon fo mate dad'i tutunu-hohotu' nggati nggita. Noo Ana dad'i tutunu-hohotu' lao esa 'a, Ana soi dala' fo nggari hendi basa atahori sala-kilu na ra. Basa naa, dei de Ana neu 'endo' sia Lamatualain bob'oa 'onan, sia mamana nenefee had'a-hormat. 13 Ana nahani sia naa losa Lamatualain tao musu na ra be'utee neu E.c 14 Tutunu-hohotun fo lao 'a esa' naa, tao na'etu' nakandoo sala-kilu' ra koasan fee neu atahori fo Kristus tao nameu' ra.
15 Lamatualain Dula-d'ale Meumaren o nafad'e dala' 'ona' naa neu hai ena boe. Huu Ana o 'ola' nita nae,
16 “Hei Malanggam nafad'e ta'o ia:
Au hengge-nee hehelu-fufuli feu' 'oo atahori ngga ra,
Au tao hohoro-lalane ngga ra sia dud'u'a na ra,
ma Au sura' parenda ngga sia rala na ra rala.”d
17 Basa ma Ana nafad'e selu' nae,
“Dei fo Au lilii' hendi sala-kilu na ra.
Ma Au lilii' hendi tatao-nono'i de'ulaka na ra,
lele' ara ralena-langga neu Au hohoro-lalane ngga ra.”e
18 Naa. Sosoan nae, mete ma Lamatualain 'ose hendi atahori sala-kilu na ra, na, atahori nda 'afi' parluu rendi tutunu-hohotu' sa ena, fo tao ma'asufu Lamatualain rala na.
'Afi' tamatau tisi' Lamatualain matan
19 Dad'i ta'o ia, toronoo ngga ra, e! Yesus fee raan nandali fo tao ma'asufu Lamatualain rala na. Naa de ia naa, ata 'afi' tamatau tisi' Lamatualain sia Mamana Meumare Manaselin sia sorga. 20 Tasaned'a Kama Meumare Manaseli mbaraa' a! Sia naa, hambu teme loa monae' bambi fo atahori 'afi' mata' reu risi' Lamatualain mata na. Te noo Yesus mamaten, Ana soi dala feu', de atahori bisa 'ola-'ola' roo Lamatualain boe. 21 Lelenan fai, Yesus dad'i agama malangga monaen, mana mete-se'u ma mana linu-afi Lamatualain ume isi na ra. 22 Huu naa dad'i hita hak na, de la'i rala teu fo tandaa ma 'ola' too Lamatualain. Te musi tamahere teb'e noo rala ndoos neu E. Huu Yesus mamaten tao nameu rala ta ra, losa ata nda dud'u'a dala-d'ala de'ulaka' ra sa ena. Boe ma ata musi tasod'a meumare', 'ona' malangga agama mbaraa' ra musi rariu, dei fo rala reu mete-se'u Lamatualain.f
23 La'i fo ata o to'u tahere' basa saa fo hita tataa so'al Lamatualain. Ata musi tamahena E ma sud'i dud'u'a, te dei fo Ana tao tungga hehelu-fufuli na. 24 Ma la'i fo ata sangga dala' fo tao manggatee toronoo atahori mamahere' ra rala na ra, fo 'ona bee, na, basa nggita tatud'u susue' nae-nae noo ue-tao dala malole' mata'-mata'. 25 Huu Au rena atahori ruma nda nau ra'ab'ue roo toronoo atahori mamahere' ra sa ena. Te 'afi' ta'o naa! Hei musi mi'ib'ue fo esa tao manggatee esa rala na. Lelenan fai, Lamatualain fai neneman sangga losa ena. Fee nesenened'a' neu se ta'o naa!
26 Toronoo susue ngga ra, e! Ata tahine lutu'-lelo' Lamatua' Yesus dala ndoo-tetun ena. Te mete ma tasad'ea hela Yesus, ma 'aka' tao sala-kilu' takandoo 'a, na, sosoan nae, nda 'afi' hambu tutunu-hohotu' laen sa ena fo 'ose hendi sala-kilu ta ra. 27 Hita tahani noo 'a nemetaus, huu Lamatualain nema fee huku-d'oki' neu nggita. Huu ai naraka fo mana mbila manaseli' a nenesad'ia' ena fo nalutu basa atahori mana lab'an E.g 28 Fe'esa'an, mete ma hambu atahori esa nda simbo ba'i Musa hohoro-lalanen sa, ma hambu rua-telu dad'i sakasii, na, atahori mana tao sala-kilu' naa musi nenehukun mate, ma nda hambu ambon sa ena.h 29 Te ia naa, mete ma atahori ra'amuti Lamatualain Anan, naa 'ona' ana nae naloe-nad'ae Yesus raan, fo Ana na'andandali' ena fo tao nameu atahori naa. Ma ana nda taoafi' neu Lamatualain hehelu-fufulin, fo Ana hengge-nee noo atahori naa nendi' raa na. Ma ana o tao namanasa Lamatualain Dula-d'alen, fo mana natud'u rala malolen fee neu atahori ra. Du'a neu' ena! Atahori mata' ia ra dei fo lemba-rasaa huku-d'oki' beran lena' mia atahori nda mana simbo ba'i Musa hohoro-lalanen sa.i 30 Lamatualain 'ola' nita nae,
“Au 'u'ena hak, fo bala-b'ae atahori ra de'ulaka na ra.
Ma dei fo Au tao tungga ta'o naa.”
Ma nenesura' fai nae,
“Lamatualain naa, mana na'ena hak parenda basa' e.
Dei fo Ana hukun atahori na ra.”j
31 Misined'a te Lamatualain nasod'a nakandoo! Dei fo atahori nggengge'er, mete ma Lamatualain humu nala se ena!
32 Hei musi misined'a lele' hei fe'e na mihine so'al Kristus, dud'u'a ma ra dad'i meu'. Huu lele' naa, 'ona' mae hei hambu doid'oso' ma susa-sona' nae' o hei mi'itataa' ma mimihere mikindoo neu Kristus. 33 Hambu atahori ra'amuti, ma ra'amamae' nggi sia atahori hetar mata na. Ma mete ma atahori ra'amuti ma ra'amamae' hei toronoo atahori mamahere ma ra, na, hei tulu-fali se. 34 Hei kasian ma mitud'u rala malole ma ra neu atahori mana sia bui rala ra. Mete ma atahori ramana'o rendi sud'i 'a saa ma ra, na, hei simbo noo rala nemeho'ot, huu hei bub'ulu' mae, dei fo hei simbo saa-saa fo malolen lena', ma atahori nda bisa ramana'o rala sa. 35 Naa de hei musi to'u mihere' nemehere ma ra. Te dei fo Lamatualain bala-b'ae nae' lena' neu nggi. 36 Dad'i mi'itataa'! Te mete ma hei tao tungga mikindoo Lamatualain hihii-nanaun, na, dei fo ama simbo basa saa fo Ana helu-fuli nae fee nggi' a. 37 Lamatualain mana 'ola-'ola na ra sura' so'al Atahori mana nae nema' a nae,
“Nda doo sa, te Atahori mana nae nema' a, sou nema ena.
'Afi' male-ma'a, te Ana nda nahani sa.
38 Atahori fo ralan ndoos,
dei fo hambu masoi-masod'a',
huu namahere neu Au.
Te mete ma hambu ruma dinggo' hela Au,
na, rala ngga nda namaho'o sa.”k
39 Hita nda atahori mana namatau de lao hela nemehere ta ra sa. Huu atahori mata' naa, dei fo ara saranggaa mia E. Te huu hita, atahori mana to'u tahere' nemehere' ta ra. Naa de hita hambu masoi-masod'a' takandoo 'a.