3 Hambu teme bab'ambi monae naru' esa doko-d'oko bab'ata kama laen esa fo ara ro'e rae, Lamatualain Kama Meumare Manaseli na.^b 4 Sia teme bab'ambi' a mata', hambu mei lilo' esa, fo ded'e kamanyan ma'ameni' fee neu Lamatualain. Ma sia Kama Meumare Manaseli' a rala, hambu peti lilo' esa sia naa, fo ara ro'e rae, Peti Hehelu-fufuli'. Sia peti a rala, ara mbed'a' sud'i 'a saa mia fai ulu' a fo dad'i nesenened'a' neu atahori so'al Lamatualain hehelu-fufulin, fo Ana hengge-nee noo se' a. Sia naa hambu tofles lilo' esa, ara mbed'a' roti manna sia rala. Roti naa, roti fo dalahulun Lamatualain na'onda' mia lalai, fee bei-ba'i ta ra lele' ara ndoe mia lenu-loa' a. Sia peti naa o hambu ba'i Harun tetea meton boe, fo dalahulun ana nambetu. Boe ma hambu fatu beb'ela' boe fo lele ulu' a Lamatualain pake fo dud'ula hohoro-lalanen fee neu ba'i Musa.^c 5 Sia peti a tatanan hambu paton manaseli' rua. Paton naa ra mata-ao na ra 'ona' Lamatualain ate malid'a na ra mia sorga, mana rambarii' rakambembela lid'a na ra fo bab'ata rala peti a, huu mamana' naa natud'u Lamatualain rala kasian na neu atahori. Te ia lele' ia , au nda ka'e 'ala fo 'ola' losa lutu'-lelo' sud'i 'a saa naa ra sa.^d

6 Mema' ara biasa mbed'a'-nggao sud'i 'a saa ra sia Lamatualain Ume Lalaat Hule-o'en, ta'o naa. Basa fo malangga agama ra dea-rala tungga fai sia kama mata' a fo ralalao ue-tatao na ra sia naa.^e 7 Te 'aka' agama Yahud'i malangga monaen bole rala neu nisi' Lamatualain Kama Meumare Manaseli na. Ma nda rala neu sud'i 'a fai' saa sa, te too esa na rala neu lao esa 'a. Mete ma ana rala neu, ana musi nendi banda tutunu-hohotu' raan, fo bib'irus neu Peti Hehelu-fufuli' a tatana na. Raa' naa sosoan, naa fo Lamatualain 'ose hendi malangga agama noo basa atahori ra sala-kilu na ra, 'ona' mae sala' fo ara tao' te nda rita' rae sala' sa boe.^f

8 Lamatualain nanori nggita nendi' Dula-d'ale Meumaren ena nae, mete ma teme bab'ambi' a fe'e bab'ata dala' mana nisi' Kama Meumare Manaseli' a, sosoan nae, atahori nda fe'e bisa rala reu risi' Lamatualain matan sa, mete ma hohoro-lalane mbaraa' ra fe'e sia. 9 Huu basa naa ra dad'i conto Lamatualain Dula-d'alen, fo nanori nggita mana hambu masod'a' 'ale' ia. Dalahulun, bei-ba'i ta ra rendi banda tutunu-hohotu' fee neu malangga agama, fo Lamatualain 'ose hendi sala-kilu na ra. 'Ona' mae rendi tutunu-hohotu' naen seli o, tutunu-hohotu' naa ra nda bisa tao fee rala na ra dad'i meumare' sa, ma nda bisa tao namopo' sira dud'u'an rae sira tao sala' sa. 10 Dad'i saa fo ara tao' naa ra, tungga 'aka' hohoro-lalane agama. Hambu hohoro-lalane' parenda 'oi, 'afi' raa ia, ma 'afi' rinu naa. Hambu hohoro-lalane' ruma rae, ara musi rameu ao na ra ma sud'i 'a saa na ra tungga hohoro-lalane' hihii-nanau na. Tao-tao te, basa hohoro-lalane' ra ralalau atahori tungga 'aka' ao-sisi 'a, te nda bisa ralalau atahori rala dud'u'a na ra sa. 'Ona' naa o, hohoro-lalane' naa ra musi lao' rakandoo boe, losa Lamatualain nggati se noo hohoro-lalane feu'.

11 Te 'ale' ia, hambu Atahori esa ena, fo Lamatualain helu-fuli mema' mia lele' ulu' a. Eni ia, Kristus. Ana nema fo dad'i hita agama malangga monaen, ma Ana tao dala malole' fee nggita ena.^g Ana nalalao ue-tataon, 'ona' malangga agama mbaraa' a, te Ana ue-tao sia mamana hule-o'e manaseli' teb'e. Mamana hule-o'en naa, nda sia raefafo' ia sa, huu atahori nda tao mamana' naa sa. 12 Kristus o maso' nisi' Kama Meumare Manaseli' naa boe, fo nandaa noo Lamatualain 'ona' agama Yahud'i malangga monaen mbaraa' ra, tao too esa na lao esa. Lele' Ana rala neu, Ana o nendi raa' fee Lamatualain boe. Te nda 'ona esa' sa. Huu Kristus nda nendi raa' mia banda tutunu-hohotu' ra sa. Ana nendi' naa, Eni raan, huu Ana mate ena fo dad'i tutunu-hohotu' fee nggita. 'Aka' na Kristus nendi raan lao esa 'a fo tao nggita nenembo'it mia sala-kilu ta ra, losa doo ndu'u-d'oo na.

13 Dad'i Kristus raan naa, mema' manaseli' lena' banda tutunu-hohotu' ra raa na. Tungga ba'i Musa hohoro-lalane na ra, atahori mana tao sala' ra, manggenggeo' ma nda randaa maso' be'utee neu Lamatualain sa. Ara musi risi' malangga agama ra fo tao tutunu-hohotu', naa fo tutunu-hohotu' a raan tao nemeu bali' se. Tutunu-hohotu' nae' ro'e bib'i hiek raan noo sapi raa na. Hambu hohoro-lalane' esa nae, mete ma atahori kois atahori mates, na, eni manggenggeo' sia Lamatualain matan ena. De mete ma atahori naa nae dad'i meu' bali', na, malangga agama musi ha'i afu mia sapi tena nenetunu' a, fo neu mbori neu atahori manggenggeo' naa, naa fo ana dad'i meu' bali'.^h

14 Naa! Mete ma banda raa' bisa tao nameu atahori ao-sisin mana manggenggeo', na, lelenan fai Kristus raan! Huu raan naa tao nggita nenembo'i' mia sala-kilu' ra, boe ma tao nameu rala dud'u'a ta ra. Huu sala-kilu ta ra tao fee nggita saranggaa too Lamatualain. Lele' Kristus mate boe ma, Lamatualain Dula-d'alen fo mana nasod'a nakandoo 'a, tulu-fali E fo fee aon neu Lamatualain, 'ona' banda tutunu-hohotu' nda mana koa-kaki' mbei sa boe. De ia naa, hita bisa be'utee noo matetu' neu Lamatualain mana nasod'a losa bab'asa na.

15 Huu Kristus raan manaseli' naa, naeni de Lamatualain pake E, fo nalalao hehelu-fufuli feu' fee neu basa atahori fo Lamatualain no'e se dad'i atahori na. Huu lele' Kristus mate fo fee atahori masoi-masod'a', Ana o soi-tefa nala bei-ba'i ta ra mia sala-kilu' fo ara tao dalahulun naa, lele' Lamatualain hengge-nee hehelu-fufuli mbaraa' noo se. Huu naa, de ara bisa rasod'a rakandoo roo Lamatualain.

16 Au pake conto 'ona' atahori simbo pusaka, 'ona' ama' esa sura' susura hengge-nee' fo fee pusaka neu ana na ra. Te 'ana' naa fe'e na bisa to'u nala pusaka naa, lele' aman mate nese ena. 17 Te mete ma ama' naa fe'e masod'a', na, anan nda fe'e bisa simbo nala pusaka fo aman hengge-nee sia susura naa sa. 18 'Ona' naa boe Lamatualain hehelu-fufuli fefeun fo Ana hengge-nee noo bei-ba'i ta ra. Ara fe'e na simbo rala saa fo Lamatualain helu-fuli' naa, mete ma esa mate na'ahulu' ena. Naeni de ara tunu-hotu rendi' banda raa' fo dad'i bukti rae hambu esa mate ena. 19 Lele' naa, ba'i Musa na'ab'ue nala bei-ba'i ta ra, de nafad'e neu se basa parenda' mana sia hohoro-lalane' fo Lamatualain na'onda' ra. Basa naa de, ba'i Musa tati-mbau sapi ma hiek, fo ha'i nala raa na ra, de sambor noo oe. Ana o pa'a hau roo lutu' a danan nendi' tali mbilas. Basa ma ana boro' e neu raa', dei de ana bib'irus neu Lamatualain Susuran ata, ma neu basa rauinggu ra.ⁱ 20 Lele' ba'i Musa bib'irus raa' a, ana 'ola' nae, “Raa' ia, dad'i tatanda' 'oi, Lamatualain hengge-nee hehelu-fufulin noo nggi ena. De mete ma ama tao tungga basa Eni parenda na ra, na, dei fo Eni fee basa saa fo nenehelu-fuli' naa ra.”^j 21 Ba'i Musa o bib'irus raa' a neu Ume Lalaat Hule-o'e' a, noo basa sud'i 'a saa mana sia naa ra fo ara pake be'utee neu Lamatualain.^k 22 Te tungga Lamatualain hohoro-lalanen, basa sud'i 'a saa mana manggenggeo', musi tao nemeu se nendi' raa'. Huu naa, de mete ma atahori nau dad'i meu' mia basa sala na ra, na, musi hambu tutunu-hohotu' a raan dei.^l

23 Saa fo au dui' a so'al bei-ba'i ta ra roo Ume Lalaat Hule-o'en naa, basa naa ra dad'i 'a conto, naa fo tahine Lamatualain Ume Hule-o'e matetun sia sorga. Huu mete ma malangga agama mbaraa' nae Ume Lalaat rala neu fo be'utee neu Lamatualain, ara musi tao rameu basa-b'asa' e dei, rendi' banda tutunu-hohotu' raa na. Lamatualain mamana hule-o'en sia sorga o musi meu' boe. Te huu musi pake raa tutunu-hohotu' manaseli' lena' banda raa'. 24 Kama Meumare manaseli' fo Kristus rala neu' a, nda kama Ume Lalaat Hule-o'e' fo atahori tao' a sa. Ume Lalaat mana sia raefafo' ia, naa dad'i 'a conto mia matetu na. Te Kristus sorga rala neu fo nasala'e nggita sia Lamatualain mata na. 25 Dalahulun agama Yahud'i malangga monaen musi rala neu nasafafali tungga too sia Kama Meumare manaseli' a, nendi banda tutunu-hohotu' a raan neu Lamatualain. Te Kristus nda ta'o naa sa. Eni parluu rala neu lao 'aka' esa' a, ma nendi Eni raa na. 26 Huu mete ma Ana musi rala neu tungga too 'ona' agama Yahud'i malangga monaen mbaraa' ra, na, sosoan nae, Eni musi mate nasafafali, eni' a mia ne'ed'ad'ad'i' raefafo' ia losa lele' ia, naa fo Ana 'ose hendi atahori esa-esa' sala-kilu na ra. Te Ana nda tao ta'o naa sa. Te nandaa noo fai na, Ana mate dad'i tutunu-hohotu' 'aka' lao esa 'a, fo nggari hendi basa sala' fo atahori tao' ra. 27 Matetun, atahori o mate lao 'a esa 'a boe. Te basa naa, ana musi neu nisi' Lamatualain matan fo Lamatualain paresa' e. 28 Kristus o 'ona' naa boe. Ana mate ma fee aon dad'i tutunu-hohotu' lao esa 'a. Dei fo Ana bali' nema. Te Ana nda taoafi' neu atahori sala-kilu na ra sa ena, huu Ana tao natetu ue-tataon ena. Te saa fo Ana nae tao mata' neu' a, naeni Ana nae fee masoi-masod'a' neu basa atahori mana ramahena neu Eni.^m